Ismet Beqiri ende ka shpresa se LDK-ja do ta kthejë Prishtinën!

Sekretari i përgjithshëm i LDK-së, Ismet Beqiri, ka thënë se është i bindur se do ta kthejmë qeverisjen e LDK-së në Prishtinë, pasi qytetarët e kanë kuptuar se udhëheqja aktuale në Prishtinë është e dështuar.

Periskopi.com Lajme

Beqiri në një intervistë për KosovaPress, ka thënë se është i bindur që qeverisjes aktuale nuk do t’i vazhdon mandati nga qytetarët, pasi gjatë kësaj kohe kishte vetëm stagnim.

“Normalisht që tash ndër synimet në mos synimin kryesorë, qëllimin objektivin e kemi ta kthejmë Prishtinën, ta kthejmë qeverisjen e LDK-së, dhe unë jam i bindur që kjo do të ndodh, unë jam i bindur, po e përsërisë që kjo do të ndodhë për shumë arsye, mbi të gjitha arsyeja e parë është që pushteti aktual në Prishtinë gjatë tri viteve vetëm stagnim, nuk është që po e them vetëm unë, po e thotë edhe shumëkush, e thotë edhe qytetarë, sepse çdo pushtet duhet me u mbajt mend për diçka, për një punë të mirë, një punë së paku, për një projekt të rëndësishëm dhe jam i bindur që qytetarët e Prishtinës e kanë vërtetuar një gjë që kjo udhëheqje aktuale është udhëheqje e dështuar dhe unë jam i bindur që nuk ka me iu vazhduar, zgjedhjet e ardhshme që i kemi në fund, nëntor diku të këtij viti, Prishtina do t’i kthehet qeverisjes nën Lidhjen Demokratike të Kosovës”, tha Beqiri.

Ai tha se udhëheqja aktuale e Prishtinës është shndërruar veç në organ të prokurorisë dhe se të vetmen gjë që e bënë është që të ankohen, e për këtë ai thotë se Shpend Ahmeti nuk është zgjedhur kryetarë, por të punojë për përmirësimin e jetës së qytetarëve.

“Kjo komunë aktualisht, kjo udhëheqje është shndërruar veç në organ të prokurorisë, të vetmen gjë që e kanë është më u ankua. Qytetarët nuk i kanë zgjedhë me u ankua, qytetarët i kanë zgjedh me i zgjedh problemet dhe ata nëse kanë fituar, e dihet se qysh kanë fituar me përkrahjen e PDK-së, krejt dynjaja këtë punë e dinë si është bërë kryetarë z.Ahmeti, është kryetarë kurrkush nuk e mohon këtë, por nuk është zgjedh për me u ankua, por është zgjedhur për t’i zgjidh problemet. A po e bënë këtë, jo, ju e dini të gjithë, ai me të gjitha merret edhe komuna e Prishtinës me të gjitha, vetëm me Prishtinën dhe hallet e qytetarëve nuk merret, me të gjitha merret, vetëm për ngrohjen globale me fol, edhe për atë temë se të tjerat, e kanë top prioritet vetëm çështjet nacionale edhe më së pakti. Kryetari i komunës dhe komuna është edhe me ligj për qeverisje lokale i obliguar me u përkujdes për punën, jetën dhe mirëqenien e qytetarëve, këtë rast Prishtinës”, tha Beqiri.

Sipas Beqirit, gjatë qeverisjes aktuale në Prishtinë, nuk është ndërtuar asnjë shkollë, apo objekt shëndetësorë. Po ashtu, ai thotë se tri objektet për banim social në Hajvali kanë qenë të përfunduara në mandatin e Isa Mustafës dhe vetëm tani kanë filluar që t’i sistemojnë familjet.

“Puna e jashtëzakonshme që është bërë nga LDK-ja edhe në mandatin e z.Mustafa, kryeministrit aktual, janë punë që shihen, janë projekte që shihen dhe ato duhet me i pa, cilat janë ato projekte me arsimore, me shëndetësore, me infrastrukturë, me projekte të mëdha numër i madh që janë bërë në Prishtinë, aktualisht duhet të ma thoni vetëm një projekt, cila shkollë është ndërtuar, cili objekt shëndetësorë është ndërtuar, asnjë, asnjë i vetmi nuk është ndërtuar. Çerdhet partner publik-privat që thuhet, asnjë çerdhe nuk e kanë ndërtuar, tri objektet për banim social në Hajvali që tri vjet kanë qenë të gatshme, në mandatin e z.Mustafa është kryer, tash Ia ka nisë këtë vit kishe po dëshirojmë me i sistemua ato familje, pse i kanë lënë që tri vite njerëzit me ndejt se ato janë bërë për ta”, tha ai.

