Bahtiri nuk e llogarit si asgjë PDK-në, përmend edhe Serbinë

Kryetari i Mitrovicës Agim Bahtiri, ka thënë se nëse ai do të kandidonte edhe për një mandat të dytë në Mitrovicë, do të fitonte gjithsesi.

Periskopi.com Lajme

“Nëse unë kandidoj, jam fitues i bindshëm. Edhe sikur të kisha Kadri Veselin kandidat, e rrëzoj”.

Këto komente Bahtiri i ka bërë në Info Magazine të Klan Kosovës.

“Kurrë nuk mund të kthehet PDK në Mitrovicë, aq sa kthehet Kosova në Serbi. Ne jemi duke biseduar, AKR nëse shkon me dikë në koalicion, atëherë është fitues”, tha ai.

Agim Bahtiri thotë se ka ndalur haraçin dhe korrupsionin në Mitrovicë

Agim Bahtiri, kryetari i Mitrovicës ka thënë se ai e ka ndalur haraçin dhe korrupsionin në Mitrovicë.

Periskopi.com Lajme

“Haraçi dhe korrupsioni është ndalë, sepse në vendin ku unë menaxhoj nuk guxon të ndodhë një gjë e tillë”.

“Janë 20 fabrika që po ndërtohen në një komunë që ka qenë e pa perspektivë, një komunë që e kam gjetur me barrikada me tonelata, një komunë që edhe në pjesën diplomatike të investitorëve është parë si më e korruptuara në krejt Kosovën”.

Kështu ka thënë Bahtiri në Info Magazine të Klan Kosovës.

Në rajonin e Mitrovicës zbulohen 106 vetura të padoganuara

Policia e Kosovës, përkatësisht Njësia e auto krimeve kanë pranuar një informatë të hënën se tri deponi, në lokacione të ndryshme, dyshohet për vetura që iu kanë shmangur obligimeve doganore.

Periskopi.com Lajme

Njësia e autokrimeve rajonale në Mitrovicë dhe një njësi mobile e Doganës në Mitrovicë, dje kanë bërë kontrollimin e këtyre deponive të veturave, të cilat këto vetura demolohen dhe pastaj shiten për pjesë, ku nga kontrollet e bëra në këto tri lokacione është arritur të evidentohen 106 vetura, të cilat dyshohet se ju kanë shmangur obligimeve doganore, për procedura të mëtejme, për shmangie doganore merret Dogana e Kosovës.

Me të gjitha veprimet është njoftuar prokurori i Shtetit, i cili ka sugjeruar që të vazhdohet me procedurën e hetimeve të mëtutjeshme.

Dokumentet amerikane: Imami Avdiu, ekstremist islamik e rekrutues

Imami i Xhamisë së Mitrovcës, Ekrem Avdiu, përmendet në dosjet e Departamentit të Mbrojtjes të Shteteve të Bashkuara të Amerikës, të publikuara nga organizata Wikileaks, organizatë kjo e themeluar nga Julian Assange e që ka tronditur botën me publikimet e komunikimeve zyrtare, të bëra ndërmjet agjencive të SHBA’së.

Periskopi.com Uncategorized

Në një memorandum të dërguar te Komanda Jugore e SHBA’ve në Miami nga burgu i Guantanamos në Kubë më 21 prill 2007, rreth një të burgosuri të Guantanamos, inteligjenca amerikane e cilëson Ekrem Avdiun si ‘ekstremist islamik dhe rekrutues’, transmeton Gazeta Metro.

Sipas këtij dokumenti, aktivitetet ekstremiste të imamit Avdiu nuk kufizoheshin vetëm brenda territorit të Shqipërisë, por ai kishte lidhje edhe me Çeçeninë dhe Irakun.

“…së paku deri më datën 7 shkurt 2007, Avdiu ka ushtruar aktivitete ekstremiste në Shqipëri”, thuhet në këtë dokument.

Më tutje, në komunikimet mes zyrtarëve amerikanë shpjegohet se si forcat e KFOR’it më 28 nëntor 2003, kishin bastisur shtëpinë e Ekrem Avdiut. Aty, KFOR kishte konfiskuar një bllok të numrave telefonikë, i cili përmbante një numër (7326931), që lidhej me një variant të nofkës së të burgosurit për të cilin është hartuar raporti, Abou Saad Taifi.

