Maqedonia, në prag të sanksioneve nga BE-ja

Rritja e presioneve nga bashkësia ndërkombëtare mund të ndihmojë në kapërcimin e krizës qeveritare në Maqedoni, e cila tani ka marrë edhe dimensionin e krizës etnike dhe ndëretnike, vlerësojnë njohësit e çështjeve ndërkombëtare. Komentet vijnë pasmesazheve të fundit në Shkup të komisionarit Johanes Hahn, i cili kërkoi respektimin e shumicës së re parlamentare dhe lejimin e formimit të qeverisë.

Periskopi.com Lajme

Mersel Bilalli, profesor i së drejtës ndërkombëtare në Universitetin Fon, thotë për Radion Evropa e Lirë se Maqedonia ka shansin e fundit për të evituar pasojat nga kriza e gjatë politike dhe sipas tij, masat ndëshkuese do të nisin që nga zyrtarët nëse edhe më tej vazhdojnë të shpërfillin thirrjet për kapërcimin e krizës institucionale.

“Mendoj se fillimi i sanksioneve do të jetë i lidhur me personalitete të caktuara, siç është presidenti i shtetit, ish-kryeministri, ndoshta edhe struktura të biznesit të lidhura me VMRO DPMNE-në, por edhe lobe tjera. Pra, unë mendoj se faza e parë mund të jenë sanksione personale e ndoshta më vonë ato mund të zgjerohen që për fat të keq, pasojat do t’i ndiejnë të gjithë qytetarët e Maqedonisë”, thotë Bilalli.

Europarlamentari Ivo Vajgl në një deklaratë për mediet maqedonase tha se VMRO-ja duhet të respektoj rrethanat e reja dhe të mos e pengojë kalimin e pushtetit te shumica e re.

Ai tha se në rast se nuk ka përmirësim të gjendjes, ndoshta do të përdoren edhe instrumente tjera apo sanksione, ku bën pjesë edhe ndihma financiare. Vajgl deklaroi se ish-kryeministri Gruevski në takimet e realizuara me euro-parlamentarët u ka thënë atyre se “do ta çojë deri në vend(politikën e tij), pasi nuk i shkohet në burg”. Vajgl ka thënë se nëse ky do të ishte motivi, atëherë edhe një kohë të gjatë nuk do të ketë kompromis. Këto pretendime të euro-parlamentarit janë hedhur poshtë nga VRMO-ja, duke i quajtur “manipulime në shërbim të opozitës”.

Edhe ish-ministri i Punëve të Jashtme, Denko Malevski, nuk e përjashton edhe mundësinë e vendosjes së sanksioneve, por fillimisht ndaj zyrtarëve, përfshirë edhe drejtuesit e VMRO-së, të cilët me të gjitha mënyrat e mundshme po pengojnë konstituimin e Kuvendit dhe të institucioneve tjera.

“Sanksionet mund të çojnë në prishjen e sistemit, por sa i përket individëve, sigurisht se Brukseli ka mekanizma të tillë dhe mund të aplikojë diçka të tillë. Paralajmërimet e tyre janë shumë serioze, më serioze edhe nuk mund të jenë. Ata janë kundër nxitjes së nacionalizmit, në veçanti, në kohën kur presin ndryshimet në pushtet apo respektimin e rezultatit zgjedhor dhe lejimin e funksionimit të shumicës së re parlamentare, ashtu siç ndodh në çdo shtet demokratik”, vlerëson Malevski.

Aplikimi eventual i sanksioneve, sipas komunikologut Mitko Gaxhovski, mund ta përkeqësojë gjendjen në Maqedoni, pasi pasojat do të bien edhe mbi qytetarin e rëndomtë.

“Nëse shteti përballet me izolim ndërkombëtar, kjo do të ketë pasoja të mëdha, madje edhe deri në pamundësinë e pagesës së pensioneve dhe pagave, që mund të çojë në situata të pakontrolluara dhe kjo gjithsesi se nuk do të ishte në favor të VMRO-së dhe të pushtetit të saj, pasi e gjitha kjo do t’u faturohej atyre nga ana popullit”, thotë Gaxhovski.

Partitë e shumicës së re parlamentare, LSDM, BDI dhe Aleanca për Shqiptarët që kanë 62 deputetë, të premten kanë njoftuar se kandidati tyre për kryetar të Kuvendit është Talat Xhaferi nga BDI-ja, por kandidatura e tij duhet të kalojë në Komisionin për zgjedhje dhe emërime që drejtohet nga VMRO-ja.

Ajo ka bërë të ditur se do ta kundërshtoj[ çdo nismë që nuk e respekton fituesen e zgjedhjen apo VMRO-në, ndërsa këtë e kanë paralajmëruar edhe protestuesit, por me arsyetimin se do të kundërshtojnë zgjedhjen e çdo kryeparlamentari, i cili, sipas tyre nuk e dënon deklaratën e partive politike shqiptare, me të cilën, siç pretendojnë ata, federalizohet Maqedonia dhe rrënohet karakteri i saj unitar.

