Pension dhe pagë nga buxheti i shtetit, Muja i ‘hekurt’ që nuk i njeh dënimet e Gjykatës

Kryetari i Komunës së Prizrenit, Ramadan Muja për shumë gjëra mund të hyjë në historinë e Kosovës, por për moshën që ka, e që ende ushtron detyrën e të parit të një komune, mund të thyejë rekord edhe në botë.

Periskopi.com Lajme

77 vjeçari që ka shumë probleme me shëndetin, është bërë një ‘kështjellë’ e pathyeshme në Prizren.

Që kur është bërë kryetar, është përcjellë me skandale e pakënaqësi të shumë qytetarëve. Qyteti ndër më të bukurit në Kosovë, nuk është ngjallur ekonomikisht në mandatet e tij.

Jo vetëm kaq, ai është i dënuar me dy vjet burgim dhe vazhdon të jetë në postin e të parit të Prizrenit, ngase dënimin e ka me kusht që të mos kryej vepra të tjera penale gjatë 3 vjetëve të ardhshëm.

Shumë herë është kërkuar dorëheqja e tij. Një ndër më të rëndësishmet është për shkak të tragjedisë që ndodhi në këtë qytet, ku është shembur një shtëpi në Zonën Historike në Prizren, dhe i mori jetën një fëmije 3 vjeç.

Ramadan Muja, siç mëson Periskopi pavarësisht që nuk shihet askund, dënimeve që ka dhe mospunëve, ai merr pagën e kryetarit, por edhe pensionin.

Nga buxheti i shtetit, Muja, brenda në viti merr rreth 21 mijë euro në vit.

Shtëpia ku banon Ramadan Muja, kryetar i Prizrenit nga Partia Demokratike e Kosovës, ka 250 metra katror dhe kap vlerën prej 150 mijë eurosh, ndërsa ka para të gatshme në bankë 103,416 euro.

Ai vet ka deklaruar se ka rrogën vjetore prej 18,664 euro dhe pensioni prej 1,896 euro.

Nuk përfundon me kaq, kandidati i PDK-së dhe kryetari aktual i Prizrenit, Ramadan Muja, është në mandatin e tij të tretë si kryetar i Prizrenit.

I doktoruar në histori, nuk duhet lënë pa përmendur se ai ka përjetuar edhe Luftën e Dytë Botërore.

Pavarësisht se ai dyshohej për keqpërdorim pronash, PDK-ja e kishte të preferuar dhe e kandidoi gjithmonë për kryetar, raporton lajmi.net

I njohur si refuzues i debateve televizive, i daljes para publikut, shikuesve dhe kundër-kandidatëve, Muja qëndron në fron që rreth 10 vjet, e premtimi më i famshëm i partisë së tij, mbetet 100 milionëshi për Prizrenin, që kurrë më nuk është përmendur pas fushatës.

E në fillim të muajit që kemi lënë pas, më në fund, Gjykata e Apelit ia kishte dalë ta caktojë një datë për një seancë ndaj Ramadan Mujës dhe ish-zyrtarëve të tjerë të Komunës së Prizrenit.

Palëve në këtë proces u ishin dërguar njoftimet e nënshkruara për datën 14 mars, por pak ditë më pas seanca është anuluar.

Ndryshe, pas dënimit në shkallën e parë në mars të vitit 2014, rastin ndaj kryetarit Muja dhe 5 ish-zyrtarëve të tjerë të kësaj komune, që akuzohen për keqpërdorim të pozitës zyrtare, Apeli e kishte kthyer në rigjykim.

Prokuroria ishte ankuar ndaj këtij vendimi në Gjykatën Supreme, që e kishte anuluar vendimin për rigjykim dhe e kishte kthyer rastin për rishqyrtim në Apel./ Periskopi

Prizreni, qytet i mundësive për të rinjtë

Qyteti i Prizrenit është një nga qendrat kryesore të Kosovës dhe si qytet me vlera historike dhe kulturore, si dhe me mundësi shkollimi edhe në nivelin universitar, ofron mjaft mundësi për jetën e përditshme të të rinjve, vlerësojnë disa të rinj të këtij qyteti.