Ekrem Avdiu, aktualisht shërben si imam dhe ligjërues i xhamisë në lagjen Tavnik njëkohësisht është anëtar i BIK-ut në Mitrovicë. Ai ishte arrestuar nga Policia e Kosovës si i dyshuar për pjesëmarrje në aktivitetet ekstremiste.

MBPZHR-ja mbështetje për projektet bujqësore edhe në Mitrovicën Veriore

Ministri i Bujqësisë, Pylltarisë dhe Zhvillimit Rural, Memli Krasniqi priti sot në një takim zyrtaren kryesore ekzekutive për Komunën e Mitrovicës së Veriut, Adrijana Hodzic, me të cilën ka biseduar për projektet zhvillimore të ministrisë, të cilat do të realizohen gjatë këtij viti në sektorin e bujqësisë, si dhe zhvillimet e përgjithshme në këtë sektor.

Periskopi.com Lajme

Me këtë rast, ministri Krasniqi, e ka njoftuar kryetaren më hollësisht për Programin për Bujqësi dhe Zhvillim Rural të këtij viti, ku në kuadër të këtij programi ai tha se do të mund te gjejnë mbështetje edhe një numër i konsiderueshëm i fermerëve të komunave te veriut.

Po ashtu, ministri Krasniqi shtoi se mbështetja për zhvillimin e bujqësisë në këtë komunë dhe të tjerat, do të rritet në vazhdimësi, me qëllim të shtimit të prodhimtarisë bujqësore, si dhe rritjes së cilësisë së prodhimeve vendore.

Nga ana e saj, kryetarja, Adriana Hodzic, e falënderoi ministrin për gatishmërinë për përkrahjen e mëtejmë të sektorit të bujqësisë në këtë komunë dhe komunave tjera te veriut./ Periskopi

A i njihni? Ai ishte i arrestuar nga Serbia, mbrojti Mogherinin e cila beson në dialog

Nehat Thaqi dhe Frederica Mogherini u takuan sot te ura në Mitrovicë.

Periskopi.com Lajme

Teksa shefja e diplomacisë evropiane shkoi për vizitë atje, nuk dihet nëse e njohu Thaqin ose jo.

Ai ishte i arrestuar për disa javë, madje u mbajt në Beograd, raporton Periskopi

Thaqi që është drejtor i Policisë Rajonale të Kosovës në Mitrovicë e priti atë, kur dihet se sot kishte masa tepër të rrepta të sigurisë, e edhe vet zyra e BE-së në Kosovë nuk e tregonte orën kur ajo viziton këtë vend, sikur frikësoheshin.

Ata u patë që shkëmbyen fjalë mes vete./ Periskopi

Mogherini foli nga ura e Mitrovicës, dha një mesazh

Shefja e diplomacisë evropiane, Federica Mogherini ka thënë të shtunën në Mitrovicë se po i sheh punimet që po ecin mirë në urën e lumit Ibër.

Periskopi.com Lajme

“Ura do t’i bashkojë të dy komunitetet nga veriu dhe jugu. Ky nuk është rezultat i alienëve, por i njerëzve. Është rezultat i bisedimeve nga vendimmarrësit e dy shteteve në Bruksel”, ka thënë ajo.

Ajo tha se është e lumtur me atë që është arritur pasi sipas saj më në fund ka kuptim të ndërsjellë mes palëve.

Tutje përfaqësuesja e lartë e BE-së tha se ata do të mbështesin qytetarët në të dy anët e urës. Ndërsa nuk dha ndonjë datë për revitalizimin e saj, duke thënë se ai do të bëhet së shpejti.

Mogherini ka takuar edhe kryetarin e Komunës së Mitrovicës së Veriut, Goran Rakiq.

E pranishme ishte edhe shefja e Zyrës së BE-së në Kosovë, Nataliya Apostolova.

 

Mogherini bashkon liderët e Kosovës, i frikësohet vizitës te ura në Mitrovicë

Përfaqësuesja e lartë e Bashkimit Evropian Federica Mogherini, do të mbledh nesër në një takim të përbashkët të gjithë krerët e partive politike.

