Tronditet koalicioni PAN! Kaq vota i humbi nga viti 2014

Periskopi.com Lajme

Pavarësisht se PDK-ja dhe koalicioni PAN e shohin veten si fituese të këtyre zgjedhjeve, ata vlerësohen si humbësit më të mëdhenj të 11 qershorit. Kjo pasi, grupi prej 12 partish nuk arriti të marrë më shumë se 33,92% të votave.

Ky rezultat i pamundëson këtij koalicioni që si i tillë të formojë qeverinë. Andaj këtij grupi partish i duhet edhe një koalicion paszgjedhor për formuar institucionet. Duket se problemet për formimin e qeverisë fillojnë pikërisht tani kur koalicioni PAN do të bllokojë sërish instituionet e vendit dhe funskionalizimin e tyre. Kjo për shkakun se asnjë parti tjetër nuk do të bashkëqeverisë me ta.

Kështu, bashkë me PDK-në janë edhe ky grup partish që llogariten si humbës në këto zgjedhje: Aleanca për Ardhmërinë e Kosovës, Nisma për Kosovën, Partia e Drejtësisë, Lëvizja për Bashkim, Partia Shqiptare Demokristiane e Kosovës, Partia Konservatore e Kosovës, Alternativa Demokratike e Kosovës, Republikanët e Kosovës, Partia e Ballit, Partia Socialdemokrate, Balli Kombëtar i Kosovës.

Ndonëse zyrtarë nga këto parti falendëruan qytetarët për përkrahje për ‘fitoren’ e tyre, ata nuk deshën të komentojnë nëse janë fitues apo humbës të këtyre zgjedhjeve.

Zyrtari nga AAK-ja, Muhamet Kelmendi mendon se humbës ishte vetëm PDK-ja, pasi partitë tjera në koalicion kanë mbetur të njëjta me rezultat.

“Tash dihet se koalicioni ka pësuar një humbje relative. Ndërsa, partitë si AAK dhe NISMA, kanë mbetur të njëjta në përqindjen e vitit 2014 ose janë edhe më shumë vota. Dështimi është i PAN pse nuk i ka numrat për qeverisje dhe se ka për detyrë të gjejë partner të ri”, thekson Kelmendi.

Sipas tij, tani ekzistojnë vështirësitë në gjetjen e partnerëve.

“Kushtetuta e ka përcaktuar qartë mënyrën e ndërtimit të qeverisë. Shpjegim të mëtejshëm ka dhe në vitin 2014 edhe Gjykata Kushtetuese. Shpresoj se do të gjenden forca për të ndërtuar një qeveri funksionale. Natyrisht se jo. Edhe pse minoritetet i kanë 20 deputetë dihet se me ata nuk bëhen  numrat”, ka thënë ai.

Sipas Kelmendit, PAN nuk mund të ndërtojë qeveri pa gjetur së paku edhe disa deputetë të subjekteve te tjera.

Dy koalicionet e mundshme

“Se a do të arrijnë këtë mbetet të shihet. Mendoj se juridikisht ekzistojnë dy mënyra të mundshme: PAN dhe LDK ose AKR nëse i ka mbi 5 deputetë; dhe VV dhe LDK e AKR. Pra, opsionet janë të hapura dhe shumë do të varet edhe nga Presidenti, se a do t’ia jep ai mandatin partisë së dytë, nëse nuk ndërtohet qeveria nga PAN”, ka theksuar Kelmendi për “Bota sot”.

Por si humbës këtë koalicion e shohin njohësit e çështjeve politike.

Kështu analistja politike Luljeta Aliu, ka thënë për “Bota sot” se rezultatet e këtyre zgjedhjeve si fitues kryesor e nxjerrin vetë qytetarin e Kosovës, sepse ai ka arritur të vetëdijësohet rreth të drejtave, mirëpo edhe detyrimeve të tij për zhvillimin dhe mbarëvajtjen e proceseve demokratike.

“Demokracia nuk funksionon me qytetarë pasivë e të dëgjueshëm. Përkundrazi, mendimi kritik i një mase qytetarësh të arsimuar dhe të pavarur është sine qua non për avancimin e secilës shoqëri demokratike. Votuesi i Kosovës ka bërë përvojën e nevojshme, por edhe ka përjetuar zhgënjime të mjaftueshme për t’u këndellur dhe për të marrë vendimet e duhura”, ka theksuar ajo.

Sipas Aliut, koalicioni PAN, në bazë të rezultateve preliminare, del si fitues i zgjedhjeve, por me shumëfish votues më pak se zgjedhjet e kaluara.

“Krahasuar me rezultatet e vitit 2014, kur PDK kishte 222,181 votues, AAK 69,793 dhe NISMA 37,680 sosh, të cilat përkthyer në përqindje do të ishin mbi 45 %, rezultatet e këtij viti janë nën pritjet e kalkuluara. Totali i votuesve për koalicionin PAN këtë vit ishte 236,990, pra 92,664 votues më pak se herën e kaluar. Kjo është rënie në shifra, ndaj së cilës nuk mund të qëndrojnë neglizhent asnjëri prej subjekteve të këtij koalicioni. Unë mendoj se përshkrimi i koalicionit si krahu i luftës e dëmtoi koalicioni PAN, sepse 18 vite pas luftës qytetari nuk identifikohet më me narracionin e heroizmave të komandantëve”, ka thënë tutje ajo për “Bota sot”.

Por si humbëse në këtë zgjedhje, ajo e sheh edhe LDK-në.

