Kandidati i Vetëvendosjes që fitoi zemra edhe në Drenicë

Periskopi.com Lajme

Kandidati për kryeministër nga Lëvizja Vetëvendosje, Albin Kurti ka marrë 1709 vota në Gllogovc. Kështu mësohet në bazë të llogaritjeve të formularëve të publikuara nga KZQ-ja.

Formularët e publikuar janë nga numërimi i votave nëpër qendra të votimit, menjëherë pasi u mbyllën ato.

Sipas këtyre formularëve, del se drenicasit pas Kurtit, më së shumti vota i kanë dhënë Shpend Ahmetit dhe jo kryetarit të VV-së, Visar Ymerit.

Shpend Ahmeti në Gllogovc ka marrë 817, kurse, Visar Ymeri ka marrë vetëm 465 vota.

Në këtë numër nuk janë të llogaritura votat me kusht, me postë dhe votat e personave me aftësi të kufizuara.

Reklamë
Reklamë

Të akuzuarit e VV-së a mund të marrin pjesë në seanca nëse bëhen deputetë ?(Video)

Periskopi.com Lajme

Kandidatët për deputetë Adea Batusha, Frashër Krasniqi, Egzon Haliti dhe Atdhe Arifi, nga Lëvizja Vetëvendosje, që janë nën hetime për sulm ndaj Kuvendit të Kosovës, nuk do të mund të kenë lehtësira gjatë hetimit,  edhe nëse arrijnë të sigurojnë votat e mjaftueshme për ulëse në Parlament.

Avokati i Frashër Krasniqit, Tomë Gashi ka thënë se  ligjet e vendit nuk i japin imunitet kandidatëve për deputetë, nëse këta të fundit hetohen para se të zgjidhen në këtë post.

Mirëpo nëse ata zgjidhen në këto poste, partia e tyre është e gatshme tua ruaj vendet e tyre deri sa ata të lirohen nga akuzat.

Përveç saj anëtari i kryesisë së kësaj partie Rexhep Selimi ka thënë  se ata megjithatë kanë të drejtë të marrin pjesë  në seancat e Kuvendit edhe nëse janë në arrest shtëpiak.

Ai shtoi se ka pasur raste të mëhershme kur të dënuarit me arrest shtëpiak kanë marr pjesë në seanca të Kuvendit.

 

Reklamë
Reklamë

Anëtari i LDK’së tregon cilin post kërkojnë në bashkëqeverisje me Vetëvendosjen

Periskopi.com Lajme

Anëtari i kryesisë së LDK-së, Muharrem Svarqa ka thënë se ata si subjekt politik në asnjë formë nuk shkojnë në bashkëqeverisje me koalicionin PAN.

“Unë i binden vullnetin të elektoratit për kundërshtim të koalicionit me PDK”, ka thënë Svarqa, njofton Klan Kosova.

“Natyrisht që ne nuk kemi arsye të kthehemi në gjendjen e mëparshme”, ka pohuar ai.

Svarqa ka thënë se duhet mësuar që marrëveshjet e nënshkruara të respektohen, duke folur për koalicionin e fundit me PDK, të cilët e votuan mocionin e mosbesimit ndaj Qeverisë Mustafa.

“Në mënyrë indirekte mund të nënkuptohet se jemi të hapur për Vetëvendosjen”, është deklaruar Svarqa, që është edhe kryetar i Komunës së Ferizajt.

Ai ka thënë se Vetëvendosjes mund të ia kërkojnë postin e kryeministrit si kusht për shkuarje në qeveri me ta.

“Besoj se do të ishte normale që të kërkohet posti i kryeministrit, pasi Vetëvendosje nuk ka përvojë në qeverisje”.

“Do të ishte mirë edhe për demokracinë dhe ky është mendim imi personal”, ka theksuar ai.

Më tej ka thënë se janë të gatshëm që si LDK të rrinë edhe në opozitë.

Reklamë
Reklamë

Deklarohet LDK lidhur me ftesën e Vetëvendosjes për bashkëqeverisje

Periskopi.com Lajme

Zëdhënësi i Lidhjes Demokratike të Kosovës, Arban Abrashi ka thënë se ky subjekt politik  po e pret certifikimin e zgjedhjeve dhe më pas do të merret me ftesën që i ka bërë Lëvizja Vetëvendosje për bashkëqeverisje.

Ai tha se kryesia e LDK do të mblidhet dhe do të dalë me qëndrim për këtë gjë, përderisa ka refuzuar të tregojë se cili është disponimi i njerëzve të kësaj partie mbi mundësinë që ata ta bëjnë Qeverinë me kryeministër Albin Kurtin.

Reklamë
Reklamë

Kandidati i Vetëvendosjes mori vota 800% më shumë në Skenderaj

Periskopi.com Lajme

Kandidati për deputet nga radhët e Vetëvendosjes, FIsnik Ismaili thotë se ka pas rritje 800%.