Periskopi.com Lajme

Ajo, do t’i takojë ata në zyrat e Bashkimit Evropian.

Kjo konfirmohet edhe tek agjenda e Mogherinit, ku thuhet se në ora 11:00 ajo do të takojë udhëheqësit e partive politike.

Prezencën për gazetametro.net e ka konfirmuar edhe Lëvizja Vetëvendosje. Lideri i kësaj partie Visar Ymeri, do të jetë në këtë takim.

Ndërsa edhe në agjendën e kryeministrit Isa Mustafa, është shënuar për takimin me Mogherinin dhe udhëheqësit e partive tjera.

Në publikimin e agjendës së Mogherinit, nuk është treguar as për kohën e vizitës së saj te ura në Mitrovicë, por është konfirmuar se do jetë atje.

Në njoftim thuhet se ato detaje do bëhen të ditura në vazhdimësi.

Agjenda e Mogherinit në Kosovë, i frikësohet vizitës te ura në Mitrovicë

 

 

Mbesa e Kadri Veselit punësohet pa konkurs nga Agim Bahtiri

Emisioni “Drejtësia në Kosovë” sonte publikoi një hulumtim për disa punësime pa konkurse në komunën e Mitrovicës.

Periskopi.com Lajme

Në intervistën për “Drejtësia në Kosovë”,  ish drejtori i arsimit në Mitrovicë Pajazit Hajzeri ka theksuar së kryetari i kësaj komune, Agim Bahtiri ka emëruar Fitore Veselin pa konkurs në pozitën sekretare e shkollës në Shipol të Mitrovicës ndërsa ajo kishte marrë pagë “pa shkuar asnjë ditë në punë”.

“Emërimi i Fitore Veselit ka ardhur me vendimin e kryetarit të komunës Agim Bahtiri, një vendim qe e mandaton Veslin me fillu punën për tre muaj në shkollën “Fazli Greiçevci” mirëpo e njëjta asnjëherë nuk ka qenë punëtore e arsimit”, tha Hajzeri.

Fitore Veseli nuk ka pranuar të flasë para kamerës, por përmes telefonit tha për emisionin “Drejtësia në Kosovë” se punësimi i saj në këtë shkollë nuk është bërë pse ajo është mbesa e kryetarit të Kuvendit të Kosovës.

“Nuk është e vërtetë që unë jam punësuar pse jam mbesa e Kadri Veselit. Edhe unë kam kryer shkollë për të punuar diku, e jo për të mbetur në shtëpi. Kur jam punësuar në Shkollën ‘Fazli Greiçevci’ i kam pasur disa probleme shëndetësore dhe nuk kam mundur ta vijoj punën. Unë nuk kam bërë asgjë të jashtëligjshme, sepse shkolla ka pasur nevojë dhe jam punësuar unë. Paga që e kam marrë nuk është ndonjë pagë e madhe, e kam marrë sepse kam punuar edhe në komunë dhe në muze. Pse jam punësuar pa konkurs në Shkollën ‘Fazli Greiçevci’ i kam plotësuar kushtet”, kishte thënë Veseli.

Kryetari i Mitrovicës Agim Bahtiri ka thënë se nuk e ka ditur se është duke e punësuar mbesën e kryeparlamentarit Kardi Veseli dhe se këtë e kishte kuptuar vetëm pasi Fitore Veseli ishte pranuar në punë.

“Unë pasi e kam punësuar e kam kuptuar se Fitore Veseli është mbesa e Kadri Veselit… Rasti është mbret i botës”, thotë Bahtiri.

Naxhije Kurti, drejtoreshë e shkollës “Fazli Greiçevci” në Shipol të Mitrovicës, tha se Fitore Veseli në vendin e punës ka qëndruar vetëm 2 orë dhe është shokuar kur e ka parë në listën e pagave.

“Mua më ka brejtë pse mundet një njeri me ardhë me marrë të holla pa punuar asnjë ditë punë, kjo është e pa logjikshme për mua, e pafalshme”, tha drejtoresha Kurti.