“Parë nga një perspektivë konceptuale, humbëse ishin partitë, të cilat nuk kanë ditur të përkthejnë kritikat ndaj tyre në një ofertë programore, e cila do kuptohej si zgjidhje e atyre kritikave. Humbja erdhi, sepse partitë filluan më shumë vonesë ta marrin seriozisht kërkesën për ndryshim nga ana e qytetarit. Ndërsa, VV e kapi këtë moment dhe u tregua shumë vigjilente”, ka vlerësuar analistja Aliu.

Si humbës absolut të këtyre zgjedhjeve, koalicionin PAN e sheh edhe analisti Blerim Burjani. Madje ai ka thënë se ky koalicion duhet t’i jap dikujt tjetër postin e kryeministrit për të evituar eskalimin e situatës në vend.

“Humbës në kuptimin e synimeve gjithsesi, ishte një përllogaritje e dobët dhe një parashikim i dobët i këtij koalicioni e tash shteti ndodhet në të njëjtën gjendje që ishte në 2014, pa qeveri dhe pa numra. Pra, PAN duhet t’ia jep dikujt tjetër postin e kryeminsitrit, në të kundërtën, shteti mund të shkojë në zgjedhje jo më larg se katër muaj, pra nëse veç sërish jep këtë post në rregull, mund të dalë diçka, të nxjerret një qeveri e lodhët me numra, pasi në të kundërtën, shpresat janë të vogla shumë, për këtë koalicion, i cili është fitues me numër jo mjaftueshëm mandatesh”, ka thënë Burjani për “Bota sot”.

Ndryshe, zgjedhjet e jashtëzakonshme të 11 qershorit nxorën koalicionin PAN-in fitues me vetëm 32% të votave, Lëvizja Vetëvendosje u rendit e dyta me 27% të votave, derisa në vendin e tretë doli koalicioni LDK-AKR dhe Alternativa me 25 % të votave.

Qeveria në largim ndau 200 mijë euro për Aeroportin e Gjakovës

Periskopi.com Lajme

Qeveria në largim e Kosovës ka ndarë 200 mijë euro për Aeroportin e Gjakovës.

Këto mjete janë të dedikuara për mbulimin e shpenzimeve të sigurisë dhe nevojave të tjera emergjente.

Ndarja e tyre u bë në mbledhjen e sotme të Qeverisë.

Befason Jakup Krasniqi, ka një propozim se kush duhet ta formojë qeverinë e re

Periskopi.com Lajme

Jakup Krasniqi që për shumë vite ishte kryetar i Kuvendit të Kosovës ka një propozim.

AI nuk zgjodhi të ishte kandidat për deputet por thotë se Kushtetuta e Kosovë s e sidomos vendimi i vitit 2014 i Gjykatës Kushtetuese, ka sqaruar shumëçka dhe nuk ka lënë shumë zgjidhje.

Krasniqi sugjerim ka një Qeveri gjithëpërfshirëse edhe pse thotë se është vështirë të bëhet.

Lexoni arsyet e tij për gjithqka:

Vendimet e mëdha nuk i marrin njerëzit e vegjël!

Kushdo që ka përcjellë zhvillimet politike, sidomos nga viti 2014 duhet ta ketë më shumë se të qartë se kush mund ta bëjë Qeverinë në Kosovë. Kushtetuta e sidomos Vendimi i vitit 2014 i Gjykatës Kushtetuese, ka sqaruar shumëçka dhe nuk ka lënë shumë zgjidhje, ketë duhet të kuptojnë se paku çdo politikanë apo kandidatët për Kryeministër që u nominuan nga partitë a koalicionet parazgjedhore në zgjedhjet e 11 qershorit 2017. Kush nuk e ka kuptuar ketë, nuk ka kuptuar asgjë.

Në situata të tilla të mbarsura më shumë egoizëm e armiqësi politike, zgjidhja e problemit nuk është të uni, por te ti-ja. Uni e ka kuptimin e plotë vetëm aty ku shkalla e rrezikshmërisë është e madhe dhe kërkohet integritet i lartë njerëzor (kujtoni flijimin e Jasharëve në krye me Adem Legjendarin, kthesën që bëri ai flijim dhe askush tjetër). Pra, në momente të mëdha kthese, kërkohet urtia e zemërgjerësia e madhe në vendimmarrje. Kujtoni të djeshmen kur kërkohej flijimi, sot nuk po kërkohet Flijimi i Madh, po, po kërkohet një Vendim i Madh për kombin e shtetin.

Në një situatë si kjo e jona, sygjerimi im do të ishte: Një Qeveri gjithëpërfshirëse, ku do të merrnin pjesë të gjitha partitë politike sipas fuqive politike që kanë marr nga qytetarët e Republikës, por edhe kjo është goxha e pa mundur në ketë ambient e kulturë politike që karakterizohet nga kundërthënie të shumta deri në pa durueshmëria ekstreme. Krejt çështja është: si ta mundim ketë animizitet e pa durueshmëri ekstreme në politikën tonë?! Interesi politik është që gjithsecili ta mund vetveten dhe brezave t’ua lemë një kulturë politike për lakmi, ashtu siç na e lan trimat e motit flijimin për liri. Liderët tanë a e kanë ketë kurajo politike?

Pse po e kërkoj ketë?

