Këta janë deputetët e LDK-së që humbën numër të madh votash (Foto)

Periskopi.com Lajme

Lidhja Demokratike e Kosovës në zgjedhjet e 11 qershorit ka humbur një numër të madh votash, dhe kjo është vërejtur edhe te lista e kandidatëve.

Ismet Beqiri, Arben Gashi, Armend Zemaj, Anton Quni, Blerim Grainca e Bardhyl Meta kanë humbur vota shumë.

Beqiri në zgjedhjet e vitit 2014 kishte pasur mbi 17 mijë vota, kurse në këto zgjedhje sipas rezultateve të para ka 6 mijë e 229 vota, pra ka humbur mbi 11 mijë vota, raporton lajmi.net.

Afro 10 mijë vota i ka humbur edhe Haki Demolli. Në zgjedhjet e fundit ai kishte pasur mbi 14 mijë vota, kurse në zgjedhjet që u mbajtën javën e kaluar ka siguruar rreth 5 mijë vota.

Numër të madh të votave ka humbur edhe Armend Zemaj. Në këto zgjedhje ai ka marrë 5 mijë e 554 vota, kurse në zgjedhjet e kaluara kishte pasur mbi 11 mijë vota.

Mbi 5 mijë vota i ka humbur edhe Arben Gashi. Ky kishte pasur gati 15 mijë vota në zgjedhjet e vitit 2014, kurse në zgjedhjet e 11 qershorit nuk ka marrë më shumë se 8 mijë e 447.

Nga 4 mijë vota krahasuar me zgjedhjet e kaluara i kanë humbur edhe Blerim Grainca e Anton Quni, kurse tre mijë tjera i ka humbur Bardhyl Meta.

LDK-ja në këto zgjedhje ishte në koalicion me AKR-në dhe Alternativën.

Reklamë
Reklamë

Anëtari i LDK’së tregon cilin post kërkojnë në bashkëqeverisje me Vetëvendosjen

Periskopi.com Lajme

Anëtari i kryesisë së LDK-së, Muharrem Svarqa ka thënë se ata si subjekt politik në asnjë formë nuk shkojnë në bashkëqeverisje me koalicionin PAN.

“Unë i binden vullnetin të elektoratit për kundërshtim të koalicionit me PDK”, ka thënë Svarqa, njofton Klan Kosova.

“Natyrisht që ne nuk kemi arsye të kthehemi në gjendjen e mëparshme”, ka pohuar ai.

Svarqa ka thënë se duhet mësuar që marrëveshjet e nënshkruara të respektohen, duke folur për koalicionin e fundit me PDK, të cilët e votuan mocionin e mosbesimit ndaj Qeverisë Mustafa.

“Në mënyrë indirekte mund të nënkuptohet se jemi të hapur për Vetëvendosjen”, është deklaruar Svarqa, që është edhe kryetar i Komunës së Ferizajt.

Ai ka thënë se Vetëvendosjes mund të ia kërkojnë postin e kryeministrit si kusht për shkuarje në qeveri me ta.

“Besoj se do të ishte normale që të kërkohet posti i kryeministrit, pasi Vetëvendosje nuk ka përvojë në qeverisje”.

“Do të ishte mirë edhe për demokracinë dhe ky është mendim imi personal”, ka theksuar ai.

Më tej ka thënë se janë të gatshëm që si LDK të rrinë edhe në opozitë.

Reklamë
Reklamë

Kusari-Lila tregon se kur do e braktis LDK’në

Periskopi.com Lajme

Kryetarja e Gjakovës, Mimoza Kusari, e cila drejton Alternativën që në zgjedhjet e 11 qershorit u bë pjesë e listës së Lidhjes Demokratike, në emisionin Komiteti, ka folur për opsionet që ka para vetës koalicioni LDK-AKR-Alternativa, që u rëndit i treti në zgjedhje.

Kusari ka treguar nëse LDK po mendon të bëhet pjesë e ndonjë koalicioni qeveritar, formimin e së cilit fillimisht do ta provojë koalicioni PDK-AAK-Nisma, e cili doli i pari në zgjedhje.

Ajo ka bërë të ditur qëndrimet e Alternativës, e cila, sipas Kusarit, do të ketë së paku dy ulëse në Kuvend, në lidhje me koalicionet që mund ta bëjnë LDK-në pjesë të Qeverisë.

Kusari ka treguar se do të jetë në çdo formë së bashku me LDK-në, përveç në rast se kjo e fundit vendos të formojë koalicion me PDK-në në Qeveri.

Ajo bën të ditur se diçka e tillë do ta prishte marrëveshjen parazgjedhore LDK-Alternativa.

Reklamë
Reklamë

Deklarohet LDK lidhur me ftesën e Vetëvendosjes për bashkëqeverisje

Periskopi.com Lajme

Zëdhënësi i Lidhjes Demokratike të Kosovës, Arban Abrashi ka thënë se ky subjekt politik  po e pret certifikimin e zgjedhjeve dhe më pas do të merret me ftesën që i ka bërë Lëvizja Vetëvendosje për bashkëqeverisje.

Ai tha se kryesia e LDK do të mblidhet dhe do të dalë me qëndrim për këtë gjë, përderisa ka refuzuar të tregojë se cili është disponimi i njerëzve të kësaj partie mbi mundësinë që ata ta bëjnë Qeverinë me kryeministër Albin Kurtin.

Reklamë
Reklamë

Analisti ka një paralajmërim për LDK’në nëse bënë koalicion me PAN’in

Periskopi.com Lajme

Analisti Donik Sallova thotë se nëse klanet e LDK’së vendosin t’i bashkohen PAN’in, siç ai e quan PANikut, vlerëson se LDK’ja do shuhej.

Ai thotë kalimi i tyre në PAN nuk do të ishte koalicion por aderim kolektiv.

“Nëse klanet e LDK-së vendosin eventualisht që “në emër të interesit të Kosovës” LDK t’i bashkohet PAN-ikut në qeverisje, ky nuk do ishte koalicion, por aderim kolektiv i LDK-së në PDK.”, shkruan ai./ Periskopi

Reklamë
Reklamë

Koalicioni LDK-AKR-Alternativa dhe Lëvizja për Drejtësi ka marr një vendim

Periskopi.com Lajme

Pas zgjedhjeve të përgjithshme, të mbajtura të dielën, drejtuesit e subjekteve të koalicionit LDK-AKR-Alternativa dhe Lëvizja për Drejtësi janë takuar të hënën dhe kanë e vlerësuar ecurinë e procesit zgjedhor.

