Zgjedhjet në Maqedoni – shqiptarët humbën mandate, fituan vëmendjen e të gjithëve!

Si asnjëherë më parë rezultati i zgjedhjeve parlamentare në Maqedoni, në veçanti ai i votuesve shqiptarë, shkaktoi një debat të madh publik në gjithë hapësirën kombëtare shqiptare dhe më gjerë. Mënyra se si ata e dhanë votën e tyre në këto zgjedhje, vërtetë bëri që t'i humbin disa mandate në parlament, por fituan vëmendjen e munguar në vite të tëra. Po qese edhe kësaj radhe do të kishin votuar ashtu sikur kanë votuar gjithmonë, sigurisht që do t’i kishin marrë edhe disa mandate më shumë, mirëpo e tërë kjo histori do të përmbyllej shumë shpejt.

Bilall Sherifi Opinione

Fituesi i zgjedhjeve do të kishte dalë rrugëve të qyteteve shqiptare në Maqedoni për të festuar fitoren dhe të nesërmen do t’i kishte filluar bisedimet për të ndërtuar koalicion me partinë fituese maqedonase dhe kështu do të ishin zhytur sërish në përditshmërinë 4 vjeçare deri në zgjedhjet e ardhshme.

Votën e votuesit shqiptar në Maqedoni duhet kuptuar si ndezje të alarmit të kuq përmes të cilit ai në këto zgjedhje shprehu pakënaqësinë mbi gjendjen në të cilën është katandisur. Në këtë shkrim do të përpiqem të jap këndvështrimin tim se cilat janë arsyet që e shtynë votuesin shqiptar në Maqedoni të veprojë në këtë mënyrë dhe cila është porosia e verdiktit të tij që e dha më 11 dhjetor.

Në demokraci pushtetin askush nuk e ka të garantuar përgjithmonë. Nuk është një e dhënë e përhershme. Në shumicën e vendeve demokratike, së paku në çdo katër vite, përmes zgjedhjeve të lira dhe të drejta ai duhet  të rimerret. Pushteti është fuqi e shpërndarë në qindra mijëra apo miliona pjesë, e cila përmes një procesi zgjedhor koncentrohet në një vend, në këtë rast te partia politike e më pas përmes saj bartet te organet shtetërore, dhe pas një periudhe të caktuar kjo fuqi kthehet sërish te ‘Aksionarët’, që në këtë rast janë votuesit. Shprehur me logjikën e “Shoqatave Aksionare” partitë janë një lloj “Shoqate Aksionare” ku votuesi është aksionar ndërsa vota e tij një “Aksion”, të cilin, si pronar i saj që është, ka të drejtë ta investojë te cila do “Shoqatë Aksionare”, parti politike që beson se do t’i mbrojë më së miri interesat e “aksionit” të tij.

Analiza mbi arsyet pse shqiptarët e Maqedonisë votuan ashtu sikur votuan të dielën e kaluar do të ishte e mangët nëse nuk do të analizoheshin së pari arsyet dhe rrethanat në të cilat u organizuan këto zgjedhje të jashtëzakonshme parlamentare. Këndvështrimi im mbi votën e elektoratit shqiptar në këto zgjedhje në Maqedoni do të përqendrohet në ato arsye që, sipas meje, i shtynë shqiptarët e Maqedonisë të japin këtë verdikt ashtu të tillë sikur e dhanë. Po t’i hedhim një sy rezultatit të zgjedhjeve në Maqedoni do të shohim se për herë të parë në historinë e zgjedhjeve parlamentare, votuesit shqiptar në Maqedoni nuk kanë prodhuar një fitues të vetëm te blloku politik shqiptar.

Në historinë 25 vjeçare pluraliste shqiptarët e Maqedonisë kanë pasur tre lider, i pari ishte kryetari i PPD-së Nevzat Halili, i dyti ai i PDSH-së Arbër Xhaferi, i treti dhe i fundit kryetari i BDI-së Ali Ahmeti. Fuqia e tyre vendimmarrëse shtrihej përtej fuqisë që zakonisht kanë drejtuesit e një partie politike. Për shkak të specifikave në të cilat jetonin shqiptarët në Maqedoni shpesh herë që të tre kanë pasur fuqi të marrin vendime që shtriheshin përtej një mandati pa pasur nevojë që këtë vendim marrje ta ndajnë edhe me dikë tjetër.

Në veçanti me një pushtet të tillë, pothuajse absolut, përmes zgjedhjeve, shqiptarët në Maqedoni që nga viti 2001 e kanë pajisur Ali Ahmetin dhe partinë e tij BDI-në. Arsyet pse Ali Ahmeti është pajisur në vazhdimësi me pushtet kaq të madh nga votuesit shqiptar besoj që publikut i janë të njohura.

Në këto zgjedhje për herë të parë në historinë e zgjedhjeve parlamentare shqiptarët në Maqedoni votën e tyre e shpërndanë te 5 parti politike: BDI, BESA, ALENCA për SHQIPTARËT, PDSH, dhe për herrë të parë edhe te një parti politike maqedonase te Lidhja Social Demokrate e Maqedonisë (LSDM).

Pra, për herë të parë në historinë e zgjedhjeve shqiptarët në Maqedoni nuk prodhuan një fitues të vetëm të zgjedhjeve, asnjërës parti nuk i dha mjaftueshëm mandate në mënyrë që e vetme të mund të hyjë në koalicion me partitë politike maqedonase dhe të mund të marrë vendime në emër të tyre. Përmes këtij verdikti, porosia e votuesve shqiptar duket të jetë shumë e qartë. Nëse deri me tani bashkëpunimi mes politikanëve shqiptar në Maqedoni me njëri tjetrin ka qenë çështje e vullnetit të tyre, tani e tutje, përmes këtij rezultati të shpërndarë në kaq shume forca politike është shndërruar në detyrim. Në detyrim sepse as njërit veç e veç nuk i mjafton fuqia që i ka dhënë elektorati shqiptar për t’i përfaqësuar e vetme në institucionet e shtetit.