Janë disa çështje të mëdha politike që kërkojnë më shumë sesa një qeverisje të thjeshtë prej 61 numrave. Pra janë disa çështje që kërkojnë një konsensus nacional në mes të gjitha partive politike shqiptare e minoritare, siç janë: Përfundimi i demarkacionit me Malin e Zi; Riformatizimi i Bisedimeve me Serbinë me ndërmjetësimin e Brukselit; Përmbyllja e shtetndërtimit; Zyrtarizimi i Ushtrisë, Reformimi i Sistemit të Drejtësisë; krijimi i politikave të qarta zhvillimore dhe reforma të tjera në fushën e investimeve, të administratës publike, në arsim e shëndetësi etj. Të gjitha këto çështje janë ekskluzivisht të ekzekutivit e të askujt tjetër.

Nëse këto reforma të interesit nacional do të kryheshin brenda dy, tri a katër viteve me një konsensus të gjerë nacional dhe pasi të përfundohej një Reformë e duhur Zgjedhore, do të mund të shkohej në zgjedhje të reja. Mbase, edhe do të krijoheshin dy blloqe të mëdha ideologjike në politikën tonë. Natyrisht për t’u arritur këto gjera tepër të rëndësishme, duhet të ketë vullnet politik, përgjegjësi politike, dashuri për kombin e shtetin dhe mendim politik të shkollës se Rilindësve! Rilindësve që na lan kombin dhe të qenurit evropian. Vendit e kombit i duhen Rilindës të kohës!

Koalicionin gjithëpërfshirës është domosdoshmëri për qeverisjen e vendit për arsyet që i përmenda më lartë. Kandidatet për Kryeministra duhet ta dinë se interesat nacionale kurdoherë janë mbi interesa e dëshira individuale. Madje ata duhet ta dinë se në Kosovë ka personalitete që dinë e donë të qeverisin më mirë sesa këta që po pretendojnë, por përgjegjësia momentalisht bie mbi këta që i kemi! Vendimi i peshuar mirë edhe i këtyre kandidatëve do të ishte sa i pranueshëm aq edhe i mundshëm, por vetëm kërkohet pak vullnet pozitiv politik për kthesën e duhur politike, të cilën po e kërkon vendi e kombi. Nga vendimi i këtyre njerëzve varet e ardhmja e vendit.

Andaj kërkoj nga partitë politike shqiptare që kanë marrë mbështetje qytetare në zgjedhjet e 11 qershorit 2017, të marrin pozicionin politik që i duhet shtetit e kombit e jo ambicieve politike të individëve a grupeve të ngushta politike a parapolitike. Kujtoni: këtu ku jemi e kështu si jemi që sa vite, jemi si rezultat i egove të sëmura te individit. Nuk mendoj se vendi mund të udhëhiqet nga egot e sëmura të akëcilit njeri.

Një gjë dihet: Vendimet e Mëdha nuk i marrin njerëzit e vegjël!

  1. S.

Mendimi i shfaqur në ketë opinion është kryekreje autorial. Kjo është bindja ime politike dhe bindjet e mija nuk frikësohem që t’i bëjë publike në kohën e duhur.

Probleme serioze për formimin e Qeverisë së ardhshme

Periskopi.com Lajme

Kosova mund të futet në bllokadë rreth formimit të Qeverisë së re pas zgjedhjeve të parakohshme parlamentare që u mbajtën më 11 qershor, parashikojnë njohës të çështjeve politike.

Ata thonë se bllokada rreth formimit të Qeverisë së re mund të diktohet nga rezultati përfundimtar i zgjedhjeve, e që sipas rezultateve të deritanishme asnjëra nga subjektet politike nuk kanë fituar më shumë se 35 për qind të votave.

Nga 97 për qind e votave të numëruara nga Komisioni Qendror i Zgjedhjeve (KQZ), koalicioni i Partisë Demokratike të Kosovës, Aleancës për Ardhmërinë e Kosovës dhe partisë Nisma ka fituar 34.2 për qind të votave.

Pasohet nga Lëvizja Vetëvendosje me 27 për qind, kurse koalicioni Lidhja Demokratike e Kosovës, Aleanca Kosova e Re dhe Alternativa me 25.7 për qind të votave.

Derisa, Lista Serbe ka fituar mbi 5 për qind.

Politologu Belul Beqaj, profesor i Shkencave Politike, thotë për Radion Evropa e Lirë se mund të ketë vështirësi të mëdha në krijimin e Qeverisë së re pas zgjedhje të parakohshme parlamentare të 11 qershorit.

“Pas proceseve që janë zhvilluar kohëve të fundit besoj që do të ketë probleme serioze për formimin e Qeverisë së ardhshme për arsye se rezultati përfundimtar i zgjedhjeve është i përafërt. Në një situatë të rezultateve të përafërta të tri blloqeve do të jetë shumë vështirë të gjendet një emërues i përbashkët”, ka theksuar Beqaj.

Për formimin e Qeverisë së Kosovës, janë të domosdoshme të paktën 61 vota në Kuvend. Koalicioni apo partia fituese, kryesisht llogaritë në koalicione paszgjedhore edhe në pakicat, si kategori kushtetuese e domosdoshme për përfshirje në Qeveri.

Avni Mazreku, njohës i rrethanave politike dhe profesor i së Drejtës Evropiane, duke folur për Radion Evropa e Lirë, thotë se duhet të ketë një konsensus politik nacional si i vetmi instrument që mund të shpie përpara agjendën shtet-formuese të Kosovës.

“Faktorët politik parlamentar pas zgjedhjeve të 11 qershorit do të duhet të arrinin në një pikë konsensuale politike pavarësisht se në cilin krah do t’i poziciononte rezultati si parti në pushtet apo opozitare, për tema me interes nacional të ketë kompromis politik”, ka theksuar Mazreku

Ndërkohë, nëse do të arrihet që të formohet Qeveria e re e Kosovës, sipas analistëve politikë, Kosovën do ta presin çështjet për të cilat mbeten të papërfunduara nga Qeveria në largim dhe për të cilat vendi shkoi në zgjedhje.

