Higuain thotë se nuk është pensionuar nga futbolli: Do të vazhdoj të luaj

Gonzalo Higuain ka kundërshtuar pretendimet e bëra nga babai i tij se ai po planifikon të pensionohet si futbollist, duke thënë se ishte një keqkuptim.

Babai i Higuain kishte deklaruar se sulmuesi i Inter Miamit nuk do ta vazhdonte karrierën e tij në Argjentinë dhe përkundrazi do të shkonte në pension.

“Unë nuk e shoh atë të kthehet në Argjentinë. Ai e mbaron këtë vit. Të paktën atë që më tha mua, se po pensionohej. Ai po pensionohet nga sporti” , deklaroi babai i Higuain në një intervistë për TNT Sports.

Megjithatë, realiteti nuk korrespondon me këto pretendime dhe tani vetë Higuain ka deklaruar publikisht se synon të vazhdojë të luajë.

“Ka qenë një keqkuptim që ka pasur me mua, në asnjë moment nuk i kam thënë për pension, është shprehur keq”, është shprehur 34-vjeçari.

“Është diçka që mund të ndodhë, por nuk ka të bëjë me realitetin, jam i fokusuar te klubi dhe te përmbushja e kontratës sime. Kur të vijë koha, nëse do të merret ai vendim, do të jem unë që do ta komunikoj atë, çfarë mund të thotë babai im apo njerëzit e tjerë në këtë rast, nuk ka të bëjë me atë që them unë”, deklaroi ish-sulmuesi i Real Madridit.