Sipas një njoftimi, drejtuesit e koalicionit LDK-AKR-Alternativa dhe Lëvizja për Drejtësi vlerësojnë lart dhe falënderojnë qytetarët e Republikës së Kosovës për një proces të rregullt zgjedhor, për kulturën e treguar dhe për mbështetjen që i kanë dhënë koalicionit LDK-AKR-Alternativa dhe Lëvizja për Drejtësi.

“Partnerët e koalicionit LDK-AKR-Alternativa dhe Lëvizja për Drejtësi, pas procesit të djeshëm, presin certifikimin e rezultatit nga ana e KQZ-së, për të ditur rezultatet përfundimtare të zgjedhjeve të 11 qershorit. Koalicioni përsërit qëndrimin e palëkundur se nuk do të jetë pjesë e asnjë qeverie, në të cilën është edhe PDK-ja”, thuhet në njoftim, raporton Periskopi

LDK-AKR-Alternativa dhe Lëvizja për Drejtësi theksojnë se koalicioni është unik në të gjitha qëndrimet.

Koalicioni është pajtuar që kryetari i LDK-së ta përfaqësojë këtë koalicion./ Periskopi

 

Reklamë
Reklamë

Çfarë po ndodh në LDK? Nënkryetari i saj nuk i thotë JO koalicionit me PDK’në

Periskopi.com Lajme

Nënkryetari i Lidhjes Demokratike e Kosovës, Agim Veliu nuk ju beson rezultateve të zgjedhjeve të deritanishme, ai pret që të dalin rezultatet përfundimtare.

I pyetur nga GazetaBlic nëse do të hyn në koalicion me PAN, Veliu është përgjigjur shkurt:

“Le këtë temë njëherë. T`i shohim rezultatet përfundimtare një herë”.

Deri tash janë numëruar 93,29 për qind e votave dhe rezultati deritanishëm është ky: PDK-AAK-NISMA kanë 34.57% të votave, Vetëvendosje 26.68% ndërsa LDK-AKR ka 25.81%.

Rezultatet janë momentale në faqen e KQZ-së dhe ato ndryshojnë nga minuta në minutë.

 

 

Reklamë
Reklamë

Edhe Bajram Gecaj dorëzohet, ka një porosi për përkrahësit

Periskopi.com Lajme

Zv/ministri në detyrë dhe këshilltari i kryeministrit, Bajram Gecaj ka falënderuar elektoratin e LDK-së por njëkohësisht edhe e ka ngushëlluar. Ai thotë se kjo nuk është fundi i “luftës”, por vetëm i një “beteje”, prandaj ju lus që rezultati mos t’u dekurajoi, pa marrë parasysh sa zhgënjyes mund të jetë për secilin prej nesh.

Ky është qëndrimi i tij i dhënë përmes facebook-ut:

Të dashur dhe shumë të respektuar përkrahës të cilët keni votuar LDK-në dhe mua personalisht. Ju falënderoi nga thellësia e zemrës pa marrë parasysh rezultatin përfundimtar.

Ishit të mrekullueshëm gjatë fushatës zgjedhore dhe besoj fuqishëm se do të jeni të tillë edhe në të ardhmen e afërt.

Kjo nuk është fundi i “luftës”, por vetëm i një “beteje”, prandaj ju lus që rezultati mos t’u dekurajoi, pa marrë parasysh sa zhgënjyes mund të jetë për secilin prej nesh.

Është kjo një porosi e elektoratit të cilën duhet ta respektojmë, studiojmë, dëgjojmë dhe të veprojmë e të sillemi në përputhshmëri me te.

Na priftë e mbara në ditët dhe vitet e ardhme. Zoti e bekoftë LDK-në – Zoti e bekoftë Kosovën.

Reklamë
Reklamë

Abdixhiku pranon humbjen, flet nëse do bëjnë koalicion me PDK’në

Periskopi.com Lajme

Kandidati për deputet i LDK-së, Lumir Abdixhiku, i cili aderoi në këtë parti në prag të fushatës parazgjedhore, thotë se LDK nuk duhet të zhgënjehet nga rezultatet e dala nga zgjedhjet e 11 qershorit.

Thotë se  do të punojnë për një rrugëtim të ri. Ndërsa pohon se  populli e do PAN-in në opozitë dhe se këtë vullnet të popullit LDK duhet ta përmbushë, duke respektuar në plotni votën e popullit.

“Miq, përkrahës tanë. Kokën lart. Arsyet për zhgënjim duhet t’i zëvendësojmë me punë e përkushtim, me korigjim të lëshimeve – me rikthim. Ky është veçse fillimi. Një rrugë e gjatë na pret përpara, e LDK-së do t’i dalim zot – për këtë të mbeteni të sigurt. Një falënderim për secilin votues tonin. Secili që ndau të njëjtin besim. Nuk kemi me ju zhgënjy. Përkundrazi, do të punojmë që t’i bindim edhe të tjerët për rrugëtimin tonë të ri. Mirënjohje të veçantë për të gjithë vullnetarët e aktivistët tanë që u angazhuan mëngjes e mbrëmje secilën ditë. Populli foli. Ata duan PAN-in në opozitë. Këtë vullnet të tyre LDK duhet dhe do ta përmbushë. Vota e juaj do të respektohet në plotni”, tha ai.

Reklamë
Reklamë

Hoti: Ne ofrojmë punësimin e të rinjve dhe rritjen e pensioneve 40%

Periskopi.com Lajme

Kandidati për kryeministër nga LDK-AKR-Alternativa, Avdullah Hoti ka thënë të enjten në Kaçanik se Programi ynë qeverisës ofron punësimit e të rinjve dhe rritjen e pensioneve 40%.

“Ne jemi të vetmit që garantojmë buxhet 3 miliardë euro. Rritjen ekonomike deri 7 për qind, punësim të mbi 25 mijë personave çdo vit, punësimin e çdo të riu që kryen studimet,

financim të çdo ideje të të rinjve për biznes, pagesë të qind për qindtë të pushimit të lehonisë të nënave të punësuara për 12 muaj”, ka thënë Hoti.

Ai ka shtuar se nga 100 euro do të marrin për 12 muaj edhe të gjitha nënat e reja që janë të papunësuara.