Konfirmohet vizita e Mogherinit në Mitrovicë, detajet nuk dihen

Zëdhënësja e Bashkimit Evropian, Maja Koçijançiq, në një prononcim për Telegrafin ka konfirmuar vizitën që do t’ia bëjë Kosovës më 4 mars, përfaqësuesja e Lartë e Bashkimit Evropian për Politikë të Jashtme, Federica Mogherini.

Periskopi.com Lajme

Ditorja serbe “Novosti” ka shkruar sot se pavarësisht paralajmërimeve nga disa politikanë shqiptarë se Mogherini do të jetë pjesëmarrëse në hapjen e urës kryesore mbi lumin Ibër, kjo nuk do të ndodhë.

Koçijançiq nuk është deklaruar për këtë, meqë punimet ende po vazhdojnë, ndërsa përurimi i urës pritet të bëhet në fund të marsit.

“Më 4 mars, përfaqësuesja e Lartë e BE-së, Federica Mogherini, do të vizitojë Kosovën. Ajo do të takojë kryeministrin e vendit dhe presidentin. Po ashtu do të vizitojë dhe qytetin e Mitrovicës. Vizita ka karakter rajonal, për prioritetet në e BE-së në këtë hapësirë”, ka thënë Koçijançiq.

Siç është raportuar, pas kësaj vizite Mogherini pritet të bëjë raport për gjendjet në rajon, i cili më pas do të shqyrtohet në Këshillin e punëve të jashtme të Bashkimit Evropian, ndërkaq do të jetë edhe temë e Samitit të Këshillit Evropian të caktuar për më 9 dhe 10 mars.

Kreu i radikalëve serbë, Vojisllav Sheshel, ka paralajmëruar protesta kundër vizitës së Mogherinit në Beograd dhe fjalimit të saj në Kuvendin e Serbisë. /Telegrafi/

Tmerr: Zjarr dhe tym i zi nga djegia e gomave në magjistralen Vushtrri-Mitrovicë (Video)

Dje në magjistralen Vushtrri Mitrovicë është parë një tym i zi dhe flaka e madhe që ka tmerruar të gjithë ata që dje kanë udhëtuar përgjatë kësaj rruge, por edhe banorët përreth.

Periskopi.com Lajme

Në një video të dërguar nga një lexues i lajmi.net shihet se një zjarr i madh ishte ndozur qëllimisht nga dikush afër rrugës teksa kalonin veturat, mirëpo nuk shihet se ka zjarrfikës apo policë në vendin e ngjarjes.

Kujtojmë, se Ministria e Mjedisit dhe Planifikimit Hapësinor, ka bërë një udhëzim që paralajmëron ndëshkime për të gjithë ata që gjuajnë mbeturina në tokë dhe ndezin goma, raporton lajmi.net.

Pra, ligji për mbrojtjen e ajrit ndalon rreptësisht djegien e gomave. Me ligj dënohet çdo person që kryen një veprim të tillë mund të dënohet më 100 euro.

Ndryshe, ndezja e gomave në mjedis të hapur liron dyoksinën dhe materie tjera të rrezikshme që janë tejet të rrezikshme për shëndetin e njeriut. /Lajmi.net

 

Përleshje në Mitrovicë, 10 të arrestuar e katër policë të lënduar

Policia në Mitrovicë ka arrestuar dhjetë persona pasi kanë sulmuar autobusët me tifozë nga Prishtina.

Periskopi.com Lajme

Kjo ka ndodhur pas ndeshjes së basketbollit sonte në Mitrovicë, ku si pasojë katër pjesëtarë të Policisë së Kosovës kanë marrë lëndime trupore gjatë tentimit të qetësimit të situatës, njofton Klan Kosova.

Zëdhënësi i policisë së Mitrovicës, Avni Zahiti, në një prononcim për Klan Kosova konfirmoi që kjo përleshje ka ndodhur si pasojë e disa qytetarëve të cilët kanë hedhur gjësende në drejtim të autobusëve të cilët po bartnin tifozët nga Prishtina.

Ky incident ka ndodhur pasi tifozët përcollën ndeshjen e basketbollit në mes Trepçës dhe Sigal Prishtinës, e cila u realizua në kuadër të gjysmëfinales së Kupër së Kosovës.