Kaq sa i përket pjesës së elektoratit shqiptar që i votoi partitë politike shqiptare. Tani, do të jap mendimin tim se cilat janë arsyet që një pjesë e shqiptarëve e votoi LSDM-në e Zoran Zaevit. Maqedonia që nga viti 2006 udhëhiqet nga Nikolla Gruevski, ndërsa pjesë e qeverisjes me të, me përjashtim të mandatit të tij të parë 2006-2008 ku për partner kishte PDSH-në e Menduh Thaçit, që nga viti 2008 e deri më sot në qeverisje me te ishte BDI e Ali Ahmetit.

Nikola Gruevski dhe VMRO që nga viti 2006, me një lehtësi dhe diferencë të madhe i fitonte të gjitha betejat elektorale në kampin maqedonas. Në gjithë Maqedoninë, madje edhe në qarqet ndërkombëtare flitej hapur se kjo diferencë nuk ishte produkt vetëm i vullnetit të zgjedhësve maqedon por arrihej edhe me ndihmën e mjeteve tjera por që në rrethana të shtetit të kapur ishte e vështirë të dëshmohej dhe të provohej një gjë e tillë, prandaj edhe rezultatet e zgjedhjeve pranoheshin ashtu sikur edhe certifikoheshin nga Komisioni Shtetëror Zgjedhor i Maqedonisë (KSHZ). Si rezultat i këtij fakti, në Maqedoni u krijua miti se Gruevski është i pa thyeshëm prandaj ajo që duhej bërë ishte të mësohemi të jetojmë me te dhe të përpiqemi të nxjerrim atë që mundemi të nxjerrim. Kështu në Maqedoni u krijua një gjendje dëshpëruese dhe pothuajse e pa shpresë.

Nga momenti kur opozita Maqedonase në krye me Zaevin filloi të publikojë një seri të telefonatave të përgjuara në të cilat shpërfaqej fytyra e vërtetë e regjimit që kishte instaluar Gruevski, u ngjall shpresa se epoka e tij do të merrte fund. Përgjimet e publikuara, përveç tjerash, shpërfaqën edhe mënyrën se si Gruevski kishte arritur në vazhdimësi ta krijojë atë diferencën e madhe mes partisë së tij dhe kundërshtarit të tij LSDM-së.

Mirëpo, përkundër këtyre publikimeve, të cilat në çdo vend me demokraci madje jo shumë të zhvilluar, do të kishte shkaktuar një tërmet të vërtetë në skenën politike të atij vendi ku, politikanët që do të kishin qenë pjesë e një skandali të tillë, në zgjedhjet e radhës nuk do të kishin pasur asnjë shans për të fituar sërish, në Maqedoni nuk po e jepte efektin e pritur sepse të gjitha anketat e besueshme tregonin se Gruevski kishte një rënie të lehtë te elektorati maqedonas por jo mjaftueshëm saqë t’i shkaktonte atij humbjen e zgjedhjeve. Kjo situatë krijonte frustrime edhe te kampi opozitar maqedonas por edhe te ai shqiptar.

Pra, skandalet e publikuara krijuan një situatë të atillë në të cilën i tërë diskursi publik u orientua vetëm në një drejtim, në shpalljen e Gruevskit si fajtorin e vetëm për gjendjen në cilën kishte rënë Maqedonia dhe rrjedhimisht edhe kërkonin rrëzimin e tij.

Rrëzimi i tij u shndërrua pothuajse në kauzë të përbashkët të të gjithëve, madje edhe e atyre që në periudha të ndryshme kishin bashkë qeverisur me te. Që kauza e rrëzimit të Gruevskit nga pushteti tani mbështetej edhe nga faktorët ndërkombëtar ishte bërë sekreti më i madh publik në historinë pluraliste të Maqedonisë.

Zaevi i bindur se vetëm me votat nga elektorati maqedonas, i cili historikisht në shumicë nuk ka qenë miqësor me shqiptarët, nuk do të mund ta rrëzonte Gruevskin, në strategjinë për të fituar zgjedhjet e radhës, filloi të kërkojë ndihmën edhe të shqiptarëve. Dhe, sikur edhe del nga rezultati i këtyre zgjedhjeve me një sukses relativisht të mirë.

Në këto rrethana të krijuara në Maqedoni, një numër i konsiderueshëm i votuesve shqiptar, të shtyrë nga arsye dhe motive të ndryshme por gjithsesi duke besuar që e keqja më e madhe e Maqedonisë ishte Gruevski, rrjedhimisht edhe shkaktar i gjendjes së tyre të rëndë ekonomike dhe sociale, si dhe të bindur se Zaevi vetëm me votat e maqedonasve nuk do të arrijë ta mund Gruevskin, vendosën që votën e tyre t’ia japin Zaevit.

Gjithashtu një ndër arsyet e votës për Zaevin të votuesve shqiptar është edhe fakti se votuesi shqiptar i LSDM-së duke dashur me çdo kusht rrëzimin e Gruevskin më shumë ka besuar se një gjë të tillë do ta arrijë përmes votës dhënë LSDM-së sesa votës së dhënë partive shqiptare.

Alarmi i ndezur i votuesve shqiptar duhet kuptuar drejt dhe jo të fillohet linçimi i atyre që në këto zgjedhje kanë votuar ndryshe nga që kanë votuar deri më sot. Sidomos përpjekja që votuesi shqiptar i LSDM-së, ose të shpallet thjesht vetëm i zhgënjyer, apo edhe më keq, të etiketohet deri në nivelin e tradhtisë është jo vetëm e pasaktë por edhe e pa pranueshme.

Fakti që LSDM ka votues edhe në Tanushë aty ku filloi lufta e shqiptarëve në Maqedoni, dhe në Haraqinë aty ku përpos që u zhvilluan beteja të ashpra është edhe simbol i përfundimit të luftës, e përjashton një akuzë të tillë.

Paradoksalisht, tani që shqiptarët në Maqedoni dolën më të dobët në mandate, kanë një shans historik që përmes një bashkëpunimi mes forcave politike të realizojnë shumë më shumë të drejta sesa që kanë realizuar apo do të realizonin përmes më shumë mandateve por të siguruara vetëm nga një parti politike.