Kjo madje ka ndodhur në Skenderaj.

Ismaili thotë se nuk duhet menduar që Drenica nuk din me votu.

“Kam pasë rritje masive prej 800% në Skenderaj. Prej 5, në 57 vota. Ani qysh thojshin dje, “S’po din Drenica me votue.” Po din, valla, edhe boll mirë.

Të due, Drenicë! ❤️”, ka shkruar ai.

Reklamë
Reklamë

Flet Behgjet Pacolli: Me Vetëvendosjen……

Periskopi.com Lajme

Behgjet Pacolli tashmë është deklaruar.

Këtë e ka bërë pas një takimi që ka pasur me partnerët e koalicionit të tij, LDK’në, Alternativën dhe Lëvizje për Drejtësi.

Pacolli tregon për marrëdhëniet që ka AKR me LDK’në dhe flet edhe për Vetëvendosjen.

Shkrimi i plotë:

AKR…rol kyq në të kaluarën dhe në të ardhmen politike të Kosovës!

AKR forca përcaktuese e çdo konfiguracioni të ardhshëm

Zgjedhjet e djeshme dhanë rezultatin që donte qytetari, dhe që për disa elemente, ishte surprizë.

Për disa elemente të tjera nuk ishte.

Fitoi fryma e ndryshimit.

Votuesit e partive shqiptare kundër establishmentit që ka dominuar Kosovën tash dhjetë vjet, janë më shumë sesa gjysma e numrit tërësor të votuesve.

Vetëvendosja që ishte koherente, e palëkundur në këtë qëndrim rezultoi partia numër një dhe për këtë meriton çdo lëvdatë.

E tash AKR-ja ?

AKR nuk arriti rezultatin që meriton për shkak të vështirësive që ka patur votuesi për t’u orientuar në koalicionet e krijuara, problemeve në një fushatë komplekse, etj.

Por ka diçka që nuk ndryshon :

AKR-ja ka qenë dhe mbetet aktore cilësore pro ndryshimit në Kosovë. Që nga 2007 deri më sot.

Kur AKR hyri në skenën politike të Kosovës, AKR ishte partia e pajtimit të bllokut të partive të luftës me pjesën tjetër të partive të paqes.

Në këtë qasje AKR nuk gaboi.

A nuk ishte Presidenti Rugova që bëri koalicion të LDK-së me AAK-në, duke i dhënë kryeministrin ?

Ne u përpoqëm që t’i jepnim qeverisjeve të ndryshme në Kosovë, programin tonë, ekspertizën tonë, zgjidhjet tona unike, të posaçme për gjyqësinë, për Trepçën, për bujqësinë, për investimet, për Bashkimin kombëtar ekonomik, etj, por u sabotuam rregullisht.

Kësisoj ne vendosëm përkundrejt presioneve, shantazheve të bëjmë zgjidhjen tonë autonome. Larg atyre që nuk e duan Kosovën, që nuk dinë të qeverisin, nuk duan të qeverisin si duhet.

Sot ne jemi në një situatë tjetër.

Tash dhjetë vjet i njëjti grup qeverisës kërkon të mbetet në pushtet, kokëfortë në gabimet e veta që i kanë kushtuar Kosovës. Pavarësisht se ata sot janë koalicion më i gjerë, prapëseprapë ai dominohet nga të njëjtët njerëz në skenë dhe prapaskenë.

AKR si pjesë e frymës për ndryshim ka negociuar prej një kohe bukur të gjatë me Lëvizjen Vetëvendosja. Kemi arritur përputhje relativisht të madhe në programe. Nuk kemi parë ndarje postesh, por konvergjim programesh. Kemi patur divergjenca për rolin e shtetit në ekonomi, por dhe për raportin me perëndimin. Unë punova njëkohësisht për krijimin e një fronti të madh për ndryshimin, që të përfshinte dhe LDK-në. Nuk arritëm dot për shumë arsye, por urat kanë mbetur të ngritura. Më vjen mirë që më në fund dhe zotëri Kurti në një mesazh publik për miqtë tanë perëndimorë e rikonfirmoi këtë orientim :

Kosova do ruajë raportin e privilegjuar me Perëndimin, me ata që e çliruan, duke ndërtuar një shtet serioz, të pakorruptuar që nuk abuzon me ndihmën perëndimore.

AKR e rikonfirmon fuqishëm bindjen e vet se Kosovës i duhet ndryshimi i madh. Forcat e ndryshimit janë më shumë sesa gjysma e elektoratit.

AKR është përcaktuese në konfirmimin në pushtet të forcave të ndryshimit dhe do të kontribuojë në këtë ndryshim me ndershmërinë e vet, me moderacionin e vet, me diturinë e vet, me ekspertizën e vet, me programin e vet.

Ne jemi të bindur se çdo qeveri e ardhshme duhet të ketë prioritetin numër një zhvillimin ekonomik dhe shtetin ligjor.