Sigal Prishtina kryesoi në këtë garë ndërkaq finalja pritet të zhvillohet të dielën në qytetin e Mitrovicës.

Pretendimi serb për Suhodollin bllokon Marrëveshjen Jug-Veri

Caktimi i kufirit administrativ mes Mitrovicës Veriore dhe Mitrovicës Jugore ka mbetur peng i pretendimit të veriorëve që brenda kufijve të vet ta përfshijë edhe Suhodollin, shkruan sot Koha Ditore.

Periskopi.com Lajme

 

Por, sipas ligjit për kufijtë administrativë, i hartuar mbi bazën e dispozitave të Pakos së Ahtisaarit, Suhodolli i përshkruhet Mitrovicës Jugore.

Kreu i Komunës së Mitrovicës Jugore, Agim Bahtiri, ka thënë se nuk do të pranojë që të heqë dorë nga Suhodolli, me gjithë kërkesën e Rakiqit që të ketë shmangie nga ligji. “Marrëveshja për rivitalizimin e urës parasheh që të vendoset edhe kufiri administrativ, por kjo çështje ka ngecur pasi unë nuk po lëshoj pe në Marrëveshjen e vitit 2004 të Kuvendit Komunal, e miratuar edhe nga Kuvendi i Kosovës, sipas së cilës Suhodolli i takon Mitrovicës Jugore. Goran Rakiqi po e kërkon, por unë nuk e jap Suhodollin”, ka thënë Bahtiri.

Banorët e veriut kujtojnë ditën kur Thaçi e Veseli i ndaluan të kthehen në shtëpitë e tyre (Video)

Familjet e dëbuara nga Mitrovica e Veriut, të cilëve u ishin djegur edhe shtëpitë, ankohen se as pas 18 vjetësh, ata nuk mund të kthehen në pronat e tyre.

Periskopi.com Lajme

Shumë prej tyre, gjatë këtyre viteve, jetojnë me qira, derisa as sot e kësaj dite nuk mund të shkojnë lirshëm në vendin ku kishin kaluar pjesën më të madhe të jetës.

Ndërkohë, i kanë të freskëta kujtimet, kur Hashim Thaçi e Kadri Veseli i ndaluan të shkonin në veri.

Ata thonë se iu bindën fjalëve të Thaçit, i cili atëkohë u premtoi atyre se do t’i kthente në shtëpitë e tyre në veri.

Veseli thotë se s’do ta ndalte asnjë deputet që të shkonte në veri

Kryetari i Kuvendit, Kadri Veseli, ka deklaruar se institucionet po ndihen më të lehtësuara pas rrënimit të murit në veri të vendit.

Periskopi.com Lajme

Ai po ashtu ka thënë se nëse një deputet nga Kuvendi do që të shkojë në veri të vendit, kryeparlamentari nuk do të përpiqej që t’i ndalte ata.

“Është mirë bashkërisht të shkojmë përpara. Të gjejmë pika më shumë të përbashkëta. Nuk është thumbuese as goditëse por dua ta them me shaka. Pas 99-ës nuk kam dëshirë që në mënyrë demonstruese të shkojmë në pjesën veriore. Nuk besoj që mund t’i lirojmë bashkëqytetarët tanë në veri përmes dhunës. Po ua jap fjalën publikisht, me bë me shkua dikush nga Kuvendi në veri, kurrë s’kam me i dal përpara me e ndal. I them shko – shko. S’e ndali le të shkon”, ka thënë ai.

Shpërndahen serbët që po ruanin murin në veri

Janë shpërndarë serbët që për disa orë rresht kanë qëndruar “duke ruajtur murin” në veri të Mitrovicës.

Periskopi.com Lajme

Shpërndarja e tyre është bërë pak pasi që ka përfunduar takimi në Rashkë në mes të kryeministrit serb Aleksandër Vuçiq dhe përfaqësuesve politikë të serbëve të Kosovës.

Në fakt, besohet se serbët nuk janë shpërndarë tërësisht, por kanë mbushur kafeteritë që janë përskaj murit.

Ata ishin tubuar sot pasdite matanë murit.

