nishani-780x439

Nishani dekreton datën e zgjedhjeve, qershor 2017

Presidenti i Republikës, Bujar Nishani ka dekretuar këtë të hënë datën e mbajtjes së zgjedhjeve të ardhshme parlamentare.

Periskopi.com Lajme

Burime nga zyra e shtypit e Presidencës kanë bërë me dije se kreu i shtetit ka caktuar datën 18 qershor 2017.

Në njoftimin e Presidencës saktësohet se, data në fjalë bie ditën e diel dhe se dekreti i Nishanit hyn në fuqi menjëherë. /Top Channel/

unnamed-7-3

KIZ: Shqetësues rasti në vendvotimin në Polluzhë

Koalicioni për Integritet Zgjedhor – KIZ, e vlerëson si shqetësues rastin në qendrën e votimit 0318E /01R – Polluzhë

Periskopi.com Lajme

KIZ ka bërë të ditur vëzhguesi i PDK-së i ka kërkuar të nënshkruhen të gjithë vëzhguesit e pranishëm në këtë vendvotim.

“Koalicioni veprimin e tillë e konsideron si të papranueshëm dhe si formë e presionit ndaj vëzhguesve të pavarur.  Koalicioni njofton opinionin publik që është duke monitoruar të gjitha vendvotimet në Komunën e Drenasit, dhe do ju mbaj të informuar në kohë reale për mbarëvajtjen e procesit zgjedhor në Drenas.”, thuhet në njoftimin e KIZ.  Sipas të dhënave nga monitoruesit e Koalicionit, nga 72 vendvotime 58 janë hapur me kohë, kurse 12 janë hapur me vonesë  prej 10 deri 50 minutash. Në shumicën e vendvotimeve vonesat kanë ardhur për shkak të mungesës së materialit zgjedhor. Vonesat më të mëdha janë identifikuar në këto vendvotime,   Gllobar vendvotimi 0321E/02  është hapur me 50 minuta vonesë, Qikatove e vjetër 0322E/ 02 është hapur me 50 minuta vonesë, Likoshan përkatësisht vendvotimi 0312E, është hapur me 40 minuta vonesë për shkak të mungesës se Kryesuesit të këshillit të vendvotimit, anëtarët tjerë kanë vendosur për hapjen e vendvotimit pa prezencën e kryesuesit”, bëhet e ditur në komunikatën e KIZ.

Ndryshe, rrjeti i OJQ-ve “Koalicioni për Integritet Zgjedhor – KIZ”, ka për qëllim që të promovojë dhe garantojë vlera demokratike që do nxisin zgjedhje të lira, të drejta dhe të barabarta. Ky rrjet përbëhet nga këto organizata jo qeveritare: Çohu, Democracy Plus (D+), Grupi për Studime Juridike dhe Politike (GLPS), Instituti i Kosovës për Drejtësi (IKD), Iniciativa Qytetare në Skenderaj (IQS), Iniciativa për Progres (INPO) dhe Community Building Mitrovica (CBM).

Koalicioni – shfrytëzon rastin që ti bën thirrje të gjithë qytetarëve të Komunës së Drenasit që të dalin në votime, për të ushtruar të drejtën e tyre qytetare dhe Kushtetuese.

KQZ

KQZ: Nëse s’ka fitues në raundin e parë, balotazhi në Drenas mbahet më 1 janar

Komisioni Qendror i Zgjedhjeve dhe Sekretariati i saj, kanë kryer të gjitha obligimet për përgatitjen e një procesi zgjedhor në Drenas.

Periskopi.com Lajme

“Tash jemi në fundin e këtyre përgatitjeve dhe gjithçka ka shkuar sipas planeve tona operacionale dhe nuk ka diçka për të mos u theksuar në kuptimin e mos realizimit”, ka thënë Enis Halimi, kryeshef i sekretariatit të KQZ-së në Tribuna Channel.

Sipas tij, materiali tani gjendet në depot e KQZ-së përfshirë edhe fletëvotimet.

“Lista zgjedhore është tema bosht e një procesi zgjedhor. I kemi disa probleme në kuptimin e cilësisë së listës, por ne kemi bërë gjithçka për ta pasur një listë cilësore, një listë të pastruar”, ka deklaruar Halimi.

Sa i përket akreditimit të vëzhguesve ai ka thënë se nuk ka numër të saktë të tyre sepse afati për akreditim është ende i hapur.

Ligji parasheh që balotazhi të mbahet katër javë pas ditës së votimit në raundin e parë dhe nëse do të këtë balotazh atëherë del se data 1 janar do të jetë dita kur qytetarët e Drenasit, ndonëse festë, do t’i drejtohen edhe njëherë kutive të votimit.

“Ne jemi të përgatitur për çdo proces. Por tani jemi fokusuar vetëm në ruanin e parë”, ka deklaruar Halimi.

sulme6

Aleanca për Shqiptarët: BDI inskenon sulmet, për të akuzuar të tjerët!

Aleanca për Shqiptarët ka reaguar lidhur me thyerjen e shtabit të BDI -së në Sllupçan të komunës së Likovës.

Periskopi.com Lajme

Ku sipas tyre ky incident është i inskenuar me qëllim për të njollosur subjektet tjera politike.

Aleanca për Shqipëtarët vlerëson se BDI shpeshherë i ka përdorur këto truke edhe në zgjedhjet e kaluara, me të vetmin qëllim, për të përfituar politikisht.

“Aleanca për Shqiptarëtdistancohet nga të gjitha tendencat e qëllimshme dhe të paqëllimshme që kanë të bëjnë me incidente të fushatës dhe thyerje të shtabeve zgjedhore.