Nuk ndalen protestat kundër shqiptarëve

Edhe sonte kanë vazhduar protestat e organizuar nga shoqata “Për Maqedoni të përbashkët”, kundër platformës së partive shqiptare për gjuhën shqipe.

Periskopi.com Lajme

Në ditën e 25-të, protesta në Shkup filloi para Qeverisë, duke marshuar deri tek Kuvendi.

Edhe sonte protestuesit kërkuan nga partitë maqedonase që të refuzojnë platformën e përbashkët të partive shqiptare dhe mos zbatimin e dygjuhësisë në tërë territorin e Maqedonisë

VMRO dhe BDI përplasen për deklaratën e përbashkët të partive shqiptare

Ilija Dimovski i VMRO DPMNE-së këmbëngulë se temë e bisedimeve me BDI-në rreth formimit të Qeverisë në asnjë moment nuk ka qenë deklarata e përbashkët e partive shqiptare.

Periskopi.com Lajme

Sipas tij, fakti që BDI nuk bëri koalicion me VMRO PMNE-n është pikërisht mospranimi i kësaj platforme.

“VMRO DPMNE absolutisht nuk ka pranuar dhe nuk ka biseduar për të ashtuquajturën platformë nga Tirana. Këtë gjë e kemi potencuar dhe kumtuar tashmë disa herë. Megjithatë, për fat të mirë ishte kumtuar edhe nga vetë BDI se dallimi mes VMRO-së dhe LSDM-së është se kjo e fundit ka pranuar platformën e Tiranës”, deklaroi Ilija Dimovski nga VMRO-DPMNE.

Nënkryetari i BDI-së Nevzat Bejta nga ana tjetër demanton Dimovskin. Në emisionin “Rruga Drejt” Bejta tha se VMRO DPMNE-ja kishte propozuar dygjuhësisë në uniformat e policisë.

“Ai ka qenë propozim i tyre, me të cilin jemi pajtuar edhe ne që policët shqiptarë t’i kenë uniformat në gjuhën shqipe. Ai është propozim i atyre, që uniformat e policisë shqiptare të jenë në dy gjuhë, gjuhën maqedonase dhe gjuhën shqipe”, deklaroi Nevzat Bejta, nënkryetar i BDI-së.

Nga BDI-ja njoftuan se koalicioni me VMRO DPMNE nuk u arrit për shkak të qëndrimeve të ndara rreth Speciales. Por VMRO-ja insiston se ndarja me BDI-në erdhi pasi Gruevski nuk ka pranuar platformën shqiptare.

Hahn javën e ardhshme në Shkup

Komisari evropian për Zgjerim, Johanes Hahn, së bashku me tre deputetë, Eduard Kukan, Ivo Vajgl dhe Knut Flekenshtajn, do të udhëtojnë javën e ardhshme për vizitë në Shkup, ka konfirmuar të premten zëdhënësja e Komisionit Evropian, Maja Kocijançiq.

Periskopi.com Lajme

Ajo ka deklaruar se Hahn dhe parlamentarët evropianë do të takohen me të gjitha partitë politike dhe presidentin maqedonas George Ivanov.

 

 

Vandalët fshijnë gjuhën shqipe në tabelat rrugore (Foto)

Disa tabela dhe shenja të komunikacionit janë vandalizuar nëpër rrugët e Maqedonisë.

Periskopi.com Lajme

Në redaksinë e TV21 kanë arritur disa fotografi, në të cilat shihet se si është fshirë gjithkund ku është shkruar në gjuhën shqipe.

Kryerësit e veprës si duket janë përkrahës të partisë OBRM-PDUKM, pasi nëpër disa tabela është shkruar emri i kësaj partie. Nga MPB ishin të pakokontaktueshëm për të treguar se sa tabela janë përshkëllyer. Por pas reagimeve të qytetarëve nëpër rrjetet sociale tabelat janë pastruar.

 

Kryeministri i Maqedonisë – BE’së: Mos u përziej në punët e brendshme

Kryeministri teknik i Maqedonisë, Emil Dimitriev, në samitin e sotëm të vendeve të Ballkanit Perëndimor i cili po mbahet në Sarajavë, porositi që bashkëpunimi mes vendeve është i patjetërsueshëm, ndërsa sipas tij, nuk duhet të ketë përzierje në punët e brendshme dhe duhet të respektohet sovraniteti dhe integriteti i çdo shteti, përcjell Telegrafi Maqedoni.