Muri i ndërtuar ilegalisht është bërë shkas i deklaratave të ashpra nga krerët politikë të Serbisë e Kosovës. Ata në Beogradë thonë se “Prishtina po planifikon të sulmojë veriun”. Në anën tjetër Prishtina zyrtare ka thënë se muri ilegal duhet të rrënohet.

Vuçiq e pranon se do shembet muri në veri

Kryeministri i Serbisë Aleksandar Vuçiq është takuar pasditen e së enjtes me përfaqësuesit e Listës Serbe dhe kryetarit e komunave me shumicë serbe në Kosovë

Periskopi.com Lajme

 

Gjatë një pauze të këtij takimi ai u ka thënë medieve se në takimin e së mërkurës në Bruksel bisedimet kanë qenë të rënda.

“Dëshiroj të them se kemi pasur bisedime të rënda, në të cilat Serbia i ka pranuar gjithçka që është kërkuar nga ajo. Pse këtë nuk duan ta thonë disa, pyetni ata. Së shpejti do të jem i gatshëm që qytetarët e Serbisë, plotësisht t’i informoj dhe tu them se me çfarë presionesh jemi ballafaquar, me çfarë tentimesh të shembjes së sovranitetit të vendit tonë”, ka thënë Vuçiq.

Sipas tij nga Prishtina është kërkuar shembja e murit në Mitrovicën e veriut, pavarësisht që rregullimi komunal është nën kompetencat e komunës.

“Madje edhe sipas ligjeve të Kosovës, kjo është nën kompetencat e drejtpërdrejta të vetëqeverisjeve lokale, pra nën kompetencat e Goran Rakiqit nga Mitrovica e veriut. ‘Nuk numërohet’, nuk vlejnë as ligjet e Kosovës. ‘Nuk vlen asgjë, duhet të shembet’. Goran Rakiq pranon që të shembet (muri), jo pse mendon keq për popullin e tij ose pse është frikacak, por sepse dëshiron ta ruaj paqen”, theksoi Vuçiq.

Ai gjithashtu ka theksuar se i ka porositur serbët e Kosovës që të rrinë të qetë.

“Në emër të shtetit të Serbisë dhe në emrin tim personal i lus serbët e Kosovës që të rrinë të qetë me çdo çmim, të jenë të dinjitetshëm dhe me krenari ta ruajnë emrin dhe mbiemrin e tyre serb, të mos i braktisin vatrat e tyre. Ne do të luftojmë me të vërtetën, me të drejtën dhe me drejtësi”, ka thënë Vuçiq, duke shtuar se për Serbinë dhe për serbët më e rëndësishme është paqja.

Serbët vazhdojnë ta ruajnë murin (Foto)

Serbët vazhdojnë të qëndrojnë edhe gjatë orëve të mbrëmjes afër cepit verior të urës së Ibrit.

Periskopi.com Lajme

Askush nuk di të thotë nëse ata kanë dalë në protestë apo jo, por ka disa orë që të ndarë në grupe po qëndrojnë aty.

Burime nga veriu i Mitrovicës bëjnë të ditur për KosovaPress se qytetarët janë mbledhur pasi që kanë dëgjuar se autoritetet e Prishtinës do ta rrënojnë me forcë murin e jashtëligjshëm.

Ndërkohë, Policia e Kosovës ka mohuar lajmin se ka shtuar prezencën dhe aktivitetet e veta nëpër lokacione të caktuara, ku si rrjedhojë në orët e pasdites erdhi deri te grumbullimi i rreth 200 personave në rrugën ‘Mbreti Petër’ në Mitrovicë.

20170202184512949

Hoxhiq ndryshon deklaratën, tash thotë se muri nuk është në projekt

Zyrtarja ekzekutive në komunën e Mitrovicës Veriore, Adriana Hoxhiq, ka thënë se muri ilegal në veri nuk është pjesë e projektit të Bashkimit Evropian për revitalizimin e urës kryesore të lumit Ibër.

Periskopi.com Lajme

Hoxhiq ka treguar për “Epoka e re” se ky projekt parasheh ndërtimin e një muri mbështetës për shëtitoren e paraparë, e jo për murin që është ndërtuar aty.