Njëkohësisht i bën thirrje anëtarësisë dhe mbështetësve partiak që mos bien pre e këtyre provokimeve dhe të jenë të kujdesshëm gjatë gjithë këtij procesi zgjedhor, duke kontribuar për një proces zgjedhor demokratik si dhe duke promovuar vlerat qytetare dhe demokratike të Aleancës për një fushatë të qetë, pa tension dhe pa luftë psikologjike”, theksohet në reagim, duke kërkuar nga BDI që të tërhiqet nga këto manipulime dhe tentime parazgjedhore. “Edhe sikur vërtetë dikush të ju gjuaj me gurrë dhe të Ju thotë se jeni të padëshiruar në vendbanimet tuaja, ajo nuk është faji i Aleancës për shqiptarët”, nënvizohet në reagim./albeu.com/

opozita-fatmiri-visari-ramushi-670x350

Opozita për zgjedhje të dyfishta në pranverë

Kohëve të fundit janë shtuar zërat që vendi mund të shkoj drejt dy palë zgjedhjeve, atyre qendrore dhe lokale, paralelisht në pranverë të vitit të ardhshëm.

Periskopi.com Lajme

Këtë ide po e mbështetin plotësisht, tri partitë opozitare, Lëvizja Vetëvendosje, AAK dhe Nisma për Kosovën, të cilat zgjedhjet i shohin si rrugëdalje të vetme nga gjendja në të cilën ndodhet vendi, shkruan Indeksonline.

Muharrem Nitaj, anëtar i Kryesisë së AAK-së, vlerëson se kërkesa për të shkuar drejt zgjedhjeve, tashmë nuk është vetëm kërkesë e opozitës, por edhe të tjerëve në përgjithësi. Kjo sipas tij, ka ardhur si pasojë e zhvillimeve të fundit politike.

“Çështja e zgjedhjeve të parakohshme apo të jashtëzakonshme, tashmë po shndërrohet në një kërkesë përtej AAK-së, apo opozitës në përgjithësi. Momenti politik dhe zhvillimet e fundit i kanë shtruar si nevojë zgjedhjet. Nëse nuk keni harruar ne fundvitin e shkuar AAK, ka dalë me idenë që vendi të shkojë në zgjedhje të parakohshme, kjo si rrugë për të dalë nga bllokada që dukej që atëherë, por të tjerët na kanë akuzuar se kundërshtimin e dy çështjeve të mëdha, e kishim vetëm për pushtet”, ka thënë Nitaj.

Sipas tij, tani pas një viti Kosova ka ardhur në situatë, kur për zgjedhjet e parakohshme nuk mendon vetëm AAK apo opozita, por kjo ide dhe kërkesë është gjithnjë e më e shprehur edhe nga vetë eksponentë të partive në pushtet.

“Unë besoj se edhe partitë e shumicës, zgjedhjet e parakohshme duhet t’i shohin si një mundësi të rikthimit të një far lloj normaliteti në vend, dhe sot nuk kemi normalitet. Kjo nuk duhet të shihet si agjendë e opozitës, por domosdoshmëri e krijuar nga një situatë pa rrugëdalje. Tani, e mira e së mirës do të ishte që zgjedhjet të mbaheshin menjëherë, por nëse klasa politike e këtij vendi, mund të arrijë një konsenzus që zgjedhjet të mbaheshin edhe në pranverë, kjo do të ishte gjyma e të keqes”, ka theksuar Nitaj për Indeksonline.

Edhe zyrtari për media i Lëvizjes Vetëvendosje, Shkodran Hoti vlerëson se zgjedhjet duhet të mbahen sa më parë, aq më mirë. Madje, ai ka thënë se VV-ja veçse ka filluar përgatitjet në teren, duke u bërë gjithmonë e më e fortë.

“Për ne është jashtëzakonisht urgjente mbajtja e zgjedhjeve dhe kjo duhet të ndodhë sa më parë. Kjo sepse shtetin nuk mund ta drejtojë tutje një qeveri e cila punon në kundërshtim me vullnetin e popullit, e cila është e kriminalizuar dhe të cilës i ka humbur legjitimiteti. Ne ka kohë që kërkojmë zgjedhjet dhe mendojmë që sa më shumë vonohet mbajtja e tyre, aq më shumë stërkeqet vendi, prandaj do të duhej që pranvera e 2017’së ta gjente Kosovën me një qeveri të re”, ka thënë Hoti për Indeksonline.

Ndërsa sa i përket zgjedhjeve lokale, Hoti ka shtuar se edhe në nivel lokal, në shumicën e komunave gjendja është e rëndë sepse udhëheqin këto parti dhe kanë model të njëjtë. Megjithatë, sipas tij,  prioritare dhe urgjente janë zgjedhjet e përgjithshme, ngase është i nevojshëm një ndryshim rrënjësor në qendër.

“Por, sidoqoftë, ne jemi duke u forcuar në terren dhe VV është më e fuqishme se kurrë më parë. Paralelisht me shtrirjen e madhe në terren jemi në përgatitje edhe për proceset zgjedhore”, ka thënë tutje Hoti.

Partia tjetër opozitare, Nisma për Kosovën mbështet mbajtjen e zgjedhjeve sa më parë që është e mundur. Bilall Sherifi, anëtar i Kryesisë së Nisma-s ka thënë për Indeksonline se meqë asgjë nuk po bëhet si duhet në Kosovë, zgjedhjet janë zgjidhja e vetme.

“Duke e parë që në vend asgjë nuk është duke u bërë sikur që duhet, atëherë rëndësi ka që zgjedhjet të mbahen sa më shpejt qoftë menjëherë brenda 45 dite, qoftë në pranverë”, ka thënë shkurt Sherifi. /Indeksonline/

Greg Delawie

Intervistë ekskluzive: Delawie thotë se ShBA nuk ndryshon politikën ndaj Kosovës as me Trumpin

Ambasadori i Shteteve të Bashkuara të Amerikës në Kosovë, Greg Delawie, në një intervistë ekskluzive për Periskopi.com flet për vdekjen e Astrit Deharit, për zgjedhjet në ShBA dhe ndryshimin e mundshëm të marrëdhëniet mes këtyre dy vendeve pas zgjedhjes së Donald Trump si president, flet për zgjedhjet e parakohshme në Kosovë dhe shumë të tjera.

