Surroi kritikon rëndë qeverinë Haradinaj

Periskopi.com Lajme

“Ajo dhe ndryshimet” titullohet shkrimi më i ri i publicistit Veton Surroi. Në të, problematizohet çështja e ndryshimit të praktikës qeverisëse – e cila në sytë e Surroit nuk ka ndryshuar asgjë.

Ai përmend numrin e madh të ministrave, zëvendësministrave e këshilltarëve – të cilët do ta rëndojnë në mënyrë të tmerrshme buxhetin e vogël të Kosovës. Qeveria Haradinaj do të vazhdojë në të njëjtën mënyrë – dhe për Surroin, ky është një lajm i mirë për ata që nuk duan ndryshime, por i keq për ata që i presin ato.

Sipas tij, në mënyrë që Kosova të bëhet vend me perspektivë duhet të rriten pagat në sektorin privat dhe duhet arritur një rritje ekonomike prej 7%.

Shkrimi i plotë:

http://www.koha.net/veshtrime/56368/ajo-dhe-ndryshimet/

Surroi tërhiqet nga Facebook-u por e vazhdon poshtërimin e rajonit të Drenicës

Periskopi.com Lajme

Në një shënim margjinal në gazetën ‘Koha Ditore’, publicisti Veton Surroi ka treguar se e ka mbyllur llogarinë e tij në Facebook, pasi nuk ka mundur t’i bënte ballë sharjeve të shumta në komente.

Në një status në këtë rrjet social, para disa ditësh ai kishte ironizuar me mundësinë për të ndërtuar stadiumin në Drenas. Ai kishte shkruar një fjali të shkurtër ku thuhej: “…dhe Teatri e Opera në Skenderaj”. Në shënimin e tij, Surroi shkruan se edhe sfera publike tentohet të ‘zap’ohet’ nga dhunuesit e njëjtë që kishin zaptuar asetet e tjera shtetërore [duke iu referuar [siç]  njësive të urrejtjes në PDK].

Por ai nuk distancohet nga ironia që nënkuptueshëm lidhej me rajonin e Drenicës  [Drenasit dhe Skenderajit]. Madje, ai e vijon më tej sulmin ndaj këtij rajoni përmes përuljes së gjuhës së përdorur [shembull përdor ‘zap’ues’ në vend të zaptues] karakteristikë gjuhësore kjo pikërisht e atij rajoni.

Padyshim, gjuha e urrejtjes dhe sharjet në përgjithësi duhen dënuar. Ato e dëmtojnë hapësirën publike. Por në anën tjetër, nuk duhet toleruar as gjuha dhe ironitë që përdoren nga figura të rëndësishme për të përulur e poshtëruar rajone të ndryshme të Kosovës.

Në përpjekjen e tij për të racionalizuar debatin, Surroi shkruan: “Fillimi racional i debatit mund të ishte ky: meqë Stadiumi olimpik si projekt politik kërkohet të ndërtohet në Drenas, është e logjikshme që salla e re shtetërore e Teatrit dhe Operës të kërkohet të ndërtohet në Skenderaj”. Por pyetja që duhet shtruar këtu është: cila logjikë e thotë se nëse stadiumi ndërtohet në një qytet të një rajoni, teatri dhe opera duhet ndërtuar në qytetin tjetër të këtij rajoni? Çfarë lidhje kanë teatri dhe opera me stadiumin? Mos ndoshta kemi të bëjmë thjesht me poshtërimin e këtyre rajoneve në lidhje me kulturën?

Në të vërtetë disa prej liderëve politikë në Kosovë që merren si personifikim i korrupsionit dhe keqzhvillimit të vendit tonë, ishin nga ai rajon. Por, kjo nuk është arsye për të tallur e poshtëruar gjithë rajonin. Në të vërtetë, sfera publike dëmtohet jashtëzakonisht shumë kur njerëz me peshë publike, përdorin gjuhë urrejtëse dhe poshtëruese.

