UEFA përgënjeshtron gjithçka, komunikatë e ashpër kundër Super League
Shtëpia më e madhe e futbollit në Evropë, UEFA, ka lëshuar një komunikatë për medie.
Mbrëmë raportohej se Ceferin është dorëzuar para projektit të European Super League, dhe më pas Agnelli lëshoi një komunikatë në emër të ESL.
Megjithatë, sot ka ardhur reagimi i UEFA. Aty thuhet se do të vazhdohet të merren të gjitha masat e nevojshme për të parandaluar projektin e Super League.
“Parë njoftimin e djeshëm të ashtuquajturës Super League dhe masave që UEFA ka marrë, UEFA riafirmon pikëpamjen e saj që ka vepruar gjithmonë në përputhje jo vetëm me Statutet dhe Rregulloret e saj, por edhe me ligjin e BE-së, Konventës për të Drejtat e Njeriut dhe ligjit zviceran në lidhje me këtë projekt të ashtuquajtur ‘Super League’. UEFA mbetet me besimin – dhe do të vazhdojë të mbrojë – pozicionin e saj në të gjitha juridiksionet përkatëse”, thuhet në komunikatën e UEFA, transmeton Periskopi.
“UEFA ka vepruar gjithmonë me mirëbesim gjatë gjithë procedurave që janë në pritje para Gjykatës në Madrid. Në përputhje me rrethanat dhe pavarësisht se UEFA nuk e njeh juridiksionin e Gjykatës në Madrid dhe beson me vendosmëri se ajo ka vepruar gjithmonë në përputhje të plotë me procedurat në pritje – UEFA sot ka bërë parashtrime zyrtare në Gjykatën në Madrid duke evidentuar pajtueshmërinë e saj të vazhdueshme me urdhrat”, thuhet tutje.
“Përveç kësaj, UEFA ka paraqitur një mocion për përjashtimin e gjyqtarit që kryeson procedurat aktuale pasi beson se ka parregullsi të rëndësishme në këto procedura. Në përputhje me ligjin spanjoll – dhe në interesat themelore të drejtësisë – UEFA pret që gjyqtari në fjalë të qëndrojë menjëherë mënjanë në pritje të shqyrtimit të plotë dhe të duhur të këtij mocioni.”
“Tutje, UEFA gjithashtu do të bëjë një apel zyrtar në një gjykatë më të lartë, Gjykatën e Apelit në Madrid.”
“UEFA do të vazhdojë të ndërmarrë të gjitha hapat e nevojshëm, në përputhje të rreptë me ligjet kombëtare dhe ligjet e BE-së, në mënyrë që të mbrojë interesat e saj dhe – më e rëndësishmja – ato të anëtarëve të saj dhe të gjithë akterëve të futbollit”, thuhet në komunikatë. /Periskopi/