Shpend Gudaqi Intervista

Gjatë intervistës ka thënë se vdekjet në mbajtje janë gjithmonë shqetësuese dhe se mirëpresin përfshirjen e vëzhguesve të pavarur në rastin e Astrit Deharit.

Thotë se takohen me secilin subjekt politik në Kosovë, por që nuk preferojnë dhunën dhe nuk takohen me individë që ushtrojnë atë apo promovojnë.

Delawie për Periskopi.com thotë se politika e ShBA-së lidhur me Kosovën nuk pret të ndryshoj pas zgjedhjet se Trumpit.

Ka folur edhe zgjedhjet e parakohshme në Kosovë që po diskutohen që disa kohë, e Delawie thotë se pavarësisht kur do mbahen, Qeveria nuk duhet ndalur së punuari.

Greg Delawie

Periskopi: Kemi hyrë në javën e tretë dhe mospajtimet për rastin e aktivistit të VV-së, Astrit Dehari, që vdiq në Qendrën e Paraburgimit në Prizren vazhdojnë ende. U kontestua edhe rezultati i autopsisë; u kërkua edhe një hetim ndërkombëtar nga Ambasada Britanike, por s’ka ende përgjigje. Si e shihni ju zoti Delawie zgjidhjen e kësaj situate?

Delawie: Ambasada ka mirëpritur përfshirjen e vëzhguesve të pavarur në hetim nga Ministria e Drejtësisë që nga fillimi. Vdekjet në mbajtje janë gjithmonë shqetësuese dhe ne jemi të inkurajuar nga fakti se Ministria e Drejtësisë është duke i adresuar çështjet që kanë dalë në pah nga ky rast në mënyrë që të parandalohen tragjeditë në të ardhmen.

Periskopi: A mban ambasada amerikane kontakte me Lëvizjen Vetëvendosje – dhe çfarë bashkëpunimi ka?

Delawie: Stafi nga Ambasada takohet me çdo parti politike në Kosovë për të diskutuar çështje të shumëllojshme lidhur me politikat dhe prioritetet. Sidoqoftë, ne nuk takohemi me individë që marrin pjesë në dhunë apo e promovojnë atë si mjet për të bërë deklaratë politike, apo me ata që janë paditur apo dënuar për korrupsion. Qëndrimi ynë lidhur me këto dy çështje ka qenë shumë i qartë.

Periskopi: Përfliten shume zgjedhjet e parakohshme si mënyrë e të dalurit nga papajtueshmëria e madhe politike për çështje të ndryshme në Kosovë? A mendoni ju zoti Delawie që duhet shkuar në zgjedhje?

Delawie: Diskutimet lidhur me zgjedhjet e parakohshme nuk duhet të shpërqendrojnë nga puna e rëndësishme që qeveria duhet të vazhdojë të bëjë lidhur me çështjet për të cilat brengosen njerëzit e Kosovës, siç janë miratimi i një buxheti të qëndrueshëm, punësimi i profesionistëve të kualifikuar për pozita kritike në qeveri, zhvillimi i hetimeve për korrupsion dhe keqpërdorim të detyrës zyrtare, dhe të siguruarit që të gjithë qytetarët e Kosovës, përfshirë pakicat, kanë qasje në arsimim, kujdes shëndetësor dhe shërbime tjera sociale cilësore. Poashtu, kjo qeveri duhet të mbajë përqendrimin e saj në zhvillimin e ekonomisë së Kosovës, tërheqjen e investimeve të sektorit privat dhe rritjen e punësimit, dhe përparimin drejt integrimit evropian, duke përfshirë edhe kualifikimin për liberalizimin e vizave.

Periskopi:  Jemi në muajt e fundit të vitit; si e vlerësoni ju angazhimin e Qeverisë gjatë këtij viti? A mendoni se Kosova ka shënuar ndonjë progres, veçanërisht në ekonomi kur dihet se papunësia mbetet problemi më i madh i kosovarëve?

Delawie: Që nga pavarësia Kosova ka bërë përparim të dukshëm në vendosjen dhe zhvillimin e politikave dhe legjislacionit për tregun e lirë, dhe në përmirësimin e ambientit për afarizëm, siç edhe kemi parë në raportin e fundit të Bankës Botërore për Bërje të Biznesit. Qeveria e Kosovës poashtu ka zbatuar një pako të re fiskale për të nxitur zhvillimin ekonomik, për të tërhequr investime nga jashtë, dhe për të rritur të hyrat. Këto përpjekje duhet të vazhdojnë së bashku me përkushtimin e vazhdueshëm ndaj luftës kundër korrupsionit dhe ndaj adresimit të çështjeve tjera që e frenojnë rritjen ekonomike të Kosovës.

Periskopi: Një kërkesë e ambasadës amerikane dhe Zyrës së Bashkimit Evropian në Kosovë për luftimin e krimit dhe korrupsionit është përsëritur disa herë. Ndërkohë, raportet ndërkombëtare gjejnë se këto dukuri ende mbetën në nivel shqetësues; A mendoni se është bërë mjaftueshëm në luftimin e krimit e korrupsionit, veçanërisht në nivelet e larta institucionale?

Delawie: Kam qenë shumë i qartë në pikëpamjen time se korrupsioni është duke e mbajtur Kosovën prapa, dhe sigurisht se duhet bërë më shumë punë. Korporata e Sfidës së Mijëvjeçarit ka ulur së fundi notën për Kosovën lidhur me kriterin e saj për Kontrollin e Korrupsionit. Prapë se prapë, ka pasur përparim në disa fusha të rëndësishme. Disa deputetë dhe zyrtarë të tjerë që janë paditur për korrupsion kanë dhënë dorëheqje, prokurimi elektronik është duke ecur përpara në qeveri, dhe Qeveria e Kosovës është pajtuar që të punojë me Ambasadën e Mbretërisë së Bashkuar për të siguruar që shërbyesit civilë të lartë punësohen në mënyrë transparente dhe duke u bazuar në merita. Ne e inkurajojmë qeverinë dhe shoqërinë civile që të vazhdojnë të shtyjnë përpara këtë çështje, dhe që t’i kapitalizojnë këto suksese. Poashtu, është shumë e rëndësishme që të mbahet përparimi në fushat ku Kosova ka pasur të arritura të vërteta siç janë reformat lidhur me menaxhimin dhe llogaridhënien në Agjencinë e Doganave.