Surroi: “Pas dhjetë vitesh do t’i kemi njëqind mijë veteranë”

Periskopi.com Lajme

Në një shkrim autorial për portalin Koha “Një pension për Haxhi Zekën”, publicisti Veton Surroi ka folur për çështjen e rishikimit të buxhetit, dhe për nevojën e sigurimeve shëndetësore në Kosovë.

Ai bën një ndërlidhje të çuditshme mes kryengritësit të njohur Haxhi Zeka, dhe kancelarit të famshëm gjerman Otto Von Bismarck. Por poashtu, siç dëftohet edhe nga titulli, bën një ndërlidhje të çuditsme mes Haxhi Zekës dhe veteranëve mashtrues.

Sipas tij, ishte Bismarcku që dashakeqësisht e nisi ‘shtetin social’ thjesht duke dashur të merrte mbështetje nga shtresat e varfëra, e jo sepse e besonte në një gjë të tillë. Lidhja e Haxhi Zekës, si një figurë e njohur kombëtare, me qëllimet e shkrimit është krejtësisht e pakuptueshme.

Publicisti i njohur kosovar shpreh mllefin e tij për çështjen e listave të veteranëve, dhe për prioritetizimin e pagave të veteranëve ndaj sigurimeve shëndetësore. Ashtu siç vërehet edhe në titullin e shkrimit të tij “pension për Haxhi Zekën” ai provon të bëj sarkazmë me fryerjen e listave, dhe me politikanët që janë përgegjës për një gjë të tillë. Sidoqoftë, sarkazma dështon të përkthehet në sarkazmë, sepse e vërteta është që “pensionet” për veteranët përdoren pikërisht për efekte politike ose ekonomike – siç e thotë ndër rreshta vetë Surroi.

Ashtu siç është e paqartë prania e Haxhi Zekës në shkrimin e tij, është e paqartë edhe ajo që duhej të bëhej në rastin konkret. Të votohej apo të mos votohej për buxhetin. Dhe poashtu, çfarë të bëhej konkretisht në lidhje me hetimin e listave, dhe me ndërtimin e një ‘shteti social’ të cilin ai e kërkon?

Lexo shkrimin e plotë: http://www.koha.net/veshtrime/53483/nje-pension-per-haxhi-zeken/

Surroi nuk përmbahet, i ka dy fjalë për Ramush Haradinajn

Publicisti Veton Surroi, thotë se me refuzimin e tri fletarresteve të lëshuara nga Interpoli për tre ndihmës të politikanit ultranacionalist serb, Vojisllav Sheshel, nga ana e Serbisë, autoritetet franceze do duhej që të ishin bindur për ta liruar nga masa e lirisë me kusht ish-kryeministrin e Kosovës Ramush Haradinaj.

Periskopi.com Lajme

Një gjë të tillë, Surroi e tha përmes një postimi në faqen e tij zyrtare në rrjetin social Facebook, ku shkruan se:

Serbia refuzon të zbatojë qe dy javë urdhërarrestat e kuq të Interpolit ndaj tre ithtarëve të Vojisllav Sheshelit të cilët i kërkon Gjykata Ndërkombëtare e Ish Jugosllavisë në Hagë.

Ndërkohë insiston në urdhërearrestin e Interpolit, me kërkesë të veten, ndaj qytetarit të Kosovës , Ramush Haradinaj (rrjedhimisht edhe të çdo qytetari tjetër të Kosovës I cili nuk I pëlqen Serbisë).

Ramush Haradinaj pikësëpari fare nuk do të duhej të ishte I ndaluar, por pas tërë kësaj farse të Serbisë autoritetet e Francës duhej të ishin bindur dhe ta kishin përcjellë për në aeroplanin e parë drejt Prishtinës.

Haradinaj, është ndaluar në Francë që në fillim të muajit janar të këtij viti bazuar në një fletarrest të lëshuar nga Serbia në vitin 2004 përmes Interpolit.

Në javën e ardhshme, me saktësisht më 6 prill është caktuar të mbahet seanca e katërt gjyqësore për rastin e Haradinajt, kur edhe pritet të merret një vendim.

