Analist Maliqi: Kush merr vesh e di se Biden po fiton ndaj Trump

Analisti i mirënjohur kosovar, Agon Maliqi, ka bërë një status në profilin e tij në Facebook ku ka deklaruar se Joe Biden po i fiton zgjedhjet presidenciale. 

Në të vërtetë, edhe më tej nuk dihet rezultati në shtetet kyçe të mbetura ndërsa Trump vazhdon të udhëheq.

Sidoqoftë, Maliqi thotë se “në katër shtetet kyçe votat e fundit që u futën në numërim janë ato me postë në qendrat e mëdha urbane të cilat tashmë dihet janë rrreth 70-80% demokrate”, përcjell Periskopi.

Maliqi e konsideron të kryer fitoren e Bidenit në Wisconsin dhe Michigan, megjithëse në Wisconsin epërsia është ende e kthyeshme ndërsa në Michigan udhëheq Trump deri në këto momente sipas AP.

Statusi i plotë: 

Kush ka sy e vesh, merr vesh dhe kupton, se Biden po fiton. E gjithë kjo dramë është rezultat i faktit se në katër shtete kyçe votat e fundit që u futën në numërim janë ato me postë në qendrat e mëdha urbane të cilat tashmë dihet janë rreth 70-80% demokrate. Prandaj edhe Wisconsin dhe Michigan u kthyen me kohë drejt Biden nga ajo që mbrëmë dukej si humbje. Këto të dyja tashmë mjaftojnë për fitore (270). Pennsylvania dhe Georgia vështirë të përmbysen por bujrum.