“Kështu eliminohemi nga Sevilla”, Haaland ‘shkund’ Dortmund

Sevilla dhe Dortmund luajnë duelin e parë mes tyre të mërkurën në mbrëmje. Kalimi në çerekfinalet e Champions është një objektiv i të dy skuadrave dhe pritet spektakël dhe gola në të dy ndeshjet.

Verdhezinjtë gjermanë nuk po kalojnë një formë të mirë dhe renditen në vend të gjashtë në Bundesligë. Vetëm një fitore në gjashtë ndeshjet e fundit në kampionat, ecuri që ka mërzitur disi bomberin Erling Haaland.

“Nëse luajmë si në ndeshjet e fundit, nuk kemi shanse për të eliminuar Sevillan. Duhet t’i rikthejmë energjinë pozitive ambientit që na rrethon, duhet ta bëjmë sa më shpejt të jetë e mundur. Trajneri ka një plan dhe ne duhet ta ndjekim atë.

Ai beson te ne dhe duhet të ndjekim udhëzimet e tij për t’u kthyer te fitorja. Zbresim në fushë me një plan të qartë dhe gjatë ndeshjes nuk duhet të harrojmë të bëjmë atë që kemi vendosur të bëjmë.

Champions? Është diçka e veçantë të luaj në këtë kompeticion me Dortmund. Shpresoj që t’ia dalim të kualifikohemi në raundin tjetër. Ia dalim nëse japim 100% nga vetja“, deklaron sulmuesi 20-vjeçar.