Në çdo rast, në mënyrë konsensuale, çdo qeveri do duhet të iniciojë një reformë të gjerë kushtetuese që ndryshon sistemin zgjedhor, që fut zgjedhjen e presidentit nga populli dhe ndryshime të tjera.

AKR është e gatshme që të luajë rolin që i lipset vendit.

Reklamë
Reklamë

PDK e humbi bastionin më të fuqishëm, ia mori Vetëvendosja

Periskopi.com Lajme

Vushtrriu njihet si bastion i PDK-së.

Komuna të cilën e udhëhoqi dhe u mundu të bëjë investime rrugore, nuk ndikoi që të qytetarët të ia japin sërish besimin.

Kësaj radhe Vetëvendosje prin në këtë komunë.

Gara është e ngushtë, por janë në pyetje ende edhe rreth 2 mijë vota.

Deri më tani në këtë komunë janë numëruar 92% e votave.

Besohet se është kandidatja Aida Dërguti ajo që përveç të tjerëve ka sjellë vota në këtë subjekt, kur dihet se vjen nga kjo komunë./ Periskopi

Reklamë
Reklamë

Vetëvendosje e vetme do t’i mund të gjitha koalicionet

Periskopi.com Intervista

Kandidatja për deputete nga Lëvizja Vetëvendosje, Shkurta Aliu, thotë se angazhimet e saja si deputete do të jenë të lidhura ngushtë me realizimin e programit 40 pikësh të Lëvizjes Vetëvendosje.

Thotë se VV ka kapacitetet e mjaftueshme për të udhëheqë vendin drejtë një stadi të ri të zhvillimit ekomomik, ku thotë se për një gjë të tillë është dëshmuar edhe në qeverisjen e kryeqytetit .

Ajo flet për rolin e gruas në vendimmarrje dhe tregon pse subjekti ku ajo garon nuk ka forum të gruas.

Aliu shpjegon për koalicionet e edhe për vijat e kuqe.

Cili do të jetë angazhimi i juaj kryesor nëse zgjidheni deputet i Kuvendit?

Angazhimi im si deputete e Republikës së Kosovës do të jetë ngushtë i lidhur me realizimin e programit 40 pikësh të Lëvizjes Vetëvendosje, duke mos dalluar asnjërën pasi që secila është në të mirë të vendit.

A besoni se Lëvizja Vetëvendosje ka kapacitetet e nevojshme që ta udhëheqë vendin drejt një stadi të ri të zhvillimit ekonomik?

Lëvizja e ka një listë prej 110 kandidatëve për deputet ku secili prej tyre është i kualifikuar dhe ka ekspertizë në fushën e vet. Ne si Lëvizje jemi dëshmuar edhe në qeverisjen në qytetin e Prishtinës, andaj përgjigja e shkurtë është po.

 Cilat mendoni se janë hapat imediat që qeverisja e re duhet t’i ndërmarrë për ta nxjerr vendin nga kriza e vazhdueshme ekonomike dhe politike?

Lëvizja Vetëvendosje! në programin e saj ka 40 masat që janë paraparë të ndërmerren për zhvillimin dhe forcimin e Republikës së Kosovës. Këto masa konkrete rrjedhin nga Alternativa qeverisëse dhe do të zbatohen brenda mandatit qeverisës katër vjeçar të drejtuar nga Lëvizja Vetëvendosje nën udhëheqjen e Kryeministrit Albin Kurti.

A mendoni se në VV-së ka hapësirë të mjaftueshme për gratë?

Ndërsa, Lëvizja Vetëvendosje vazhdimisht e ka dëshmuar se hapësira për gruan nuk është vetëm çështje e kuotës gjinore, por edhe mënyrë e funksionimit. Lëvizja Vetëvendosje është e vetmja që nuk ka forum të gruas, sepse tek ne gruaja merr pjesë në të gjitha diskutimet dhe vendimmarrjet.

Me cilën parti ose koalicion do të preferonit të qeverisnit nëse Vetëvendosje do të arrijë të dalë parti e parë në zgjedhjet e 11 qershorit?

Nuk është momenti për të folur rreth koalicioneve tani. Vetëvendosje ka garuar e vetme dhe e vetme do t’i mund gjitha koalicionet. Gjithashtu është e vetmja që ka logo dhe vijë të kuqe.

 

Reklamë
Reklamë

Çka ofron Vetëvendosje për ata që votojnë për herë të parë në këto zgjedhje?

Periskopi.com Lajme

Krahasuar me zgjedhjet e kaluara parlamentare, këtë të dielë do të votojnë edhe rreth 100 mijë të rinj e të reja që marrin pjesë për herë të parë në këtë proces.

Është shumë e rëndësishme që secili i ri që voton për herë të parë, të marrë vendim të informuar dhe të krahasojë se cili subjekt ofron më shumë për ta. Lëvizja Vetëvendosje u ka kushtuar një hapësirë dhe rëndësi të veçantë të gjithë të rinjëve në programin e saj qeverisës. Më poshtë janë vetëm disa nga masat që do të realizohen në mandatin e parë.