Periskopi: Donald Trump së shpejti do të jetë edhe zyrtarisht president i Shteteve të Bashkuara të Amerikës; shumë kosovarë druajnë nga një ndërrim qasjeje e mundshme e SHBA-së ndaj Kosovës, marrë parasysh raportet e mira që kanë kultivuar dy shtetet. A ekziston mundësia e ndryshimit të qasjes amerikane në raport me Kosovën?

Delawie: Politika e SHBA-ve lidhur me Kosovën ka qenë shumë konsistente gjatë tri qeverive të fundit, qoftë kur në Shtëpinë e Bardhë është një Demokrat apo një Republikan. Nuk shohim asnjë arsye që të presim që kjo të ndryshojë.

 

Demarkacioni-me-Malin-e-Zi

“ Qeveria dëshiron dështimin e Demarkacionit që të shkohet në zgjedhje”

Njohësit e rrethanave politike në vend kanë shprehur skepticizëm për ratifikimin e marrëveshjes së demarkacionit me Malin e Zi gjatë këtij viti.

Periskopi.com Lajme

Belul Beqaj dhe Shkëlzen Maliqi kanë thënë për “Epoka e re” se në rast se dështon liberalizimi i vizave, përgjegjësia kryesore bie mbi koalicionin qeverisës.

Analisti Beqaj i ka sugjeruar kryeministrit Mustafa që më mirë të përgatitet për ta verifikuar legjitimitetin e tij dhe të partisë sesa ta procedojë demarkacionin për ratifikim në Kuvend pasi, sipas tij, rezultati do të jetë me pasoja me kalimin ose jo të demarkacionit.

Kurse analisti Maliqi mendon se Qeveria ndoshta qëllimisht po shkon në variantin e dështimit të ratifikimit të demarkacionit, për ta marrë pastaj këtë si shkak për shpalljen e zgjedhjeve të parakohshme.

premtime_1479646283-5734079

Edhe këto zgjedhje në Maqedoni plot me gënjeshtra për të tërhequr vota

Partitë politike në Maqedoni, pjesëmarrëse në zgjedhjet e parakohshme parlamentare më 11 dhjetor kanë filluar të prezantojnë programet e tyre para elektoratit duke ofruar gjithçka – që nga rrugët dhe autostradat, uljen e tatimeve, investime, punësime të reja, shërbim të mira shëndetësor, e çka jo tjetër.

Periskopi.com Lajme

Në tubimet me simpatizantët e partisë së tij, kryetari i BDI-së, Ali Ahmeti, ka thënë se barazia ekonomike do të jetë një nga shtyllat kryesore të partisë së tij. Ai me këtë rast u lavdërua me vendosjen e gurit themeltar për ndërtimin e një fabrike në zonën e lirë ekonomike në Tetovë, ku sipas tij, pritet punësimi i 9 mijë personave.

“A fituam? Fituam se nuk e humbën besimin te qëllimi dhe qëllimi ishte që njerëzve t’u krijojmë perspektivë, që njerëzve t’iu themi se në këtë vend jetohet, se ky është vendi ynë. Fillimi është shumë i mbarë pasi brenda dy viteve pritet që deri në 9 mijë njerëz të kërkohen në zonën e lirë të Tetovës. Të gjithë duhet të mendojmë se si do t’i përgjigjemi këtyre kërkesave”, ka deklaruar Ahmeti.

Por, ndryshe nga ai, kryetari i Partisë Demokratike Shqiptare të opozitës, Menduh Thaçi, gjendjen e ka përshkruar si shumë të rëndë. Në tubimet me elektoratin e tij, ai ka premtuar amnisti ekonomike për të gjithë ato familje që për shkak të gjendjes së rëndë, nuk kanë mundur t’i paguajnë faturat apo obligimet tjera ndaj shtetit. Thaçi ka thënë se partia e tij do ta përmirësojë jetën e çdo banori.

“Fitorja jonë do të përdoret për ta përmirësuar urgjentisht jetën e njerëzve që jetojnë në këto zona. Nuk kemi rrugë, nuk kemi kanalizime, nuk kemi investime, nuk kemi mbrojtje sociale, nuk kemi shëndetësi, nuk kemi transport për nxënësit, nuk kemi kredi për studentët, populli po na ikë jashtë. Është momenti për të mirësuar këtë gjendje dhe këtë duhet ta bëjmë me votë më 11 dhjetor”, ka thënë Thaçi.

Premtime të ngjashme po japin edhe partitë maqedonase, LSDM, VMRO DPMNE, por edhe partitë tjera. Por, sa janë reale këto premtime në kohën kur të gjithë flasin për krizë të rëndë ekonomike?

“Tani është sezoni i sheqerkave, i dhuratave të babadimrit. Të gjithë do të kenë gojën përplot premtime, do të ofrojnë gjithçka, rrugë, shkolla, spitale, vende pune, me një fjalë do të ofrojnë qumësht e mjaltë, siç thotë një fjalë popullore. Vlerësoj se aspak nuk janë reale këto premtime. Premtime të tilla dëgjohen në çdo cikël zgjedhor”.

“Maqedonia ndodhet në krizë të thellë ekonomike me një borxh prej rreth 5 miliardë dollar, më ta lartin që nga pavarësia e vendit. Kemi një fond pensional para kolapsit, kemi ikje të investitorëve, kemi rritje të korrupsionit, kemi kriminalitet në të gjitha segmentet e pushtetit, të rinjtë po braktisin vendin. Është paradoksale dhe mëkat që në një gjendje të tillë të dalësh me premtime të tilla”, vlerëson Zoran Vitanov, njohës i çështjeve të ekonomisë.