Iniciativat për ta bërë të mundur këtë bashkëpunim mes partive politike shqiptare tanimë kanë filluar. Sidomos iniciativa e filluar nga kryeministri i Shqipërisë Edi Rama është një mundësi e mirë që humbja e vogël, ajo e disa mandateve, të mund të shndërrohet në një fitore të madhe, ajo e realizimit të atyre të drejtave që, përkundër pasjes deri më tani të më shumë mandateve, nuk u realizuan deri më sot.

Për fund, Gjermanët e kanë një shprehje për zgjedhjet e cila thotë “Erste Tag nach der Wahl, ist erste Tag vor der Wahl” që në shqip do të thotë “Dita e parë pas zgjedhjeve është dita e parë para zgjedhjeve”.

Reklamë
Reklamë

Gruevski i befasuar me mbështetjen e shqiptarëve

Lideri i VMRO-DPMNE-së, Nikolla Gruevski, deklaroi se në zgjedhjet e parakohshme parlamentare në Maqedoni, partia e tij është fitues, si dhe shtoi se në Maqedoni përsëri u mbajtën zgjedhje të drejta, demokratike dhe kredibile në të cilat qytetarët në mënyrë të lirë votuan dhanë besimin e tyre.

Periskopi.com Lajme

 

Gruevski duke uruar qytetarët të cilët shfrytëzuan të drejtën e tyre të votës, shtoi se sipas rezultateve nga 88.61 përqind e votave të përpunuara, mbështetje partisë së tij i kanë dhënë gjithsej 434.051 qytetarë, ndërsa openentit LSDM mbështetje i kanë dhënë 415.258 qytetarë.

“Falënderojmë të gjithë votuesit, te ato komuna ku fituam, por edhe te ato ku humbëm zgjedhjet. Pa ata dhe pa votën e tyre nuk do të arrinim këtë fitore”, u shpreh ai.

Gruevski shtoi se në këto zgjedhje një befasi kishte te blloku shqiptar, duke theksuar se LSDM ka marrë një mbështetje të qartë nga komuniteti shqiptar në vend.

“Është koha e formimit të koalicionit dhe e formimit të Qeverisë në Maqedoni. Kriza patjetër duhet të përfundojë dhe Maqedonia të ecë përpara. Ky do të jetë qëllimi ynë kryesor në ditët dhe javët e ardhshme, kriza në Maqedoni të përfundojë me këto zgjedhje dhe vendi të ecë përpara”, tha Gruevski.

Reklamë
Reklamë

Fillojnë parregullsitë në zgjedhjet në Maqedoni

Asociacioni qytetar MOST, i cili ka vëzhgues në terren bën të ditur se të gjitha qendrat e votimit në Republikën e Maqedonisë janë hapur me kohë.

Periskopi.com Lajme

Kryetari i MOST-it Darko Aleksov në konferencën e parë për media përmendi disa incidente në këtë proces zgjedhor.

“Vendvotimi 1036 në komunën e Kumanovës është hapur me 15 minuta vonesë, qendra e votimit 2210 në komunën e Velesit është hapur me vonesë prej 30 minuta për shkak të mungesës së energjisë elektrike”, tha Aleksov.

Më pas ai shtoi se “Deri tani është regjistruar se në vendvotimin 1580/1 në komunën e Radovishit një votues e ka fotografuar fletëvotimin ku këshilli zgjedhor nuk e ka vërejtur dhe nuk ka reaguar. Në qendrën e votimit 2556 në komunën e Gjorçe Petrovit një votues e ka fotografuar fletëvotimin ku është thirr policia”, raporton AA.

Asociacioni qytetar MOST i ndjek zgjedhjet e parakohshme parlamentare me më shumë se 3.000 vëzhgues. Në qendrat e votimit janë të stacionuar 2.664 vëzhgues të cilët mbulojnë rreth 55 përqind të qendrave të votimit në Republikën e Maqedonisë.

Në mënyrë shtesë MOST ka 120 ekipe me nga dy vëzhgues të cilët do të ndjekin votimin në ato vende ku MOST nuk ka vëzhgues statik. 80 vëzhgues të MOST-it do të mbikëqyrin punën e të gjitha komisioneve zgjedhore komunale ndërsa do të mbikëqyret edhe puna e Komisionit Shtetëror Zgjedhor (KSHZ).

Në zgjedhjet e sotme të parakohshme parlamentare marrin pjesë 11 subjekte politike prej të cilave gjashtë parti politike dhe pesë koalicione, me 58 lista dhe me 1.092 kandidatë.

 

Reklamë
Reklamë

Hapen vendvotimet në Maqedoni

Sot Maqedonia nga ora 07 deri në 19.00 voton për zgjedhjet e parakohshme patlamentare të 11 dhjetorit 2016.

Periskopi.com Lajme

Në zgjedhje do të marrin pjesë 11 subjekte politike: 6 parti dhe 5 koalicione me 58 lista për deputetë me 1092 kandidatë.

Të drejtë vote ka çdo person i cili është i regjistruar në certifikatën nga Lista zgjedhore dhe posedon letërnjoftim ose pasaportë të vlefshëm. Votimi kryhet personalisht.

Pas ardhjes në vendvotim, qytetarit fillimisht i kontrollohet gishti i madh i djathtë me UV llambë që të shihet nëse ka gjurmë nga UV spërkatësi pa ngjyrë, pastaj bëhet kontroll i dokumenteve për identifikim personal dhe ai nënshkruhet në certifikatën nga Lista zgjedhore. Pastaj anëtari i bordit zgjedhor i jep fletëvotim  në të cilin në pjesën e përparme duhet të vuloset. Para se të drejtohet votuesi te paravani për votim spërkatet me spërkatës pa ngjyrë.

Përveç letërnjoftimit ose pasaportës së vlefshme për votim nuk pranohen dokumente tjera si patenta e shoferit, libreza shëndetësore, legjitimacion i nxënësve dhe studentëve etj.

