Sherri Conte-Agnelli shkon në prokurori, të dy rrezikojnë shumë?

Ashtu si zënka mes Zlatan Ibrahimovic dhe Romelu Lukakut edhe konfrontimi në distancë mes Antonio Contes dhe presidentit të Juventusit, Andrea Agnelli, mund të hetohet nga prokuroria e Federatës italiane të Futbollit e cila mund të marrë masa duke dënuar dy protagonistët.

Megjithatë gjithçka rreth kësaj çështjeje do të varet nga raporti i gjyqtarit të 4-t i cili ka parë gjithçka nga afër.

Në rast se ai e ka vendosur në raportin e ndeshjes, FIGC pritet të nisë këtë të enjte shqyrtimin e çështjes për të dalë në një vendim përfundimtar, që varion nga paralajmërimi, deri në pezullim për disa ndeshje, diçka që do i rëndonte më shumë Contes.

Nga ajo që dëgjoi gjyqtari i katërt javë më parë u dënuan Paratici dhe Nedved.

Në rast se gjyqtari vendos të mos e rendisë në protokoll këtë çështje, prokurori i FIGC ka të drejtë të ndërhyjë për një shtesë të mëtejshme të hetimeve.

Për gishtin e mesit që i drejtoi Agnellit, ku u kap edhe nga kamerat, Antonio Conte rrezikon shumë, pasi ndryshe nga ajo e Agnellit mungesa e tij mund të ndihet më tepër.