”Fëmijëve tanë do t’u ofrojmë arsimim cilësor, që sistemin arsimor e lidh me kërkesat e ekonomisë së tregut të lirë. Ne do ta trefishojmë buxhetin për bujqësinë, e nuk do t’i lejojmë më ata që po duan një Fillim të Ri me zakonet e vjetra. Nuk do t’i lejojmë t’ua marrin, sikur deri tani, bujqve e fermerëve grantet që shteti ndanë për ta. Vota për ne më 11 qershor është garanci që investitorët e huaj nuk do të ndiqen e nuk do t’u kërkohet më ryshfet”, ka thënë Hoti.

Kryeministri Isa Mustafa ka thënë se njerëz të fortë nuk janë vetëm ata që duken fizikisht të fortë, por ata që janë mentalisht të fortë, që marrin vendime të forta, që mendojnë për qytetarin, për vendin dhe zhvillimin e tij.

“Në këtë drejtim, kandidati ynë për kryeministër Avdullah Hoti është shumë i fortë. Z. Hoti do të punojë shumë për rininë, sepse ju të rinjtë e mrekullueshëm të Kaçanikut do të jeni pjesë e rëndësishme e fitores sonë. Do të punojë që ju të keni shkolla më të mira, që ata që e punojnë tokën të kenë kushte më të mira, të kemi shëndetësi të mirë, ambient të mirë, jetë më të mirë”, ka thënë Mustafa.

Sipas tij, Kaçaniku gjithmonë ka marrë vendime të mëdha, sepse është vendi ku është shpallur Kushtetua e Republikës së Kosovës, vendi ku janë zhvilluar beteja të mëdha, prandaj pres që edhe 11 qershor të marrim një vendim të madh, një vendim që i nevojitet Kosovës.

Selim Reka, kryetar i degës së LDK-së në Kaçanik ka thënë se e kemi më shumë se një arsye për të qenë në mbështetje të LDK-së dhe koalicionit të shpresës.

“Kaçaniku është i vendosur në këtë drejtim dhe fitorja është e jona. Do të kthehemi me fitore të madhe si në kohën e Presidentit historik, Ibrahim Rugova. Vota për LDK-në është votë për Kaçanikun, votë për Kosovën. Avdullah Hoti është zgjidhja më e mirë, prandaj ju ftoj që më 11 qershor të dalim masivisht dhe të votojmë për listën tonë, listën më të mirë”, ka thënë Raka.

Ai ka thënë se blloku tjetër politik u bashkuan për të humbur, sepse i penguan sukseset e kryeministrit Mustafa. “Një LDK të bashkuar nuk ka strukturë politike në Kosovë që e mundë, prandaj së bashku me anëtarët e koalicionit, do t’i gëzohemi fitores së madhe”, ka thënë ai.

Labinot Tahiri, zëvendëskryetar i AKR-së ka thënë se jemi këtu në Kaçanik, ku filluan të ndërtohen themelet e Republikës së Kosovës, duke mos e harruar për asnjë moment as vizionin e babait të Teutës, presidentit historik, Ibrahim Rugova. “Në emër të presidentit Pacolli, u premtoj se prioriteti ynë do të jetë punësimi i sa më shumë njerëzve, e në veçanti i të rinjve”, ka thënë Tahiri.

Ilir Deda nga Alternativa ka thënë se në Kaçanikun e madh, të gjithë ne jemi të vegjël. “Këtu u vendosën themelet e lirisë dhe pavarësisë së Kosovës. Sot jemi këtu për të treguar se ky koalicion është një besëlidhje e re, besëlidhje e tre brezave që kanë vendosur të nxjerrin Kosovën nga kjo gjendje në të cilën ndodhet. Këta breza janë: brezi i të 90-ve, brezi i luftës dhe brezi i Republikës”, ka thënë ai.

Deda ka pohuar se tre brezat bashkë janë për shtetndërtimin e Kosovës. “Ne e kemi një dallim të madh me atë koalicionin tjetër. Ne jemi të bashkuar, vërtet të bashkuar, që Kosova të ecë përpara, Kosova të jetë evropiane, me zhvillim ekonomik, me arsim cilësor, shëndetësi të mirë e integrime euroatlantike. Ai koalicioni tjetër nuk po duket që janë bashkë. Para disa ditëve, i pari i tyre tha se partia e tij do ta ketë kryeministrin, kryeparlamentarin dhe presidentin e shtetit, por që nuk po del të jetë ashtu”, ka thënë Deda.

Sipas tij, populli ynë kurrë nuk ka pasur vendim më të lehtë para vetes. “Jemi ne që na prin Avdullah Hoti, brezi i shtetndërtimit, apo ana tjetër që është brezi i shtetshkatërrimit”, ka thënë Deda.

Sylejman Qerkezi nga Lëvizja për Drejtësi ka thënë se kjo Grykë e Kaçanikut ka vlera të mëdha dhe kthesat që nisin këtu vazhdojnë gjatë.

Reklamë
Reklamë

Hoti: Çdo institucion publik do të ketë një të punësuar me nevojat të veçanta

Periskopi.com Lajme

Gjatë një vizite që i ka bërë Handikosit në Prishtinë, kandidati për kryeministër nga LDK-AKR-Alternativa, Avdullah Hoti, ka thënë të enjten se në të gjitha institucionet publike do të ketë të paktën një të punësuar me nevoja të veçanta, ndërsa bizneset që punësojnë këto kategori do të përfitojnë subvencionimin e pagave të tyre.

“Në dy vitet e kaluara kemi punuar me ministrin Abrashi dhe do të vazhdojmë edhe në të ardhmen. Tashmë linja buxhetore është e gatshme. Zotohem para juve se do të angazhohemi shumë për përmirësimin e kushteve të kësaj kategorie, ndërsa po ashtu e them këtu se të gjitha institucionet publike do ta punësojnë së paku nga një person me nevoja të veçanta, ndërsa nëse bizneset private punësojnë njerëz nga kjo kategori, ne do t’i subvencionojmë në pagat e tyre”, ka thënë Hoti.

Ai ka shtuar se njerëzit me nevoja të veçanta janë kategori që kërkon më tepër kujdes dhe ne do të vazhdojmë të punojmë edhe më tepër për përmirësimin e gjendjes në këtë kategori.