Sekretari i përgjithshëm i LDK-së, Ismet Beqiri, tha se Lidhja Demokratike e Kosovës nuk ka vendosur se kush do të jetë kandidati i kësaj partie për kryetarë të Prishtinës, por që ai thotë se nuk kanë nevojë të nguten por as të vonohen. Beqiri tha se në kohën e duhur kjo parti do të dal me kandidatin e saj.

“Jo, nuk kemi vendosur, është rregull që ne në çdo komunë, çdo degë bën propozime pastaj është kryesia qendrore që merre vendime. Normalisht, po të ketë nevojë edhe këshilli i përgjithshëm, sipas rregullit edhe statutit edhe këshilli i përgjithshëm, ju pyetet edhe për Prishtinën, janë 5 degë të Prishtinës, dhe degët tjera me kohë besoj që edhe nuk kemi arsye me u vonua por as me u ngut, nëse mund të thuhet kësisoj, por në kohën e nevojshme sigurisht do të dalin kandidatët, ne kemi kandidatë flas si LDK, mendoj të përgatitur dhe normalisht intenca jonë është që t’i fitojmë shumicën e komunave. Sepse duhet të jem korrekt nuk mund të them të gjitha komunat sepse nuk mund të ndodh dhe ndoshta për shëndetin e demokracisë nuk është mirë të gjitha komunat me i fituar edhe në rrethanat e pluralizmit politik nuk ka shancë më ndodh tek asnjë parti politike, por është synim i yni sa ma shumë komuna të fitojmë”, t ha ai.

I pyetur se a do të jetë ai kandidat për kryetar të Prishtinës, ai nuk e ka pohuar por as mohuar, duke thënë se për këtë vendosin të gjitha degët e komunës dhe pastaj do të dilet me kandidat.

Komuna e Prishtinës largon nga banesat komunale zyrtarët e PDK-së dhe LDK-së

Komuna e Prishtinës ka vendosur që në banesat e ndara komunale në “Bregun e Diellit” t’i largojë të gjithë ata që nuk i përkasin rasteve sociale, kategorive të luftës dhe që nuk janë invalidë të punës.

Periskopi.com Lajme

Në një konferencë për media drejtori i Pronës në komunën e Prishtinës, Dren Kukaj, tha se kjo është vendosur që të largojë nga banesat komunale të gjithë ata që nuk e meritojnë. Sipas tij pushtetarët e kaluar të komunës së Prishtinës në saje të privilegjeve që i kanë pasur i kanë ndarë vetes banesa. Kukaj thotë se ato banesa do t’ua marrin dhe do t’u jepen njerëzve që kanë nevojë..

Drejtori i Pronës bëri të ditur se përfitues të banesave komunale kanë qenë kryesuesi i Asamblesë Komunale Halim Halimi i cili e ka përfituar banesën si ish drejtor, Sabedin Haxhiu, Muhamet Gashi, Agim Dibrani. Të gjithë këta qenë përfitues gjatë kohës sa kanë   qenë drejtorë. Në mesin e përfituesve është edhe asamblisti i tanishëm nga radhët e PDK-së Shemsi Veseli.

“Pra ky është një vendim, një qëndrim politik i qeverisjes se Lëvizjes Vetëvendosjes të cilën e kemi marrë në bashkëpunim me kryetarin tonë Shpend Ahmeti. Shpresoj që të mos keqkuptohet e të mos interpretohet si ndonjë lloj hakmarrje politike, por si një vendim i drejtë ku do të largohen ata që më të vërtetë nuk kanë nevojë dhe do të zëvendësohen me të tjerë që më të vërtetë kanë nevojë. Të tillë, si përfitues mund ta gjeni prej kryesuesit të asamblesë komunale Halim Halimi i cili ka përfituar atë banesë si ish drejtor, gjithashtu Sabedin Haxhiun e Muhamet Gashi, Agim Dibrani, të gjithë drejtorë në atë kohë kur janë dhënë banesat vetës së tyre. Gjithashtu ka edhe asamblist të atëhershëm por edhe të tashëm, sikurse Shemsi Veseli nga radhët e PDK-së”, tha Kukaj.

Drejtori i Pronës në komunën e Prishtinës tha se do të largohen të gjitha ata që nuk janë raste sociale për t’i zëvendësuar me raste që sipas tij me të vërtetë kanë nevojë.

“Kemi marrë një vendim ose duhet t’iu kumtoj një qëndrim politik të qeverisjes sonë që për banesat e ndara në ‘Bregun e Diellit’, për të cilat është folur shumë që janë diku rreth 50 banesa, ne kemi vendosur që përjashtimisht prej kategorive që u kanë ndarë kategorive të luftës, rasteve sociale, të invaliduarëve në punë që ka raste të tilla që kanë përfituar banesa, të gjithë të tjerët ne kemi vendosur që prej aty t’i largojmë e njëkohësisht të shpallim një konkurs të ri, që të njëjtit t’i zëvendësojmë me raste që me të vërtetë kanë nevojë”, tha Kukaj.