Periskopi.com Lajme

Siç informon AIM, në këtë samit përkar Dimitrievit pjesëmarrës janë edhe kryeministrat e Bosnjës, Shqipërisë, Malit të Zi, Kosovës dhe Serbisë, si dhe eurokomesari për zgjerim dhe fqinjësi të mirë Johannes Hahn dhe ministri i jashtëm italian Angellino Alfano.

Dimitriev gjithashtu tha se Maqedonia dhe vendet tjera të rajonit duhet të konsiderohen si partnere në ballafaqimin me pengesat që ballafaqohet BE-ja.

I akuzuari në rastin “Kumanova”: Deshëm ta ridefinojmë Maqedoninë

Genci Sefaj, i akuzuari në rastin “Kumanova” në seancën e sotme gjyqësore për rastin “Kumanova”, gjatë dëshmisë së tij, ka zbuluar synimet e grupit dhe ka shpalosur kërkesat që grupi kishte përpiluar e që kishin të bëjnë me të drejtat e shqiptare, konkretisht me ridefinimin e statusit shtetformues të shqiptarëve. Sefaj hedh poshtë kategorikisht akuzën për terrorizëm. Ai tha se motiv që grupi të organizohet ishin padrejtësitë e shtetit të Maqedonisë ndaj shqiptarëve.

Periskopi.com Lajme

“1-2 maj, 2015, kemi hyrë në Maqedoni. Një natë kemi kaluar në Maqedoni. Natën tjetër në mes Sllupçanit dhe Orizares dhe pastaj kemi hyrë në Kumanovë- vend i panjohur për mua. Jemi mobilizuar, me vullnet kam pranuar. Qëllimi ka qenë të dalim publikisht me kumtesë në emër të UÇK-së. Kemi dashur të organizojmë dalje publike me kërkesa të qarta, para medieve- opinionit. Kemi dashur të tërheqim vëmendjen e shtetit ndaj kërkesave të shqiptarëve. Marrëveshja e Ohrit duhej të realizohej deri më vitin 2004. Pastaj ju dha kohë shtesë deri më 2006, por e njëjta mbeti vetëm në sirtare. Në vend se pas 2001 të përmirësohej gjendja e shqiptarëve situata shkoi mbrapa. Gjendja tash nuk mund të krahasohet as me Kushtetutën e 1974. Kishim eliminimin e ish bashkëluftëtarëve, montimet si “Monstra”, “Sopoti”, … u krijua përshtypje se shteti po punon me dy ligje- një për shqiptarët dhe një për maqedonasit. Këto ishin motive që u gjendëm në Lagjen e Trimave”, dëshmoi Sefaj, raporton gazeta Lajm

Ai pohon se ftesa i ishte bërë nga Maqedonia komandantit të tyre që të formojmë njësi, konkretisht Mirsad Ndrecajt.

“Mirsadit i është besuar formimi i njësisë. Unë jam informuar më 26 prill nga Mirsad Ndrecaj dhe vet u afrova. Unë jam me protezë, nuk deshën të më pranojnë, por insistova dhe u bëra pjesë e UÇK-së. Meqë deri më 8 maj nuk kishim bërë asgjë, kërkuam nga Mirsadi veprime konkrete dhe kërkuam që kumtesën ta bëjmë vet ne. E përpiluam kumtesën me këto kërkesa: Ridefinimi i statusit shtetformues të shqiptarëve, gjuha shqipe të jetë zyrtare dhe e barabartë me gjuhën maqedonase, zgjidhja e problemit me nënshtetësitë, ndërprerja e gjuhës së urrejtjes, ndërprerja e rasteve të montuara dhe zbardhja e tyre, zbardhja e vrasjeve të bashkëluftëtarëve tonë,- konkretisht rasti i Harun Aliut- Kushtrimit, të ndërpritet diskriminimi në buxhet, kulturë, arsim, e kështu me radhë …”, deklaroi Sefaj para gjykatës.

Sefaj njoftoi se Mirsadi e mori përsipër ta dërgojë kumtesën, por, sipas tij, nuk u kuptua se pse nuk është publikuar dhe në interes të kujt ishte modalja e kumtesës.

 

“Datën e 9 majit, ora 4 e gjysmë u zgjuam nga krismat. Veprimet tjera i dini. Kemi kërkuar ndërprerjen e zjarrit që të mund të dalin civilët, familja e Shaban Jasharit, e Fadil Fejzullahut dhe Irfan Lutfiu. OSBE kërkonte ndaljen e gjuajtjeve, por këtë e kemi respektuar vetëm ne. Dhe, kjo pati kundër efekt, sepse njësiti e mori si dobësi tonën dhe e rritën artilerinë kundër nesh. Kur për herë të parë u ndërpre zjarri u vra me snajper Fatlum Vishesella. Vërtetohet edhe në përgjime se, ishte pabesi. Për një kohë prap na është kërkuar ndalja e zjarrit, Xhafer Zymberi ishte pozicionuar dhe po fliste për ndërprerjen e zjarrit, edhe Xhaferi është qëlluar në atë moment me snajper nga ambulanca që është përballë lagjes”, vazhdoi dëshminë e tij Sefaj.