Për herë të parë në këto zgjedhje, certifikatat nga Lista zgjedhore do të përmbajnë edhe fotografi nga votuesit. Fotografitë personale do të jenë në formë si të letërnjoftimit ose pasaportës. Në certifikatë nga Lista zgjedhore do të shtypet fotografia nga ai dokument i cili është me datë më të re të dhënies. Sipas udhëzimeve të KSHZ-së gjatë konfirmimit të identiteti personal, votuesi është i obliguar para bordit zgjedhor të prezantohet në mënyrën në të cilën është prezantuar në fotografinë në dokument për identifikim personal. Përfaqësuesit e parashtruesve të listave dhe vëzhguesit e akredituar mund nga afër ta ndjekin konfirmimin e identitetit të votuesit.

Përderisa konfirmojnë se votuesi nuk është në certifikatat nga Lista zgjedhore, anëtarët e bordit zgjedhor (BZ) janë të obliguar në sektorin kompetent rajonal të KSHZ-së dhe ta vizitojnë faqen e internetit https://izbirackispsiok.gov.mk/ që të kontrollohet nëse ai është regjistruar në Listën zgjedhore dhe përderisa është, në cilin vend mund të votojë.

Nëse votuesi i cili gjendet në Listën zgjedhore është analfabet ose është me pengesa në zhvillim ai do të vendos shenjë nga gishti i madh i djathtë në vendin e rezervuar për nënshkrim në certifikatën nga Lista zgjedhore.

Nuk guxon të votojë votuesi i cili do të refuzojë të nënshkruajë në Listën zgjedhore dhe i cili nuk do të lejojë t’i vendoset spërkatës pa ngjyrë.

Votohet pas paravanit për votim, me rrethimin e numrit rendor para parashtruesit të listës së kandidatëve edhe atë vetëm me stilolaps me ngjyrë të kaltër. Përderisa votuesi gabon nuk do të marrë fletëvotim tjetër. Fletëvotimi i palosur vendoset në kutinë zgjedhore. Nuk guxon të lejohet që votuesi ta lëshojë vendvotimin pa e vendosur fletëvotimin në kuti.

Pas një paravani për votim është e lejuar të ketë një votues përveç në rast kur votuesit i nevojitet ndihmë. Personat me aftësi të kufizuara dhe analfabetizëm sipas Kodit zgjedhor kanë të drejte me vete të marrin një person i cili do t’ju ndihmojë gjatë votimit.

Votimi familjar dhe grupor dhe votimi në emër të tjetrit është i ndaluar

Prishja e sekretit të votimit është vepër penale në Republikën e Maqedonisë. Me Kushtetutën e Republikës së Maqedonisë garantohet e drejta e sekretit të votuesve. Është e ndaluar edhe votimi grupor dhe votimi në emër të tjetër kujt. Anëtarët e bordeve zgjedhore janë të obliguar t’i pengojnë tentimet eventuale për prishjen e sekretit të votimit. votimi familjar dhe grupor në emër të tjetër kujt do të thotë shkelje e të drejtës zgjedhore paraqesin bazë për prishjes së sekretit të votimit dhe mund të sjellin deri në anulimin e zgjedhjeve.

Një anëtar i organit i cili punon në kundërshtim me dispozitat e Kodit zgjedhor mund të përpunojë kallëzim kundërvajtës dhe gjobë në vlerë prej një mijë deri në tre mijë euro në kundërvlerë të denarit. Gjoba në vlerë prej 750 deri në 2.250 euro në kundërvlerë të denarit për kundërvajtje do të shqiptohet për personin fizik i cili voton për më shumë persona në emër të tjetër kujt.

Votimi përfundon në orën 19:00

Vendvotimi mbyllet në orën 19:00, ndërsa personat të cilët kanë qenë në objekt do t’ju mundësohet të votojnë.

Ndërprerje të votimit mund të ketë përderisa në vendvotim prishet rendi derisa ai nuk vendoset, në rast të motit të keq dhe rrethanave tjera të jashtëzakonshme, nëse kalimin deri te vendvotimi nuk e siguron policia dhe për këtë ka pasur nevojë dhe përderisa policia është thirr dhe nuk i është përgjigjur thirrjes.

Përderisa votimi ndërpritet më herët se një orë kjo nuk vazhdon pas orës 19:00, por nëse është ndërprerë më gjatë se tre orë nuk vazhdon të njëjtën ditë.

Përfaqësuesit e autorizuar të parashtruesve të listave, vëzhguesit dhe votuesit në ditën e zgjedhjeve në vendvotimet nuk guxojnë të shfrytëzojnë telefon celular, aparat ose mjete tjera për të fotografuar fletëvotimin. Bordi zgjedhor mund ta largojë nga vendvotimi çdo person i cili nuk i përmbahet kësaj ndalese.

Të shtunën votoi diaspora, të sëmurët dhe të burgosurit ndërsa të mërkurën, siç është kumtuar në ueb-faqen e KSHZ-së, kanë votuar 325 anëtarët e Këshillave Zgjedhorë.

Numërimi i votave

Procesverbale dhe materialet tjera zgjedhore, bordet zgjedhore e dorëzojnë deri te KZHK-ja në afat prej pesë ore pas përfundimit të votimit. KZHK-ja kompetente i grumbullon rezultate nga votimi, përbën procesverbal dhe ia dorëzon KSHZ-së.

KSHZ-ja rezultatet e para nga votimi të marra përmes rrugës elektronike i publikon rradhazi, ndërsa rezultatet nga procesverbalet nga KZHK-ja në afat prej 12 ore pas përfundimit të zgjedhjeve.

KSHZ-ja, rezultatet përfundimtare nga zgjedhjet i publikon në afat prej 24 ore nga dita e përfundimit të tyre.

Ankesa

Çdo parashtrues i listës së kandidatëve në procedurën për votim, grumbullimi dhe konfirmimi i rezultateve nga votimi mund të parashtrojë paraburgim deri te KSHZ-ja në afat prej 48 ore pas përfundimit të votimit gjegjësisht publikimi i rezultatet e para. KSHZ-ja është i obliguar të vendos përmes kundërshtimit në afat prej 48 ore pas pranimit.