Arsim i lartë publik pa pagesë

Ne synojmë që të forcojmë Universitetin e Prishtinës dhe t’i transformojmë universitetet publike në qytetet e tjera duke i specializuar ato. Që kjo të realizohet me sukses përpos masave për staf akademik cilësor e me integritet, si dhe buxhet të shtuar për arsimin e lartë, është me rëndësi që familjet e Kosovës të kenë mundësi t’ia mbështesin banimin dhe shkollimin fëmijëve të tyre në Universitet pa hyrë në borxhe, ndaj do të heqim çdo pagesë semestrale.

Subvencionim i klubeve sportive dhe ndërtim i stadiumit të futbollit

Klubet tona janë në situatë emergjente dhe presin mbështetje serioze nga qeverisja jonë. Ne kemi planifikuar ndërhyrje të gjithëmbarshme për rimëkëmbjen e sporteve individuale dhe kolektive në alternativën tonë qeverisëse. Ne vlerësojmë se këtë rimëkëmbje, përveç buxhetit të shtuar e të ndarë drejtë, e sjell dhe unifikimi i ligave dhe kampionateve me Republikën e Shqipërisë. Gjithashtu, ndërtimi i stadiumit të ri që përmbush kriteret e UEFA-s dhe FIFA-s do të fillojë që në vitin e pare të qeverisjes. Në këtë mënyrë të rinjtë tanë nuk do të kenë nevojë të udhëtojnë për  në terrene neutrale sa herë që kemi ndonjë ndeshje të karakterit ndërkombëtar.

Përkrahje me financim për ide biznesore

Fondi Sovran do të ketë edhe komponentën kredituese, e cila do të ndihmojë financiarisht të gjitha bizneset që kanë potencial krijimin e vendeve të punës dhe eksportin. Marrë parasysh që rinia jonë është në hap me kohën sa u përket zhvillimeve në fushën e teknologjisë, investimi në biznese të kësaj fushe paraqet mundësi ideale. Kjo për arsye se përveç krijimit të vendeve të punës, shërbimet e programimit dhe dizajnit mund edhe të eksportohen pa asnjë barrierë.

 

*shkrim i sponsorisuar 

 

Reklamë
Reklamë

Sulmohet kryetari i Klinës, Sokol Bashota

Periskopi.com Lajme

Kryetari i Klinës, Sokol Bashota, është sulmuar me vezë.

Shqipe Pantina, kandidatja për deputete nga radhët e Lëvizjes Vetëvendosje, ka thënë se kjo Lëvizje nuk qëndron prapa këtij sulmi, pavarësisht që sipas saj, Bashota nuk meriton respekt nga qytetarët.

Pantina, përmes një postimi në profilin e saj zyrtar në rrjetin social “Facebook”, ka shkruar se aktualisht kjo Lëvizje është e zënë duke shpalosur programin e tyre qeverisës për katër vitet e ardhshme dhe se sipas saj,  nuk knë kohë për të humbur me Bashotën me të cilin siç shprehet ajo, duhet të ketë punë prokuroria për keq menaxhimin dhe keqpërdorimet që i ka bërë në Komunën e Klinës.

Reagimi i plotë i Pantinës:

Reagim

Sapo u njoftuam se në ceremoninë e hapjes së festivalit ” I këndojmë lirisë” në Klinë qenka gjuajtur me vezë kryetari I komunës së Klinës Sokol Bashota.

Ndonëse ne besojmë se kryetari Bashota nuk meriton respekt nga qytetarët, Lëvizja Vetëvendosje nuk qëndron prapa këtij akti simbolik.

Aktualisht ne jemi të zëne duke shpalosur programin tonë qeverisës për katër vitet e ardhshme dhe nuk kemi kohë për të humbur me Bashoten me të cilin duhet të ketë punë prokuroria për keq menaxhimin dhe keqpërdorimet që i ka bërë ne komunën e Klinës.

Veçanërisht na vie keq që prezent me këtë rast ka qenë Halil Krasniqi babi i heroit Mujë Krasniqi i cili gëzon respektin e gjithë qytetarëve përfshi këtu edhe të aktivistëve dhe anëtarëve të Lëvizjes Vetëvendosje.

Reklamë
Reklamë

Analistët: Vetëvendosje do të jetë e dyta

Periskopi.com Lajme

Analisti politik, Burim Ramadani deklaroi se Lëvizja Vetëvendosje, do të dalë e dyta në zgjedhjet e 11 qershorit.

Ramadani në emisionin “Tribunë Zgjedhore” deklaroi se koalicioni PDK-AAK-NISMA, do të jetë fituese e zgjedhjeve, e pasuar nga Lëvizja Vetëvendosje dhe vendi i tretë sipas tij do jetë i koalicionit LDK-AKR.

Për Vetëvendosjes njësoj mendon edhe analisti tjetër Bajrush Morina.