Sa i përket banesave që janë ndërtuar në Hajvali për familjet me gjendje të rëndë ekonomike, drejtori i Shëndetësisë Arben Vitia tha se përfitues të tyre do të hyjnë 50 familje me gjendje të rëndë ekonomike.

“Nga këto banesa do të përfitojnë vetëm 50 familje, ato në kushtet më të rënda, janë 330 familje që kanë aplikuar në tërësi. Deri më tani në fazën e dytë Komisioni ka bërë vlerësimin e situatës në terren për 94 familje, procesi është në vazhdim e sipër dhe tani që po flasim, besoj që sot do ta tejkalojë numrin 100 dhe për një kohë relativisht të shkurtë presim të vijnë edhe me të gjitha informacionet më fotografi dhe vlerësimin e situatës në terren për të gjitha familjet 330 të cilat kanë aplikuar”, tha Vitia.

Gjithashtu, ai tha se  nën mbikëqyrjen e kryetarit Shpend Ahmeti, për 280 familjet tjera të cilat nuk do të munden të përfitojnë nga ky rast janë duke përgatitur planin tre vjeçar të banimit në bashkëpunim me Drejtorinë e Pronës dhe Drejtorinë e Urbanizmi, t i cili plan mendohet që në tri deri në pesë vitet e ardhshme do të zgjedhë përfundimisht çështjen e banimit social në komunën e Prishtinës.

Anëtari i LDK-së paralajmëron Sokol Havollin kandidat për kryetar të Prishtinës

Sokol Havolli, këshilltar politik i kryeministrit Isa Mustafa ka reaguar ndaj lajmit të publikuar se Lëvizja Vetëvendosje ka punësuar aktivistët e saj në Komunën e Prishtinës.

Periskopi.com Lajme

Duke ironizuar me këtë gjë dhe me kryetarin e Prishtinës, Shpend Ahmetin, ai ka thënë se dikush nga Ambasadat duhet të nënshkruajnë një projekt për rekrutimin e stafit nga komuna, përcjellë Indeksonline.

“Ka ardhur koha që ndonjëra nga Ambasadat në Kosovë të nënshkruaj një projekt për rekrutimin e stafit në Komunën e Prishtinës. Edhe pse aty ka punë edhe për organet e rendit dhe drejtësisë, sepse dallaveri më i vogël është punësimi i militantëve”, ka shkruar ai.

Por, shkrimit të Havollit i është përgjigjur njëri nga anëtarët e Kryesisë së LDK-së në Malishevë.

Famir Ademaj i ka komentuar Havollit, se kur ai të vijë në krye të Prishtinës, atëherë do të frymojë fryma e Ligjit, duke paralajmëruar kështu kandidaturën e tij për kryetar të kryeqytetit.

Komuna tentoi t’u jepte skamnorëve dru për ngrohje, nuk lejon Agjencioni i Pyjeve (Video)

Familjet skamnore të Prishtinës do mund të furnizoheshim me dru për këtë dimër të ftohët me një iniciativë të Komunës, por që një gjë të tillë nuk po e lejon Agjencioni i Pyjeve të Kosovës.

Periskopi.com Lajme

Kjo për arsye se drurët që komuna ka menduar tu shpërndaj familjeve skamnore janë pjesë ë mallrave të konfiskuar, transmeton Tribuna Channel.

Rrjedhimisht Agjencioni i Pyjeve nuk po e lejon Komunën që këta drunj tu dhurohen skamnorëve  me arsyetimin se ato duhen të shiten e jo të shpërndahen falas për familjet me kushte të rënda sociale.

 

Komuna e Prishtinës veproi ‘përmes’ Facebook-ut, rregulloi problemin më të vjetër në qytet (Foto)

Problemi që në lagjen "Dardania" në Prishtinë ishte që nga viti 2001, tashmë po rregullohet.

Periskopi.com Uncategorized

Ka mjaftuar  një postim në rrjetin social dhe Komuna e Prishtinës ka intervenuar.

Blendi Zymi ka postuar fotografi, se si në një pjesë të kësaj lagjeje, gjithmonë bëhet akulli dhe rrezikon qytetarët, si me makina si këmbësorët.

Kur ai postoi fotografinë, i përmendi edhe kryetarin Shpend Ahmetin dhe nënkryetarin Dardan Sejdiun.

E ky i fundit reagoi menjëherë. I kërkoi adresën e saktë dhe pas pak orësh i tregoi se akulli u largu, e përveç kësaj, premtoi se do rregullohet edhe rrjedha e ujit tërësisht, shumë shpejt.