Edhe disa nga qytetarë të anketuar nuk presin se premtimet e partive do të realizohen. Ata thonë se premtime të tilla po dëgjojnë tani 25 vjet, por jeta e tyre vazhdohet të rëndohet nga dita në ditë.

“Duke marrë parasysh vitet dhe përvojën që kam, nuk besoj se jam aq naiv që t’iu besoj premtimeve të tilla. Tani 25 vjet jemi ngopur me fjalë boshe, gënjeshtra e manipulime nga më të ndryshmet, me të vetmin qëllim marrjen e votës. Kaq, nuk do të them asgjë më shumë”, thotë Mirçe Stojkovski, një qytetar rreth 40-vjeçar.

Ngjashëm vlerëson edhe Sermet Bilalli, i papunë, nga Shkupi:

“Çdo herë kanë gënjyer. Asnjëherë nuk i kanë realizuar premtimet. Gjithmonë kanë punuar vetëm për interesat e tyre personale apo të një grupi të caktuar”.

Se gjendja ekonomike nuk është e kënaqshme flet edhe raporti i fundit i Komisionit Evropian. Rritja ekonomike e projektuar për 3.7 për qind nuk do te jetë më e lartë se dy për qind. Rreth 25 për qind e popullsisë dy milionëshe jeton nën pragun e varfërisë./REL/

Kadri Veseli dhe Isa Mustafa

‘Zgjedhjet e parakohshme do mbahen në tremujorin e parë të vitit të ardhshëm’

Zërat kritik brenda mazhorancës se “Demarkacioni është bërë në mënyrë të gabueshme dhe Kosova po humb mjaft shumë në këtë proces” ka bërë që të shtohen edhe më shumë zërat svendi do të shkojë në zgjedhje të parakohshme.

Periskopi.com Lajme

Opozita vazhdon të kërkojë me ngulm zgjedhje të parakohshme. Sipas tyre, tanimë ka shumë arsye pse duhet t’u drejtohemi kutive të votimit. Opozitarët vlerësojnë se mjafton dështimi i Demarkacionit dhe Asociacionit që kjo Qeveri të bjerë dhe të shkohet në zgjedhje të parakohshme.

Por, Demarkacioni nuk është shkaku i vetëm pse Kosova duhet të shkojë në zgjedhje të parakohshme. Njohësit e çështjeve politike mendojnë se tashmë nuk ka kurrfarë arsye pse kjo qeverisje të vazhdojë mandatin deri në fund.

Analisti Imer Mushkolaj, në një prononcim thotë se zgjedhjet janë të pashmangshme dh se ato mund të mbahen më së largu në tre mujorin e parë të vitit të ardhshëm.

“Koalicioni qeveritar ka dështuar të çojë përpara procese të rëndësishme dhe ka mbetur pa legjitimitet. Andaj, zgjedhjet janë të pashmangshme. Zgjedhjet e parakohshme mund të mbahen në tremujorin e parë të vitit të ardhshëm. Mbajtja e tyre mund ta nxjerrë vendin nga kriza politike që po zgjat tash një kohë të gjatë, duke e bërë të pamundur funksionimin normal të shtetit”, tha Mushkolaj.

Njësoj mendon edhe analisti Nexhmedin Spahiu, i cili beson se Kosova do të shkojë në zgjedhje të parakohshme.

“Besoj që patjetër do të kemi zgjedhje të parakohshme. Se kur do të mbahen është pak më e vështirë të perceptohet por qe ato do të mbahen”, ka thënë Spahiu.

Përkundër kërkesave të shumta që Kosova të shkojë në zgjedhje të parakohshme, ambasadorja gjermane në Kosovë, Angelika Viets, ka deklaruar se zgjedhjet e parakohshme do të sjellin ngecje në të gjitha reformat dhe në të gjitha fushat. Në qoftë se Kosova nuk shkon në zgjedhje të parakohshme, atëherë zgjedhjet qendrore të rregullta do të mbahen në vitin 2018./ Indeksonline

Xhavit Drenori

Drenori: Drenasi do t’ia kthejë shpinën Lladrovcit

Përderisa zgjedhjet e jashtëzakonshme në Komunën e Drenasit po afrojnë, kandidati i pavarur për postin e të parit të qytetit Xhavit Drenori, ka thënë se beson që ka shanse të mira të jetë fitues sepse qytetarët e Drenasit, ia kanë kthyer shpinën Ramiz Lladrovcit.

Periskopi.com Lajme

Në emisionin Ora e Fundit në Klan Kosova, Drenori tha se Partia Demokratike e solli në kandidaturë Lladrovcin në mënyrë autoritare, prandaj ka vendosur të kandidojë i pavarur, dhe shton qytetarët do ta dënojnë PDK-në për këtë arsye.

“S’jam kundër PDK-së, por jam kundër kandidatit që e sollën në kandidaturë në mënyrë autoritare. Qytetarët e Drenasit, do t’ia kthejnë shpinën kandidatit që erdhi në mënyrë autoritare në garë. I kam shanset e mira që edhe pa balotazh ta fitoj garën, megjithatë secili prej nesh mbanë përgjegjësi për ato që thotë, the assesi nuk do të tërhiqem nga gara”.

Ai ka thënë se edhe qeverisja e kaluar në krye me Nexhat Demakun që u dënua për krime lufte, ishte jo e mirë për qytetarët dhe kishte elemente autoritarizmi.

“Qeverisja Demaku, ishte një qeverisje totalisht autoritare, ku ata kanë vendosur për çdo gjë në atë qytet”.

Drenori thotë t’i ketë hyrë garës me optimizëm se e ka mbështetjen e zgjedhësve, duke premtuar se do të bëjë ndryshime të mëdha dhe do t’i adresojë të gjitha problemet që ka qyteti.

“Janë disa arsye se pse kam vendosur t’i hyj kësaj gare. E para është për t’i zgjidhur problemet të cilat i kam identifikuar si asamblist gjatë tri viteve. Debati brenda Partisë Demokratike nuk ka qenë efektiv, dhe pas bisedave që kam pasur me qytetarët e miqtë, kam vendosur që të kandidoj i pavarur”.