Sipas tij, nëse policia kishte aplikuar procedurë standarde operative, nëse do të kishte për qëllim arrestimin e tyre do të ishte më e logjikshme që nëpërmes mikrofonit të kërkonte dorëzimin.

“Nuk them se do të ishim bindur, por do të kishte më pak humbje. Kjo nuk ndodhi. A e ka ditur policia se çfarë grupi jemi ne, apo i ka dërguar policët duke u thënë se në Lagjen e Trimave ka narko- trafikantë| Policia na ka sulmuar pa paralajmërim.

Policia na akuzon për terror, se kemi shkaktuar pasiguri te qytetarët. Nga 1-9 maj ishim në Kumanovë. Sa raste ka të denoncuar në polici? Çfarë kemi pritur ne deri më atë ditë. Ne kemi mundur të shkojmë deri në Koçan. Më 7 maj në lagje kishte inspektorë të policisë. Kemi mundur të veprojmë. Kanë ardhur inspektor me letra, si postier, nuk kemi vepruar. Në lagje jeta shkonte normal”, tha Sefaj.

“Isha me uniformë. Komunikata duhej të dilte në emër të UÇK-së. Ne nuk mund të dilnim si shoqëri civile ose organizatë humanitare. Duhej të ishim më serioz. Për të qenë më të besueshëm na duhej uniforma dhe arma”, ishte decid në dëshminë e tij Sefaj.

Ndryshe, Enver Hoxhaj është tërhequr nga dëshmia.

Vitin e kaluar në “Lagjen e Trimave” në Kumanovë, një grup i armatosur është përleshur me forcat e sigurisë të Maqedonisë. Nga rasti në fjalë, u vranë 8 policë nga njësitet speciale dhe nga njësitet e veçanta të MPB-së, ndërkaq 4 të tjerë u plagosën. Ndërkaq, humbën jetën edhe 10 pjesëtar të grupit të armatosur.

“The Economist”: Rreziku i konfliktit në Maqedoni

Tensionet me politikanët shqiptarë në Maqedoni mund të degjenerojnë në konflikt, paralajmëron “The Economist”.

Periskopi.com Lajme

E përjavshmja prestigjioze britanike analizon interesin e politikanëve perëndimorë për Shkupin, deklaratat polemizuese ruse dhe afrimin e luftës së trumpetuar nga gazetat serbe.

Ngërçi nisi me grindjen për koalicion, kur BDI-ja vendosi që të mos bashkëpunonte më tej me VMRO-DPMNE-në, dhe u përshkallëzua nga refuzimi i Gjorgje Ivanovit për t’i dorëzuar mandatin LSDM-së, me argumentin se kërkesat e shqiptarëve do të “shkatërojnë” vendin.

Por duke u thelluar më tej në situatën që ka bllokuar jetën politike të Maqedonisë, “The Economist” shkruan se kriza politike i ka rrënjët që në vitin 2015, kur LSDM-ja filloi të publikojë përgjimet e paligjshme që përfshinë Nikola Gruevskin.

Për këtë arsye u krijua Prokuroria Speciale Publike dhe mbështetësit e VMRO-së kaluan në akuza ndaj George Sorosit për konspiracion ndaj Maqedonisë.

Pretendimeve të ngjashme nuk i ka shpëtuar as vet Federica Mogherini. Sipas Radmila Sekerinska, zv.kryetare e socialdemokratëve, është vet Gruevski ai që e nxiti krizën në momentin kur kuptoi se mund të humbiste pushtetin, e kjo do ta linte të ekspozuar ndaj hetimeve të Prokurorise Speciale.

Ahmeti, – vazhdon “The Economist”, – paralajmëron që mosmarrëveshjet të mos kthehen nga politike në përplasje të karakterit etnik dhe mohon çdo plan të Shqipërisë së madhe. Rusia, sipas tij, është ajo që po ndez gjakrat në Ballkan.

“Mënyra më e mirë për të dalë nga kjo gjendje, – përfundon artikulli, – mbetet përshpejtimi i procesit të anëtarësimit të Maqedonisë në NATO dhe BE, e këtu i urojmë fat”.

Mijëra qytetarë në protestat antishqiptare në Maqedoni (Video)

Kanë vijuar edhe sot në shumë qytete të vendit protestat kundër platformës shqiptare.

Periskopi.com Lajme

 

Në marshin e sotëm në Shkup dolën rreth janë 4000 persona ndërsa në të janë bashkëngjitur edhe disa bujq të cilët në rrugë kanë nxjerr edhe traktorë e kombajnë.