“Në momentin që krijohen kushtet klimatike do të intervenohet edhe në rregullimin e rrjedhjes së ujit!”, ka shkruar Sejdiu./ Periskopi

gdgk capturexfgdfdsx 15978093_10154183748022681_1166698870377671258_n 15977546_10154183747837681_6135080535564523460_n 16105800_582392741946578_1817946521313088484_n

Rakiq-Prishtinës: Muri nuk do të rrënohet, ROSU nuk guxon të vijë më në veri

Kryetari i Mitrovicës Veriore, Goran Rakiq, ka porositur nga veriu i këtij qyteti se muri në Mitrovicë nuk do të rrënohet.

Periskopi.com Lajme

Ai në një intervistë për Kosovapress, ka bërë të ditur se Njësitet Speciale të Policisë së Kosovës nuk guxojnë të shkojnë në veri, ndërsa ka ftuar bashkësinë ndërkombëtare të ndërhyjë në rast se Prishtina tenton që me forcë ta rrënojë murin.

Sipas tij, pas ngjarjeve të fundit në veri, tensionet janë ngritur ndërsa qytetarët janë të shqetësuar.

“Pas ngjarjeve të fundit tensionet janë rritur, qytetarët janë të shqetësuar me arsye. Konsideroj se dikush ka dashur të shfrytëzoj këtë situatë për shkak të qëllimeve politike dhe unë vërtetë lus të gjitha palët të cilat bisedojnë në Bruksel që të ulin tensionet dhe prioritet i të gjitha prioriteteve duhet të jetë ruajtja e paqes në këto hapësira sepse nuk ka alternativë tjetër… Unë dua të përkujtoj të gjitha palët se revitalizimi i urës dhe zona për këmbësorë janë diçka për të cilën është arritur marrëveshje në Bruksel dhe unë mund t’ua lexoj njërën nga pikat që është nënshkruar nga të dy kryeministrat, e kjo është se ndërtimi i zonës për këmbësorë është përgjegjësi lokale, që nënkupton se komuna vendos se si do të duket dhe kur do të funksionalizohet…Muri nuk do të rrënohet, muri do të ridizajnohet, po e përsëris se rreth kësaj janë dakorduar të gjitha palët, do të thotë Prishtina, pushtetet lokale, Beogradi dhe Bashkimi Evropian…Lëvizja e qarkullimit të lirë është diçka për të cilën nuk duhet as diskutuar. Dua të them se Njësia Speciale ROSU nuk është dashur të vijnë në veri, sepse marrëveshja ka qenë pa marrëveshje me shkrim të NATO-s dhe përfaqësuesve politikë të serbëve të veriut, ROSU nuk guxon të vij në veri”, tha Rakiq.

Rakiq është shprehur kategorik kundër luftës, derisa ka ftuar mitrovicasit pa dallim që të jetojnë në paqe sikur kanë jetuar ndër vite.

“Qytetarët e Mitrovicës i porosis të qëndrojnë të qetë të mos ngrisin tensione, pres bashkëjetesë me qytetarët në jug të Ibrit. Ne me shekuj kemi jetuar njëri pranë tjetrit, andaj pres që kjo të vazhdojë, të jetojmë në paqe dhe harmoni… Ftoj edhe njëherë qytetarët, shqiptarët e serbët, të jenë të qetë dhe të mos bien pre e provokimeve politike… Pres reagimin e Bashkësisë Ndërkombëtare, të Unionit Evropian, që ta parandalojnë rrënimin me forcë të murit… Natyrisht, askush nuk e dëshiron luftën, dhe kjo është diçka që më së paku na duhet në këtë moment, do të thotë dua që në këto hapësira përgjithmonë të mbretërojë paqja”, ka thënë për KosovaPress Rakiq.

Ai, prapa kamerës u shpreh i sigurt se inaugurimi i urës nuk do të bëhet më 20 janar siç ishte paraparë, për shkak të mos përfundimit të punimeve në sheshin “Car Llazar”, përkatësisht çështjes së murit.

 

 

Shpend Ahmeti tregon nëse do të rikandidojë për kryetar komune

Kryetari i Prishtinës, Shpend Ahmeti, ka deklaruar se nëse i kërkohet edhe një mandat i dytë në krye të kryeqytetit, ai është i gatshëm për këtë hap.

Periskopi.com Lajme

Në Interaktiv të KTV-së ai ka thënë se kjo i është kërkuar edhe nga partia e tij Vetëvendosje, dhe pasi ta vlerësojë se kjo është rruga e duhur apo jo, ai edhe do të marrë vendim.

“Do të jem këtu sa kërkohet nga unë. Nuk do të rrezikojmë projektin e Prishtinës. VV ka pasur të qartë nga unë që të kandidoj edhe për një mandat, do ta diskutojmë, por nuk e rrezikojmë rrugën e Prishtinës. Nëse e duhura është të vazhdoj, jam i gatshëm”, ka deklaruar Ahmeti.