Surroi flet për afërsinë e Tërnavës me PDK-në

Ligjëratat rreth luftës në Siri dhe paraqitjes së Sirisë si tokë e shamit sipas publicistit Veton Surroi bëjnë që lufta atje të shihet obligim.

Periskopi.com Lajme

Rrjedhimisht sipas Surroit politizohet islami.

E faj për këto, thotë ai, ka edhe Bashkësia Islame e Kosovës për mënyrën e ligjërimit.

“Kjo është një lëvizje që qartazi ka dal në formë paralele me këtë pushtet politik dhe nuk është rastësi pasi kryetari i BIK-ut, Tërnava është i afërt me PDK-në”, ka thënë ai.

Përball tij, opinionistja Laura Kryeziu pyet nëse rasti i imamit Shefqet Krasniqi është mundësi për zgjidhjen e tërë situatës në të cilën e ka sjell vendin ekstremizmi i dhunshëm.

Publicisti Surroi shprehet optimist duke theksuar mundësinë e mirë për diskutim publik por jo edhe ngritje të akuzës ndaj dikujt, në këtë rast imamit Krasniqi.

“Është mirë të debatohet se si kemi mbërri që në vend të islamit tolerant të lejojmë e të hyjë një islam fyes, posaçërisht fyes ndaj gruas dhe religjioneve tjera”, ka thënë ai.

Surroi i del në mbrojtje Shefqet Krasniqit

Publicisti Veton Surroi përmes një shkrimi autorial ka dalur në mbrojtje të ish-imamit të Xhamisë së Madhe në Prishtinë, Shefqet Krasniqit.

Periskopi.com Lajme

Surroi përmes këtij shkrimi ka thënë se Shefqet Krasniqi është i pafajshëm për aktakuzën me të cilën e ngarkon Prokuroria, për shkak të mbrojtjes së lirive fondamentale, sipas tij fajtor në masë të madhe është shteti i cili e akuzon atë.

Sipas Surroit thellësia teologjike dhe intelektuale e Krasniqit, mund të kuptohej lehtë në përgjigjen që ia dha një besimtari se ku e kishte vendin Nëna Terezë.

“”Në Xhehnem”, tha ai me vendosmërinë e njeriut që i di gjërat e ardhmërisë me siguri të plotë. Nëna Terezë, sipas dr. Krasniqit, e kishte vendin në Xhehnem (Ferr), sepse nuk e kishte pranuar “Allahun e plotë” , pra Allahun që nuk ka djalë të vetin (siç është rasti me Allahun e Nënës Terezë, i cili kishte djalë Jezu Krishtin). Ajo, sipas dr. Krasniqit, i ka pasë “të tanat. Me hangër çka don, me pi çka don, burra sa të don me ndërru…”, por megjithatë nuk e pranoi Allahun dhe tanimë do të jetë në Ferr”, shkruan ai.

Surroi shkruan se ekzistoi një ndërlidhje e natyrshme mes dy fenomeneve: predikimit jotradicional të Krasniqit e shokëve të tij dhe rritjes brengosëse të numrit të rekrutëve të rinj shqiptarë në ISIS dhe Al-Nusra.

Kjo ndërlidhje sipas Surroit nuk do të befasonte me lajmin se u ngrit aktakuzë ndaj Krasniqir për shtytje për kryerjen e veprave terroriste. Por sipas tij me leximin e aktakuzën kuptohet se Krasniqi është i pafajshëm për këtë akuzë.

“Në aktakuzën kundër Krasniqit nuk ekziston as edhe një dëshmi me të cilën do të vërtetohej se ai ka ftuar ndokënd të kryejë akte terroriste. Nuk ekziston një dëshmi nga ligjëratat e tij publike e as ekziston dëshmi nga përgjimet elektronike. Përkundrazi, në provat e deklarimit të tij publik ekzistojnë prova se ka thënë se “nuk është farz (obligim fetar) me shku në Siri” dhe se “të rinjtë tanë nuk kanë obligim me shku në Siri”, shkruan ai.

Surroi thotë se Prokuroria pranon se nuk ka prova për thirrje të drejtpërdrejtë të Krasniqit për veprime terrorizmit, por cek se ka prova për veprim të zhdrejtë të tij në fjalimet publike.

