Thaçi i përgjigjet LDK-së për vrasjet e pasluftës

Derisa udhëheqësit e Lidhjes Demokratike të Kosovës, kanë hapur çështjen e vrasjeve të pasluftës, kjo nuk është befasi për Presidentin e Kosovës, Hashim Thaçi, sidomos në kohën para zgjedhjeve. Ai në një intervistë për KosovaPress, u ka bërë thirrje që të mos përdorën këto vrasje për përfitime politike por të ndihmohet drejtësia.

Periskopi.com Lajme

Madje, kreu i shtetit përmend edhe letrat e dërguara tek kryeprokurori i vendit Aleksandër Lumezi, pikërisht për zbardhjen e këtyre vrasjeve dhe vrasjeve tjera.

“Kjo çështje nuk është e një partie politike, as për përfitime politike të kujtdo qoftë. Unë i kam dërguar letra kryeprokurorit që t’i ketë si trajtim të posaçëm që vrasjet e personaliteteve publike të sqarohen deri në fund, prandaj obligim i partive politike dhe institucioneve në vend që t’i politizojnë dhe manipulojnë me familjet e këtyre njerëzve, t’i japin mbështetje sistemit të drejtësisë. Kjo është rruga ime, qëllimi dhe vizioni im”, theksoi Thaçi.

Ish-lideri i PDK-së, partia e të cilit ishte akuzuar në të kaluarën nga LDK-ja se ka gisht në vrasjet e eksponentëve të saj, shton se riaktualizimi i tyre para zgjedhjeve nuk është befasues, porse më shumë i lëndon familjet e të vrarëve, se sa ua lehtëson dhimbjen.

“Le të vlerësoj vet opinioni, por nuk është befasuese që çdoherë para zgjedhjeve hapen tema të tilla të ndjeshme për të lënduar me tepër familjet e tyre, se sa për t’ua lehtësuar dhimbjen apo për të ndihmuar të vërtetën dhe drejtësinë….unë e theksova ne duhet ta mbështesim drejtësinë e t’i lëmë politizimet”, ka shtuar presidenti Thaçi.

Në këtë intervistë, presidenti Thaçi ka folur edhe për Komisionin për të Vërtetën. Kreu i shtetit konfirmon se një të ardhme të afërt, do të dekretoi edhe themelimin e këtij komisioni, pas konsultimeve që ka zhvilluar me gjithë akterët, ku ka marrë opinionet pro dhe kundër.

“Komisioni për të vërtetën dhe pajtimin do të jetë një komision i pavarur, nuk do të zëvendësoj drejtësinë, do ta ndihmoj drejtësinë. Unë besoj se edhe drejtësia, edhe pajtimi, edhe e vërteta mund të ndodhin në Kosovë. Serbia ka kryer gjenocid në Kosovë, por kanë ndodhur gjëra jo të mira edhe ndaj komunitetit të tyre pas luftës, prandaj çdo zbulim i së vërtetës është mirë për vendin, është çlirim për vendin, është mesazh i pajtimit, kështu në të ardhmen e afërt do ta bëjë edhe dekretimin e Komisionit për të Vërtetën dhe Pajtimin”, tha ai.

Thaçi madje shprehet i bindur se ky Komision do të ketë sukses, meqë ka marrë mbështetjen e shoqërisë civile, mediave dhe familjeve të personave të pagjetur, si shqiptarë, ashtu edhe serbë. Megjithatë, ai thekson edhe kritikat që ka marrë për këtë iniciativë, të cilat i vlerëson si normale.

“Definitivisht besoj se do të ketë sukses, sikurse mos të besoja në të vërtetën dhe pajtimin as që do ta inicioja”, u shpreh presidenti Thaçi.

Në vazhdimin e intervistës, e cila do të publikohet nesër, presidenti Thaçi do të flas rreth procesit të themelimit të ushtrisë por edhe rreth asaj se a ka marrë mbështetjen e SHBA-s për të vazhduar këtë proces, a është iniciativa e tij si trysni për ta shtyrë SHBA-në dhe NATO-n, ta detyrojnë Listën Serbe të kthehet dhe të votojë ndryshimet kushtetuese, si dhe rreth hapave që do të ndërmarrë për dekriminalizimin e skenës politike dhe a beson ai se do ta përkrahë ish-partia e tij në këtë nismë.

Presidenti Thaci do të flas edhe për hapat që do të ndërmarrë ai si president nëse nuk kalojnë në Kuvend, Demarkacioni, Asociacioni dhe Ushtria,dhe a do të kërkojë shkuarjen në zgjedhje nëse dështon ky koalicion t’i përfundojë këto tema.

Anton Quni thotë se Hashim Thaçi ka dëshmi për vrasjet e pasluftës

Deputeti i Lidhjes Demokratike të Kosovës, Anton Quni, ka komentuar letrat e dërguara nga Presidenti i Kosovës në adresë të Prokurorisë ku ai kërkon zbardhjen e shumë rasteve të pazgjidhura deri më tani.

Periskopi.com Lajme

Është ndalur më shumë tek letrat në të cilat presidenti Hashim Thaçi i kërkon Prokurorisë të zbardhë rastet e vrasjeve të pasluftës ku janë vrarë shumë zyrtarë të Lidhjes Demokratike të Kosovës.

Por sipas Qunit, Thaçi duhet të ketë më shumë se kaq guxim nëse dëshiron të zgjidhen këto raste.

Madje ka thënë se presidenti duhet të jetë edhe dëshmitar në këto procese.

“Të ofrojë të gjitha faktet dhe argumentet. Jam i bindur që i ka sepse ka qenë detyra e tij, edhe për vrasjet e pasluftës”, ka thënë Quni në emisionin “Rrokum Roll”.

Sipas tij, Thaçi ka ushtruar rol të rëndësishëm në ushtri por edhe në politikë dhe ka qenë i “afërt me disa shërbime të inteligjencës dhe padyshim posedon edhe informata”.

“Përpos kërkesës ai ka mundësinë që të ofrojë dëshmi, dhe të jetë dëshmitar dhe të gjitha njohuritë që i ka ra për rastet veç e veç t’ia dorëzoj prokurorisë. Pra jetë bashkëpunues”, ka thënë Quni.

Ai ka ripërsëritur idenë se Thaçi ka informata të tillë.

“Pas lufte ne kemi kuptuar se ekziston një shërbim i njohur si SHIK, i drejtuar nga z.Veseli të cilët siç thonë ata kanë qenë në shërbim të çështjes dhe kauzës kombëtare. Nuk dua të paragjykoj por do ta inkurajoja që të ketë guxim që të gjitha informatat që posedon t’ia ofrojë si dëshmi”, ka thënë Quni.

Ai madje ka thënë se presidenti ka në rrethin e tij njerëz që apostrofohen si të dyshuar se kanë gisht vrasjet e pasluftës.

“E ka një rreth të shokëve që janë apostrofuar që kanë gisht në ngjarje të ndryshme likuidime të personaliteteve politiko-ushtarake. Duhet të dimë a kanë qenë të përfshirë apo jo? Nëse kanë qenë duhet të dihet arsyeja”, ka thënë Quni.

Deputeti Quni edhe më herët kishte përmendur Thaçin si personaliteti që ka informacione për këto vrasje madje duke e lidhur edhe SHIK-un e drejtuar nga Kadri Veseli, që tash drejton Partinë Demokratike të Kosovës.