Shkupi kryeqendra më e ftohtë, Tirana më e ngrohta në rajon, ja ku radhitet Prishtina (Foto)

Me temperaturat e matura -18 gradë Celsius, Shkupi këtë mëngjes ishte kryeqyteti më i ftohtë i rajonit, Sarajeva me -17 gradë Celsius radhitet e dyta, raporton Anadolu Agency (AA).

Periskopi.com Lajme

 

Shumë mot i ftohtë mbizotëron edhe në kryeqytetet tjera të rajonit, kështu që këtë mëngjes -13 gradë Celsius janë matur në Lubjanë, Zagreb dhe Prishtinë, Beogradi ishte -10, ndërsa pak më të ngrohta ishin Podgorica me -6 gradë Celsius, dhe më e ngrohta ishte Tirana me -4 gradë Celsius.

Përpos Ballkanit Perëndimor dhe Evropës Juglindore, pjesa më e ftohtë e kontinentit evropian ishte Evropa qendrore.

Temperatuarat më të ulta ishin në Pragë me -16 gradë Celsius, në kryeqytetin polak, Varshavë, kryeqytetin e Sllovakisë, Bratisllava ishte -14 gradë Celsius, në Vjenë ishte -12, në Budapest -10 gradë Celsius.

Është interesante se Moska ishte më e ngrohtë nga kryeqendrat e sipërpërmendura, ku u shënuan -10 gradë Celsius.

Përkundër kësaj në Evropën Perëndimore temperaturat janë të favorshme mbi zero, kështu në kryeqytetin belg, Bruksel këtë mëngjes janë matur 6 gradë Celsius, ndërsa në Amsterdam ishte 7 gradë Celsius./AA/

Hoti premton autobusë të rinj urbanë edhe për 6 komuna tjera

Ministri i Financave, Avdullah Hoti, i cili mori pjesë në përurimin e 15 autobusëve të rinj të Trafikut Urban në Prishtinë bashkë me kryetarin e Komunës së Prishtinës, Shpend Ahmeti, ka shprehur kënaqësinë e tij që pas një pune të gjatë, ia kanë dalë që qytetarëve të Prishtinës t’ju mundësohet një trafik urban më modern.

Periskopi.com Lajme

 

Hoti ka thënë se marrëveshja për Garanci Shtetërore, e cila është kërkuar nga “Trafiku Urban” dhe është negociuar nga ekipi i kryesuar nga Ministria e Financave, garanton kredinë që Trafiku Urban ka marrë për blerjen e 51 autobusëve.

“Kredia ka vlerë totale prej 10 milionë euro, me maturitet 12 vite, ku 2 vite janë grejs periudhë dhe 10 vite amortizim i kredisë. Interesi vjetor është 1% + Euribor 6-mujor, gjë që e bën këtë kredi mjaft të volitshme”, ka potencuar ministri i Financave, raporton Koha.net.

Ndërkaq, ai ka premtuar se projekte të tilla, Qeveria dhe Ministria që ai drejton do të përkrahin edhe në 6 qendra tjera të Kosovës.

“Qeveria e Kosovës dhe Ministria e Financave do të mbështesë projekte të tilla edhe në qendrat e tjera të Kosovës, Prizren, Pejë, Gjilan, Ferizaj, Gjakovë dhe Mitrovicë”, ka përfunduar ai.

KEDS-i njofton se Prishtina e Prizreni do të mbesin pa rrymë

KEDS-i njofton se për shkak të kërkesës së KOST-it është i obliguar të ndalë transformatorët 110/10 kilovotësh Prishtina 3 dhe 110/10 kilovotesh Prizreni 1, njofton Klan Kosova.

Periskopi.com Lajme

 

Ndalesa do të zgjasë sipas kërkesës për 90 minuta mesditën e ditës së sotme,  përkatësisht nga ora 12:00 deri në ora 13:30.

Nga kjo ndalesë do të ketë ndërprerje të energjisë elektrike për pjesën qendrore të Prishtinës dhe qytetit të Prizrenit me rrethinë.

Futbollistët e Prishtinës shkojnë në stërvitje me Porsche

Trajneri gjerman i Klubit të Futbollit Prishtina, Lindtz Lindemann ka rrëfyer për mediumin gjerman Mitteldeutsche Zeitung, aventurën e tij të deritanishme në Kosovë me skuadrën më të trofeshme kosovare.

Periskopi.com Sporti

Lindemann ka thënë se futbolli në Kosovë është i një niveli të kënaqshëm, duke potencuar faktin se ka futbollistë në skuadrën e Prishtinës që shkojnë në stërvitje me Porsche.