Kundër vendimit të KSHZ-së, mund të parashtrohet padi deri te Gjykata administrative, në afat prej 24 orëve nga pranimi i vendimit. Gjykata administrata e Republikës së Maqedonisë, megjithatë, pas ankesës është i obliguar të sjell vendim në afat prej 48 ore pas pranimit të saj.

Çdo votues të cilit i është shkelur e drejta në procedurën e zbatimit të votimit mund të parashtrojë ankesë deri te KSHZ-ja në afat prej 24 ore. KSHZ-ja është e obliguar në afat prej katër ore pas pranimit të sjell vendim.

Kundër vendimit-të KSHZ-së, votuesi mund në afat prej 24 ore pas pranimit të parashtrojë ankesë deri te Gjykata administrative e Republikës së Maqedonisë, e cila megjithatë pas ankesës është i obliguar të sjell vendim në afat prej 48 ore pas pranimit të saj.

KSHZ-ja mund përmes detyrës zyrtare ose pas ankesës së parashtruar, me vendim e anulon votimin në vendvotimin në rastet e caktuara të konfirmuara me Kodin zgjedhor.

Kundër vendimit me të cilin anulohet votimi mund të parashtrohet ankesë deri te Gjykata administrative e Republikës së Maqedonisë në afat prej 24 ore nga pranimi i vendimit. Gjykata administrative e Republikës së Maqedonisë është e obliguar pas ankesës të veprojë në afat prej 72 ore pas pranimit të saj. Votimi i sërishëm në vendvotim ku është anuluar mbahet 14 ditë nga dita e votimit të parë.

KSHZ do të informojë rregullisht për mbarëvajtjen e zgjedhjeve

Komisioni Shtetëror Zgjedhor (KSHZ), i ka publikuar orarin e konferencave për shtyp, që do t’i mbajnë sot dhe nesër në hapësirat e tyre.

Sot KSHZ mbanë konferencë në ora 12:00, në të cilën do të flitet për logjistikën e ditës së votimit, ndërkaq për nesër janë caktuar tre konferenca për shtyp. E para do të jetë në ora 11:00, e dyta 14:00, ndërkaq e treta në ora 18:00. Prej orës 19:00  andej, do të deklarohen rezultatet në mënyrë të drejtpërdrejtë.

“Konferencat për shtyp do të jenë të hapura për mediat e brendshme dhe të jashtme, vëzhguesit e akredituar të brendshëm dhe të jashtëm, por edhe për personat e autorizuar”, thonë nga KSHZ.

Të shtunën votoi diaspora, të sëmurët dhe të burgosurit ndërsa të mërkurën siç është kumtuar në ueb-faqen e KSHZ-së, kanë votuar 325 anëtarët e Këshillave Zgjedhorë.

Dënimet e mundshme në rastet e keqpërdorimeve

Dënime të larta me para dhe burg parashihet për rastet e shkeljeve të rregullave të procesit zgjedhor të 11 dhjetorit të këtij viti, njofton Portalb.

Prej 3 deri më 6 vjet burg do të dënohet personi i cili pengon për të votuar, mbajtje të armës dhe detyrim për votim.

Personi i cili e fotografon votën e tij do të dënohet nga 300 deri më 100 euro.

Deri më 500 euro është dënimi nëse mbani simbole në vendvotimin.

Një anëtar i organit i cili punon në kundërshtim me dispozitat e Kodit zgjedhor mund të merr kallëzim kundërvajtës dhe gjobë në vlerë prej një 1.000 deri në 3.000 euro.

Gjoba në vlerë prej 750 deri në 2.250 do të shqiptohet për personin fizik i cili voton për më shumë persona në emër të tjetër kujt.

Dënime të mëdha me para Kodi Zgjedhor parasheh edhe për partitë politike dhe për mediat të cilat nuk i përmbahen Kodit Zgjedhor.

Reklamë
Reklamë

Mërgimtari nga Kërçova: Të mos përçahet vota shqiptare (Video)

Një mërgimtar nga Kërçova që sot mori pjesë në zgjedhjet e diasporës në Bern të Zvicrës, në një deklaratë për Radio Vala, ndërmjet tjerash deklaroi që është me rëndësi që të dilet në votime dhe të mos bëhet përçarja e votës shqiptare, transmeton TetovaSot.

Periskopi.com Lajme

“I kisha lutur të gjithë njerëzit që jemi në diasporë të dalim në votime. Vëllezërve tonë në Maqedoni u ka mbetur edhe pak kohë, i kisha lut që të mos përçahen, të bëhen bashkë, jemi vëllezër të kuptojmë njëherë e përgjithmonë.

Edhe të bëjmë një dialog që të bëjmë jetë të përbashkët e të mos bëjmë copëtime”, deklaroi ndërmjet tjerash mërgimtari nga Kërçova gjatë votimeve të sotshme në Bern të Zvicrës./TetovaSot/

Reklamë
Reklamë

Ahmeti në tubimin përfundimtar: Lirinë që e fituam me gjak, ska çmim që dikush mund ta blejë (Foto)

Cep më cep ishte mbushur sheshi Iliria në Tetovë ku atmosfera ngjasonte më shumë me një festë të një fitoreje të madhe se sa një tubim.

Periskopi.com Lajme

Emocione të shumta dhe adrenalina nuk mungoi në turmë, por jo nga Ilir Shaqiri ose nga të tjerët që performuan para publikut. Emocionet i ngjalli Ali Ahmeti me fjalimin e tij unifikues, i cili për finalen e fushatës zgjedhore, kërkoi unifikim vote për fuqizim të faktorit shqiptar në Maqedoni.

Ahmeti para të pranishmëve tha se BDI nuk mbron më vetëm një platformë politike, por doktrinë kombëtare dhe që nuk ka forcë tjetër që mund t’i bëje ballë gjithçkaje pos BDI- së.