Në kundërshtim me veprimet e tyre dhe protestat kundër zgjerimit të të drejtave të shqiptarëve ata kanë folur kanë folur edhe për bashkëjetesën në Maqedoni.

Gjatë protestave nuk janë shënuar incidente ndërsa ka pas shumë pankarta me mbishkrime akuzuese ndaj Zaevit për tradhti kombëtare.

Zbulohet emri: Ja kush do të jetë kreu shqiptar i Kuvendit të Maqedonisë

Ish Ministri i Mbrojtjes së Republikës së Maqedonisë, Talat Xhaferi prite të jetë kryetari i Parlamentit në rast të formimit të qeverisë mes LSDM-së dhe BDI-së.

Periskopi.com Lajme

Sipas Republika.mk, ka një marrëveshje me Ali Ahmetit dhe Zpran Zaev për ta bërë Xhaferin kruetar të Kuvendit të Maqedonisë.

Në mungesë të Presidentit të shtetit, Xhaferi do të udhëheqë shtetin dhe do të jetë komandant i përgjithshëm i forcave të armatosura të Republikës së Maqedonisë.

Liderët shqiptarë në Maqedoni: S’heqim dorë nga Deklarata e përbashkët (Video)

Liderët e partive politike shqiptare, pas takimit të tyre që sot realizuan me sekretarin e përgjithshëm të OSBE-së, Lamberto Zannier, me të cilin kanë diskutuar për situatën aktuale politike në vend.

Periskopi.com Lajme

Pas këtij takimi në deklaratat për gazetarët, Ziadin Sela, Ali Ahmeti dhe Bilall Kasami këmbëngulën se asgjë që theksohet në pikat e Delaratës së përbashkët nuk është jashtë Kushtetutës së Maqedonisë.

BDI vendosi, Osmani: Do të jemi pjesë e Qeverisë së re

Bashkimi Demokratik për Integrim (BDI) ka vendosur që të jetë pjesë e Qeverisë së re me LSDM. Ky vendim është miratuar mbrëmë në mbledhjen e kryesisë qendrore, ndërsa ai është bërë i ditur nga zëdhënësi i saj, Bujar Osmani, informon INA.

Periskopi.com Lajme

Ai ka sqaruar se partia e tyre ka sqaruar dilemat që të jetë ose jo në qeveri dhe se pas debateve është vendosur se BDI përveç përkrahjes së liderit të LSDM, Zoran Zaev për marrjen e mandatit, ajo do të jetë edhe pjesë e Qeverisë së re.

Njëkohësisht Osmani theksoi se BDI  si subjekt politik është e hapur për hetimin e aktiviteteve të saj që nga themelimi i saj dhe se angazhimi i saj bazohet në reforma në drejtësi.

Osmani ka përmendur tani programin zgjedhor që kanë pasur gjatë zgjedhjeve të njohur si përbetimet e BDI-së, ndërsa nuk ka përmendur platformën e partive shqiptare. Vendimi për hyrje në qeveri ka të bëjë me respektimin e vullnetit të shqiptarëve. (INA)

VMRO-DPMNE bën thirrje për zgjedhje të reja

VMRO-DPMNE i bën thirrje LSDM-së dhe Zoran Zaevit nëse janë të sigurt se pranimi i platformës gjithëshqiptare është e mirë për ardhmërinë e Maqedonisë dhe ajo do të mbështetej nga qytetarët, të pranojnë shpallje të zgjedhjeve të reja në të cilat do të votohej për platformën nga Tirana.

Periskopi.com Lajme

“Në zgjedhjet e dhjetorit qytetarët nuk votuan për platformën nga Tirana. Atë apo cilëndo qoftë platformë tjetër të përpiluar në shtet të huaj nuk mund dhe nuk lejohet të bëhet kusht për formim të qeverisë në Republikën e Maqedonisë”, theksojnë nga VMRO-DPMNE në kumtesën në të cilën shtojnë se LSDM-ja është shantazhuar ta pranojë platformën dhe të punojë në gjetjen e mënyrës ajo të realizohet.

Sipas atyre më pak është e rëndësishme me çka është i shantazhuar Zoran Zaev dhe LSDM-ja, shkruan Zhurnal.mk.

Shumë me më rëndësi, theksojnë është të parandalohen pasojat nga shantazhi dhe zbatimi i platformës të cilat donë të thonë ridefinim i Maqedonisë dhe bartin rrezik që të shkaktojnë tensione.

“Nëse Zoran Zaev nuk është i sigurt në rejtingun personal dhe mbështetjen, vlerësojmë se LSDM-ja duhet ta hedhë poshtë platformën dhe të heq dorë nga realizimi i të gjitha elementeve nga ato të cilat çojnë drejtë formimit të shtetit binacional. Në rast të tillë VMRO-DPMNE-ja do t`ia jap votat e saj LSDM-së që të formojë qeveri, si dëshiron, por pa shatnazhe dhe pranim të platformave të cilat shkaktojnë dëme të mëdha dhe e shndërrojnë Maqedoninë nga shteti multietnik në shtet binacional”, thuhet në kumtesë.

