Pse njerëzit po bojkotojnë ‘Mulan’
ersioni live-action i filmit të animuar “Mulan” është tashmë i disponuesëm për të gjithë të abonuarit e Disney+, ndonëse do të duhet të paguajnë afro 30 dollarë nëse duan ta shohin para datës zyrtare të publikimit më 4 dhjetor. Megjithatë në Twitter ka nisur një fushatë për të bojkotuar Mulanin.
E gjitha nisi kur protagonistja e filmit, Liu Yifei, deklaroi mbështetjen për zbatimin e ligjit, pasi policia kineze u akuzua për dhunë ndaj protestuesve pro-demokracisë në vitin 2019 në Hong Kong. “Unë mbështes policinë në Hong Kong. Tani, mund të më sulmoni të gjithë. Çfarë turpi për Hong Kongun,” shkroi ajo në Weibo, një rrjet social kinez. Komentet e saj në 2019-n dolën sërish në sipërfaqe pas publikimit të “Mulan”.
Protestat e Hong Kongut nisën në qershor të 2019-s dhe janë pro-demokracisë, ndryshe nga Kina, e cila po përpiqet të forcojë kontrollin e saj. Shumë njerëz besojnë se forcat policore po kontrollojnë njerëzit që protestojnë dhe po përpiqen të shtypin protestat për demokracinë. Aq më tepër që Liu është shtetase amerikane.
“Mulan është princesha ime e preferuar dhe kam kaq kohë që pres për filmin, por duke marrë parasysh që aktorja protagoniste mbështet policinë, mendoj se s’duhet të paguajmë për këtë,” shkruan një përdoruese në Twitter. “Nëse mbështet të drejtat e njeriut, nëse urren dhunën policore, nëse mendon se artistët, aktorët dhe kompanitë duhet të kenë përgjegjësi sociale, nëse respekton aziatikët, bojkoto Mulan,” shkruan një tjetër.
Producenti i Mulan dhe ekzekutivi i Disney, Jason T. Reed, së fundmi komentoi polemikat rreth filmit. “Epo, mendoj së pari, se është një situatë shumë e komplikuar për njerëzit që jetojnë dhe punojnë në Kinë,” tha ai për Yahoo Finance. “Natyrisht, tensionet midis dy entiteteve janë shumë të komplikuara. Unë nuk jam i kualifikuar për t’i diskutuar ato. Unë jam këtu për të përfaqësuar filmin.”
Një (ish)fans i filmit, ka një tjetër arsye (madhore) pse nuk duhet parë: Nuk shfaqet Mushu.