“Qëllimi ynë nuk është vetëm t’u sigurojmë kushte për jetë të dinjitetshme, por edhe t’i integrojmë sa më tepër në shoqëri”, ka thënë Hoti.

Afrim Maliqi, drejtor i Handikosit ka thënë se jemi të nderuar që i kemi këtu në mesin tonë kandidatin për kryeministër z. Hoti dhe përfaqësuesit e koalicionit LDK-AKR-Alternativa, të cilët nuk na vizitojnë vetëm në kohë fushatash, por kujdesen vazhdimisht për personat me nevoja të veçanta.

“Bashkëpunimi ynë do të ndikojë në përmirësimin e kushteve të personave me nevoja të veçanta e njëkohësisht edhe mbulimin e shërbimeve të domosdoshme. Kjo do ta rritë mirëqenien e gjitha familjeve, të cilat preokupohen me këtë problem”, ka thënë Maliqi.

Reklamë
Reklamë

Milaim Zeka thotë se LDK-ja do i bashkohet PAN-it

Periskopi.com Lajme

Milaim Zeka, kandidati për deputet nga koalicioni PDK-AAK-NISMA, i tha Blerim Graincës nga LDK, që ka mundësi të mëdha që LDK të hyjë në koalicion me këtë koalicion.

Ai në emisionin “Tribunë Zgjedhore” tha se nëse Bashkësia Ndërkombëtare e sheh të arsyeshme të bëhet një koalicion i tillë, atëherë qare nuk do të ketë LDK që të hyjë në koalicion më ta.

Dhe sipas Zekës kjo gjë është shumë e mundur për t’u realizuar.

Reklamë
Reklamë

LDK: Thaçi përfshihet në fushatë, në Prizren koordinohet me Kryeziun e PDK-së

Periskopi.com Lajme

Presidenti i Kosovës, Hashim Thaçi, është fotografuar në Prizren në shoqëri të Njazi Kryziut, zyrtarit të shkarkuar të komunës së Prizrenit, pas publikimit të “Dosjes Pronto” dhe një serie skandalesh të udhëheqjes së Komunës së Prizrenit prej Partisë Demokratike të Kosovës (PDK), por të shpërblyer prej pasuesit të Hashim Thaçit në krye të PDK-së, Kadri Veselit, me një pozitë këshilltari në kabinetin e tij të stërmadh si ish-kryetar i Kuvendit të Kosovës.

Njazi Kryziu, për më tepër, është një prej drejtuesve të PDK-së në Prizren.

Prandaj, Lidhja Demokratike e Kosovës (LDK), të cilës të martën i ka mbërritur kjo fotografi nga një qytetar i Prizrenit, të kulturës dhe traditës, shpreh shqetësimin se Presidenti i Kosovës, Hashim Thaçi, në kundërshtim me mandatin e tij kushtetues, po vazhdon të përfshihet në fushatën parazgjedhore në Kosovë, në përpjekje për t’u dalë në ndihmë bashkëpartiakëve të tij të PDK-së.

LDK konsideron se nuk ka asnjë shpjegim objektiv që e arsyeton praninë e një Presidenti të shtetit nëpër aktivitete jozyrtare, në kohë fushate dhe me eksponentë të njohur të një subjekti politik. Sigurisht PDK-së.

Kabineti i Presidentit të Kosovës, për të martën, kur është zhvilluar “vizita” e Hashim Thaçit në Prizren, nuk ka njoftuar për asnjë aktivitet zyrtar të tij.

Siç duket, vërejtja publike që iu bë atij nga LDK dhe shoqëria civile e mediat, për denoncim në Gjykatën Kushtetuese, ka bërë që Thaçi të mos e vazhdojë fushatën e tij në mbështetje të PDK-së nëpër shkolla.

Por, ai tashmë, fshehtas, siç dinë të punojë ai dhe bashkëpartiakët e tij, po mundohet ta shpëtojë PDK-në dhe satelitët e saj nga humbja e zgjedhjeve.

LDK kërkon nga vëzhguesit ndërkombëtarë të zgjedhjeve dhe përfaqësuesit e korit diplomatik në Kosovë që të ushtrojnë ndikimin e tyre, për të penguar Thaçin që të keqpërdor institucionin e Presidentit për interesa të ngushta politike, në kundërshtim me Kushtetutën dhe ligjet në fuqi.

Por, LDK dhe partnerët e saj të koalicionit, të mbështetur nga qytetarët e Kosovës, më 11 qershor do ta qesin në opozitë Koalicionin e Mesnatës.

Kurse Thaçit do t’i duhet të japë përgjegjësi për ndërhyrjet e tij të shumta në punë që nuk i takojnë një Presidenti të shtetit.

Reklamë
Reklamë

Bardhyl Meta zbulon kush nuk po i lejon anëtarët e PDK-së të marrin pjesë në debate

Periskopi.com Lajme

Kandidati për deputet nga radhët e LDK-së, Bardhyl Meta thotë se Kadri Veseli nuk po i lejon anëtarët e PDK-së me shku në debate.

Kjo ka ndodhur sërish sot, ku Xhavit Haliti edhe pse ka konfirmuar pjesëmarrjen në RTK në një debat me Metën dhe Glauk Konjufcën e Vetëvendosjes, një orë para debatit e ka anuluar atë.

Meta thotë se Fillimi i RI, përkthyer i bie shkuarja në opozitë.

Shkrimi i plotë:

Xhavit Haliti i koalicionit PDK-AAK-Nisma, s’erdhi në debatin Live – përballë z. Bardhyl Metajt te LDK-AKR-Alternativa-LD, dhe karshi z.Gllauk Konjufcës te VV;

– Njejtë sikur që s’po vjen as Ramush Haradinaj përballë, Dr.Avdulla Hotit e Albin Kurtit.

– Me nje dallim – Xhavit Haliti ka konfirmuar ardhjen, nje ore para fillimit te tij – dhe s’erdhi!

-Spo i len Kadri Veseli me u perballe me askend… Po e dine se Fillimi i Ri, peekthyer po i bie, shkuarje n’opozite e “Shtabit të Milionereve”!

Apo’jo?