Maqedonasit vazhdojnë protestat kundër gjuhës shqipe

Edhe sonte janë mbajtur protesta në disa qytete të Maqedonisë kundër platformës së partive shqiptare, përkundër vendimit të Presidentit Gjorgje Ivanov, për të mos mandatuar liderin e LSDM-së, Zoran Zaev për kryeministër.

Periskopi.com Lajme

Protestuesit sikurse mbrëmjeve tjera, edhe sonte kanë mbajtur pankarta dhe kanë bërë thirrje kundër zyrtarizmit të gjuhës shqipe në Maqedoni, transmeton KP.

Edhe pse VMRO vazhdimisht mohon zërat se qëndrojnë pas protestave, zyrtarët e saj janë parë vazhdimisht në protestë, ndërsa kërkesat e protestuesve janë në relacion me kërkesat e liderëve të saj.

Besa kërkojnë ndërhyrje të bashkësisë ndërkombëtare në Maqedoni

Lëvizja Besa përmes një komunikate të dërguar për Telegrafin në Maqedoni ka reaguar ndaj vendimit të sotëm të presidentit Ivanov, i cili vendos të mos e ndajë mandatin për formimin e qeverisë së re. Nga Lëvizja Besa thonë se ky është moment shqetësues dhe Ivanov është shkelësi më i madh i Kushtetutës.

Periskopi.com Lajme

“Ky është një moment shqetësues për vendin. Në të vërtetë, Ivanov është shkelësi më i madh i Kushtetutës, qoftë kur ia dha mandatin padrejtësisht kryetarit të VMRO-DPMNE-së ose kur nuk ia dha kryetarit të LSDM-së. E kur kihet parasysh se ai përfaqëson institucionin më të lartë të vendit, ndërsa në emër të këtij institucioni ai gati sa nuk bëri thirrje për linçim të shqiptarëve të Maqedonisë, vetëm për arsyen e vetme se shqiptarët paskan nënshkruar një Deklaratë të Përbashkët të Partive Shqiptare, kjo është alarmante. Prandaj i bëjmë thirrje bashkësisë ndërkombëtare, Shteteve të Bashkuara të Amerikës dhe Bashkimit Europian, që ta kenë parasysh se vendimi i sotëm është rrezik potencial për komunitetin shqiptar në Maqedoni, andaj i ftojmë ato që të ndërhyjnë në rikthimin e shtetit të së drejtës, për të garantuar paqen dhe sigurinë e të gjithë qytetarëve në Republikën e Maqedonisë dhe për ta vendosur shtetin në binarët e integrimit euro-atlantik”, thuhet në komunikatën e Lëvizjes Besa.

Ata gjithashtu ju bëjnë thirrje qytetarëve të jenë gjakftohtë dhe të mos bien pre e provokimeve të ndryshme./Telegrafi/

Prag kaosi? Maqedonasit bllokojnë rrugën në protestë ndaj shqiptarëve (Foto lajm)

Çfarë do të ndodhë tani që Ivanov nuk ia dha mandatin LSDM-së?

Periskopi.com Uncategorized

Gruevski dhe Ivanov bashkohen kundër shqiptarëve: Platforma e Tiranës është anti-kushtetuese Maqedonasit po ndërmarrin hapa të tjerë kundër platformës së partive shqiptare të pranuar tashmë nga Zoran Zaev, të cilin vetëm pak minuta më parë presidenti Ivanov refuzoi t’i jepte mandatin për të bërë qeverinë.

TV Tera raporton se një grup maqedonasish kanë bllokuar rrugën Manastir – Prilep në shenjë proteste, përcjell Albeu.com.

 

Bllokada ka ndodhur në udhëkryqin në Kukureçani në dalje të Manastirit.

Protesta në fjalë është shoqëruar me këngë patriotike maqedonase, flamuj dhe thirrje kundër gjuhës shqipe dhe shqiptarëve. /Albeu.com

Deklarata kontradiktore për formimin e qeverisë në Maqedoni

Harmonizohen qëndrimet me partitë shqiptare? Kreu socialdemokrat, Zoran Zaev pohon se ka arritur ujdi me partitë shqiptare. Por nga ana e saj BDI-ja pohon se mund të mbetet në opozitë.

Periskopi.com Lajme

Kryetari i Lidhjes Social Demokrate të Maqedonisë Zoran Zaev ka bërë të ditur se i ka siguruar nënshkrimet e nevojshme të deputetëve të partive politike shqiptare për të marrë mandatin nga Presidenti për krijimin e Qeverisë së re. Zaev ka thënë, se ka harmonizuar qëndrimet me partitë politike shqiptare, përfshirë edhe Ligjin për përdorimin e gjuhëve.