“Arsyeja kryesore pse një qytetar i Drenasit duhet të votojë për mua është se kam krijuar besim tek qytetarët, dhe jam shumë i informuar me problemet e tyre”.

“Disa prej çështjeve që s’kam mundur t’i shtroj sa isha anëtar i Kuvendit, do t’i bëj tani dhe ato që s’mundi t’i bëjë kryetari i kaluar, do t’i bëj unë”, ka thënë Drenori.

Ndër të tjerash, ai ka deklaruar thënë se, “jam optimist sepse jam çdo ditë në kontakt me elektoratin, që mezi ka pritur të jem në garë. Flas me bindje të plotë se në Drenas do të ndodhë një befasi kësaj radhe”. /Klan Kosova/

Bajram-Gecaj

Gecaj: Pozita nuk ka frikë nga zgjedhjet, por nuk dëshiron t’i lërë anash punët e shumta

Këshilltari politik i kryeministrit Mustafa dhe zëvendësministri në Ministrinë e Administrimit të Pushtetit Lokal , Bajrma Gecaj, në një postim t vetin në facebook, duke iu përgjigjur kërkesës së Aleancës për Ardhmërinë e Kosovës për zgjedhjet të parakohshme, ka thënë se “ pozita nuk ka frikë nga këto zgjedhje, por nuk dëshiron t’i lërë anash punët e shumta”, transmeton Koha.net.

Periskopi.com Lajme

Gecaj, njëkohësisht, ka adresuar akuza të rënda ndaj opozitës për shkak se ajo e kritikon vazhdimisht Qeverinë! “Punoni , mos bojkotoni” e ka këshilluar Gecaj opozitën duke thënë se dueli i zgjedhjeve do të bëhet në vitin 2018.
Gecaj ka shkruar:

“AAK paska kërkuar t’i drejtohemi popullit me zgjedhje të jashtëzakonshme dhe të na vlerësoi qytetari se kush ka të drejtë e kush jo. Pra edhe AAK i është bashkangjitur kërkesës me turr dhe të papërmbajtur për dalje sa më të shpejtë në zgjedhje. Atyre që po kërkojnë zgjedhje të reja u është mbushur mendja se do të fitojnë. Sa më shumë po kërkojnë zgjedhje të jashtëzakonshme aq më shumë po trimërohen. Kur pozita po i injoron me të drejtë, për të mos i lënë anash punët e shumta, ata po mendojnë se ne kemi frikë për këtë duel. Kështu puna e opozitës është bërë, mospuna apo ëndrra për zgjedhje të jashtëzakonshme. Kjo qasje vazhdon të jetë përjashtuese, kokëforte dhe e dëmshme. Çdo iniciativë, çdo ftesë, çdo veprimtari e Qeverisë ka një përgjigje nga opozita – Zgjedhje të Jashtëzakonshme – E në anën tjetër po kjo opozitë vazhdon ta kualifikoj qeverinë se nuk bashkëpunon, nuk është fleksibile e të tjera të ngjashme. E keqja më e madhe është se me këtë qasje kjo opozitë qëllimshëm dëshiron ta dëmtoj qeverinë dhe në anën tjetër të vazhdoj të pretendoj se me këtë po i mbron interesat vitale të Kosovës. Në të vërtetë tash sa kohë po e bënë mu të kundërtën. Është vërtetë punë e gjatë dhe e lodhshme të punohet në mënyrë demokratike duke qenë në opozitë. Punoni mos bojkotoni, sepse të qenët në opozitë duhet kuptuar si punë të madhe dhe ushqim demokratik për shoqërinë. E sa për zgjedhje, këtë duel do ta bëjmë në vitin 2018. Deri atëherë ne do të punojmë – për ju nuk e di”.

Xhavit Drenori

Drenori: Elektorati i Naim Bazajt tani më voton mua dhe Isa Xhemajlajn

Një ditë para tërheqjes së shortit për renditjen e subjekteve politike në fletëvotimet për zgjedhjet e 4 dhjetorit, kur pritet të votohet për kryetarin e ri të Drenasit, kandidati i pavarur, Naim Bazaj është tërhequr nga gara.

Periskopi.com Lajme

Tërheqja e tij ka rritur shpresat për numër më të madh të votave të elektoratit tek kundërkandidatët tjerë, shkruan Indeksonline.

Asamblisti i PDK-së, tashmë kandidat i pavarur për kryetar të Drenasit, Xhavit Drenori ka thënë në një prononcim për Indeksonline se nuk e ka pritur që një gjë e tillë do të ndodhte tash që po afrohet dita e zgjedhjeve.

“Është definitivisht një garë interesante, sidomos pas ngjarjeve që ndodhen dje. Ato që kanë ndodhur dje në momentin e fundit, unë realisht nuk i kam pritur, por ja që tashmë u bë”, tha Drenori.

Sipas tij, pas asaj që ndodhi mbrëmë, përkrahësit e Bazajt nuk do të votojnë për kandidatin e PDK-së, të përzgjedhur nga kryesia e partisë dhe kryetari i saj, Kadri Veseli.

“Mund t’iu them me siguri të plotë se njerëzit që e kanë përkrah kandidatin e tërhequr, Naim Bazaj kanë qenë votues të PDK-së e që nuk kanë qenë të kënaqur me mënyrën se si është sjell kandidati i PDK-së për Drenasin nga kryesia, respektivisht Kadri Veseli. Ata përkrahës nuk do ta përkrahin kandidatin e PDK-së, shumë prej tyre tashmë veçse më kanë telefonuar dhe janë në gjendje edhe të zyrtarizojnë përkrahjen e kandidaturës sime”, ka theksuar kandidati Drenori.

Ai vlerësoi se gara për Drenas është interesante dhe se gjërat kanë ndryshuar por në bërthamë vazhdojnë të jenë të njëjta.