 “Nuk ka kompromis me doktrinën tonë. Barazi e plotë, ky është mandat I barazisë së ploitë të shqiptarëve të Maqedonisë. Unë po flas I pari sepse unë para jush paraqes zërin e të gjithë këtyre bashkëpunëtorëve të mij deputetë e kandidatë. Unë paraqesh një zë këtu, e ai është BDI I cili ju përfaqëson juve. Ju jeni motori, energjia që keni mbrojt me sukses doktrinën e platfotrmën e BDI-së”, u shpreh lideri I BDI-së Ali Ahmeti.

Ahmeti para të pranishmëve tha se BDI është e orientuar për një mirëqenje ekonomike të popullit shqiptar dhe nuk ka asgjë që do e devijojë nga ky qëllim.

“Kudo që kam shkuar, të gjithë njerzit kanë kërkuar zhvillim ekonomik. Kush mund të bëje më mirë se sa bijtë dhe bijat e juaja që janë radhitur prapa BDI-së tonë të fuqishme. Sigurisht që të pakonkurent me dije e pajisje. Ngado që kemi shkuar, njerëzit dhe qytetarët kërkojnë vende të reja të punës, kërkojnë perspektivë. Kush mund ta bëje më mirë se këta që janë para jush, që hapën më shumë se 2 mij vende pune brenda 2 muajve”, deklaroi Ahmeti.

Ahmeti më tej tha se, BDI nuk dëshiron vetëm ekonomi të mirëfillt për popullin shqiptar, por edhe arsim cilësor I cili do ecë para në vazhdimësi.

“Kush më mirë mund të ju përfaqësojë se sa ata që mundësuan një universitet të zyrtarizuar dhe tjetrin të themeluar mu aty ku e kërkonte vetë Rilindja kombëtare, mu në qendër të Dardanisë, në Shkup, me emrin Nënë Tereza”, tha Ahmeti, duke shtuar se, shqiptarët duhet unifikuar me ata që mundësuan dhe po punojnë çdo herë drejt stabilitetit.

 “Kudo që kemi qenë, njerëzit kërkojnë paqe dhe qetësi e siguri. E kush dinë më mirë ta bëj atë pos atyre që bënë luftën Clirimtare, pasi vetëm ata dinë të bëjnë paqen, e të ndërtojnë të ardhmen, pasi kështu I ka mësuar doktrina shqiptare. E kush tjetër, pos bijve dhe bijave të këtij trolli të cilët janë edhe garant I stabilitetit, pasi kështu duan shqiptarët dhe qytetarët”, u shpreh Ahmeti.

Ahmeti përmbylli fushatën duke kërkuar unifikimin e votës për një mandate më të fuqishëm shqiptar, duke kërkuar kështu edhe nga oponentët, të mëdhenj e të vegjël, t’i bashkojnë forcat për mos çuarje huç të mandateve në kuvend.

Reklamë
Reklamë

Ahmeti: Vota e shqiptarëve nuk duhet të përçahet

Kryetari i Bashkimit Demokratik për Integrim në Maqedoni, Ali Ahmeti në një intervistë për Zërin e Amerikës para zgjedhjeve të 11 dhjetorit thotë, mes tjerash se shqiptarët mund të humbasin deputetë në zonat zgjedhore 1, 2 dhe 5 nëse votat e tyre shpërndahen për më shumë kandidatë në garë.

Periskopi.com Lajme

Ai nuk mendon se shqiptarët do të votojnë për një parti maqedonase. Zoti Ahmeti pret që pas zgjedhjeve të hapen çështje siç është ajo e emrit të Maqedonisë. Ai flet për zhvillime të tjera aktuale në Maqedoni dhe për perspektivat e vendit.

Zëri i Amerikës:Zoti Ahmeti, këtë fushatë dhe këto zgjedhje i keni cilësuar si historike. Duket se edhe elektorati ret diçka më shumë nga këto zgjedhje. Çka prini ju të ndodh pas 11 dhjetorit?

Ali Ahmeti: Janë vërtetë zgjedhje të rëndësishme e pse jo edhe historike sepse e gjithë çështja është se çka do të ndodh pas 11 dhjetorit, cila do të të jetë axhenda, sa do të jemi ne të suksesshëm në axhendën e paracaktuar që duhet të zbatohet pas 12 dhjetorit. Republikën e Maqedonisë e presin detyrime të rëndëishme karshi qytetarëve, rajonit e komunitetit ndërkombëtar. Pas 11 dhjetorit unë pres që në këtë vend të shtrohen tema të rëndësishme siç është çështja e zgjidhjes së problemit të emrit, gjetja e një kompromisi sepse ky kompromis na lehtëson rrugën drejt marrjes së ftesës për anëtarësim në Nato. Me këtë, forcohet paqja, stabiliteti në këtë vend dhe në rajon; mbi të gjitha krijohen marrëdhënie më të mira në mes dy etnive më të mëdha, sepse shumëçka varet nga marrëdhëniet në mes shqiptarëve dhe maqedonasve, pastaj është çështja e investimeve, krijohet një klimë më e mirë për investime.

Zëri i Amerikes: Sipas parashikimeve, shqiptarët në këto zgjedhje do të dalin me 3 a 4 deputetë – më pak se sa që kanë pasur, për shkak të numrit më të madh të partive shqiptare në garë. A është kjo shqetësuese për ju?

Ali Ahmeti: Kjo më brengosë. Mendoj se shqetësimi dhe brenga nuk janë kategori të njëllojta. Më brengos sepse dobësohen shqiptarët. Unë gjithmonë kam thirrë partitë e vogla që të bëhen bashkë se të tilla bëhen më të forta dhe le ta fitonin Bashkimin Demokratik për Integrim! Dhe nuk është humbje për shqiptarët nëse do të humbte BDI-ja, por humbje do të jetë nëse shqiptarët humbin mandate, nëse përçahet vota shqiptare. Mirëpo, nuk ndodhi që partitë e vogla të bashkohen me një program dhe nën një ombrellë dhe kjo gjë më brengosi sepse në qoftë se shqiptarët ndajnë votat, sigurisht se i dobësojnë mandatet (në parlament). Dhe në këtë situatë medoemos u bëj thirrje shqiptarëve që ta votojnë sa më shumë BDI-në si dalëzotës i vetëm i kauzës shqiptare në Maqedoni, e që di të përballet në situata me të tjerët, di të ofrojë zgjidhje dhe alternativa; Ka vizion se si duhet ndryshuar e sotmja dhe e nesërmja të bëhet më e mirë. Unë nuk shoh tek këto lëvizje të vogla që janë krijuar, kapacitet për t’u përballur dhe zgjidhur problemet. Unë për 14 vjet nuk kam bërë thirrje “Votoni BDI-në”, por në këtë gjendje duke pasur këtë brengosje vërtetë u them shqiptarëve në Maqedoni: Votoni BDI-në si i vetmi dalëzotës që di të përballet me të tjerët!