“Tanimë kemi siguruar nënshkrimet e nevojshme të deputetëve për të marrë mandatin. Besoj se ka mbetur një pjesë e vogël për t’u biseduar rreth formimit të Qeverisë së Maqedonisë, sepse çështjet kruciale, siç është platforma e Qeverisë së re, platforma e Lidhjes Social Demokrate, platforma e partive politike shqiptare, ligji që rregullon përdorimin e gjuhëve tanimë janë harmonizuar”, ka theksuar Zaev.

Sipas tij ka mbetur që të diskutohet me kryetarët e partive të tjera për të diskutuar rreth ndarjes së dikastereve ministrore dhe kuadrin që do të jetë pjesë e qeverisë së re .”Besoj se brenda 10 apo 15 ditëve në fillim të muajit mars, Maqedonia do ta ketë qeverinë e re, të kryesuar nga social demokratët”, është shprehur Zaev. Ai nuk beson se do të ketë protesta të organizuara nga VMRO DPMNE, e kryesuar nga Nikolla Gruevski si shenjë pakënaqësie apo shfaqje revolte. “Ajo se do të ketë protesta apo bojkot nga VMRO DPMNE nuk do të ndodh, sepse siç e dini kur e majta vjen në pushtet atëherë ka dialog. Ne jemi të hapur për të biseduar për gjithçka dhe të arrihet një zgjidhje. Nëse dëshirojnë pa arsye të mbajnë protesta atëherë le të shëtisin pak rrugëve “, ka thënë Zaev.

BDI në dilemë – pë pozitë apo opozitë?

Kryetari i Bashkimit Demokratik për Integrim, Ali Ahmeti ka thënë se BDI-ja mund të mbetet në opozitë dhe kjo është një nga opsionet e debatit në mbledhjen e kryesisë qendrore të mbajtur të premten. Kryesia qendrore e Bashkimit Demokratik për Integrim ka analizuar dy opsione, nëse do të përkrahë një qeveri të pakicës, ose të marrë pjese në qeverinë e ardhshme të Maqedonisë.

“Shqyrtojmë opcionin të ngelemi në opozitë”, është përgjigjur Ahmeti i pyetur lidhur me pozicionin e partisë së tij në negociatat për formimin e qeverisë së re. Sipas tij, akoma nuk është arritur marrëveshja se vallë do t’i jep apo jo firmat e deputetëve kreut të LSDM-së, Zoran Zaev, që ai të mund të marrë mandatin nga presidenti Gjorge Ivanov. I pyetur nëse në këto bisedime a bisedohet për një koalicion eventual me VMRON-DPMNE-në , zëdhënësi i BDI-së Bujar Osmani është përgjigjur shkurt, se një gjë e tillë nuk po bisedohet.

VMRO-DPMNE: Nuk do të lejojmë ridefinimin e shtetit

Njoftimet për arritjen e marrëveshjes për gjuhën shqipe kanë nxitur reagime të shumta, në veçanti nga VMRO DPMNE-ja e Nikolla Gruevskit, e cila ka paralajmëruar kundërshtimin e një zgjidhjeje të tillë me të gjitha format e mundshme.Lideri i VMRO-DPMNE-së, Nikolla Gruevski vlerëson se LSDM-ja dhe Zoran Zaev duan t’i defaktorizojnë maqedonasit në këtë shtet.

“Tentativa e LSDM-së dhe BDI-së është që të bëjnë defaktorizim të maqedonasve, të popullit maqedonas dhe të bashkësive të tjera etnike si turqit, serbët, vllehët, romët etj. Këtë defakrorizim nuk do ta lejojmë. VMRO-DPMNE-ja do të qëndrojë fuqishëm, në cilën do situatë në mbrojtjen e shtetit dhe të interesave nacionale. LSDM bën garë me veten se sa më shumë do t’u ofrojë partive shqiptare. Kjo duhet ndalur. Dikush nuk e kupton seriozisht këtë, por koha tregon në se LSDM fuqishëm kërkon të bëjë ridefinimin e Republikës së Maqedonisë”, ka thënë Gruevski.

Mbështetje Zaevit, nëse ai pranon platformën shqiptare

Dy partitë e tjera shqiptare Aleanca për Shqiptarët dhe Lëvizja Besa thonë se do të deponojnë nënshkrimet e deputetëve të tyre për të marrë mandatin kryetari i Lidhjes Social Demokrate të Maqedonisë, dhe pas kësaj do të fillojnë bisedimet për të marrë ose jo pjesë në Qeveri ndërkohë që kanë thënë se do ta mbështesin Qeverinë e kryesuar nga LSDM-ja. Të dyja partitë pohuan se do të negocionin me LSDM-në për koalicionim të mundshëm, por vetëm nëse plotësohen kushtet e tyre. Ziadin Sela nga Aleanca betonoi edhe njëherë qëndrimin se nuk do të jetë pjesë e një koalicioni që nuk do ta barazonte shqipen me maqedonishten.

