kujtim-shala-ne-bullgari

​ Bullgarët të gatshëm për bashkëpunim kulturor me Kosovën

Ministri i Kulturës, Rinisë dhe Sportit, Kujtim Shala, po qëndron për vizitë zyrtare në Bullgari, ku është takuar me ministrin e Kulturës së Bullgarisë, Vezhdi Rashidov.

Periskopi.com Lajme

Të dy ministrat kanë nënshkruar Marrëveshjen për Bashkëpunim Kulturor ndërmjet Qeverisë së Republikës së Kosovës dhe Qeverisë së Republikës së Bullgarisë.

Fillimisht, Shala ka biseduar me homologun e tij, Rashidov për raportet bilaterale ndërmjet dy shteteve, të cilat u vlerësuan shumë të mira, si dhe për një varg temash të interesit të përbashkët që lidhen me bashkëpunimin kulturor.

Ministri Shala e falënderoi ministrin Rashidov për përkrahjen që Bullgaria e ka dhënë për shtetin e Kosovës gjatë tërë proceseve, dhe shtoi se ky akt i nënshkrimit të Marrëveshjes për Bashkëpunim Kulturor, i bën edhe më konkrete raportet ndërmjet dy vendeve dhe është në funksion të njohjes më të thellë nëpërmjet kulturës dhe trashëgimisë kulturore.

Ministrat Shala dhe Rashidov, me një theks të veçantë biseduan për konkretizimin e këtij akti të nënshkrimit të marrëveshjes, ndërmjet nismave konkrete, duke e vlerësuar këtë marrëveshje si hap të rëndësishëm që ndihmon thellimin e bashkëpunimit kulturor.

Shala dhe Rashidov po ashtu u shprehën se kultura është fushë shumë e rëndësishme për njohje mes popujve dhe shteteve, dhe një faktor shumë i rëndësishëm për zhvillim të gjithëmbarshëm.

Gjithashtu, dy ministrat, Shala dhe Rashidov, u shprehën se kulturat e dy vendeve janë interesante dhe duhet të njihen nëpërmjet projekteve të përbashkëta dhe shkëmbimeve kulturore.

Kjo marrëveshje që u nënshkrua sot përfshinë një gamë të gjerë temash për bashkëpunim konkret kulturor, duke filluar nga bashkëpunimi në ngjarjet kulturore ndërkombëtare, muzika dhe vallëzimi, arti bashkëkohor dhe trashëgimia kulturore, biblioteka, muzetë dhe arkivat, kinematografia, libri dhe letërsia, të drejtat e autorit, etj.Më pas, delegacioni nga Kosova, ka parë gjetjet e fundit arkeologjike në lokalitetin e hapur antik të qytetit të lashtë Serdika, i cili tanimë ishte muze i hapur, si dhe kanë vizituar Galerinë Kombëtare të Bullgarisë.

Ministri Shala ka diskutuar me drejtuesit e këtyre institucioneve për bashkëpunimin konkret kulturor ndërmjet institucioneve përkatëse të Republikës së Kosovës dhe atyre të Bullgarisë, për të shkëmbyer përvojat në fushën e kulturës dhe trashëgimisë kulturore, si dhe për të njohur njëri-tjetrin më shumë nëpërmjet mundësive që jep kultura.

Me këtë rast, Shala u shpreh se “njohjet kulturore, janë shumë të dobishme, ndaj edhe duhet të punojmë më shumë në këtë drejtim, në mënyrë që t’i bëjmë sa më konkrete dhe sa më të shpeshta”.