Lunacek uron për zgjedhjet, ka një mesazh për Kosovën

Periskopi.com Lajme

Nënkryetarja e Parlamentit Evropian, Ulrike Lunacek, njëherit edhe raportuese për Kosovën në këtë parlament, u kërkon partive të Kosovës që të formojnë shpejt një qeveri të re me frymën evropiane.

Ka folur për arbresh.info dhe ka uruar për qytetarët e Kosovës dhe partitë politike për këto zgjedhje  duke i vlerësuar “në përgjithësi të organizuara mirë dhe funksionale.”

“Komisioni Qendror i Zgjedhjeve ishte i suksesshëm në organizimin e këtyre zgjedhjeve të parakohshme në një periudhë të shkurtër kohore. Gjithashtu deklaroj me kënaqësi se shumica e procesit ka ndodhur në një atmosferë paqësore,” është shprehur Lunacek.

Sipas saj, kjo është inkurajuese për zhvillimin e vazhdueshëm demokratik të Kosovës.

“Po ashtu mirëpres pjesëmarrjen në rritje të komunitetit serb të Kosovës si shenjë pozitive të angazhimit të tyre të mëtejshëm me institucionet e vendit, megjithëse akte të ndryshme të frikësimit ndaj kandidatëve të komunitetit serb të Kosovës në konkurrencë me Listën Srpska.”

Ajo thekson se “sot puna për të mirën e vendit dhe qytetarëve të saj duhet të fillojë përsëri,” duke bërë një thirrje për përfaqësuesit politik,

“Prandaj i bëj thirrje partive të Kosovës që të formojnë shpejt një qeveri për të trajtuar sfidat e ndryshme dhe për të vazhduar rrugën e Kosovës në BE.”

Qeveria e ardhshme, sipas saj,  duhet të fokusohet në krijimin e kushteve më të mira ekonomike dhe sociale, si dhe të punojë më shumë në arsim dhe shëndetësi.

“Kjo është ajo që qytetarët kërkojnë! Kjo është ajo që miqtë e Kosovës në BE duan për qytetarët e Kosovës.”

Ish-qeveria dhe Kuvendi i Kosovës kanë humbur shumë kohë gjatë viteve të fundit, vlerëson Lunacek, duke shtuar se dy standardet e mbetura për liberalizimin e vizave mund dhe duhet të përmbushen së shpejti nga Kosova.

“Ratifikimi i marrëveshjes së demarkacionit kufitar me Malin e Zi është një domosdoshmëri si rekordi i përmirësuar i bindjeve të nivelit të lartë për korrupsionin dhe krimin e organizuar. Qeveria e ardhshme duhet të sigurojë një rezultat të mirë të këtij procesi të liberalizimit të vizave në mënyrë që të hapë rrugën për udhëtimin pa viza për qytetarët e Kosovës sa më shpejt që të jetë e mundur,” thotë Lunacek për arbresh.info.

Ajo ka paralajmëruar se këtë javë Parlamenti Evropian do të miratojë gjithashtu raportin e saj për përparimin e Kosovës drejt BE.

“Ky votim do të dërgojë edhe njëherë një sinjal të fortë se e ardhmja e një Kosove të pavarur qëndron në Bashkimin Evropian. Partitë dhe politikanët e Kosovës janë të nxitur që t’i përgjigjen këtij sinjali nga pala e PE në një mënyrë konstruktive dhe frymës evropiane.”

Liderët kosovarë nuk duhet harrojnë kushtet, duhet kujdes me premtimet

Periskopi.com Intervista

Pavarësisht se kush fiton zgjedhjet në Kosovë, duhet të realizojë dy kushtet e domosdoshme për liberalizimin e vizave, thotë në intervistën ekskluzive me DW, Ulrike Lunacek, raportuese e posaçme për Kosovën.

Deutsche Welle: Zonja Lunacek, çfarë prisni nga zgjedhjet e ardhshme në Kosovë?