P.S. Foto: Moderatori – RTK – z. Meta e z. Konjufca, presin kot, “të Guximshmit”! …

Reklamë
Reklamë

Hoti: Rinisë së Malishevës dhe gjithë Kosovës do t’ia kthejmë shpresën

Periskopi.com Lajme

Kandidati për kryeministër nga LDK-AKR-Alternativa, Avdullah Hoti, ka thënë të hënën se përmes Ligjit për Investime Strategjike, në Malishevë, do të sjellim investitorë seriozë, që do të krijojnë vende pune e mirëqenie për familjet tuaja.

“Rinisë së Malishevës, ne do t’ia kthejmë shpresën. Sapo t’i kryejnë studimet, ne do t’u garantojmë 1 vjet përvojë pune me pagesë. Ata pastaj do të jenë kuadrot që do të punojnë nëpër bizneset që do të hapen përmes investimeve të shqiptarëve apo investimeve të huaja”, ka thënë Hoti.

Ai ka potencuar se Qeveria e re, përmes Fondit të Zhvillimit, do të mbështesë idenë e çdo të riu për biznes. “Ne kemi plan konkret për ta bërë buxhetin e Kosovës 3 miliardë euro. Reformat që kemi planifikuar do ta garantojnë rritjen ekonomike vjetore prej 7 përqind. Qeveria që unë do të drejtoj, me stabilitetin buxhetor që ju garantoj se do ta ketë, do të arrijë të punësojë çdo vit nga mbi 25 mijë të papunë, pra të gjithë ata që çdo vit bëhen të aftë për punë”, ka thënë Hoti.

Ai ka deklaruar se përmes investimeve që kemi planifikuar në disa sektorë, si Termocentrali Kosova e Re me mbi 1 miliard euro investim, investimi në Trepçë dhe minierat tjera apo investimet në Brezovicë e resurse tjera nacionale të Kosovës, do të arrijë të punësojë edhe kontigjentin tjetër të të papunëve.

“Ju garantoj se në fund të mandatit tonë qeverisës, Kosova do të ketë papunësi në përqindje njëshifrore. Me qeverisjen tonë, paga minimale do të jetë prej 210 euro, do të keni rritje pagash e pensionesh çdo vit”, ka shtuar Hoti.

Kandidati për kryeministër ka thënë se ne kemi plan konkret për trefishimin e investimeve në bujqësi.

“Grantet për bujqit dhe fermerët, Ju garantoj se do t’u shkojnë bujqve e fermerëve punëtorë të Malishevës, e nuk do të keqpërdoren sikur deri tani nga grupe kriminale”, ka shtuar ai.

Kryeministri i vendit, Isa Mustafa, ka thënë se duhet të punojmë shumë që më 11 qershor të arrijmë fitore, sepse në këtë mënyrë do të fitojë Kosova.

“Programi ynë është alternativa më e mirë për vendin. LDK-ja, bashkë me AKR-në, Alternativën e Lëvizjen për drejtësi e ka listën më të mirë për deputetë. Në listën tonë janë njerëzit më të përgatitur në fushat përkatëse. Këta njerëz, të udhëhequr nga kryeministri Avdullah Hoti, janë të gjendje të sigurojnë zhvillim ekonomik, punësi,, arsim, shëndetësi dhe integrime evro-atlantike për vendin tonë”, ka thënë Mustafa.

Sami Kafexholli, kryetar i degës së LDK-së në Malishevë ka thënë se: “ky koalicion është oferta e vetme që garanton model të qeverisjes së mirë, zhvillim ekonomik, vende pune, arsim e shëndetësi cilësore.

“Ne nuk mund të lejojmë ata që shkatërruan gjithçka, politizuan sistemin arsimor, keqpërdorën e bënë çdo gjë për interesa të tyre personale e klanore. Si mund t’i besohet koalicionit të krimit e korrupsionit në të cilin gjendet edhe Fatmir Limaj, i cili është sinonim i korrupsionit. Ju ftoj, që më 11 qershor të dilni në mënyrë masive të votoni për koalicionin tonë, për koalicionin e shpresës dhe kandidatin tonë për kryeministër Avdullah Hotin”, ka thënë Kafexholli.

Reklamë
Reklamë

Hoti: Do t’i mundim koalicionin e natës, sikur Muhaxheri më 2013

Periskopi.com Lajme

 Kandidati i Koalicionit të partive të djathta për kryeministër, Avdullah Hoti, ka thënë të dielën në Pejë, se koalicionin e natës do t’i mundim më 11 qershor, siç i ka mundur Gazmend Muhaxheri, në zgjedhjet lokale më 2013, ku ishte koalicioni i njëjtë.

“Ne nuk shantazhohemi nga askush. Neve nuk mund të na kërcënojë e as të na frikësojë askush, me asgjë, sepse ne i kemi duart e pastra. Vetëm ne i kemi duart e pastra. Ne do ta mundim koalicionin e natës siç i ka mundur koalicionin e njëjtë Gazmend Muhaxheri në Pejë në vitin 2013”, ka thënë Hoti.

Para mijëra simpatizantëve të Pejës, Hoti ka potencuar se këto zgjedhje janë referendum për të ardhmen e Kosovës.

“Ne kërkojmë votën e qytetarëve të Kosovës, sepse kemi ekip atdhetar, kompetent dhe përfaqësues. Bashkimi ynë në këtë koalicion është natyral. Prandaj edhe programet e partive që janë pjesë e këtij koalicioni janë harmonizuar lehtësisht. Rivalët tanë nuk po ofrojnë program qeverisës, sepse përveç fjalëve koti nuk kanë asgjë konkrete për zgjidhjen e çështjeve jetike me të cilat përballen qytetarët e Kosovës”, ka deklaruar Hoti.

Ai i ka porositur pejanët dhe gjithë qytetarët e Kosovës, që mos të lejojnë që të rrezikohet e ardhmja e vendit nga koalicione dhe kandidatë që kanë probleme me personalitetin e tyre.

“Ju duhet të vendosni që qeverinë e ardhshme ta drejtojmë ne, jo ata. Institucionet e Kosovës duhet të drejtohen nga Lidhja Demokratike e Ibrahim Rugovës dhe nga partnerët e saj të koalicionit, AKR, Alternativa dhe Lëvizja Për Drejtësi”, ka pohuar Hoti.

Kryeministri dhe kryetari i LDK-së, Isa Mustafa ka thënë se Hoti është një politikan i mençur, i dijshëm, këmbëngulës dhe me duar të pastra.

“Profesor Hoti është një evropian i vërtetë i cili meriton të udhëheqë një Kosovë evropiane. Ai i ka të gjitha kapacitetet për të drejtuar një qeveri që e meriton vendi ynë”, ka thënë Mustafa.