Tashmë edhe publikisht disa votues të cilët kishin ndarë mendjen ta votojnë Bazajn, pas tërheqjës së tij nga gara kanë dalë me qëndrime të hapura në rrjetet sociale se nuk do ta votojnë Lladrovcin, por dikë tjetër nga partitë që garojnë në Drenas.

I pyetur se a pret që votat e kandidatit të tërhequr t’i marr ai, Drenori është shprehur i bindur se do të ndodh një gjë e tillë.

“Minimumi 70% të votave të kundërshtarit të tërhequr do t’i marr, sepse në bazë të informacioneve që kam, një pjesë tashmë kanë kaluar te kundërkandidati Isa Xhemajlaj dhe ata që nuk kanë dashur të votojnë kandidatin e PDK-së nuk do ta votojnë prapë. Pra, votat prapë do të mbesin jashtë PDK-së”, tha tutje Drenori.

Kujtojmë se Drenasi ndodhet në prag të zgjedhjeve të parakohshme për kryetar të komunës, të cilat vijnë pas konfirmimit të dënimit nga Apeli ndaj tanimë ish kryetarit, Nexhat Demaku. Drenasi voton për kryetarin e ri më 4 dhjetor. /Indeksonline/

zgjedhjet 2017

Gara për kryetar të Drenasit përcillet me akuza dhe kundërakuza

Periskopi.com Lajme

Është ashpërsuar tej mase fjalori i kandidatëve për kryetar të Drenasit dhe i përkrahësve të tyre, të cilët kanë intensifikuar fushatën nëpër fshatrat e komunës së Drenasit. Kryetari i PDK-së, Kadri Veseli, deputetë dhe zyrtarë të tjerë të PDK-së, duke përfshirë edhe deputetin Shaip Muja, i cili është kthyer në PDK, gati për çdo natë shkojnë odë me odë në fshatra të Drenasit në përkrahje të Ramiz Lladrovcit.

Ata kanë qenë edhe në Tërstenik, në fshatin e kandidatit tjetër të PDK-së, Naim Bazaj, por që ka kandiduar si i pavarur për të kërkuar vota për Lladrovcin, i cili dje është tërhequr nga gara për kryetar, shkruan “Zëri”.

Në një nga këto takime deputeti i PDK-së, Shaip Muja, e ka quajtur gjithashtu kandidatin e PDK-së, por që garon si i pavarur, Xhavit Drenorin kryetar të “sallatave”.

Por Drenori ia ka kthyer menjëherë Mujës, duke i dërguar “selamin” se po qe se bëhet kryetar i Drenasit një hotel që ka ndërtuar në tokën komunale në Drenas do ta dërgojë në gjykatë. Në “selamin” e tij, që Drenori ia ka dërguar Mujës, ka thënë se atij dhe të gjithë atyre që kanë për mision ruajtjen e bizneseve të pista “pushka top iu bëftë”.

“Doki, unë si kryetar i ‘sallatave’, siç po më quan ti nëpër oda të Drenasit, me kismet nga pozicioni i kryetarit këtë objektin që ke ndërtuar në tokë të Komunës, në janar të vitit 2017 do ta përcjelli në gjykatë, sado që më kishe bërë presion të madh që mos të merrem me të. Ty, doktor Shaip Muja edhe shokëve tu, që keni për mision ruajtjen e bizneseve të pista në prona komunale në Drenas, nën logo të PDK-së ‘pushka top ju baftë’ se nuk keni mundur dhe nuk do të mund të më ndalni kurrë në luftën time të pakompromis të lirimit të pronës komunale nga individë, përfitues të partisë”, është përgjigjur Drenori.  /Zëri/

kqa-650x358

Sot bëhet tërheqja e shortit për renditjen e subjekteve politike për zgjedhjet në Drenas

Komisioni Qendror i Zgjedhjeve organizon tërheqjen e shortit për renditjen e subjekteve politike për Zgjedhjet e Jashtëzakonshme për Kryetar të Komunës së Drenasit (Gllogocit).

Periskopi.com Lajme

Në garë për kryetar të Drenasit në zgjedhjet e jashtëzakonshme janë 7 kandidatë, 3 prej tyre të pavarur.

Të enjten nga gara për kryetar të Drenasit e cila shkon në zgjedhje të jashtëzakonshme pas dorëheqjes së Nexhat Demakut, është tërhequr Naim Bazaj, i cili kishte paraqitur kandidaturën si i pavarur.

Zgjedhjet e jashtëzakonshme në Drenas mbahen me 4 dhjetor./ lajmi.net

Ramiz Lladrovci dhe Blerand Stavileci

Ramiz Lladrovci fillon rrugëtim për të mbledhur vota, mbështetet nga Blerand Stavileci

Kandidati i PDK-së për kryetar të Drenasit, Ramiz Lladrovic ka filluar fushatën shumë herët.

Periskopi.com Lajme

Sot ai ka vizituar Qendrën Zejtare në Drenas për të cilën tha se do të jetë prioritet i tij, e bashkë me të ishte edhe ministri i Zhvillimit Ekonomik, Blerand Stavileci, raporton Periskopi

“Çështjet e ngritura nga ju do të jenë çështje me prioritet, ngase kjo qendër është bazë e ekzistencës së shumë familjeve dhe duhet të ofrojnë shërbime cilësore për qytetarët. Gjelbërimi, ujërat e zeza, parkingu, siguria, ndriçimi dhe nevojat emergjente që ka kjo qendër, do të jenë në agjendën time dhe ndër hapat e parë që do t’i ndërmarr” u ka thënë Lladrovci punëtorëve të qendrës Zejtare në Drenas, në takimin konsultativ me ta. / Periskopi

lladrovci-3 lladrovci-5 lladrovci-1 lladrovci-8 lladrovci-6 lladrovci-7

DONALD TRUMP

Intervista e parë e Presidentit të zgjedhur Donald Trump

Presidenti i zgjedhur i SHBA-ve Donald Trump në intervistën e tij të parë, transmetuar nga rrjeti televiziv CBS, foli për disa nga masat që do të marrë me ardhjen në detyrë.