Sipas Morinës fituese e zgjedhjeve do të jetë koalicioni LDK-AKR e pasuar nga Lëvizja Vetëvendosje.

Kurse, sipas tij, në vendin e tretë do të jetë koalicioni PDK-AAK-NISMA

Se Lëvizja Vetëvendosje do të ketë shtim të elektoratit të saj, e tha edhe analisti Donik Sallova.

Sipas Sallovës, rritja e tyre do të vijë pas koalicioneve që kanë ndodhur me partitë tjera dhe atë elektoratin e pakënaqur me këto koalicioni do ta merr kjo Lëvizje.

Reklamë
Reklamë

Kurti tregon çka e dallon nga dy kandidatët tjerë për kryeministër

Periskopi.com Lajme

Albin Kurti, kandidati për kryeministër nga Vetëvendosje, thotë se ai dallon nga dy kandidatët tjerë për kryeministër sepse i takon një koncepti që nuk është provuar asnjëherë në qeverisje.

Në Rubikon të KTV-së, Kurti ka thënë se Vetëvendosja e dallon nga kandidatët tjerë sepse është koncept konsistent dhe sa herë është provuar deri tani ka dëshmuar se është koncept i duhur.

“Më së shumti më dallon Vetëvendosje, që do të thotë i përkas një koncepti që është konsistent. Ka themel kuptimor shumë të fuqishëm. VV nuk është provuar asnjëherë në qeverisje. Ku jemi provuar është mirë”, ka thënë ai.

Reklamë
Reklamë

Kurti në Prizren: Pas 11 qershorit do të kemi qeverinë e parë progresive në Kosovën e pasluftës

Periskopi.com Lajme

Kandidati për kryeministër, Albin Kurti, është shprehur i bindur se qytetarët e Prizrenit do të bashkohen në këtë qytet të bashkimit.

“Pas 11 qershorit nuk do të ketë më qytetarë të dëgjueshëm ndaj politikanëve, por politikanë të dëgjueshëm ndaj qytetarëve. Vetëvendosje e do shtetin e Kosovës me sovranitet, ekonominë me prodhim, gjyqësinë me drejtësi, shoqërinë me barazi, ligjet me morale dhe popullin e Kosovës me demokraci”, u ka thënë Kurti simpatizantëve të shumtë të mbledhur në palestrën “Rexhai Surroi”.

Tutje, Kurti tha se në secilën ditë të këtyre 4 viteve të fundit, por edhe të 18 viteve të pasluftës, kemi pasur “Ramazan” për qytetarët dhe “Bajram” për pushtetarët. Por, ai premtoi se me qeverisjen e VV-së kjo do të jetë anasjelltas.

“Kur politikani ndahet fizikisht dhe materialist prej qytetarëve ai e vendos interesin e veçantë mbi interesin e përgjithshëm, këtu nis korrupsioni. Politikanët e Vetëvendosje-s nuk do të pasurohen asnjëherë nga posti dhe do të jeni gjithmonë pranë dhe me popullin”, ka shtuar tutje Kurti.

Ai u zotua se me qeverisjen e VV-së do të investohen në bujqësi 240 milion euro në mandatin e parë. Si dhe u zotua se qeverisja e VV-së do ta fus tërë ekonominë brenda ligjit.

“Pas 11 qershorit do të kemi qeverinë e parë progresive në Kosovën e pasluftës”, u tha Kurti në fund qytetarëve të Prizrenit.

Reklamë
Reklamë

Vetëvendosje: Do ta padisim Serbinë, përmes Shqipërisë

Periskopi.com Lajme

Sekretari organizativ i Lëvizjes Vetëvendosje, Dardan Molliqaj, në Magazinën Zgjedhore të Klan Kosovës, ka thënë se mendojnë ta padisin Serbinë për krimet e kryera në Kosovë, përmes Shqipërisë.

“Do ta padisim Serbinë për krime përmes Shqipërisë. Kosova duhet ta bëjë kërkesën, ta përgatis lëndën, ta takojë kryeministrin e Shqipërisë, për padi ndaj Serbisë, për krimet e kryera në Kosovë gjatë luftës së fundit”.

Reklamë
Reklamë

E mbijetuara e masakrës serbe flet se kë duhet votuar

Periskopi.com Lajme

Kandidatja për deputete, Saranda Bogujevci, ka folur në tubimin elektoral të Vetëvendosje-s në Besianë, tubimi i tretë sot, pas Mitrovicës e Lipjanit.

“Unë jam lindur dhe kam kaluar fëmijërinë në këtë qytet, dhe si shumë familje të tjera në Kosovë, edhe familja jonë ka përjetuar dhunën dhe terrorin e Serbisë. Kemi humbur një pjesë të madhe të familjes, e ne që mbijetuam mbetëm me plagë për tërë jetën”, tha në fjalën e saj Bogujevci.