Ulrike Lunacek: Unë pres që të gjithë kandidatët, pavarësisht përkatësisë partiake apo në koalicione, gjatë fushatës të bëjnë të qartë se edhe më tej do të ndjekin rrugën e integrimeve evropiane. Na radhë të parë pres që menjëherë pas zgjedhjeve të plotësojnë dy kushtet kryesore për liberalizhimin e vizave, sepse kjo është në interesin e të gjithë qytetarëve të Kosovës. Unë shpresoj që edhe fushata do të kalojë në një atmosferë të qetë dhe bashkëpunimi, të mos ketë kërcënime apo akte të dhunshme. Në të kaluarën kemi pasur zgjedhje shumë të qeta në Kosovë, ndaj shpresoj që kështu do të jetë edhe kësaj radhe.

DW: Ju keni vëzhguar edhe vetë zgjedhjet e mëparshme paralamentare në Kosovë, ndaj e dini se cila është atmosfera atje. Sa e kënaqur jeni me fushatën deritanishme?

Ulrike Lunacek: Sa kam mundur të përcjell, përgatitjet kanë kaluar mirë. Listat zgjedhore janë pastruar dhe janë hequr personat e vdekur. Shpresoj që kjo është bërë në tërësi. Unë mendoj se është shumë me rëndësi që të mos jepen premtime të cilat nuk mund të realizohen. Kosovarët nuk e meritojnë që t’u premtohet mjaltë e sheqer apo parajsa, sepse ata tanimë e dinë shumë mirë se cilat gjëra mund të realizohen e cilat jo. Ata e dinë shumë mirë se cilat gjëra janë reale e cilat jo. Ndaj dëshiroj që kandidatët të mos premtojnë gjëra të kota.

DW: Për cilat kushte e keni fjalën konkretisht, sepse Kosova duhet të plotësojë shumë kushte në rrugën e saj drejt integrimit në BE?

Ulrike Lunacek: Dy kushtet janë: ratifikimi i marrëveshjes për demarkacionin e kufirit mes Kosovës dhe Malit të Zi. Me ratifikimin e kësaj marrëveshjeje për demarkacionin e kufirit kanë rënë dakord dhe e kanë nënshkruar kryeministri dhe përfaqësuesit e LDK dhe PDK, në Vjenë më 25 gusht 2015. Kushti tjetër është dënimi i personave me funksione të larta të përfshirë në krimin e organizuar dhe korrrupsion. Pra nuk mjafton vetëm hapja e proceseve, por kërkohet edhe dënimi i tyre. Demarkacioni i kufirit me Malin e Zi është pra një prej dy kushteve. PDK dhe LDK të cilat tani janë në lista me parti të tjera, e kanë nënshkruar këtë marrëveshje në vitin 2015. Ato duhet t’u thonë qartë partnerëve në koalicione se ky kusht duhet të plotësohet dhe që marrëveshja të ratifikohet.

DW: Por në Kosovë ekziston edhe një subjekt tjetër i fuqishëm, Lëvizja Vetëvendosje, e cila pretendon se do t’i fitojë këto zgjedhje. Nuk do t’ju pyes për vlerësimet se kush do të fitojë, sepse e di që nuk do të prononcoheni, por më thoni shkurt: a është me rëndësi për Bashkimin Evropian se kush do t’i fitojë këto zgjedhje?

Ulrike Lunacek: Unë me siguri që nuk do të jap sugjerime se për kë duhet të votohet, por unë, Komisioni Evropian, Këshilli i Evropës dhe të gjithë në Bashkimin Evropian duan që zgjedhjet të kalojnë në një atmosferë paqësore dhe që drejtuesi i ardhshëm i qeverisë të ndjekë rrugën e integrimeve evropiane. Ju kujtoj se këtë javë në Bruksel është vendosur që Kosova të futet në programet e BE, që është shumë me rëndësi për shkëmbimet kulturore, për arsimin në Kosovë dhe për ekonominë e këtij vendi. Shpresoj që Kosova do të ketë një qeveri stabile me një shumicë të duhur në Parlament, e cila mund të sigurojë zbatimin e detyrimeve kryesore të këtij vendi. Vetëm një qeveri e tillë e cila i plotëson kushtet e parapara, mund të sigurojë edhe liberalizimin e vizave.