“Dhe, si njërën prej provave më të mëdha kundër dr. Krasniqit shteti prezanton këtë shfryrje të tij, në një ligjëratë për Sirinë”, thotë Surroi duke tërhequr një paralele në mes të fjalimit të Krasniqit me një fjalim të Barak Obamas për Sirinë.

“Presidenti Obama, më 16 gusht 2011, duke kërkuar që Assadi të largohej nga posti i presidentit të Sirisë, deklaroi se është “koha për popullin e Sirisë që të vendosë për të ardhmen e vet, dhe ne do të qëndrojmë të fortë me të”. Pra, Barak Obama ka bërë pak a shumë çka ka bërë, natyrisht me stilin e tij, dr. Krasniqi: ka shprehur përkrahjen”, shkruan Surroi në një opinion në Koha Ditore.

E përbashkëta e të dy qëndrimeve thotë Surroi se nuk janë thirrje për veprime terroriste.

“Dhe meqë nuk ka prova për shtytje të drejtpërdrejtë të dr. Krasniqit për vepra terrorizmi, aktakuza kundër tij zhytet në territore deri tani të paeksploruara nga drejtësia”.

Akuza e Prokurorisë se “Gjatë faljes së xhumasë, paraqitjeve në TV, radio dhe rrjete sociale me anë të ligjëratave të ndryshme, imami kishte përdorur gjuhë të vrazhdët dhe interpretim të ajeteve kuranore jashtë kontekstit kohor e frymës islame”, sipas Surroit do të ishte i mundshëm vetëm “në Republikën Islamike të Iranit a në Mbretërinë e Arabisë Saudite, aty ku institucionet e shtetit janë të autorizuara të gjykojnë për çështje të pastra religjioze”.

Surroi insiston që Kuvendi duhet të diskutojë për Astritin

Publicisti Veton Surroi, ka reaguar pas dështimit të mbajtjes së seancës së Kuvendit për Astrit Deharin.

Periskopi.com Lajme

Ai ka thënë se për të mbajtur seancë të jashtëzakonshme, Kuvendi e ka obligim kushtetues të peticionit të mbi njëzet mijë qytetarëve të nënshkruar.

Gjithashtu ka thënë, se është edhe obligim moral ndaj humbjes së një jete njeriu si pjesë e konfliktit politik.

Më poshtë reagimi i plotë i Surroit:

Hetimet zyrtare për vdekjen e Astrit Deharit nuk mund të shërbejnë si çarçaf fshehjeje për Kuvendin e Kosovës; çfarëdo që të prodhojnë, nuk do të prodhojnë përgjigje që duhet të japë Kuvendi i Kosovës.

Përgjigjet për Kuvendin e Kosovës mund t’i japin vetëm deputetët llogaridhënës të atij Kuvendi.

Një Kuvend i përgjegjshëm i vendit do të duhej të gjente mendjen dhe forcën për të thënë , pa dallim partiak, së paku kaq:

-se konfliktet politike në vend nuk duhet të përfundojnë me vdekje; ajo e Astrit Deharit duhet të jetë e fundit

-se konfliktet politike të interesit për sovranitetin dhe integritetin e vendit (siç janë negociatatat në Bruksel, Bashkësia e Komunave Serbe, Demarkacioni me Malin e Zi) kërkojnë konsensus e jo mbivotim parlamentar

-se dialogu politik në vend bëhet brenda shoqërisë civile, publikut , Kuvendit dhe Qeverisë; dialogu politik nuk bëhet mes policisë e gjyqësisë dhe të arrestuarve veprimtarë politik

-se vdekja e një njeriu në duart e shtetit mban më vete përgjegjësinë e shtetit

E vështirë qenka për një Kuvend për të konstatuar kaq, aq më shumë kur për këtë ka obligimin Kushtetues të peticionit të mbi njëzet mijë qytetarëve të Kosovës të nënshkruar dhe obligimin moral ndaj humbjes së një jete njeriu si pjesë e konfliktit politik?/Periskopi/