Ajo nuk ka mundur të flasë për kohën brenda së cilës mund të largohet ky mur, por ka thënë se në të ardhmen do të jetë një zgjidhje, e cila do të jetë fleksibile dhe e pranueshme për të gjitha palët.

Hoxhiq ka thënë se komunitetet që jetojnë në pjesën e veriut nuk janë të interesuar për tensione, aq më pak për ndonjë konflikt të mundshëm.

Por këto deklarata bien në kundërshtim me atë çfarë e tha dje Hoxhiq rreth murit në Veri. Ajo ndër tjerash njoftoi se muri ishte pjesë e projektit, gjë për të cilën ajo sot e mohon.

Shikojeni videon:

Serbia po e sheh Kosovën si “kafshatë të lehtë”

Qytetarët e Kosovës janë të shqetësuar nga zhvillimet e fundit në raportet me Serbinë dhe zhvillimet e fundit në politikën ndërkombëtare. Reciprociteti dhe Formimi i Ushtrisë së Kosovës shihet nga analistët si opsion që mund të frenojë ambiciet e Serbisë në Kosovë.

Periskopi.com Lajme

Raportet Kosovë-Serbi nuk po acarohen, pasi kanë qenë të acaruara në vazhdimësi, ka thënë në një prononcim për Telegrafin, deputeti i Lëvizjes Vetëvendosje, njëherësh anëtar i Komisionit për Punë të Brendshme, Siguri dhe mbikëqyrjen e Forcës së Sigurisë së Kosovës, Rexhep Selimi.

Ai tha se nuk i kujtohet të kenë pasur ndonjëherë raporte të mira serbët dhe shqiptarët e kjo, sipas tij, do të jetë e njëjtë edhe në të ardhmen.

Selimi tha se nuk janë shqiptarët ata që duan luftë me Serbinë, porse Serbia do luftë me shqiptarët.

E, sa i përket takimit të fundit të krerëve të Kosovës me ata të Serbisë, shton se situata e fundit i ka nxjerr në pah dy prononcime interesante.

“Kreu i shtetit të Serbisë kërcënon, pra luftën e përmend si kërcënim ndaj qytetarëve të Kosovës; Thaçi e përmend luftën si frikësim ndaj qytetarëve të Kosovës. Njëri duke kërcënuar e tjetri duke i frikësuar qytetarët e Kosovës e kanë një plan të përbashkët”, ka thënë Selimi për Telegrafin.

Ai shprehet se mund të ketë përshkallëzim të situatës, nëse raportet në fushën e sigurisë janë të disbalancuara.

“Serbia e ka një ushtri kërcënuese dhe të përgatitur për t’u futur në Kosovë, ndërkohë që Kosova dhe institucionet e saj nuk e ndërtojnë ushtrinë e vet. Sikur Kosova ta kishte ushtrinë e saj, të përgatitur, duke i shtuar këtu edhe partneritetin me NATO-n, Serbia do të urtohej dhe nuk do të paraqiste rrezik. Rreziku vjen meqë jemi cak i lehtë, kafshatë e lehtë në sy të Serbisë”, shtoi tutje Selimi.

I pyetur nga Telegrafi se cilët janë faktorët pengues që sot Kosova nuk e ka ushtrinë e vet, ai tha se nuk ka vullnet politik nga ana e Qeverisë. Ndërkaq, shtoi se presidenti Hashim Thaçi, kryeministri Isa Mustafa dhe kryeparlamentari Kadri Veseli vazhdojnë të bëjnë lojëra me opinionin publik.

“Nuk ka nevojë që prezenca e Policisë brenda territorit të Republikës së Kosovës, në veri, të numërohet si ndërhyrje. Paralajmërimi se më 1 ose 15 shkurt do të shembet muri në anën veriore të lumit Ibër, është thjesht paralajmërim për një problem. Me murin ata shohin jo zgjidhje të problemit, por krijim të problemit”, ka thënë Selimi.

Sipas tij, e gjithë kjo që po ndodh mund të kthehet në favor për Serbinë në rrafshin diplomatik.