Periskopi.com Lajme

Në rubrikën e përjavshme për të rinjtë “VOX” të Radios Evropa e Lirë, ata thonë se i vlerësojnë mundësitë që i jep ky qytet për të rinjtë, por megjithatë, sipas tyre, perspektiva për ta në këtë qytet është e luhatshme.

Kaltrina Krasniqi, nxënëse e Shkollës së mesme të mjekësisë “Luciano Motroni”, thotë se qyteti i Prizrenit ofron mjaft për të rinjtë.

“Qyteti i Prizrenit është një qendër e mirë kulturore. Sidomos, jeta e natës, për mendimin tim është mjaft e mirë dhe ka çka ofron. Por, edhe ditën, normalisht. Sidomos rinia në Prizren është mjaft e madhe. Ka të punësuar, sepse ka mjaft hotele dhe ka mjaft lokale, mirëpo nuk është punë shumë stabile. Ka perspektivë, mirëpo, mendoj që ndoshta ka nevojë pak më shumë, sidomos për punësim dhe gjëra të tjera”, thotë Kaltrina.

Shenoll Qylangji, student i Shkencave Kompjuterike në Universitetin e Prizrenit, shpreh mendimin se jeta e të rinjve në Prizren është e ngjashme me të bashkëmoshatarëve në qendrat tjera.

“Qyteti i Prizrenit ofron shkollimin së pari, por edhe punësimin e të rinjve. Është qendër turistike. E kemi mjaft të zhvilluar turizmin. Mund të gjejnë punë, nëse janë të interesuar, por është problem, sepse numri është i madh e ndoshta qyteti i vogël. Dikush punon, e dikush në shtëpi”, shprehet Shenolli.

Mendim të përafërt për atë që ofron Prizreni për të rinjtë, ka edhe Xhemajl Çoçaj, nxënës i shkollës së mesme:

“E ke shkollimin, jetën e natës, të gjitha. Është mesatar, normalisht, si gjithkund në Kosovë. Nuk ka diçka që është më e shtrenjtë në Prizren se sa diku tjetër. Unë jam edhe në punë. Pse të mos punoj? Kam kohë për të punuar dhe për të mësuar”.

Alba Fejza, thotë se studion Menaxhmentin Ndërkombëtar në Universitetin e Prizrenit. Ajo vlerëson se të rinjtë në këtë universitet kanë ligjërues mjaft të mirë.

“Në Universitetin e Prizrenit kemi shumë profesorë që vërtetë janë të shquar dhe kanë bërë vendin për të qenë aty. Ka vend ku mund të gjej punë, por unë kam synime tjera, të dal jashtë Kosovës, të vazhdoj për master. Mendoj se mund të shkoj në Angli. Kam synim që patjetër të kthehem në Kosovë dhe të kontribuoj për Kosovën”, shprehet Alba.

Enver Bytyci, student në Fakultetin Juridik në Universitetin e Prizrenit, thotë se qyteti i Prizrenit u ofron mjaft të rinjve, por, sipas tij, punësimi pas përfundimit të studimeve nuk është i sigurt:

“Qyteti i Prizrenit për të rinjtë ofron shumë gjëra, duke filluar që nga shkollimi. Për punësim është puna pak më keq, por megjithatë ka përmirësime. Kështu që, nuk është keq, por mund të jetë edhe më mirë. Po të ishte punësimi më në nivel, do të ishte gjithçka në rregull”.

Edita Hoxhaj, nxënëse e Shkollës së mesme të mjekësisë “Luciano Motroni”, thotë se qyteti i Prizrenit është qytet turistik, që bart vlera historike dhe kulturore. Si i tillë, tërheq mjaft vizitorë dhe rrjedhimisht edhe mundësi për punë për të rinjtë, ndonëse sipas saj, mundësitë e tilla nuk janë krejt të sigurta.