DW: Kur jemi tek lieralizimi i vizave: ka dhe parti politike që premtojnë heqjen e shpejtë të vizave, përmenden madje edhe afate të caktuara. Sa seriozisht mund të kuptohen premtimet e këtilla?

Ulrike Lunacek: Për këtë e kisha fjalën në fillim kur thashë se nuk duhet të jepen premtime që nuk mund të realizohen. Votuesit shpesh përballen para zgjedhjeve me premtime të cilat nuk mund të realizohen. Kjo nuk është reale dhe këtë duhet ta kuptojnë të gjithë. Sa më parë zgjidhet një parlament, krijohet koalicioni qeverisës, ratifikohet marrëveshja për demarkacionin dhe krijohet lista e personave të denuar për krim të organizuar dhe korrupsion, aq më shpejt do të bëhet edhe liberalizimi i vizave. Por nuk më duket në rregull që të jepen premtime për kohën apo afatet se kur do të ndodhë kjo. Më mirë është që të thuhet qartë: po, ne do t’i kryejmë obligimet tona dhe kjo do t’i ndihmonte zgjedhësit që të kenë një situatë më të qartë.

DW: Zonja Lunacek, ju po flisni për dy kushtet kryesore për liberalizimin e vizave, por Kosova përveç gjendjes ekonomike dhe sfidave të tjera, para vetes ka edhe dialogun me Serbinë. Disa parti në Kosovë kanë premtuar se do të kërkojnë rishikimin e Marrëveshjes së Brukselit dhe marrëveshjet tjera me Serbinë. A është e mundur kjo dhe si e shihni ju fatin e dialogut me Serbinë?

Ulrike Lunacek: Mendoj se është shumë me rëndësi që marrëveshjet e arritura të zbatohen në mënyrë të denjë – nga Republika e Kosovës (këtu e theksoj edhe njëherë: Republika e Kosovës dhe jo dikush tjetër) si dhe Serbia. Marrëveshja duhet të zbatohet. T’ju them sinqerisht: nuk dua të dëgjoj fare për premtimet se do të ketë rinegociim apo negociata të reja për marrëveshjet e arritura. Marrëveshjet e arritura vlejnë për të dy palët – Serbinë dhe Kosovën. Ne e dimë që kanë mbetur edhe shumë gjëra që Serbia duhet t’i realizojë. Por premtimet për rishikimin e Marrëveshjes së Brukselit dhe marrëveshjeve të arritura, nuk janë serioze. Kosova dhe Serbia kanë humbur shumë kohë ndaj marrëveshjet duhet të zbatohen. Pra: zbatim, zbatim zbatim!

DW: E kuptoj që nuk doni të deklaroheni për epilogun e zgjedhjeve, por personalisht, a mund të paramendoni një dialog të suksesshëm mes Haradinajt apo Kurtit me Vuçiqin?

Ulrike Lunacek: Shpresoj të më kuptoni mirë, por për këtë nuk dua të prononcohem dhe nuk dua të jap asnjë sugjerim. Për këtë duhet të vendosin zgjedhësit në Kosovë.

Lunacek paralajmëron serbët: Asociacioni i komunave nuk do të ketë kompetenca shtetërore

Raportoja për Kosovën në Parlamentin Evropian, Ulrike Lunacek ka thënë sonte në Vjenë se pala kosovare duhet ta implementojë marrëveshjen për Asociacionin e komunave me shumicë serbe, por se ky trup nuk mund të ketë kompetenca ekzekutive.

Periskopi.com Lajme

“Asociacioni është trup i bashkësisë lokale dhe duhet të merret me tema lokale, por nuk mund të ketë kompetenca shtetërore. Kështu thuhet edhe në marrëveshje. Në Serbi ekzistojnë pritje se Asociacioni ka mandat ekzekutiv, gjë që është e pamundur”, ka thënë Lunacek, transmeton lajmi.net.