“Serbia mund ta përdor këtë fjalor në aspektin diplomatik. Mos të harrojmë, Serbia tashmë është në avantazh për shkak se murin në anën veriore të urës së Ibrit e ka kthyer në një grackë Kosovën. Ndaj, kërkon pretekste për ndërhyrje në punë të brendshme të Kosovës”, ka thënë deputeti i VV-së.

Dren Ajeti, nga Grupi për studime Politike dhe Juridike, në një prononcim për Telegrafin ka thënë se ngjarjet e fundit treguan se është i largët normalizimi i marrëdhënieve ndërmjet shtetit të Kosovës dhe Serbisë. Sipas tij, pala kosovare është nisur në këto bisedime me idenë se Serbia do ta njohë Kosovën.

“Kjo nuk do të ndodhë përderisa Serbia mundohet me çdo kusht ta minojë këtë shtetësi”, ka thënë Ajeti.

Sipas tij, provokimi i fundit me trenin rus e mbushi kupën e provokimeve, për çka edhe Qeveria e vendit u detyrua të veprojë.

“Treni simbolizonte atë që Serbia pretendon për Kosovën – se është Jerusalemi i tyre”, thekson Ajeti, duke shtuar se provokimi serb te qytetarët e Kosovës ka krijuar ndjenjën se një incident me pasoja fatale mund të ndodhë. “Problemet e BE-së, kriza e refugjatëve, luftërat në Lindjen e Mesme etj. kanë bërë që shtetet të mos e kenë më prioritet Ballkanin dhe rrjedhimisht fokusi të zhvendoset diku tjetër. Kjo ka bërë që qytetarët të humbin besimin në faktorin ndërkombëtar si garantues i stabilitetit në rajon”.

Për të, provokimet serbe janë drejtuar ashtu që sjellja e palës kosovare të paraqitet si agresion.

“Ndalja e trenit nga njësitë speciale të Policisë është vlerësuar si ndalim i lëvizjes së lirë, si veprim për të mos lejuar kthimin e serbëve në Kosovë etj. Shumë media ndërkombëtare i morën këto mesazhe duke e paraqitur rastin e trenit si ndalje jo nga Policia e një shteti të pavarur dhe sovran, por si ndalje nga forcat e armatosura shqiptare”, thotë ai.

Sa i përket mediave serbe, Ajeti mendon se ato pasqyrojnë realitetin e Kosovës në formën që u konvenon atyre.

“Ka një pajtim në heshtje mes mediumeve serbe që çdo veprim nga pala shqiptare në Kosovë të vlerësohet si shkelje e të drejtave të serbëve. Rasti i fundit ishte i arrestimit në Prizren të personit me simbolet e nacionalistëve serbë që kishin kryer krime në Kosovë, që në mediat serbe u paraqit si arrestimi i një serbi që kishte vendosur të shëtiste nëpër Prizren”, ka thënë Ajeti.

Avokati nga Mitrovica, Musa Damati, situatën e tashme e ka vlerësuar të sigurt, pasi qytetarët e Republikës së Kosovës i kanë institucionet relevante të sigurisë. Ai tha se ajo që shtetit të Kosovës i duhet është shndërrimi i FSK-së në Ushtri.

“Stabilizimi real i situatës në Republikën e Kosovës në relacion me shtetin serb do të fillojë atëherë kur negociatorët e ndryshojnë qasjen e formatit të dialogut, duke insistuar në reciprocitet juridik, ekonomik, diplomatik dhe duke e përmbyllur dialogun me një traktat të paqes midis dy shteteve”, ka thënë Damati.

Ndërkaq, sa i përket elitës politike në Serbi, ai tha se retorika e tyre e ka humbur arsyen.

“Republika e Kosovës është shtet sovran dhe ky realitet është i patjetërsueshëm. Andaj, retorika e tyre është veç për konsum të brendshëm”, theksoi Damati.

Presidenti i Republikës së Kosovës, Hashim Thaçi, në një konferencë për media ka theksuar se gjatë takimit në Bruksel ka kërkuar nga shteti serb që t’i ndalë provokimet. Ndërkaq, gjatë ditës së sotme mediat serbe kanë shkruar se Thaçi, Mustafa dhe Veseli po përgatisin një “sulm të rrufeshëm e të papritur në pjesën veriore të Kosovës”.