​Shkencëtarët zbulojnë se si të ngadalësohet plakja biologjike

Gjatë një përpjekje për të rigjeneruar gjëndrën e timusit, studiuesit nga Universiteti i Kalifornisë në Los Anxhelos mund të kenë gjetur një zgjidhje që mund të ngadalësojë procesin e plakjes, dhe madje ta kthejë atë, konfirmon një studim i ri.

Si pjesë e një studimi në Kaliforni, shkencëtarët testuan një koktej me tre ilaçe të zakonshëm – hormonin e rritjes dhe dy ilaçe për diabetin – në një vit, në mënyrë që të stimulonin rigjenerimin e gjëndrës së timusit.

Sidoqoftë, sipas një studimi të botuar në revistën Nature, studiuesit zbuluan se pjesëmarrësit humbën mesatarisht 2.5 vjet në “orën e tyre epigjenetike”, siç matet nga gjurmët e gjeneve të një personi.

“Ne prisnim të ngadalësonim orën biologjike, por jo ta kthenim atë,” tha studiuesi i UCLA Steve Horvat.

“E gjitha duket si diçka futuriste”, thotë Horvat për Nature.

Studiuesit paralajmërojnë se gjetjet janë paraprake, pasi vetëm nëntë pjesëmarrës u përfshinë në studim dhe studimi nuk përfshiu një grup kontrolli, por nëse konfirmohet – ndikimi në kujdesin shëndetësor dhe mundësia e ndikimit në procesin e plakjes mund të jetë i madh.

Ora epigjenetike matet duke regjistruar ndryshimet kimike në strukturën e ADN-së së organizmit. Qëllimi kryesor i studimit ishte të provohej – nëse hormoni i rritjes mund të përdoret për të rigjeneruar indet në gjëndrën e timusit, e cila është thelbësore për funksionin imunitar. Gjëndra fillon të tkurret pas pubertetit.

Studimet e mëparshme kanë treguar se hormoni i rritjes stimulon rigjenerimin e timusit, por gjithashtu mund të shkaktojë diabet, prandaj ilaçet e diabetit përfshihen në studimin e fundit.

Studiuesit ekzaminuan orët epigjenetike tek vullnetarët, duke arritur në përfundimin se katër masat e ndryshme të orëve epigjenetike të secilit prej pjesëmarrësve ndryshuan ndjeshëm gjatë procesit.

“Kjo tregon që efekti biologjik i trajtimit është i fortë,” tha Horvat.

Gjashtë pjesëmarrës dhanë mostra të gjakut gjashtë muaj pas testit, dhe efekti mbeti i njëjtë, gjë që e bëri Horvat shumë optimist për testet në të ardhmen.

Testet do të përfshijnë pjesëmarrës më të ndryshëm sipas moshës, gjinisë dhe kombësisë, dhe tre ilaçet do të testohen në mënyrë të pavarur, për të përcaktuar efektet specifike.