Ajo shtoi se ndihet krenare me gra e vajza të Llapit e Kosovës që kanë dhënë shumë për këtë vend, e foli edhe për angazhimin në Vetëvendosje, duke thënë se ishte shumë e lehtë të jetë pjesë e saj.

“Këtu e gjeta veten të rrethuar me shume gra dhe burra të përgatitur, që me vullnetin, guximin, dhe pa u lodhur asnjëherë,me vite e vite kanë punuar e kanë mbrojtur interesin e këtij vendi. Por, mbi te gjitha, gratë e burrat e Lëvizjes kane diturinë dhe vizionin se si ta çojnë Kosovën përpara. Ne programin e Lëvizjes Vetëvendosje i është dhënë hapësire e madhe çështjeve të të drejtave dhe obligimeve që shtetit ka ndaj grave në Kosovë, të cilat përjetojnë për çdo ditë, diskriminimin ekonomik, politik e social”, tha veç tjerash, Saranda Bogujevci në tubimin e sotëm në Besianë.

“Unë nuk e pranoj që familja ime ta ketë humbur jetën për këtë Kosovë që kemi sot. Jam e bindur që asnjë qytetar i Kosovës nuk ka luftuar dhe punuar që te kemi një liri gjysmake dhe Kosova të jetë e zhytur në varfëri. Kosova do të rimëkëmbet, për këtë nuk kam asnjë dyshim. Kjo rimëkëmbje fillon në datën 11 qershor”, përfundoi Bogujevci fjalën e saj.

Reklamë
Reklamë

Sveçla nga Lipjani: Në fund të kësaj jave merr fund qeverisja e mafiozëve

Periskopi.com Lajme

Kandidati për deputet, Xhelal Sveçla, në tubimin e mbajtur në Lipjan, i ka quajtur mafiozë ata që kanë qeverisur deri tani dhe u shpreh i bindur se fundi i tyre do të jetë fundi i kësaj jave.

“Këto klane mafioze jo vetëm që e kanë kapur secilin institucion të vendit, por po mundohen ta kapin edhe secilën ëndërr e shpresë të qytetarit.  Kur u futëm në garë për Prishtinën thane që fitoren as mos e ëndërroni. E kur fituam na thanë e keni të pamundur të bëni ndryshimin. Por sot në Prishtinë është një gjendje krejt tjetër. Tashmë shihet qartë që klanet kriminale kanë pësuar debakël në Prishtinë”, u shpreh Sveçla para lipjanasve.

Ai ftoi që të bashkohen të gjithë për ta mundësuar ndryshimin.

“Çlirimi është kauza, VETËVENDOSJE! është subjekti, 35 është numri, Albin Kurti është  Kryeministri”, tha Sveçla në tubimin e Lipjanit.

Reklamë
Reklamë

Nga Mitrovica, Aida Dërguti tregon se ku janë ushtarët e vërtetë të UÇK-së, që i kishte kolegë

Periskopi.com Lajme

Aida Dërguti ka thënë në tubimin zgjedhor të Vetëvendosje-s në Mitrovicë se nuk do të ketë drejtësi në Kosovë derisa nuk bashkohet Mitrovica.

Ajo ka kujtuar dëbimin e 11,000 shqiptarëve nga Mitrovica në vitin 2000, vrasjet e kryera në atë vit, si dhe vrasjet e Selver Haradinajt dhe Enver Zymberit, me ç’rast tha se pa zbardhjen e këtyre rasteve s’mund të ketë drejtësi.

“Me ardhjen në pushtet, Lëvizja Vetëvendosje do të themelojë Komisionin Parlamentar për zbardhjen e të gjitha vrasjeve që kanë ndodhur pas luftës dhe të gjithë ata që janë të përfshirë në këto vrasje do të vendosen para drejtësisë”, tha kandidatja për deputete, Aida Dërguti.

“Ju të gjithë e dini, koalicioni Veseli-Haradinaj-Limaj është bashkimi për të instaluar në Kosovë diktaturën e krimit”, ka thënë para mitrovicasve Dërguti, duke shtuar se kjo diktaturë që ata synojnë të instalojnë, do ta fuqizonte krimin, do të vazhdonte marrëveshjet e dëmshme me Serbinë dhe do të vazhdonte ta thellonte ndarjen e Mitrovicës.

Tutje, Dërguti tha se ushtarët e mirë të UÇK-së janë të gjithë sot me Lëvizjen Vetëvendosje dhe se diktatura e krimit po tutet nga fundi që po i vjen. Mu për këtë ajo tha, se Ramush Haradinaj e Kadri Veseli as nuk guxojnë të dalin në debat me Albin Kurtin e Visar Ymerin.

Ajo shtoi se Lëvizja Vetëvendosje, është përgatitur dhe e bashkuar me qytetarët për ta mbrojtur votën si kurrë më parë, pot kërkoi nga qytetarët që të dalin të votojnë patjetër.