Zëri i Amerikës: Por, Ju nuk keni provuar t’i afroni partitë e reja shqiptare në një koalicion parazgjedhor me BDI-në.

Ali Ahmeti: Nuk ka pasur vullnet që partitë e vogla që janë krijuar të bashkohen me BDI-në dhe unë nuk bëj thirrje hipokrizie kur shoh që diçka nuk mund të ndodh. Një pjesë ka dalur nga Bashkimi Demokratik për Integrim dhe kanë krijuar iniciatva të reja.

Zëri i Amerikës: Zona e 6 zgjedhore (që përfshin Tetovën, Gostivarin, një pjesë të Dibrës së Madhe) mbeti me më tepër se 5% të numrit të votuesve nga që parashikohet me kodin zgjedhor. Rrjedhimisht, shqiptarëve këtu u ‘digjet’ ndonjë madat deputeti. A ndjeni faj, me që keni qenë faktor i cili mund ta zgjidhte problemin?

Ali Ahmeti: Shqiptarët në zonën e gjashtë nuk mund të kenë ndonjë humbje nga mosbalancimi i zonave zgjedhore. Ky balancim kërkon marrëveshje me konsensus nga të gjitha palët dhe nuk premtonte koha që të zgjateshin negociatat për arësye të kalimit të kohës dhe zënies së afateve për organizimin e zgjedhjeve. Në zonën e 6 ka 5.20 % më tepër votues të regjistruar se që parashikohet. Por unë mendoj se humbja më e madhe do të jetë nëse ndodh që shqiptarët t’i ndajnë votat në zonën 1 (Shkup), 2 (Shkup, Kumanovë) dhe në zonën e 5-të (Strugë, Kërçovë) dhe nuk mendoj se do të ketë humbje në zonën e 6-të. Ne kemi dhe një fatkeqësi këtu sepse gati 40% e votuesve nga zona e 6 nuk jeton në vend, por në shtete të Evropës perëndimore, Kroaci e Slloveni…

Zëri i Amerikës: Z. Ahmeti, Lidhja Social Demokrate maqedonase po hapë shtabe zgjedhore nëpër zona të banuara kryesisht me shqiptarë dhe nuk është për t’u habitur nëse merr vota nga elektorati shqiptar. A ju brengos kjo gjë?

Ali Ahmeti: Jo, sepse shqiptarët dinë për kë të votojnë. Shqiptarët e dinë se kush e ka ndryshuar të djeshmen dhe të sotmen; shqiptarët janë shumë të sigurtë dhe të vetëdijshëm se të nesërmen përsëri do ta vazhdojnë ta ndryshojnë partitë e tyre politike, shqiptare. Në këtë vend ende jemi të organizuar mbi baza etnike. Maqedonasit votojnë për maqedonasit – shqiptarët votojnë për shqiptarët. Kauzën shqiptare e mbrojnë shqiptarët. Mua nuk më shqetëson fare pse LSDM ka bërë ndonjë aktivitet a veprimtari… Unë kam përcjellë deklaratat e z. Zoran Zaev. Ai është aq shumë kontradiktor, sa që herë-pas-here duken qesharake. Paradite thotë “gjuha shqipe zyrtare, pasdite thotë: unë nuk lejoj që në këtë vend të ndryshohet kushtetuta dhe se gjuha shqipe nuk mund të jetë e barabartë me gjuhën maqedone”.

Mirë është që në Maqedoni të ketë parti që do të vepronin mbi baza ideore, por kjo mbetet një dëshirë e njerëzve me vizione. Hë për hë këtu nuk janë krijuar ato kushte sepse ende ka dallime në mes forcave politike shqiptare dhe atyre maqedonase. Unë kam qenë në koalicion qeveritar edhe me LSDM-në edhe me VMRO-në; kemi dallime të mëdha për shumë çështje që kanë të bëjnë me etnitë në këtë vend, kështu që kjo mbetet një dëshirë për në të ardhmen.

Zëri i Amerikës: A i përmbaheni atij ‘rregullit të pashkruar’ se partia shqiptare e cila del me më shumë vota duhet të hyjë në koalicion qeveritar me partinë më të madhe maqedonase, që fiton zgjedhjet? Edhe nëse ajo promovon politika që nuk u përshtaten shqiptarëve?

Ali Ahmeti: Shumë do të varet nga programet e partive politike, nga negociatat pas 11 dhjetorit në mes partive politike fitimtare; Varet nga bisedat mbi temat që kërkojnë zgjidhje urgjente.

Zëri i Amerikës: Nëse i fitoni zgjedhjet në kampusin shqiptar, a do të jeni të gatshëm ta ndani pushtetin edhe me një apo parti të tjera shqiptare?

Ali Ahmeti: Kjo çështje duhet vlerësuar pas zgjedhjeve. Duhet të bisedohet me të gjitha nivelet, me organet drejtuese të partisë (BDI) që të shohim çka është në të mirë të shqiptarëv ne atë do ta bëjmë.

Zëri i Amerikës: Z. Ahmeti, çka u ofron BDI dhe çka u garanton shqiptarëve më shumë se partitë tjera shqiptare në Maqedoni?