Kryetari i AKR-së, Behgjet Pacolli, ka thënë se me gjithë potencialin e tij do t’i japë përkrahje kryeministrit të ri, Avdullah Hotit.

“Ne ia kemi borxh Rugovës dhe popullit të Kosovës një lidership politik me duar të pastra, të dijshëm dhe vizionar. Ne jemi trashëgimtarët e denjë politikë të Presidentit Rugova, profesionalë dhe me duar të pastra, pa asnjë aferë korruptive dhe kriminale”, ka thënë Pacolli.

Kryetari i Komunës së Pejës, Gazmend Muhaxheri, pasi i ka falënderuar të pranishmit, ka shprehur bindjen se LDK dhe koalicioni i shpresës do të shënojnë fitore më 11 qershor.

“Ne, në Pejë, me besimin e qytetarëve tanë, në katër vitet e kaluara e mundëm koalicionin që sot e kemi përballë. Edhe kësaj radhe, fitorja jonë do të nisë në Pejë dhe do të shtrihet në tërë Kosovën”, ka thënë Muhaxheri.

Ai ka shtuar se ndër të arriturat kryesore të Pejës ka qenë zhdukja e zhvatjes dhe haraçit. “Patëm premtuar se do ta zhdukim zhvatjen dhe haraçin dhe e bëmë këtë, patëm premtuar infrastrukturë dhe e bëmë. I bëmë të gjitha, sepse ne jemi njerëz të punës, të besës dhe të fjalës, siç ishin themeluesit e LDK-së dhe siç janë të gjithë njerëzit e LDK-së, siç ishte Presidenti historik Ibrahim Rugova”, ka theksuar Muhaxheri, i cili e ka falënderuar edhe kryeministrin Mustafa për mbështetjen që i ka dhënë.

“Komuna e Pejës e pati ndihmën e Qeverisë Mustafa dhe ne i falënderojmë për kontributin e tyre të dhënë në zhvillimin e Pejës”, ka përfunduar Hoti.

Kryetarja e Gjakovës Mimoza Kusari Lila ka thënë se Alternativa e ka kuptuar se e vetmja alternativë për Kosovën është bashkimi i forcave demokratike të të gjitha partive bashkëkohore evropiane rreth një programi të mirëfilltë, i cili do ta kthejë timonin e zhvillimit të Kosovës në drejtimin pozitiv, i cili më 12 qershor 2017, do ta bëjë Kosovën që në ditën e 18 vjetorit të çlirimit, të festojë ditën e fillimit të epopesë së zhvillimit të Kosovës.

“Ky koalicion, përveçse e ka idenë dhe mençurinë, e ka edhe guximin e mveshur në listën e saj, të prirë nga njeriu, i cili e ka guximin, forcën dhe vendosmërinë për ta shtyrë Kosovën përpara në proceset në të cilat të tjerët e ngecën”, ka potencuar Kusari Lila.

“Sot, me Pejën dhe për Pejën flasin dhe duan të marrin merita të tjerët. Pleqnarëve të Rugovës dhe gjithë tjerëve që e kanë kuptuar rëndësinë e shtetit të zhvilluar, u them t’u mos u besojnë aspak atyre që privatizuan qindra e mijëra hektarë të tokave të Kosovës në mënyrat më të paligjshme e sot thirren në kauzën se, kinse e mbrojnë tokën e Kosovës”, ka thënë ajo.

Sipas Kusari Lila “sot kemi qenë dëshmitarë të frymës së fitores në Deçan, në Junik, në Pejë, nesër në Gjakovë dhe kjo tregon për mbështetjen që koalicioni i shpresës e ka në Dukagjin, se Dukagjini njihet për trimërinë, besnikërinë dhe mençurinë. Bashkë do ta festojmë fitoren e madhe më 11 qershor”.

Reklamë
Reklamë

Hoti: Do ta zgjidhim demarkacionin pa e falur asnjë pëllëmbë tokë të Kosovës

Periskopi.com Lajme

Kandidati për kryeministër nga LDK-AKR-Alternativa, Avdullah Hoti, ka thënë të dielën në Deçan se koalicioni i djathtë posedon planin për ta zgjidhur çështjen e demarkacionit me Malin e Zi dhe për t’i hapur rrugë liberalizimit të vizave, pa e humbur asnjë pëllëmbë të tokës së Kosovës.

“Ne kemi ardhur sot t’u sigurojmë se asnjë pëllëmbë e tokës së Kosovës nuk i është falur e nuk do t’i falet askujt. Garant për këtë jemi ne. Ne nuk shantazhohemi. Ne nuk mund të na kërcënojë e as të na frikësojë askush, me asgjë. Sepse ne i kemi duart e pastra. Vetëm ne i kemi duart e pastra”, ka thënë Hoti.

Ai ka potencuar se kur me votën tuaj më 11 qershor t’i fitojmë zgjedhjet, ne do ta adresojmë me prioritet çështjen e kufirit me fqinjin tonë dhe me mençuri e me vendosmëri do ta zgjidhim këtë çështje, pa humbur asnjë pëllëmbë të tokës sonë.

“Askush tjetër, nuk mund ta bëjë një gjë të tillë. Sepse ata e kanë keqpërdorur demarkacionin për interesa politike dhe për interesa të tyre personale. Ne kemi plan konkret dhe kemi mbështetjen e miqve tanë për ta zgjidhur këtë çështje. Unë besoj fuqishëm se ky plan do të qartësojë gjithçka dhe do të hapë rrugën për liberalizimin e vizave për qytetarët e Kosovës”, ka thënë Hoti.

Ai ju ka thënë përkrahësve të Deçanit se ne kemi hartuar program konkret zhvillimor për Kosovën, me prioritete të qarta.

“Ndryshe prej oponentëve tanë politikë, programi ynë mbështetet në ekspertizë. Ata kanë listë interesash, ne kemi listë ekspertësh. Programi ynë është kontratë me Kosovën. Programi ynë garanton: buxhet të qëndrueshëm prej 3 miliardë euro brenda mandatit për të financuar nevojat e qytetarëve të Kosovës; rritje ekonomike deri 7 për qind; zhvillimin e sektorit privat me politika fiskale të përfshira në Pakon Fiskale 2; krijimi i një Fondi Zhvillimor për të përkrahur bizneset e reja etj.