“Vetëm kështu vuloset fitorja e Lëvizjes Vetëvendosje. Më 11 qershor, me numrin 35, populli do ta rrëzojë përtokë planin për instalimin e diktaturës së krimit. Më 11 qershor, me Lëvizjen Vetëvendosje, në Kosovë do të nisë festa e demokracisë!”, ishte premtimi i Dërgutit në Mitrovicë./ Periskopi

Reklamë
Reklamë

Molliqaj tregon pse u prish opozita e bashkuar

Periskopi.com Uncategorized

Në tubimin zgjedhor të Vetëvendosjes në Deçan, sekretari organizativ dhe kandidati për deputet, Dardan Molliqaj, tha se në këto zgjedhje janë 2 koncepte, janë 2 grupacione.

Sipas tij, nga njëra anë janë partitë e pazareve nga ana tjetër është Lëvizja Vetëvendosje me programin e saj.

“Përfaqësohen dy modele: nga njëra anë janë ata që nuk e futën UÇK-në në Kushtetutë, nuk i futën veteranët në Kushtetutë, por që i futën nëpër lista për t’u marrë votën në zgjedhje”, tha Dardan Molliqaj në këtë tubim.

Molliqaj tha se Vetëvendosje është për alternativën që do ta bëjë Kosovën si Prishtinën, sepse Prishtina është zgjidhja dhe zhvillimi.

“Na akuzuan se e prishëm opozitën e bashkuar. Po, sepse Ramush Haradinaj kërkoi që ne të shkonim me klanin Pronto në koalicion. Dhe ne i thamë jo”, ka thënë Molliqaj në fjalën e tij, teksa ka folur për jokonistencën e Haradinajt.

“Fitorja e Vetëvendosjes e shpëton Kosovën. Por kësaj fitoreje nuk i shpëtojnë të korruptuarit, nuk i shpëtojnë kriminelët, nuk i shpëton SHIK-u. Vota për Vetëvendosjen dhe Albin Kurtin kryeministër është votë për barazi, është votë për zhvillim”, tha kandidati për deputet Dardan Molliqaj, njofton zyra e Vetëndosjes.

Ndërsa Visar Ymeri, në tubimin elektoral të Deçanit, kryetari i Vetëvendosjes, Visar Ymeri, ka thënë se pas një jave do të jetë dita e partisë të cilës i prin. Kurse për “Fillimin e Ri” të premtuar nga partia që ishte në pushtet vazhdimisht gjithë këto vite, tha se nuk është asgjë tjetër përveçse pushteti i këtyre 18 vjetëve.

“Nuk ka kurrfarë fillimi të ri, mbase janë disa emra të ri që do të vazhdojnë avazin e vjetër. Një Kosovë e re do të jetë një Kosovë e cila e zhvillon ekonominë e vet, një Kosovë që përfundimisht ia mbyll derën Serbisë, dhe jo një Kosovë që deporton aktivistë nga Shqipëria”, tha Visar Ymeri në tubimin zgjedhor në Deçan.

Ai është zotuar se Republika e Kosovës do ta ketë ushtrinë e vet.“Ne jemi të vendosur që ta themelojmë këtë ushtri. Themelimi i ushtrisë do të thotë t’i vendosim ndjenjat tona historike në shërbim të paqes në botë. Ne e shohim pavarësinë kur edhe ne i kontribojmë NATO-s dhe jo kur iu kërkojmë lëmoshë”, ka thënë para deçanasve Visar Ymeri.

Ai tha se po ashtu se qeverisja e Vetëvendosjes do të angazhohet që të marrim më shumë aty ku tashmë ka shumë dhe të japim më shumë aty ku ka nevojë më shumë.

Tubimi u hap me fjalën e kryetarit të Vetëvendosjes në Gjakovë dhe kandidati për deputet, Driton Çaushi. Ai tha se qytetarët e Deçanit dhe gjithë Kosovës e kanë ndarë mendjen për ndryshim.

“Qytetarët e Deçanit e kanë këtë zgjedhje më të qartë se kushdo tjetër, dhe kjo për shumë arsye. Deçanasit e njohin konsistencën e Vetëvendosjen në qëndrimet e saj”, tha Driton Çaushi para deçanasve.

Çaushi tha se janë pak ditë para një dite tepër të rëndësishme, para 11 qershorit, për të cilën ditë tha se përkundër të gjithave duhet të gjemë energji, duhet të gjejmë fuqi pas këtij tubimi për një çështje që na bashkon të gjithëve.

“Nuk guxojmë të ndalemi për shkak se këto mundësi nuk na jepen shumë shpesh. Vetëvendosje si asnjëherë më parë pas datës 11 qershor do të bëjë një ndryshim rrënjësor në mënyrën se si trajtohet shteti dhe drejtësia”, tha ndër të tjera kandidati për deputet, Driton Çaushi.

Në tubimin zgjedhor të Deçanit, nënkryetarja dhe kandidatja për deputete, Fatmire Mulhaxha-Kollçaku, tha se jemi shumë afër ndryshimit.