Sipas saj, në dialogun ndërmjet Prishtinës dhe Beogradit janë bërë përparime, por edhe më tej ky përparim është i vogël dhe duhet të ecët më shpejt.

Nënkryetarja e Parlamentin Evropian ka theksuar se është mirë se dialogu i Prishtinës dhe Beograd është vendosur, pasi që është njëri nga parimet bazë për procesin e zgjerimit, si dhe raportet e mira ndërfqinjësore.

Sipas saj, raportet e e afërta të Listës Serbe me Beogradin po krijojnë probleme për vetë serbët që jetojnë në Kosovë.

Si shembull ajo ka marrë se si kohë më parë një anëtar i Kuvendit të Kosovës përmes Beogradit, në vend që të shkojë përmes Ambasadës së Kosovës në Bruksel, ka tentuar që të vë kontakt më të, gjë që sipas saj duhet të ndryshojë.

Lunaçek e lumtur që uli në një tryezë liderët politik të Kosovës

Nënkryetarja e Parlamentit Evropain, njëherësh raportuesja për Kosovën, Ulrike Lunaçek ka qenë e shkurtër në deklaratën e saj para gazetarëve pas takimit që ajo bashkë me komisionarin Hahn ka pasur me krerët politikë në vend.

Periskopi.com Lajme

Nuk ka pranuar të flasë për arritje të ndonjë marrëveshje mes palëve, por ka folur se çka është e rëndësishme nga takimi i sotëm, raporton Koha.net.

“Ishte një diskutim shumë i mirë. Mendoj se është e rëndësishme që të kemi debat me njerëz që nuk pajtohen gjithmonë për çështje të njëjta. Çfarë më pëlqeu më së shumti është se të gjithë u pajtuan se është tejet e rëndësishme për Kosovën që të ecë në rrugën e integrimit evropian”, ka thënë ajo, teksa është larguar për një takim me shoqërinë civile në Kosovë.

Lunacek: Kurrë s’kam thënë se Qeveria e ka kërkuar Demarkacionin si kusht për vizat

Nënkryetarja e Parlamentit Europian, Ulrike Lunacek, ka reaguar ndaj deputetes së "Nismës", Valdete Bajrami, e cila ka thënë se Qeveria e Kosovës ka kërkuar nga BE-ja që Demarkacioni të jetë kusht për vizat.

Periskopi.com Lajme

“Deputetja Bajrami më ka cituar gabimisht”, ka thënë Lunacek për Gazetën Express.

Lunacek, e cila është edhe raportuese e PE-së për Kosovën, ka thënë nëpërmjet një deklarate se Bajrami e ka cituar gabimisht.

“Në artikullin e djeshëm, deputetja Valdete Bajrami më ka cituar gabimisht”, ka thënë Lunacek.

“Deklarata e deputetes Bajrami nuk korrespondon me faktet. Unë kurrë nuk kam thënë se Qeveria e Kosovës ka kërkuar që demarkacioni me Malin e Zi të jetë kusht për heqjen e vizave me Zonën Schengen”, ka shtuar ajo.

“Unë iu kërkova të gjithë deputetëve që të lëvizin përpara me ratifikimin e marrëveshjes sa më parë që të jetë e mundur dhe kam shpjeguar se në atmosferën aktuale në BE, në mënyrë që qytetarët e Kosovës të lëvizin pa viza është e rëndësishme që të përmbushen edhe dy kushtet e mbetura sa më parë që të jetë e mundur. Po ashtu, u kam thënë atyre që Qeveria duhet të përmbushë kushtin e dytë që është sjellja, evidenca për dënimet e nivelit të lartë për krim të organizuar dhe korrupsion. Po ashtu, kam shprehur mbështetjen e Parlamentit Europian për liberalizimin e vizave dhe për procesin e zgjerimit për Kosovën në përgjithësi”, është shprehur Lunacek.