Belul Beqaj, thotë se janë pikërisht çështjet si Demarkacioni i kufirit me Malin e Zi dhe Asociacioni i komunave me shumë serbe, me të cilat do të merret Qeveria e re.

“Dy temat që kanë qenë oguri i zi deri më tani fatmirësisht apo fatkeqësisht do të jenë çështjet imediate që do të mundohet për t’i zgjedhur Qeveria e ardhshme. Këto janë detyrat që janë trashëguar dhe kanë shërbyer për të shkuar në zgjedhje të parakohshme”, thekson Beqaj.

Në anën tjetër, Avni Mazreku, thotë se Qeverinë e re e pret një agjendë jo e lehtë politike.

“Qeverinë e re e pret një agjendë jo shumë e lehtë politike. Në fakt, pikat kritike për të cilat ka dështuar koalicioni i cili ka qeverisur vendin që nga viti 2014, e që ajo agjende ka qenë jashtëzakonisht e rëndësishme në kontekst të shtet-ndërtimit të Kosovës. Koalicioni fitues i zgjedhjeve e pret një agjendë siç është procesi i ngecur i shtet formimit të Kosovës”, thekson Mazreku.

Kosova, që prej shpalljes së pavarësisë së saj, nuk ka pasur një Qeveri të qëndrueshme që ka kryer mandatin kushtetues prej katër vjetësh, meqë pothuaj secila prej tyre është detyruar të dorëhiqet pas votimeve të mosbesimit në Kuvend.

Edhe zgjedhjet e parakohshme parlamentare të cilat janë mbajtur më 11 qershor pasuan votimin në Kuvend të një mocioni mosbesimi ndaj Qeverisë më 10 maj.

Lajmi i keq për punëtorët e administratës, Haradinaj ka një paralajmërim

Periskopi.com Lajme

Kandidati për Kryeministër i koalicionit PDK-AAK-NISMA, Ramush Haradinaj ka premtuar në Rahovec se kushdo që punon në administratën e Shtetit dhe nuk kryen punën siç duhet do të shkojë në shtëpi.

Ka thënë se nëse është nevoja do të zbrazet krejt administrata për të sjell njerëz adekuat për të punuar në shërbim të qytetarëve.

“Nëse është nevoja krejt e zbrazim. Nuk na duhen shefa shumë. Kush nuk kryen punë shkon te shtëpia”, ka deklaruar Haradinaj.

Këtë përgjigje, Haradinaj e ka dhënë duke folur për një problem të një bujku, i cili ka thënë se kanë probleme me administratën e Ministrisë së Bujqësisë.

Me këtë rast, Haradinaj ka folur edhe për shtesat për ata që kanë fëmijë, duke thënë se shtesa të tilla marrin qytetarët e Maqedonisë, Serbisë e Gjermanisë.

“Ka me ardh një ditë kur keni me i marrë shtesat për fëmijë”, ka premtuar Haradinaj, në Rahovec.

Kandidati për Kryeministër ka premtuar se do të largohet edhe pagesa në kufi për qytetarët që jetojnë jashtë Kosovës.

“E kemi marrë prej themelit punën”, ka thënë Haradinaj.

Limaj tregon postin që dëshiron pas zgjedhjeve

Periskopi.com Lajme

Kreu i Nismës për Kosovën, Fatmir Limaj ka thënë se Nisma do ta ketë vendin meritor në qeverinë e ardhshme qe sipas tij do të drejtohet nga Ramush Haradinaj.

I pari i Nismës për Kosovën ka thënë se rastet e tij gjyqësore janë në përfundim e sipër duke shtuar de do të jetë pjesë e qeverisë.

Limaj në TV Dukagjini ka thënë se në qeverisjen e ardhshme do të ketë ç’kapje te shtetit dhe reforma fiskale.

Limaj poashtu ka thënë se AAK e Nisma nuk do të ndryshojnë qëndrimin e tanishëm për asociacionin dhe demarkacionin

Në bazë të marrëveshjes mes PDK – AAK-NISMA, kësaj të fundit i takon posti i zv/kryeministrit.

Haki Abazi

Haki Abazi tregon se cili koalicion do të shpëtonte Kosovën

Periskopi.com Lajme

Njohësi i çështjeve politike, Haki Abazi ka thënë se koalicioni i cili do ta shpëtonte shtetin do të ishte Lidhja Demokratike e Kosovë- Lëvizja Vetëvendosje- Aleanca për Ardhmërinë e Kosovës- Nisma për Kosovës së bashku me shoqërinë civile.

“ Koalicioni i Madh per Shtetin e pensionon krimin dhe korrupsionin. #LDKVVAAKNISMAShooqeriCivile”, thotë ai.

Ndryshe, java e ardhshme pritet të jetë përfundimtare për zyrtarizimin e koalicioneve parazgjedhore ndërmjet partive politike, kjo pasi që Komisioni Qendror i Zgjedhjeve, ka caktuar datën 19 maj, si koha e fundit e certifikimit të partive dhe listave të kandidatëve për deputetë të Kuvendit të Kosovës.

Skandali i kryeministrit Mustafa në emërimin e drejtorit të Agjencisë së Punësimit

Periskopi.com Lajme

Këshilli i Pavarur Mbikëqyrës për Shërbimin Civil të Kosovës, ka identifikuar parregullsi në vendimin e Qeverisë së Kosovës, të udhëhequr deri dy ditë më parë nga Kryeministri në largim Isa Mustafa, për emërimin e Drin Haraqijes drejtor të Agjencionit të Punësimit.