“Besoj se Lëvizja ka dhënë mjaftueshëm prova se ka ardhur koha e Lëvizjes Vetëvendosje”, tha Fatmire Mulhaxha-Kollçaku.

Ajo tha se pabarazia është e shprehur kudo, por më së shumti në shëndetësi. Dhe për këtë Mulhaxha-Kollçaku premtoi se Vetëvendosje këtë do ta ndryshojë me shërbime cilësore dhe qasje në to për të gjithë qytetarët.

Reklamë
Reklamë

Kjo është ushtarja e UÇK-së, kandidate për deputete nga radhët e Vetëvendosjes (Foto)

Periskopi.com Lajme

Gjatë Luftës kreu një varg detyrash, si udhëheqëse e Njësitit të Vajzave në Likovc, Zona Operative e Drenicës; pastaj në Zonën Operative të Dukagjinit përgatiti një njësit tjetër të vajzave, ndërsa më vonë kreu detyrën e oficerit për informim, kjo është Jeta Veliu (Hyrie Veliu me nofkën e luftës Jeta).

Tani ajo është kandidate për deputete për deputete të Kuvendit të Kosovës, nga radhët e Vetëvendosjes.

Periskopi ka gjetur fotografi të saj sa ishte ushtare. Ajo në listën e VV-së mbanë numrin 87.

Është e martuar dhe ka një vajzë.

Mbaroi studimet në degën e Gjuhës dhe Letërsisë Shqipe në Universitetin e Prishtinës.

Hyria qysh herët mori pjesë nëpër demostrata kundër pushtuesit, ndërsa si studente u angazhua drejtpërdrejt në Lëvizjen studentore të kohës, te Klubi Kulturor i Studentëve dhe Unioni i Pavarur, duke u bërë pjesë e organizimeve dhe veprimeve konkrete, përfshirë protestat studentore të 1 Tetorit 1997.

Ajo u bë pjesë e Ilegales në Lëvizjen Popullore të Kosovës, kontaktet e së cilës e vunë në lidhje me UÇK, pjesë e së cilës u bë më 1997. Në kohën e lëvizjeve të mëdha ishte jo veç veprimtare ilegale, po edhe shkruante për gazetën studentore Bota e Re, si dhe organin e LPK Zëri i Kosovës. / Periskopi

 

 

 

 

Reklamë
Reklamë

Kurti: Qytetarët dhe i gjithë populli ynë kanë nevojë për një qeveri që nuk i sundon, por u shërben

Periskopi.com Lajme

Në fjalimin e tij para qytetarëve të Pejës në tubimin e mbajtur në këtë komunë, Kandidati për Kryeministër, Albin Kurti, tha se qytetarët e Pejës dhe mbarë Kosovës janë njerëz të mirë që nuk i kanë merituar këto qeveri të këqija.

“Qytetarët dhe i gjithë populli ynë kanë nevojë për një qeveri që nuk i sundon, por u shërben. Ne duam të qeverisim se duam të shërbejmë”, u shpreh Kurti.

Ai tha se çdo ditë e kemi parë diktaturën prej lart, por me 11 qershor do ta shohim demokracinë prej poshtë. Si dhe shtoi se më qeverisjen e Vetëvendosje-s nuk ka më as korrupsion dhe as krim, por ka demokraci dhe zhvillim, mirëqenie e punësim, zhvillim e begati.

“Në këto 18 pas luftës, Kosova ishte shtet me deklarata politikanësh, shtet i deklaruar zyrave, shtet deklarativ. Me VV vjen përmbajtja, e vërteta, e drejta, Lëvizja. Dy koalicionet që më shumë janë një koalicion në dy lista janë përvoja e hidhur e qytetarëve. Vetëvendosje është shpresa e re e këtij vendi”, shtoi tutje.

“Unë i kam dëgjuar shpesh e shumë jo pak politikanë dhe të afërm të tyre teksa ironizojnë korrupsionin në Kosovë duke thënë që korrupsion ka gjithkund edhe në Perëndim. Pasuria e vjedhur nga buxheti duhet të konfiskohet dhe do të konfiskohet”, tha po ashtu Kandidati për Kryeministër, Albin Kurti.

Ai premtoi se se me qeverinë e Vetëvendosje-s merr fund terri i krimit dhe drita e drejtësisë, duke shtuar se qeverisja e Vetëvendosje-s sjell vende pune sepse me të vjen edhe prodhimi edhe tregu për atë prodhim.

“Me 11 qershor u thoni mjaft dhe kurrë me qeverive të pasluftës. Vetëvendosje është emri i ndryshimit dhe 35 është numri i fitores’, tha ndër të tjera Kurti, duke shtuar se Lëvizja Vetëvendosje do t’i respektojë të drejtat e pakicës serbe, jo sepse e kërkon Beogradi, por se ne besojmë te respektimi i të drejtat e njeriut.

Reklamë
Reklamë