Kryeministri Isa Mustafa, ka thënë se Deçani ka njerëz të mrekullueshëm, besnikë të LDK-së, besnikë të Presidentit Rugova. “Programi ynë ofron zgjidhje, ofron zhvillim. Ashtu siç jemi munduar të kontribuojmë edhe gjatë qeverisjes sonë, edhe pse ne nuk kemi qeverisur në Komunën e Deçanit, do të ofrojmë zgjidhje edhe në të ardhmen, për tërë Kosovën. Këtë e mundëson programi ynë dhe kandidati ynë për kryeministër Avdullah Hoti”.

“Ne i kemi të gjitha alternativat për ta çuar Kosovën përpara dhe kur kësaj i shtohet se në koalicionin tonë e kemi edhe njeriun më të suksesshëm të biznesit, jo vetëm në Kosovë, por edhe shumë më gjerë, atëherë është e qartë se zotimet tona do të përmbushen një për një. Koalicioni ynë po quhet i shpresës, sepse ofron shpresë për të gjithë qytetarët, pa përjashtim. Është koalicion i realitetit, sepse çdo shpresë do ta bëjmë realitet”, ka thënë Mustafa.

Presidenti i AKR-së, Behgjet Pacolli ka thënë se jemi këtu për ta mbështetur shpirtërisht dhe me çdo gjë që është në mundësitë tona për ta mbështetur Avdullah Hotin. “Jam i bindur se e kemi kandidatin më të mirë, më të mençur, të edukuar, të aftë, njeriun e fjalës, prandaj duhet ta mbështesim. Unë me AKR-në erdha në shtëpinë e përbashkët të Ibrahim Rugovës”, ka thënë Pacolli.

Ai ka shtuar se ne “jemi më të mirët, jemi të fortë, sepse jemi të pastër, të ndërgjegjshëm. Faleminderit për këtë përkrahje kaq të madhe në çdo vend, nga çdo kryetar dege, çdo aktivist e çdo qytetar”.

Jeton Mushkolaj, kryetar i LDK-së, në Deçan ka thënë se të bashkuar do të marshojmë drejt fitores së 11 qershorit, me koalicionin LDK-AKR-Alternativa-Lëvizja për Drejtësi.

“Ta mbështesim këtë koalicion, e njëkohësisht edhe kandidatin tonë z. Armend Zemaj, sepse vetëm ne kemi zgjidhje konkrete dhe të matshme për problemet me të cilat ballafaqohen qytetarët tanë”.

Reklamë
Reklamë

LDK: Programi dhe kandidatët e Koalicionit të djathtë me ueb faqe zyrtare

Periskopi.com Lajme

Koalicioni Lidhja Demokratike e Kosovës (LDK), Aleanca Kosova e Re (AKR), Alternativa dhe Lëvizja për Drejtësi ju mundëson të gjithë qytetarëve që të njoftohen me kandidatin për kryeministër, Prof. Dr. Avdullah Hoti dhe kandidatët për deputetë të koalicionit të djathtë në ueb faqen zyrtare.

Në këtë faqe qytetarët mund të gjejnë edhe Programin Qeverisës për katër vitet e ardhshme.

Kjo është edhe një mundësi e re për të komunikuar drejtpërdrejt me qytetarët tanë dhe për t’u ofruar atyre një kontratë të re për katër vitet e ardhshme, e cila do të lidhet me 11 qershor, në zgjedhjet e përgjithshme parlamentare.

Programi, linku i faqes dhe detajet ndodhen në atachment.

Reklamë
Reklamë

Hoti: Buxheti për bujqësinë do të trefishohet, por zhvatësit e skemave do të luftohen

Periskopi.com Uncategorized

Kandidati për kryeministër nga LDK-AKR-Alternativa, Avdullah Hoti, ka thënë të premten në Prizren që nga janari 2018, programi ynë parasheh trefishimin e subvencione për bujqësinë.

“Ne ju garantojmë bujqve dhe fermerëve që subvencionet e shtetit do t’i marrin ata, e jo grupet kriminale që i kanë marrë në emër të tyre, e tash po akuzohen për mashtrim”, ka thënë Hoti.

Ai ka paralajmëruar edhe zëvendësimin e pajisjeve bujqësore të cilat janë bukur shumë të vjetruar.

“Ndër masat e para në fushën e fuqizimit të bizneseve do të jetë krijimi i një Fondi Zhvillimor për të përkrahur biznesin vendor dhe fuqizimi i skemës së garantimit të kredive. Nëpërmes këtyre masave, ne parashikojmë që norma e papunësisë të jetë në numër njëshifror, ndërsa paga minimale në sektorin privat dhe atë publik të jetë 210 euro bruto”, ka thënë Hoti.

Ai ka shtuar se paga mesatare, pensionet dhe bursat për studentë do të rritet për çdo vit, në harmoni me rritjen ekonomike në vend.

“Mos u mashtroni me premtime elektorale për rritje pagash e pensionesh. Ato premtime janë të pa bazuara në ligj dhe janë të pamundshme. Vetëm programi ynë mundëson rritjen e pagave e pensioneve. Sepse vetëm programi ynë garanton rritje ekonomike. Rritjen e pagave ne do ta bëjmë çdo vit, mbi bazën e rritjes ekonomike të Kosovës. Ne kemi plan konkret për t’ia paguar një vit pune secilit të ri që diplomon, në mënyrë që secili prej tyre të përgatitet edhe praktikisht për tregun e punës”, ka thënë Hoti.

Kryeministri dhe kryetari i LDK-së, Isa Mustafa ka thënë se koalicioni ynë ka program të harmonizuar. “Ky program i garanton Kosovës zhvillim ekonomik, krijimin e vendeve të reja të punës, mirëqenie sociale, arsimim e shërbim shëndetësor cilësor. Çka është kryesorja, ne jemi të vetmit që kemi demonstruar vendosmëri dhe jemi të përkushtuar ta luftojmë pa kompromis korrupsionin, krimin e organizuar dhe ta mbrojmë vendin tonë prej terrorizmit”, ka thënë Mustafa.

Presidenti i AKR-së, Behxhet Pacolli ka thënë se Presidenti Rugova e ka përmendur shumë shpresën, e neve qytetarët po na quajnë koalicion të shpresës. “Ne jetësojmë shpresën. Prandaj, më 11 qershor, votojeni këtë koalicion. Ardhmëria është në duart tuaja. Personalisht, me krejt çka posedoj e mbështes këtë koalicion dhe profesor Hotin”, ka thënë Pacolli.