Bazuar në një konstatim të nxjerrur nga Këshilli i Pavarur Mbikëqyrës për Shërbimin Civil të Kosovës, të cilin ka arritur ta sigurojë edhe “Gazeta Blic” Qeveria e Kosovës ka bërë emërimin e Haraqijes si drejtor të Agjencionit të Punësimit, para se të shpallej konkursi nga Ministria e Administratës Publike.

Konkursi për drejtor në Agjencinë e Punësimit të Ministrisë së Punës dhe Mirëqenjes Sociale, ishte shpallur nga MAP me datën 13.04.2017 ndërsa Qeveria e Kosovës kishte marrë vendim që ta emëroi anëtarin e përzgjdhur Drin Haraqijen si drejtor të kësaj Agjencie me datën 05.04.2017 pra rreth 1 javë para konkursit.

Pas gjetjes së kësaj parregullsia, Këshilli i Pavarur Mbikëqyrës për Shërbimin Civil të Kosovës, ka kërkuar nga Qeveria e Kosovës pezullim të menjëhershëm nga detyra e drejtorit të Agjencionit të Punësimit, Drin Haraqijes deri në marrjen e një vendimi përfundimtar nga ana e KSHPMCK-së.“Duke u bazuar në nenin 80 paragrafin 3 të Ligjit Nr.3/1-149 për Shërbimin Civil të Republikës së Kosovës i cili përcakton se: “Të gjitha efektet e veprimeve administrative kundër të cilave është paraqitur ankesë ose të cilat janë në shqyrtim nga ana e organit kompetentë për zgjedhjen e kontesteve dhe ankesave pezullohen deri në marrjen e vendimit përfundimtar”, si dhe duke u bazuar në nein 128 paragrafit 128.1 të Ligjit Nr.02/L-28 për Procedurat Administrative, i cili përcakton se: “Ankimi administrativ”, Qeveria e Republikës së Kosovës është e obliguar që të bëjë pezullimin e vendimit Nr.08/140 të datës 05.04.2017 për emërimin e z. Drin Haraqia në pozitën e Drejtor i Përgjithshëm në Agjencinë e Punësimit të Ministrisë së Punës dhe Mirëqenies Sociale, deri në marrjen e vendimit përfundimtar nga ana e Këshillit të Pavarur Mbikëqyrës për shërbimin Civil të Kosovës“, thuhet në këtë vendim.

Ky konstatim i KSHPMCK-së ka ardh pas një ankese të bërë nga Defrim Rifaj, më datën 20.04.2017 kundër përzgjedhjes së drejtorit të përgjithshëm të Agjencionit të Punësimit, dhe i është përcjellë Kryeministrit në largim Isa Mustafa, ish-ministrit të MAP-së, Mahir Yagcilar dhe ish-ministrit të MPMS-së, Arban Abrashi, nga anëtari i KPMSHCK-së, Eshref Shaban më 24 maj të këtij viti.

Më poshtë ju pasqyrojmë vendimin e KPMSHCK-së:Ndryshe, Ministria e Punës dhe Mirëqenies Sociale sot ka lansuar Agjencinë e Punësimit të Republikës së Kosovës, përmes së cilës do të ofrohen mundësi për shërbimet e reja të punësimit.

Kujtim Shala e ‘kryqëzon’ Hajredin Kuçin

Periskopi.com Lajme

Ish – zëvendëskryeministri i Kosovës, Kujtim Shala, nga radhët e LDK-së nuk është ndalur me pyetje drejtuar Hajredin Kuçit. Kjo ndodhi në Klan.

E pyeti përse e prishën marrëveshjen, e pyeti nëse kishte pakënaqësi në qeverisje dhe ia përmendi shumë gjëra që kanë ndodhur gjatë qeverisjes së përbashkët.

Shala i tha se marrëveshja themelore mes dy partive nuk e njihte mocionin.

Shala tha se kanë kërkuar zgjedhje në shtator, pra edhe tre muaj shtesë, e jo në qershor, qysh PDK kërkonte të prishej koalicioni. Këtë kërkesë sipas Shalës e kanë bërë që të kenë mundësi për përgatitje më të mirë.

“Ishim të vetëdijshëm që për kaq pak kohë do të zgjidheshin çështjet e mëdha. Dijeni që krejt opozitën e keni kundër. Përpara do të kemi problemet e vjetra. ka pasur takime. Nuk kishim ndonjë urgjence, ndërsa ju po”, tha Shala.

Janë diskutuar dy variante, që të mbahen bashkë me zgjedhje lokale apo edhe me një muaj diferencë, tha Shala.

Shala asnjëherë nuk u ndal duke ia kujtuar se e kanë shkelur marrëveshjen bazike mes koalicionit./ Periskopi

Vetëvendosje ka një përgjigje për LDK-në, për koalicion parazgjedhor

Periskopi.com Lajme

Lëvizja Vetëvendosje nuk do të bëjë koalicion parazgjedhor me LDK-në.

Anëtarja e Lëvizjes Vetëvendosje Albulena Haxhiu, tha se e përjashtojnë çdo koalicion me PDK-në e LDK-në.

“Ne kemi diskutuar gjatë për koalicionet parazgjedhore dhe për këtë tashmë ka një vendim të Këshillit të Përgjithshëm dhe Kryesisë, që përjashton koalicionin parazgjedhor me PDK e LDK”, tha ajo për Gazeta Blic.