Drafti për ligjin për gjuhën shqipe është i përgatitur me kontributin tonë dhe janë gjërat kryesore, të cilat ne i mendojmë se duhet të jenë në ligj dhe akoma do të punohet në mënyrë që të jetë një ligj i mirëfilltë për përdorimin e gjuhës shqipe, ka thënë Zijadin Sela nga Aleanca për Shqiptarët.

Zaev ofendon rëndë Ali Ahmetin dhe BDI-në: Jeni të korruptuar

Kryetari i Lidhjes Social Demokrate të Maqedonisë (LSDM), Zoran Zaev gjatë një interviste të tij në kohën kur po i bënte publike të ashtuquajturat “Bomba të Zaevit” ka ofenduar rëndë lidershipin e BDI-së dhe vetë Ali Ahmetin duke i quajtur njerëz të korruptuar të cilët punojnë vetëm për para.

Periskopi.com Lajme

“Dy bomba nga 38-të dy ishin për Bashkimin Demokratik për Integrim (BDI), ishin speciale për to. Ja publikisht e them e korroptuar është edhe një pjesë e BDI-së dhe ikje nga kjo nuk ka së bashku me VMRO-DPMNE kanë ndarë para prone të Republikës së Maqedonisë,të qytetarëve të saj. Për të shkretat para është çmendur jo për gjë tjetër, për pushtet dhe fuqi jo për gjë tjetër, për para bëhet fjalë dhe nuk ka dilema këtu”, ka thënë Zaev, në një intervistë të dhënë para disa ditëve.

A janë këto kërcnime që Zaev i bën për të frikësuar Ali Ahmetin dhe ekipin tij?, po bën me këtë ai shantazhë ndaj BDI-së që nënkryetarët e saj Teuta Arifi dhe Nevzat Bejta që po takohen me Zaevin. Kjo mbetet një dilem që do ta zgjedh koha.

Maqedonia e përgjysmon tregtinë me Kosovën

Edhe përkundër rënies se shkëmbimit tregtar katër vitet e fundit me Kosovën,  Maqedonia deri në fund të vitit 2016 ka shënuar suficit sa i përket eksportit të mallrave kundrejt importit të mallrave nga Kosova, shkruan gazeta KOHA.

Periskopi.com Lajme

Në tregun kosovar, kompanitë nga Maqedonia brenda vitit të kaluar kanë eksportuar mallra në vlerë prej mbi 188 milionë euro, dhe krahasuar me vitin 2015, importi është rritur për 20 milionë euro, gjegjësisht në vitin 2015 Maqedonia drejt tregut kosovar kishte eksportuar rreth 168 milionë euro.

Nga na tjetër, kompanitë kosovare në vitin 2016 në Maqedoni kanë eksportuar mallra me vlerë tepër të ulët, vetëm 30 milionë euro, ndërsa krahasuar me vitin 2015 sa i përket eksportit të mallrave kosovare në tregun e Maqedonisë, ato kanë shënuar rritje prej 8 milionë eurove.

Eksporti i mallrave nga Kosova i hyrë në tregun e Maqedonisë në vitin 2015 kapte shifrën prej 22 milionë eurove. Nëse do të krahasonim se si ishte shkëmbimin tregtar midis Maqedonisë dhe Kosovës pesë vite më parë, mund të konstatohet se Maqedonia ndër vite po e humb tregun e Kosovës.

Kështu, në vitin 2011 Maqedonia ishte partner numër një sa i përket shkëmbimit tregtar me Kosovën, sepse në këtë vit këmbimi tregtar me Kosovën kishte arritur shifrën prej 421 milionë eurove, edhe atë mallrat e eksportuara nga Maqedonia drejt Kosovës shënonin vlerën prej 396 milionë eurove, ndërsa mallrat e eksportuara nga Kosova në tregun e Maqedonisë kapnin shifrën prej 25 milionë eurove.

Po të krahasojmë këto shifra të vitit 2011 me shifrat e fundit të vitit 2016, i bie që Maqedonia brenda pesë viteve drejt tregun kosovar të eksporton 50 për qind më pak mallra.

Njësitë speciale të Maqedonisë trajnohen me instruktorë të SHBA-së

Instruktorë të njësive speciale amerikane do t’i trajtojnë pjesëtarët e njësive speciale të Ministrisë së punëve të brendshme (MPB) dhe të Armatës së Republikës së Maqedonisë.

Periskopi.com Lajme

MPB-ja bën të ditur se këto ushtrime do të mbahen sot në bazën e Njësisë për shpërndarje të shpejtë në kazermën ”Gjorçe Petrov”./Telegrafi/