Periskopi.com Lajme

Zoti Trump deklaroi se:

Do të deportojë ose do të fusë në burg rreth 3 milionë emigrantë të paligjshëm me lidhje kriminale.

Të emëruarit e ardhshëm të Gjykatës Supreme do të jenë “pro jetës” – pra duhet të kundërshtojnë abortin dhe të mbrojnë të drejtën kushtetuese për të mbajtur armë.

Nuk do të kërkojë të kthejë mbrapsht legalizimin e martesës mes personave të të njëjtin seks.

Do të heqë dorë nga paga e presidentit prej 400 mijë dollarësh në vit . Në vend të kësaj shume do të marrë vetëm 1 dollar në vit.

Presidenti i zgjedhur Trump ka bërë të ditur dhe të emëruarit e rinj në ekipin e tij.

Reince Priebus, kryetar i Komitetit Kombëtar Republikan (RNC), do të jetë shefi i tij i stafit.

Ndërsa Stehphen Bannon, më parë drejtues ekzekutiv i një media me qëndrime konservatore, i akuzuar nga kritikët si ksenofob dhe mizogjen, do të jetë strategu i ri i Shtëpisë së Bardhë.

Presidenti i zgjedhur Trump do të marrë detyrën më 20 janar 2017./ Exip.al

Valdete Daka

Daka më shumë se ndryshimin e ligjit zgjedhor, kërkon zbatimin e tij (Video)

Kryetarja e Komisionit Qendror të Zgjedhjeve në Kosovë, Valdete Daka thotë se standardet e zgjedhjeve i minon mungesa e besimit tek ata që i organizojnë.

Periskopi.com Lajme

Për Dakën më shumë se ndryshimi i ligjit zgjedhor ka rëndësi zbatimi i tij si dhe sjellja e partive në zgjedhje.

“Ligjin mund ta ndryshojmë çdo ditë, por jo vetëdijen e njerëzve apo të partive politike”, thotë Daka.

Gjatë intervistës për Zërin e Amerikës, Daka flet për zgjedhjet e jashtëzakonshme në komunën Drenas si dhe deklaratat politike të partive për zgjedhje të parakohshme.

Kryetarja e KQZ-së thotë se institucioni që drejton është i detyruar të zhvillojë zgjedhje kurdo që ato të thirren nga presidenti i republikës.

Ndërkohë Daka kujton ndikimin potencial që mund të ketë në cilësinë e zgjedhjeve afatet e ngushta kohore për përgatitjen e tyre.

Kryetarja e KQZ-së ishte në Uashington DC në kuadër të programit zgjedhor të SHBA.

Shpend Ahmeti

Ahmeti flet për lidhjen e Kosovës me SHBA-në, këshillon të merremi me votat në Drenas

Kreu i Prishtinës, Shpend Ahmeti thotë se populli i Kosovës më mirë është të merren me punët e veta, të bëjnë ndryshime në vendin e tyre, të forcojnë vendin, të punojnë për të shpresuar që munden të ndërtojnë marrëdhënie strategjike me partnerët, përfshi këtu edhe SHBA-në pa marr parasysh partinë në pushtet.

Periskopi.com Lajme

Sipas tij, shumë janë me rëndësi për Kosovën e për botën rezultatet e zgjedhjeve në SHBA, tepër shumë, ama pretendimet se po dijmë me analizu se çka ka me ndodhë në Amerikë e cilat kanë me qenë politikat e SHBA-ve karshi Ballkanit, sipas tij, janë në rastin më të mirë naive.

“Gjatë demokratëve është përkrah intervenimi në vitin 1999 e gjatë republikanëve është përkrah pavarësia e Kosovës në vitin 2008. Në Senat/Kongres kemi pas përkrahje nga dyja taboret. Por, e vërteta është se viteve të fundit Kosova as që është përmend në forumet kryesore amerikane, përveç për të keq. Kjo duhet të jetë brenga jonë kryesore. Ballkani është bërë arenë e betejave të fuqive të mëdha ku ne jemi “bira e fundit e kavallit”. Me paaftësinë tonë si Kosovë e kemi humb edhe atë minimum ndikimi që e kemi pas në këto beteja, e si pasojë kemi marrëveshje të Asociacionit, e Gjykata Speciale”, thotë Ahmeti, raporton periskopi

“Po dështojmë si shtet për çdo ditë e këndej analizojmë votën në Pensilvani e Miqigen. Për mos me me keqkuptu, kjo është edhe vetëkritikë, duke ja filluar personalisht nga vetja. Ma mirë me analizu votën e Prishtinës, Prizrenit, Malishevës, Drenasit, Mitrovices etj”, thotë ai./ Periskopi

Bedri Nika

LDK e vetme në zgjedhjet për kryetar në Drenas, Bedri Nika synon këtë post

Kryesia e Lidhjes Demokratike të Kosovës ka mbajtur takimin e radhës ku janë diskutuar çështje të ndryshme që lidhen me aktualitetin politik dhe zhvillimet progresive partiake.

Periskopi.com Lajme

Kryesia e LDK-së, gjithashtu miratoi kërkesën e Degës së LDK-së në Drenas, që LDK-ja të garoj e vetme në këto zgjedhje komunale raporton Periskopi.com

Kandidat i LDK-së për zgjedhjet për kryetar të Drenasit të jetë Bedri Nika, njëkohësisht kryetar i Degës së LDK-së në Drenas. / Periskopi

Votuan Hillary dhe Bill Clinton

Kandidatja demokrate për president të SHBA-së, Hillary Clinton dhe burri i saj, ish presidenti Bill Clinton, sapo kanë votuar në Nju Jork.

Periskopi.com Lajme

Ish sekretarja e shtetit është dukur e buzëqeshur dhe i ka përshendetur një numër të madh të gazetarëve dhe mbështetësve të saj që ishin mbledhur në këtë qendër votimi.

Megjithatë, ajo nuk është deklaruar për media.

Anketat e fundit para ditës së sotme të zgjedhjeve e kanë pozicionuar Hillaryn me 3.5 pikë para Donald Trump.