“Ofron gjithçka, qoftë për t’u vizituar nga të tjerët, por edhe ka punë. Ka këtu plot kafiteri, ku ne të rinjtë mund ta kalojmë kohën. E kemi edhe kalanë që është shumë e bukur për t’u vizituar edhe nga të tjerët dhe shumë vizitorë, gjatë stinës së verës por edhe gjatë stinëve të tjera, vijnë këtu për ta vizituar. Nuk janë mundësitë më të mirat, por me këto që i kemi, po përpiqemi ta bëjmë një zgjidhje”, thotë Edita.

Të rinjtë në Prizren shprehin mendimin se ky qytet, për shkak të trashëgimisë së tij historike dhe kulturore, popullsisë shumetnike, por edhe vetë pamjes së qytetit, vazhdon të jetë qyteti më i bukur në Kosovë.

Shoqëria civile me performancë kundër kaosit nga vendparkimet, në Prizren

Aktivistë të shoqërisë civile në Prizren, të premten, kanë realizuar një performancë publike me të cilën kanë ngritur zërin kundër kaosit të krijuar nga parkimet private, që kryesisht janë krijuar pas rrënimit të shtëpive të vjetra në Zonën historike të qytetit.

Periskopi.com Lajme

Ata kanë rekomanduar institucionet përgjegjëse që të ndërmarrin veprime të duhura ligjore, me qëllim të vendosjes së rregullit, që do të përkthehej edhe në ruajtjen e vlerave të trashëgimisë ndërtimore të Prizrenit, shkruan sot Koha Ditore.

“Kjo performancë është reagim i një grupi të organizatave të shoqërisë civile kundër degradimit të vazhdueshëm që ndodh në Qendrën historike, konkretisht në këtë rast për vendparkimet private në qytet, ku shumica e tyre janë krijuar me rrënimin e shtëpive të vjetra. Prej 34 vendparkimeve brenda dhe rreth Qendrës historike të Prizrenit, diku 25 janë krijuar me rrënimin e shtëpive të vjetra”, ka thënë Edon Mullafetahu nga OJQ “EC Ma Ndryshe”.

Sipas tij nga sipërfaqja e përgjithshme e vendparkimeve del se vetëm 4.3 për qind janë publike, derisa 60.6 për qind janë private e 31.4 për qind janë joformale në trotuare e rrugë, që cenojnë lirinë e lëvizjes së qytetarëve.

MPJ dënon sulmin ndaj Konsullatës turke në Prizren, uron Policinë për aksion të suksesshëm

Ministria e Punëve të Jashtme e Republikës së Kosovës dënon ashpër sulmin ndaj Konsullatës së Përgjithshme të Republikës së Turqisë në Prizren duke e cilësuar një akt vandal nga persona të papërgjegjshëm që janë kundër një shteti demokratik e shumëetnik si Kosova, bëhet e ditur përmes një komunikate për media.

Periskopi.com Lajme

Ministria e Punëve të Jashtme përgëzon Policinë e Kosovës për punën profesionale në arrestimin e personave të papërgjegjshëm të cilët e kanë kryer këtë akt të shëmtuar. MPJ kërkon që autorët të vihen para drejtësisë, transmeton Koha.net.

Ministri i Jashtëm, Enver Hoxhaj ka komunikuar me Ambasadoren e Turqisë në Kosovë ku e ka dënuar ashpër aktin si të tillë, thuhet më tutje në komunikatë.

“Marrëdhëniet e Kosovës me Turqinë janë të shkëlqyera dhe si të tilla ato nuk do të pengohen e as dëmtohen nga kurrfarë akti vandal e të izoluar që nuk ja duan të mirën Kosovës dhe marrëdhënieve miqësore me Turqinë”, thotë MPJ.