Ali Ahmeti: BDI ka një program mjaft të përpunuar dhe të hartuar nga ekspertët më të mirë që kanë shqiptarët në Republikën e Maqedonisë dhe mendoj që është i pakrahasueshëm me programet e partive konkurrente shqiptare këtu me ca fletushka të vogla me nga 3, 4 faqe. Ne vazhdojmë të materializojmë me përkushtim barazinë e plotë si një kapitull përmbyllës në të gjitha fushat, që nga ajo kombëtare e deri te ajo ekonomike. Përshpejtimi i hapave për investime si të huaja poashtu edhe vendore. Ne kemi pasur një gjysmë mandati kaotik, por është bërë hapërimi më i madh brenda dy dekadave në këtë vend. Brenda tre muajve të fundit janë hapur mbi dy mijë vende pune që nga Struga, Kërçova dhe Tetova me fabrika të mëdha dhe me nam. Dhe vitin e ardhshëm pres që numri të arrijë në pesë mijë. Janë në proces edhe hapje të fabrikave të reja në kuadër të zonave të lira ekonomike por gjithashtu punojmë me përkushtim që investitorët vendas të kenë përparim më të madh, t’i shfrytëzojnë beneficionet e shtetit. Duhet bërë ndryshime të disa ligjeve për lehtësimin e veprimtarive të investitorëve dhe të zotohen komunat për ktrijimin e kushteve më të mira për krijimin e vendeve të reja të punës.

Zëri i Amerikës: Ka vërejtje nga komuniteti ndërkombëtar në lidhje me përzierjen e interesave shtetërore me ato partiake dhe për trysni ndaj punonjësve të administratës shtetërore. Ju jeni pjesë e pushtetit dhe rrjedhimisht kritikat vlejnë edhe për ju!

Ali Ahmeti: Ne nuk jemi të interesuar as të bëjmë trysni ndaj administratës dhe nuk jemi të interesuar që forcërisht t’i rrisim kapacitetet tona; Ne paraqesim program të cilin e vlerësojnë ata me të drejtë vote. Të ushtrohet frikë dhe dhunë, pavarësisht peshës së asaj dhune mbi elektoratin, nuk është gjë e mirë. Është me rëndësi që në këtë vend të thellohen reformat në drejtësi, të funksionojë shteti ligjor dhe këto mbeten detyra të cilave nuk mund t’iu shmangemi dhe sigurisht që në mandati i ardhshëm do të përqendrohet në këto çështje. Ky vend duhet të futet në binarë të mirëfilltë sa i përket funksionimit të shtetit ligjor.

Zëri i Amerikës: Si i shikoni veprimet e Prokurorisë së Posaçme në këtë periudhë dhe mundësinë e procedimit të rasteve që kanë të bëjnë me shqiptarët?

Ali Ahmeti: Ne kemi mbështettur Prokurorinë Speciale. Ajo është rezultat i negociatave midis katër forcave politike më të mëdha në vend. Unë vazhdimisht kam theksuar se Prokuroria e Posaçme duhet të merret me punë të gjyqësisë dhe të mos partizohet, politizohet dhe të mbajë anën e dikujt dhe në vazhdimësi do të ketë përkrahjen e BDI-së, por të kryejë punën e vetë profesionale. Sa i përket lëndëve, unë do të doja që rasti “Monstra” të kalojë në shqyrtim nga Prokuroria e Posaçme. Ndërsa rasti i Sopotit është në mbyllje e sipër dhe është vërtetuar shumëfish se ata njerëz nuk janë fajtorë.

Zëri i Amerikës: pas zgjedhjeve të 11 dhjetorit, pavarësisht rezultateve, a e shihni Maqedoninë më afër proceseve euro-integruese?

Ali Ahmeti: Mendoj se do të jetë një përballje e fortë për temat që theksova më lartë, për çka nevojitet guxim sepse duhet të merren vendime të rëndësishme dhe të vihen përpara interesat e shtetit dhe jo ato të një partie politike apo grupimi politik.

Zëri i Amerikës: Z. Ahmeti, a do ta njihni rezultatin e zgjedhjeve pavarësisht se kush del fitues?

Ali Ahmeti: Unë në radhë të parë kërkoj që zgjedhjet të jenë të lira, që të gjithë njerëzit të shprehin lirshëm vullnetin e tyre, që çdo njeri të ketë dinjitet dhe integritet në këto zgjedhje sepse mbarëvajtja e një procesi zgjedhor është imazhi i një shteti, i një kombi dhe komuniteti dhe dëshiroj dhe kontribuoj që këto zgjedhje t’i përmbajnë të të gjitha këto vlera dhe standarde. Nuk vihet në pyetje kontestimi nga ana ime i verdiktit të qytetarëve. Unë e respektoj atë dhe nuk ka asnjë diskutim për këtë.

Reklamë
Reklamë

Ahmeti në Reçicë: BDI, forca e pamposhtur e shqiptarëve

Bashkimi Demokratik për Integrim (BDI) sonte përmbylli fushatën zgjedhore në Reçicë të Vogël, në Reçicën e Universitetit të Tetovës, e të rezistencës kombëtare.

Periskopi.com Lajme

Kryetari i BDI-së, z.Ali Ahmeti para banorëve të Reçicës së Vogël u zotua se partia që ai udhëheq do të vazhdojë “betejën” paqësore me të gjitha qarqet që nuk ia dëshirojnë të mirën shqiptarëve.

“BDI është forcë e pamposhtur, që fiton, por ne nuk dëshirojmë fitore do si do, ne duam mandat të rëndësishëm ku do të mund të tejkalohen çështjet që vërtet duan imunitet. Problemi i çështjes së emrit do mirëkuptim brenda shteteve, siç është kontesti me palën greke apo me atë bullgare. Ne jemi përpjkur si BDI që të mos qëndrojmë si shiques, por jemi kyqur në mënyë aktive për zgjidhjen e këtyre problemeve. E lehtë është të ikësh nga fronti dhe nuk ka më lehtë t’ia kthesh shpinën furtunës. Ne qëndruam aktor në këto ngjarje, në këto zhvillime të mëdha, prandaj dolëm të sukseshëm në këto negociata”, deklaroi kryetari i BDI-s dhe bartësi i listës zgjedhore në njësinë zgjedhore numër 6, z.Ali Ahmeti.

_mg_8030_mg_8034_mg_8035_mg_8038_mg_8040_mg_8070_mg_8067

Reklamë
Reklamë