Sipas Haxhiut vetëm Lëvizja Vetëvendosje është e vetmja zgjidhje për qytetarët e vendit.

“Aktualisht jemi duke u angazhuar që vullnetin e qytetarëve ta bëjmë realitet në zgjedhjet e 11 qershorit. Ky vullnet është që Lëvizja VETËVENDOSJE! Si e vetmja zgjedhje për qytetarët, të udhëheqë me institucionet e vendit”.

Haxhiu përfundoi duke thënë se Lëvizja Vetëvendosje është e hapur për koalicione me subjekte të opozitës por edhe me përfaqësues të shoqërisë civile, kurse sa i përket koalicioneve parazgjedhore, është vendim që merret pas zgjedhjeve, dhe se tashmë dihet se përjashtojmë koalicionin me PDK si subjekt i kriminalizuar.

Shkodran Hoti nga zyra për informim, bëri të qartë se nuk do të ndodh një koalicion i mundshëm me LDK-në përderisa në krye të kësaj partie është Isa Mustafa.

“Është herët pasi që dje ra Qeveria, ndërsa sot u shpallen zgjedhjet, qëndrimi jonë për koalicon dihet, ajo që përjashtohet prej koalicionit është PDK-ja, LDK-ja në krye me Isa Mustafën përjashtohet”.

AAK lëshon pe, nuk e do kryeministrinë me patjetër

Periskopi.com Lajme

Ahmet Isufi nga AAK ka folur për koalicionet e mundshme që do të ndodhin pas zgjedhje në Kosovë.

Ai tha se preferojnë nj koalicion sa më të gjerë, por kur u pyet a më mirë me PDK-në apo me LDK-në tha se preferojnë t’i dërgojnë në opozitë të dyja.

Ajo që ka habitur më së shumti është se Isufi tha se AAK-ja nuk e ka me patjetër të mbajë postin e kryeministrit.

“Do të ishte mirë të vazhdonte atë 100 ditshin, por nuk është patjetër që Haradinaj të jetë kryeministër, për të mirën e vendit duam të punojmë”, tha Isufi në Klan./Periskopi

Përplasen keq Driton Selmanaj dhe Memli Krasniqi (Video)

Periskopi.com Lajme

Analisti Driton Selmanaj i është drejtuar Memli Krasniqit në emisionin ‘CLIK’ në RTV21,  duke thënë se Partia Demokratike e Kosovës e ka tradhtinë standard të të sjellurit politik .

“Ju s’dini ndryshe, ta demaskojmë situatën skenar i përgatitur në mënyrë perfide, i organizun në mënyrë përfide i realizun me sukses”, ka thënë ndër të tjerash Selmanaj.

Në anën tjetër Krasniqi iu ka drejtuar Selmanajt duke e thënë se ai i ka folur pesë rrena.

“Pse po bohesh nervoz bash për LDK-në ti?”, ka pyetur Krasniqi.

Përplasjet e tyre kanë vazhduar deri në atë pikë sa Selmanaj i thotë Krasniqit se ka lëndë në gjykatë për kohën kur ka qenë Ministër i Kulturës.

 

Krasniqi tregon pse u rrëzua Qeveria (Video)

Periskopi.com Lajme

Ministri në detyrë i Bujqësisë, Pylltarisë dhe Zhvillimit Rural, Memli Krasniqi, ka folur rreth rrëzimit të sotëm të Qeverisë nga Kuvendi i Kosovës.

Krasniqi, pjesëtar i Partisë Demokratike të Kosovës, ka vlerësuar se ajo çfarë ndodhi sot nuk ishte vetëm zhvillim i ditës së sotme, i ditëve të fundit, mirëpo ishte zhvillim i javëve dhe muajve të fundit.

Sipas Krasniqit, nuk është e drejtë që tani të ndërrohet retorika ndaj PDK’së, vetëm pse deputetët e PDK e kanë votuar mocionin për rrëzimin e Qeverisë.

Krasniqi ka thënë në RTV21 se koalicioni me LDK ka qenë koalicion që ta zhbllokojë vendin nga bllokada e VLAN-it, dhe po ashtu PDK-ja kishte pranuar që kryeministër të bëhej Isa Mustafa vetëm se vendi të mos shkojë përsëri në zgjedhje.

Sipas tij, nuk mund të thuhet se gjatë këtij mandati është punuar apo s’është punuar shumë, pasi që puna e Qeverisë është të punojë dhe ta zbatojë programin e vet.

Krasniqi po ashtu ka thënë se është evidente që ka pasur ngecje në vendimmarrje gjatë kësaj Qeverie, zhagitje të vendimeve dhe pengim të proceseve.

Isa Mustafa ende kryeministër, nesër ka një takim në Qeveri

Periskopi.com Lajme

Isa Mustafa ende është kryeministër, pavarësisht mocionit të votë-besimit.

Ai duhet dërguar punën e tij deri në fund, siç edhe e thotë kushtetuta, deri në zgjedhjet e reja.

Mustafa, nesër, e enjte, 11 maj, ka takim me ish-presidentin e Shqipërisë, bujar Nishanin. Takimi zhvillohet në objektin e Qeverisë, në orën 12:00, raporton Periskopi

Ndryshe, jo vetëm Mustafa. Punën do e vazhdojnë edhe i gjithë kabineti qeveritar.

Ata kanë të drejtë të marrin vendime për çështje teknike, ndërsa moralisht dhe ligjërisht nuk mund të marrin vendime që duhet proceduar në Kuvend.

