Studimi: Ditët para dhe pas Hënës së Plotë janë të këqija për gjumin

Populli i ka vënë hënës një varg përgjegjësish të mëdha: disponimin e njerëzve, rritjen e krimeve apo edhe psikozat. Por a mundet “efekti hënor” të ndërhyjë edhe në gjumin tonë?

Shkencëtarët tash e një kohë e kanë kuptuar që aktiviteti njerëzor fascilitohet nga drita, qoftë ajo e diellit, qoftë ajo e hënës, qoftë ajo artificiale. Por, një studim tash po sugjeron se aftësia jonë për të fjetur është në mënyrë të qartë e ndikueshme nga cikli hënor, madje edhe kur merren parasysh burimet artificiale të dritës.

Duke përdorur monitorë dore, hulumtuesit gjurmuan në tiparet e gjumit të 98 individëve që jetonin në tri komunitete indigjene në Argjentinë përgjatë një apo dy muajve. Njëri komunitet rural nuk kishte fare qasje elektrike, tjetri kishte qasje të limituar elektrike, ndërsa i treti ishte në një vendbanim urban me qasje të plotë në elektricitet, raporton Guardian, përkthen në shqip Periskopi.

Pjesëmarrësit në të tria komunitetet kishin shfaqur të njëjtin model të prishjeve të gjumit derisa hëna përparonte në cilin e saj prej 29,5 ditëve, me gjumin që ndryshonte nga 20 deri në 90 minuta, dhe me kohën e gjumit që ndryshonte nga 30 e deri në 80 minuta.

Në secilin komunitet, kulmi i pagjumësisë dhe i qëndrimit zgjuar natën vonë ndodhte në periudhën prej tre deri në pesë ditë para se të ndodhnin netët e hënës së plotë, dhe e kundërta ndodhte me netët që e paraprinin hënën e re.

Të dhënat ishin mjaft befasuese, sepse pritja fillestare ishte që do të kishte më pak gjumë dhe më shumë aktivitet në netët me hënë të plotë, tha autori i studimit Horacio de la Iglesia, profesor i biologjisë në Universitetin e Washingtonit.

Jobefasisht, të dhënat shfaqnin se efekti hënor në gjumë paraqitej më i fortë sa më pak elektricitet të kishte komuniteti. /Periskopi