Mimoza Kusari Lika, kryetare e Alternativës ka thënë se ne gjithmonë e kemi lakmuar Prizrenin, sidomos për infrastrukturën. “Por, jo të njëjtën na e thonë qytetarët e Prizrenit. Ata thonë se Prizreni është i të gjithëve, por jo i prizrenasve, për arsye se është qeverisur nga e njëjta qeveri që qeveris me Kosovën tash e dhjetë vjet. E njëjta qeverisje që e sheh Prizrenin veç si makineri votash dhe asgjë tjetër”, ka thënë Kusari Lilaj.

Ajo ka shtuar se në njërën anë e keni një koalicion të territ, në anën tjetër një koalicion të shpresës, me njerëz që janë bashkuar duke i tejkaluar të gjitha interesat, janë bashkuar për të bërë një zgjidhje për Kosovën dhe ajo zgjidhje do të fillojë implementimin më 11 qershor.

“Dilema e vetme është ndërmjet koalicionit të shpresës e zhvillimit e dritës dhe atij të regresit e izolimit. Nuk ka të ndërmjetme. Më 11 qershor mos votoni me zemër, votoni me kokë. Zemra sjell emocione, të cilat mund të na çojnë edhe në rrugë të gabuar. Nuk ka kthim më 12 qershor, më 11 është dita e fitores”, ka thënë Kusari Lila.

Sipas saj, në këtë muaj të shenjtë të Ramazanit mund t’u ofrojnë iftar, ju ofrojnë edhe gjëra tjera materiale në shkëmbim të votës suaj. “Dijeni se ato që u ofrojnë janë trosha nga zhvatja dhjetëvjeçare që ia kanë bërë buxhetit të shtetit. Mos pranoni që për një ditë ose një muaj, të vuajmë për katër vjet”, ka thënë kryetarja e Alternativës.

Kusari Lila ka shtuar se ata që e quajnë veten trima dhe të guximshëm, u munduan të kontrabandojnë ligjin për ushtrinë. “E sollën dhe e kthyen prapa. Ata që e quajnë veten trima, bllokojnë ligje strategjike për zhvillimin e Kosovës. Ata nuk janë trima. Ata janë frikacakë, opurtunistë, të cilët nuk shohin më larg se interesi i tyre”, ka thënë ajo.

“Derisa në njërin koalicion kryeministri Mustafa tërhiqet nga lista me nder e krenari, për t’ia lënë udhëheqjen një ministri të suksesshëm, në koalicionin tjetër bëhen pazare pa parime për të marrë pushtet. Mos harroni, njëri koalicion është për shtet, tjetri për pushtet dhe keqqeverisje”, ka thënë në fund Kusari Lila.

Reklamë
Reklamë

Hoti: Ne jemi trashëgimtarët e denjë politikë të Rugovës

Periskopi.com Lajme

Kandidati për kryeministër nga LDK-AKR-Alternativa, Avdullah Hoti, gjatë një bashkëbisedimi me banorët e Dragashit, ka thënë të premten se LDK dhe lidershipi i saj janë trashëgimtarët e  Presidentit Historik Ibrahim Rugova.

“Arkitekti i lirisë dhe pavarësisë së Kosovës, presidenti ynë doktor Rugova, na la një bagazh të madh intelektual, politik dhe kombëtar. Një jetë të tërë ai u sakrifikua për popullin dhe shtetin e tij. Rugova ishte figura më e pastër politike që njeh Evropa. Bota me të drejtë e quante Gandi i Ballkanit”, ka thënë Hoti.

Ai ka shtuar se ne ja kemi borxh Rugovës dhe popullit të Kosovës një lidership politik me duar të pastra, të dijshëm dhe vizionar.

“Ne jemi Brezi i Republikës, të cilin e kishe ideuar dhe parashikuar Presidenti ynë historik Ibrahim Rugova. Ne jemi trashëgimtarët e denjë politik të Presidentit Rugova, profesionalë dhe me duar të pastra, pa asnjë aferë korruptive dhe kriminale. Ne do ta jetësojmë vizionin e Rugovës për një Kosovë demokratike të zhvilluar, anëtare të BE-së dhe në miqësi të përjetshme me Shtetet e Bashkuara”, ka thënë Hoti.

Ai ka shtuar se, nëse dëshironi të jetësoni idealin e doktor Rugovës për një Kosovë demokratike, dilni më 11 qershor votoni numrin 16 dhe listën e kandidatëve tonë.

Kryetari i LDK-së, Isa Mustafa ka thënë se tubimi në Dragash dhe tubimet tjera në gjithë Kosovës janë dëshmia që ne do të fitojmë.

“Salla nuk ka mjaftuar për t’i pranuar të gjithë, prandaj kanë mbetur shumë njerëz jashtë. Jam shumë i bindur që ky koalicion i përbërë nga LDK-AKR-Alternativa dhe Lëvizja për Drejtësi do t’i fitojë këto zgjedhje. Kam qenë shpeshherë këtu, u kam vizituar, por sot dëshiroj t’u flasë kandidati për kryeministër, z. Avdullah Hoti. Është i përgatitur, njeri i duhur për Kosovën dhe njeri i cili do t’i dalë në krye t’i kryejë përgjegjësitë që i ka marrë”, ka thënë Mustafa.

Sylejman Kryeziu, kryetar i LDK-së, Dega e Opojës ka thënë se secili prej jush ka tejkaluar vetveten për të bërë një koalicion, të cilin mua po më pëlqen ta quaj koalicion i diellit, që është në kundërshtim me atë koalicionin e territ dhe natës.

“Jemi në ditën e dytë të fushatës dhe tashmë përkrahja për koalicionin nuk ka të ndalur. Ky është koalicion i fitores, koalicion i dritës. Më 11 qershor, ju do të dëshmoni që vendi do të drejtohet nga njerëzit më të mirë që i ka vendi. Fitorja na takon ne dhe fitoren do ta vulosim bashkë. Ky koalicion e ka vetëm një qëllim, bërjen e Republikës një vend ku secili respektohet dhe ndihet i barabartë në familjen evropiane”, ka thënë Kryeziu.

Reklamë
Reklamë