Ndryshe, zgjedhjet në vendin tonë duhet të mbahen brenda 45 ditësh . Llogaritet se ato do të jenë më 11 ose më 18 maj. Nesër në mëngjes mund të vendoset data, kur presidenti Hashim Thaçi ka ftuar subjektet politike në takim për të caktuar këtë datë./ Periskopi

LDK-në s’e dëmton mocioni, thonë analistët

Periskopi.com Lajme

Në seancën e sotme, me ç’rast edhe u votua mocioni për mos besimin e qeverisë, pati akuza nga të dyja partitë e koalicionit për njëra tjetrën.

E tërë këtë diskurs analisti Petrit Zogaj po e sheh si hipokrizi dhe një armiqësi artificiale, përmes së cilës PDK-ja dhe LDK-ja po bën fushatë.

“Këto dy subjekte në momentin kur kanë parë që duhet të shkojnë tek elektorati, kanë parë që duhet t’i krijojnë këto armiqësi artificiale. Diskutimet në kuvend përpos njëfarë lloj hipokrizie nuk mund të interpretohen ndryshe. Kur vije koha e zgjedhjeve këto bëhen kinse janë armike” ka thënë Zogaj në një intervistë në Zona B të Klan Kosovës.

Ndërsa analisti Astrit Gashi ka thënë që Isa Mustafa do ta ketë të vështirë t’i rikthehet elektoratit të vet duke e akuzuar PDK-në, përderisa ishte pikërisht ai që pas akuzave të mëhershme hyri në koalicion qeverisës me po këtë parti.

“LDK-ja veçse filloi fushatën elektorale dhe sërish kemi një luftë për përfitime politike e jo për parime. Isa Mustafa nuk mundet me e mashtrua më askënd në Kosovë me fjalorin e tij anti-PDK” ka thënë Astrit Gashi.

Ndërsa për analistin Ilir Mirena, mocioni i sotëm nuk është i dëmshëm për LDK-në, përderisa ka thënë që kjo parti do të ruaj pozicionin tek elektorati i saj.

“Kjo çka beri PDK-ja, megjithatë ka arritur të krijoj një lloj përbashkësie brenda LDK-së. Sot nuk e pash asnjë ton armiqësor ndaj Isa Mustafës, e që pikërisht këta deputetë më herët ishin më brutal. Nuk besoj që LDK-së do t’i kthehet në një dëm të madh të brendshëm, ajo do të arrij ti ruaj pozicionet ku i ka tek elektorati” ka thënë Ilir Mirena.

Reagon Ambasada amerikane për rrëzimin e Qeverisë në Kosovë

Periskopi.com Lajme

Ambasada e Shteteve të Bashkuara të Amerikës është deklaruar për zhvillimet e sotme politike në vend, duke premtuar vazhdimin e mbështetjes amerikane për Kosovën.

“Kuvendi e tha fjalën e vet. Përderisa vazhdon procesi i transicionit dhe vendi lëviz në drejtim të zgjedhjeve të parakohshme, ftojmë të gjithë zyrtarët e mbetur në Qeveri që të zotohen përsëri në shërbim të punëdhënësve të tyre – gjegjësisht të gjithë qytetarëve të Kosovës pa dallim. Ne vazhdojmë të jemi të palëkundur në mbështetjen tonë për Kosovën, qytetarët e saj dhe rrugëtimit të saj drejt integrimit të plotë euroatlantik”, thuhet në kumtesë.

Nesër vendoset për datën e zgjedhjeve

Periskopi.com Lajme

Presidenti i Republikës së Kosovës, Hashim Thaçi u ka dërguar ftesat partive politike për takim gjatë ditës së nesërme.

“Po ftesat janë gati dhe ato u janë nisur partive politike. Takimi do të mbahet nesër në mëngjes nga i cili do të dal edhe data e zgjedhjeve”, ka thënë një burim i Indeksonline.

Janë dy data të mundshme kur pritet që qytetarët tu drejtohen kutive të votimi, data 11 dhe ajo 18 qershor, por që për këtë do të vendoset nesër gjatë takimit Thaçi- subjektet politike.

Agim Veliu i dëshpëruar, ka dy fjalë për PDK-në

Periskopi.com Lajme

Nënkryetari i LDK-së, Agim Veliu, ka thënë se votimi i PDK-së për ta rrëzuar qeverinë ka ardhur për arsye se iu ka penguar puna e kryeministrit, Isa  Mustafa.

Veliu madje ka thënë se PDK-ja është tmerruar me rezultatet e suksesshme të qeverisjes së Mustafës dhe sipas tij, nuk kanë qenë të interesuar të marrin vendime të mëdha.

Kryetari i Podujevës ka theksuar se për PDK-në i kanë vlerësimet e njëjta, si ato të mëhershmet, dhe nuk kanë ndryshuar.

“Me të thënë drejtën, vlerësimet tona kanë qenë të njohura kaher, qëndrimi i LDK-së nuk ka ndryshuar asnjëherë, ne i njohim. Jemi në këtë skenë bashkërisht ka vite. është mosrespektim i marrëveshjes  që e kemi pasur, është shkelje e marrëveshjes dhe arsyet i kemi ditur në momentin kur këta kanë filluar kësi lëvizjesh, por tashmë janë krejt të qarta se këta i ka penguar puna e qeverisë, rezultatet e qeverisë për ta kanë qenë tmerruese, dhe nuk kanë qenë të interesuar t’i marrin vendimet e mëdha në të cilat po thirren”, ka thënë Veliu për lajmi.net.

Veliu ka thënë se PDK-ja nuk ka qenë e interesuar të kalohet demarkacioni, por shkuarja në zgjedhje,  problemet me Gjykatën Speciale dhe indikacionet se PDK-ja është në rënie.

