Rreziqet, mjekët etj: ’10 gjëra që do doja t’i dija para se të bëja ‘lip fillers’ (mbushës buzësh)
Blogerja e famshme Huda Kattan tregon disa fakte që do donte t’i kishte ditur përpara se të vendoste fillers në buzë për të shtuar volumin e tyre.
Nga puna me disa nga kirurgët dhe estetistët më të mirë plastikë në botë, ajo nxjerr këto përfundime:
#1 – Hulumtoni mjekun
Përvoja e parë e blogeres me buzët ishte e tmerrshme. Ajo përfundoi me mbushës në të gjitha zonat e gabuara dhe me buzë asimetrike.
“Ju lutem mësoni nga gabimi im. Bëni kërkimet tuaja për disa mjekë dhe zgjidhni më të mirin për ju. Lexoni “reviews”, studioni punët e tyre nga fotografitë dhe ç’është më e rëndësishmja, sigurohuni që të shkoni te një mjek i certifikuar për të kryer procedurën që ju kërkoni.
#2 – Merreni ngadalë!
Kur bëhet fjalë për mbushësit, bëhuni pjesë e një procesi gradual dhe shmangni buzët tepër të fryra, për të cilat më pas mund të pendoheni.
Disa kirurgë ju lejojnë të përdorni gjysmën e shiringës dhe të ktheheni disa javë më vonë për pjesën tjetër, nëse vendosni se kjo është ajo që dëshironi.
Mos harroni se ka pak enjtje nga procedura, kështu që duhet të prisni disa ditë deri në një javë, për të parë rezultatet përfundimtare.
#3 – Duhet ta mendoni seriozisht: Sa të fryra i dua?
Merrni gjithë kohën që ju duhet për të kuptuar se si i doni buzët tuaja.
Disa duan buzë shumë të fryra, disa i duan “më natyrale”, disa duan që buza e sipërme të jetë më e madhe etj.
Në varësi të buzëve që ju doni, ndryshon dhe teknika që mjeku përdor, prandaj duhet ta keni sa më të qartë se çfarë doni të arrini.
#4 – Përgatituni përpara takimit/konsultës suaj
Javën para takimit tuaj, nuk duhet të merrni aspirinë, anti-inflamatorë (si Ibuprofen ose Aleve), vaj peshku, multivitamina ose vitaminë E. Secila nga këto vitamina ose ilaçe do ju hollojë gjakun dhe mund të shkaktojë mavijosje pas vendosjes së mbushësit.
Kjo është arsyeja pse është gjithashtu më mirë të shmangni alkoolin ose kafeinën 24 orë para dhe pas takimit tuaj, pasi kjo do ndihmojë në uljen e enjtjes.
Nëse jeni në konsultë, sigurohuni të keni disa pyetje për të cilat doni përgjigje. Një mjek i mirë, i ka të gjitha përgjigjet.
#5 – Zgjidhni me kujdes llojin e mbushësit dhe se sa doni
Sot ka shumë variacione për fillers: Lloji më i zakonshëm është mbushësi i acidit hialuronik si Juvederm dhe Restylane.
Mjeku juaj do e dijë se cila është më e mira, në varësi të llojit të pamjes që ju doni të arrini.
Sasia e zakonshme e mbushësit për seancë është një shiringë, e cila shpesh është 1 ml.
#6 – Procedura është super e shpejtë dhe rezultatet janë pothuajse të menjëhershme
Huda thotë se takimi zgjat vetëm një orë, por pjesa më e madhe kalon duke biseduar me mjekun.
Prisni pak mavijosje dhe një enjtje jo shumë problematike, që ulet pas disa ditësh. Pas takimit, mund të mbani pak akull në buzë për të ndihmuar enjtjen.
#7 – Shamngeni kremin e mpirjes, nëse mund ta duroni dhimbjen
Një krem mpirës aplikohet para se të futet mbushësi për të ndihmuar në përballimin e dhimbjes.
“Më besoni, është e dhimbshme, sidomos në zonën Cupid të buzëve, por ka edhe shumë njerëz të cilët nuk e shohin si shumë të rëndë dhimbjen dhe nuk preferojnë as kremin mpirës.”
#8 – Kuptoni rreziqet e mbushësve
Ndoshta për faktin se është një procedurë e shpejtë, njerëzit mendojnë se nuk ka asnjë rrezik, por jo domosdoshmërisht.
Ekziston mundësia për një reaksion alergjik, që mund të çojë në një infeksion.
Nëse jeni të prirur të ftoheni shpejt, mbushësit mund ta shkaktojnë diçka të tillë, kështu që ju mund të merrni ca ilaçe tre ditë para trajtimit, gjithnjë nën këshillimin e mjekut.
#9 – Mbushësit nuk janë të lirë!
Lip fillers nuk kushtojnë pak. Për më tepër, nëse i aplikoni rregullisht, shpenzimi do jetë i vazhdueshëm.
#10 – Mund ta ktheni mbrapsht efektin e mbushësve, nëse u penduat ose s’ju pëlqen më
Nëse vendosni mbushës buzësh me bazë acid hialuronik, që është dhe më i zakonshmi, ju mund ta ktheni mbrapsht procedurën nëpërmjet hialuronidazës, një enzimë që shpejton degradimin e acidit hialuronik, shpejt dhe në mënyrë të sigurt.