“Ne kemi lojtarë të cilët më parë kanë luajtur me skuadra profesioniste në Rusi dhe Ukrainë. Ata vijnë në stërvitje me Porsche”, ka thënë me krenari Lindemann për mediumin gjerman Mitteldeutsche Zeitung.

Tekniku gjerman më tej ka thënë se në skuadrën e njohur të Kosovës ekziston një atmosferë e mirë ekipore.

“Kemi një ekip të mirë. Futbollistët gjimonë këndojnë ndonjë serenatë kur ndonjëri prej futbollistëve ka ditëlindjen”, ka thënë ai, raporton Insajderi.

Lindemann megjithatë ka theksuar faktin se në Kosovë ka edhe parregullësi që atij nuk i pëlqejnë. Ka thënë se kompania që ka të drejtën televizive për transmetimin e ndeshjeve të Superligës së Kosovës, “Digitalb”, sipas Lindemann “përckaton çdo gjë rreth ligës”.

“Televizioni privat përcakton çdo gjë. Pra, diçka që ka ndodhur është se një lojë të ligës, e cila në fakt ishte planifikuar të luhej të mërkurën, është përcjellë në mënyrë spontane për të martën, dhe ne e kemi kuptuar një ditë para ndeshjes. Kjo është ndonjëherë e bezdisshme”, thotë Lindemann.

Lindemann është ankuar edhe për vonesat e futbollistëve në stërvitje, duke thënë se stërvitjet shpeshherë ndodh që të fillojnë me vonesë.

“Edhe me orën, lojtarët nuk janë gjithmonë të saktë, trajnimi fillon me vonesë. Përndryshe ata janë shumë të gatshëm”, ka thënë ish-trajneri i skuadrës gjermane Hallescher.

Autobusët e rinj të Prishtinës tashmë gati (Foto)

Kryetari i Prishtinës, Shpend Ahmeti ka postuar autobusët e rinj që do të përdoren në kryeqytet.

Periskopi.com Uncategorized

Ata duket se janë gati dhe shpejt arrijnë në vend.

Këta 20 autobusë në kryeqytet, ndërsa 31 tjerët pritet që të vijnë në janar.

Gjatë muajit shtator u nënshkrua marrëveshja për furnizim me autobusë në mes ndërmarrjes “Trafiku Urban” dhe kompanisë çeke “Iveco”, si fituese e tenderit për furnizimin me autobusë urban në Prishtinë.

Ky projekt u mbështet me një kredi nga Banka Evropiane për Rindërtim dhe Zhvillim – BERZH./ Periskopi

15697793_10155626457827166_8406246859407163226_n 15672911_10155626457777166_5721714719719416181_n

Si u prit Bajram Gecaj në Komunën e Prishtinës? (VIDEO)

Zëvendësministri i Pushtetit Lokal, Bajram Gecaj, të premten shkoi në Komunën e Prishtinës.

Periskopi.com Lajme

Ai aty nuk u prit nga askush, ndërsa duket se cak kishte zyrën e Kryesuesit të Kuvendit, Halim Halimi, që po ashtu vjen nga radhët e LDK-së.

Por edhe për këtë të fundit, vizita e Gecaj dukej që ishte surprizë.

Ai në Komunën e Prishtinës, erdhi të fliste për ligjin e Prishtinës, mirëpo meqë për këtë nuk u prit nga i pari i kryeqytetit, Shpend Ahmeti, këto punë ai i diskutoi me Halimin.

Fitojnë Prishtina e Bashkimi

Sigal Prishtina dhe Bashkimi i kanë fituar duelet përkatëse në kuadër të xhiros së 11-të të Superligës së basketbollit.

Periskopi.com Sporti

Bardhekaltrit e mposhtën pa problem Vëllaznimin në Gjakovë me rezultat 103:86 (29:31, 33:17, 21:31 e 20:7), kurse prizrenasit ishin më të mirë se fqinji i tyre, Golden Eagle Ylli, ndaj së cilit fituan 96:57 (22:22, 17:10, 23:15 e 34:10), shkruan zeri.info

Trepça e ka mundur të premten Rahovecin 79:73, kurse Peja luan sot me Kerasan Prishtinën nga ora 14:00.

A po këndellet futbolli kosovar? Këtij futbollisti i ofrohet pagë marramendëse

Besa e Pejës prej javësh synon të ‘bombardojë’ në afatin kalimtar të dimrit, për të sjellë sulmuesin e mirënjohur, Labinot Osmani.

Periskopi.com Sporti

Gazeta Olle mëson se pejanët i kanë ofruar 20 mijë euro sulmuesit vushtrrias të Prishtinës, përfshfirë në këtë shumë edhe pagat që do të merrte për një kontratë njëvjeçare.