“Nuk kanë qenë të interesuar as për demarkacionin ta kalojmë, as nuk kanë qenë të interesuar që në zgjedhje lokale të shkojmë me kryeministrin Mustafa, dhe po ashtu një prej arsyeve kryesore është se Gjykata Speciale, dhe raportet e tyre në mes vete dhe sigurisht indikacionet se këta janë në rënie kanë qenë arsyet kryesore që të ndërpritet ky koalicion”.

Veliu ka treguar se PDK-ja ka dal hapur kundër liberalizimit të vizave, sepse sipas tij, kalimi i demarkacionit do të sillte vizat.

“Këta definitivisht në këto 2-3 ditë e fundit është parë që kanë qenë haptas kundër liberalizimit të vizave, sepse demarkacioni sillte liberalizimin dhe këta kanë qenë kundër demarkacionit dhe nuk kanë qenë të gatshëm ta votojnë, por e kanë përdorur si pretekst për rrëzim të Qeverisë”, ka deklaruar Veliu.

Nënkryetari i LDK-së ka thënë se vetëm dy deputetë të partisë së tij kanë qenë kundër demarkacionit, ndërsa në PDK 7.

“Kanë qenë dy deputetë të LDK-së kundër demarkacionit dhe 7 të PDK-së. Ne e kemi unifikuar grupin dhe kemi dhënë garanca që pas seancës së mocionit do fusin në rend dite demarkacionin dhe këta kanë dashur me pas tjera renditje dhe zhvillime”.

Veliu thotë se është vështir të bashkëpunohet më PDK-në më, pas prishjes së marrëveshjes.

Ai ka theksuar se veprimi i PDK-së mund të jetë një cikël i rrezikshëm për Kosovën sepse do të jetë vështir të ndërtohen institucione të besueshme pas këtyre veprimeve.

“Ne ua kemi bërë me dije edhe gjatë bisedave me ta, sepse kemi pasur disa biseda me ta, ua kemi bërë me dije se nëse prishja ndodhë njëanshëm, do të jetë e vështir pas një cikli tjetër zgjedhor që të gjejmë një gjuhë të përbashkët, nuk po them vija të kuqe, por ne ua kemi bërë me dije se nëse njëanshëm prishet koalicioni do të jetë vështir të bëjmë marrëveshje me ta. Ky mund të jetë një cikel i rrezikshëm për Kosovën sepse pas një procesi të këtillë zgjedhor, do të jetë e vështir të ndërtohen institucione të besueshme”, ka thënë Veliu.

Flet Isa Mustafa, tregon kur mbahen zgjedhjet

Periskopi.com Lajme

Kryeministri i Kosovës Isa Mustafa njëkohësisht edhe kryetar i LDK’së, thotë se në asnjë mënyrë kjo parti nuk pajtohet që në muajin qershor vendi të shkojë në zgjedhje të përgjithshme.

Për më tepër, Mustafa shprehet se pret respektim të marrëveshjes se koalicionit nga ana e PDK’së.

Thotë se nuk pret përkrahje të mocionit të opozitës nga na e PDK’së duke u bazuar në marrëvehsjen e koalicionit./ Blic

A mund të shtyhet seanca e nesërme për mocionin?

Periskopi.com Lajme

Seanca për mocionin e mosbesimit ndaj Qeverisë së Kryeministrit Isa Mustafa, mund të këtë shtyrje vetëm nëse e tërheqin deputetët e subjekteve të cilat e kanë iniciuar.

Ndryshe, çdo tërheqje e mocionit nga Kuvendi që është përcaktuar të mbahet nesër, është shkelje e kushtetutës dhe praktikave parlamentare.

Kështu ka thënë për Indeksonline, eksperti i kushtetutës, Riza Smaka.

“Mocioni sikundër që niset edhe mund të shtyhet apo të tërhiqet. Por kjo vetëm nëse subjektet të cilat e kanë iniciuar e tërheqin. Mirëpo, kjo nuk është praktike parlamentare dhe në parim nuk do të bëhej mirë nëse shtyhet mocioni” ka deklaruar Smaka.

Ai ka shtuar se shtyrja eventuale e mocionit që pritet të mbahet nesër, do të ishte në kundërshtim me ligjin.

“Këtu bëhet fjalë për çështje që është e rregulluar juridikisht dhe është në kundërshtim me ligjin shtyrja e tij. Sikurse që është e ligjshme dhe e drejtë e padiskutueshme e deputetëve që të bëjnë mocionin” ka theksuar njohësi i kushtetutës, Riza Smaka.

Sipas tij, shtyrja e mocionit do të ishte një manovrim i deputetëve.

Në nenin 30 të pikës Kryeministri dhe Qeveria, është e rregulluar edhe çështja e mocionit të mosbesimit për Kryeministrin.

Në këtë nen thuhet se “Mocioni i mosbesimit vihet në rendin e ditës, jo me vonë se pesë ditë dhe jo me pak se dy ditë nga dita e parashtrimit të tij” dhe “Nëse mocioni i mosbesimit dështon, një mocion tjetër i mosbesimit mund të parashtrohet vetëm pas nëntëdhjetë ditëve të ardhshme”, transmeton Indeksonline.

Sekretari i subjektit Nisma për Kosovën, Bilall Sherifi, ka deklaruar se nuk mund të këtë shtyrje të seancës së mocionit, dhe se mund të anulohet vetëm nëse kryeministri Mustafa jep dorëheqje deri një minutë para mbajtjes së seancë.