Besnik Hasi shumë i shtrenjtë për Kosovën: Merr miliona në Arabi Saudite

Bernard Challandes – trajneri i Kosovës dhe agjenti i Baselit – shpresohet nga shumë kosovarë se do ta humbas punën e parë të tij. Kjo për shkak të rezultateve të tmerrshme dhe lojërave të dobëta të Kombëtares. Por, pasardhësi i tij i parë i përmendur, Besnik Hasi del të jetë “pak i shtrenjtë” për buxhetin tonë.

Besnik Hasi është një ish futbollist i famshëm që ka luajtur për Kombëtaren e Shqipërisë, dhe ndër shumë ekipe tjera edhe për Anderlechtin në Belgjikë.

Ai bëri edhe karrierë prej trajneri për Anderlechtin, kur ia doli që për një kohë të shkurtër të bëhej kampion i Belgjikës dhe të fitonte Superkupën e këtij shteti.

Karriera e tij si trajner ka disa ngritje e disa ulje. Pasi u bë kampion me Anderlechtin më 10 mars 2014, ai përjetoi një seri rezultatesh zhgënjeyese dhe u shkarkua pas dy vitesh e dy muajsh, më 26 maj të 2016-s.

Anderlechti mbetet eksperienca e tij më e rëndësishme si trajner, pasi këtë ekip e ka menaxhuar për 119 ndeshje gjithsej.

Më pas, ai u emërua trajner i skuadrës polake Legia Warszawa, ku qëndroi për pak më shumë se tre muaj. Këtë skuadër e udhëhoqi për vetëm 18 ndeshje.

Një tjetër zhgënjim ishte edhe Olympiacosi, kampioni gati i përhershëm i Greqisë. Por, ja që Hasit nuk ia deshi as në këtë klub te i cili po ashtu qëndroi për pak më shumë se tre muaj. Ai ishte në krye të skuadrës greke për vetëm 11 ndeshje.

Por, që nga 26 korriku i 2018-s, Hasi nuk ka lëvizur më. Ai është trajner i skuadrës saudite Al-Raed, dhe në korrikun e vitit të kaluar e ka rinovuar kontratën.

Hasi deri tash ka qenë në krye të këtij ekipi për 90 ndeshje, dhe nuk ka një mesatare aq të mirë fitoresh.

Paga e tij te klubi Al-Raed mendohet të jetë afër 1 milionë euro në vit. Te Olympiacosi ai kishte nënshkruar kontratë me 600 mijë euro në vit.

Këto janë shifra të cilat Kosova nuk do të kishte mundësi që t’i paguante. Trajneri Bernard Challandes paguhet nga 300 mijë frangë në vit, por të cilit i është lejuar që të mbajë edhe një punë tjetër. /Periskopi