Osmani nuk kaloi momente të mira tek Prishtina në vjeshtë, duke qëndruar shumë herë edhe jashtë përfshirjes në protokoll.

Prishtina, pjesë e komunitetit global të të rinjve

Global Shapers Prishtina ka njoftuar se nëpërmjet kësaj organizate kryeqyteti është bërë pjesë e komunitetit më të madh të të rinjve në botë të quajtur Global Shapers Community.

Periskopi.com Lajme

 

Ky komunitet është nismë e Forumit Botëror të Ekonomisë, i cili ka për qëllim që të mbledh të rinjtë anembanë botës të cilët janë të talentuar, entuziastë dhe kreativ në zgjidhjen e problemeve brenda komunitetit të tyre, qoftë nëpërmjet projekteve, qoftë nëpërmjet kampanjave vetëdijesuese apo ndërmarrjeve sociale.

“Të rinjtë në Prishtinë dhe në Kosovë në përgjithësi përballen me shumë probleme, por në të njëjtën kohë unë shoh tek ta edhe shumë potencial dhe entuziazëm për të sjellë ndryshime pozitive në komunitet”, shprehet Andrea Garaiova, kuratore e organizatës. “Unë shpresoj që nëpërmjet punës tonë të arrijmë të kanalizojmë këtë entuziazëm dhe energji duke i përkrahur dhe duke i formësuar të rinjtë me aftësitë dhe hapësirën që ata kanë nevojë për të dhënë kontributin e tyre në shoqëri”.

Komunitetit Global Shapers në Prishtinë synon të mbledh rreth vetes të rinj të pasionuar në fusha të ndryshme shoqërore në Prishtinë dhe Kosovë, me qëllim që bashkërisht të punojnë në krijimin e një ambienti më të përshtatshëm për shoqërinë tonë. Qëllimi më prioritar i komunitetit është që nëpërmjet realizimit të projekteve, të fuqizoj rininë nëpërmjet edukimit dhe ekonomisë.

Promovimi i edukimit digjital (e-learning), përkrahja e këshilleve të nxënësve në shkolla të mesme, e promovimi i ndërmarrjeve sociale janë vetëm disa nga projektet me të cilat ky komunitet do të punojë në të ardhmen, por pa përjashtuar edhe fusha të tjera.

Lansimi zyrtar i organizatës Global Shapers Prishtina do të bëhet nëpërmjet projektit “Social Innovator Speaking Series” i cili do të organizohet më 30 nëntor 2016, nga ora 18:00 në hapësirat e Hotel Sirius.

“Nëpërmjet këtij projekti po synojmë që të sjellim para të rinjve ndërmarrës social të suksesshëm qofshin ata që kanë krijuar ndonjë biznes, apo kanë ndërmarrë ndonjë iniciativë shoqërore, për të treguar storiet e tyre me shpresë që të inspirojmë të rinjtë për mënyrën se si ata vet mund të realizojnë projektet ose ëndrrat e tyre edhe në Kosovë”, thotë Avdyl Gashi, menaxher i projektit. “Me pak fjalë nëpërmjet këtij projekti duam t’i mësojmë të rinjtë se si të zënë peshk”.

 

Paralelisht me lansimin, organizata po përgatitet të hapë thirrjen për të rinj entuziastë dhe të talentuar që ti bashkohen komunitetit me talentet e tyre, për të sjellë ndryshime pozitive në shoqëri.

“Ne kemi disa projekte nga fusha e edukimit dhe teknologjisë deri në mbështetjen e ideve kreative të biznesit për nxënësit e shkollave të mesme të cilat mezi po presim të fillojmë t’i realizojmë pas lansimit”, shton për fund Andrea Garaiova, kuratore në Global Shapers Prishtina.

Ky komunitet aktualisht gjendet në më shumë 440 qytete të botës, dhe numëron më shumë se 6630 anëtarë të rregullt dhe 311 alumni.

Prishtina shënon fitore në ‘Kupën e Pavarësisë’

Prishtina dhe Otranti nga Ulqini u takuan në ndeshjen e parë 45-minutëshe gjysmëfinale të turneut të tetë Pavarësisë që po zhvillohen në stadiumin e Tiranës, “Selman Stermasi”.

Periskopi.com Sporti

Prishtina është kualifikuar në finale pas fitores minimale ndaj Otrantit – 1:0. Penalltia e shkaktuar në Granit Jasharin, u realizua nga kapiteni, Gentrit Begolli (45+3’).

Pas një ore, Prishtina luan finalen me fituesin e ndeshjes, Shkëndija Tetovë – Kukësi që nis në ora 12.00.

Prishtina në këtë turne paraqitet me përbërje të kombinuar.

Me Otrantin, luajtën:

Prishtina (3-5-2): Visar Bekaj – Leonat Vitija, Milos Miloviç, Granit Xhaka – Granit Jashari, Rigon Kabashi, Atdhe Grajqevci, Kastriot Selmani, Djellon Dragusha – Gentrit Begolli /c/, Basit Abdul Khalid.

Prishtina, pa status

Prishtina është e përkufizuar si kryeqytet i Kosovës, por mungesa e projektligjit për të e bën selinë e shtetit në shumë aspekte të njëjtë me komunat e tjera.

Periskopi.com Lajme

Për mungesë të këtij ligji, të cilin e parasheh Kushtetuta e vendit, kryeqyteti mbetet pa status të definuar, shkruan sot “Koha Ditore”.

Neni 13 i Kushtetutës së Kosovës, i cili flet për kryeqytetin, thotë se “kryeqyteti i Republikës së Kosovës është Prishtina. Dhe statusi dhe organizimi i kryeqytetit rregullohen me ligj”.

Ndërmjet mungesës së statusit, ndërtimeve ilegale, mungesës së parkingjeve, kaosit në trafik, ndalimit të degradimit urban, Prishtina për 18 vjet ka ndërruar dy pushtete qeverisëse: për 14 vjet është qeverisur nga LDK-ja dhe për të tretin nga Vetëvendosje.

Tahiri: Ligji për Prishtinën, peng i pazareve politike

Njohësi i politikave të qeverisjes lokale, Besnik Tahiri, drejtor ekzekutiv i Institutit Kosovar për Qeverisje Lokale, mendon se miratimi i Ligjit për Prishtinën e bën funksional kryeqytetin e vendit.

Periskopi.com Lajme

Në një intervistë për “Kohën Ditore”, Tahiri ka thënë se aktualisht statusi i Prishtinës është definuar simbolikisht si kryeqytet, ngase ende akti kryesor që e rregullon statusin e tij mungon.

Ai ka thënë se përveç problemeve funksionale, Prishtina është problem politik, teksa vetë Ligji për Prishtinën është bërë peng i pazareve politike.

Pavarësisht problemeve të trashëguara nga qeverisja paraprake, Tahiri mendon se Komuna e Prishtinës ka bërë hapa pozitivë në disa sfera, siç janë: ndërtimi i çerdheve, themelimi i ndërmarrjes “Prishtina parking”, blerja e autobusëve dhe procesi i aplikimit për legalizim.

Në këtë plan, ai ka thënë se Komunës i duhet edhe më të shfrytëzojë formulën e partneritetit publiko-privat, e cila, sipas tij, nuk është përdorur mjaftueshëm nga pushteti lokal. Megjithatë, sipas Tahirit, Prishtina ka treguar efikasitet te projektet e tilla me nënkalimet, ndaj, sipas tij, është në avantazh ndaj komunave të tjera.

Tahiri ka bindjen se Prishtina mund të ndryshojë të shmangen përplasjet politike në relacion nivel qendror-nivel lokal, që vijnë si pasojë e procedurave dhe proceseve që ndodhin në të dyja nivelet..

 

 

 

 

Nis konferenca e parë e Unionit të Bashkive Shqiptare në Rajon

Në prag të festave të Nëntorit, Tirana është kthyer në kryeqytetin e shqiptarisë.

Periskopi.com Lajme

Delegacioni i Tiranës ishte nikoqir i delegacioneve nga komunat e hapësirave shqiptare si Prishtina, Tetova, Ulqini e Presheva.

Në takimin e udhëheqësve të këtyre komunave u diskutua mbi mundësitë e bashkëpunimit, por edhe shkëmbimit të përvojave më të mira për zhvillimin dhe mirëqenien e faktorit shqiptar në këto komuna.

Kryetari i Komunës së Prishtinës, Shpend Ahmeti, shprehu kënaqësinë për konkretizimin e kësaj nisme, si dhe theksoi se takime të tilla i shërbejnë drejtuesve të komunave/bashkive, por edhe stafeve të tyre drejtuese, për të vlerësuar drejt problematikat me të cilat përballen sot qytetet shqiptare.

“Problematika e qyteteve shqiptare, pajtohem që është problematikë e veçantë, e cila na detyron, na sfidon që të bashkëpunojmë, në mënyrë që këto çështje t’i shkëmbejmë edhe si përvoja, edhe si zgjidhje, e pse jo, edhe nëse diçka ka që e kemi provuar dhe s’ka ecur, t’i themi të tjerëve që mos e provoni, sepse kjo nuk funksionon. Ky është vetëm takimi i parë, shpresoj që komunat e tjera sa më shpejt të jemi nikoqirë të takimeve të radhës dhe të fillojmë dhe të shtojmë komunat e tjera, që edhe ato të bëhen pjesë e këtij rrjeti”, tha Ahmeti.

15224662_10211101326591679_2004503910_o 15205544_10211101325711657_1472445744_o