Zbehja e BE-së i lë më shumë hapësirë Turqisë në Ballkan

Periskopi.com Lajme

Zbehja e procesit të zgjerimit të Bashkimit Evropian, vlerësohet se ka shtuar ambiciet e vendeve më të fuqishme që të shtrijnë ndikimin në Ballkanin Perëndimor, përfshi edhe Kosovën. Krahas ambicieve të theksuara për rritjen e ndikimit rus në rajon, edhe Turqia, mbetet si një nga vendet më të përfolura për shtrirje ndikimi në këtë pjesë të Evropës.

Megjithatë, tash për tash, njohës të rrethanave politike, nuk besojnë që rajoni mund të rrëshqas nga orientimet integruese në Bashkimin Evropian dhe strukturat euro-atlantike.

Analisti Ilir Ibrahimi thotë se është krejt normale që shtetet më të fuqishme të provojnë të shtrijnë ndikimin në pjesë të ndryshme të botës. Por, në rastin e Turqisë, ai nuk sheh ndonjë lloj rreziku që t’i stopoj vendet e rajonit në proceset integruese evropiane, pavarësisht së tash për tash Bashkimi Evropian po ballafaqohet me sfidat e zgjerimit, sidomos pas daljes së Britanisë së Madhe.

“Nuk shoh ndonjë rrezik apo tërheqje të Bashkimit Evropian në këtë rast, sepse kemi një zbehje momentale të proceseve integruese, duke pas parasysh Brexit-in, zgjedhjet në Francë dhe zhvillimet tjera në vendet anëtare të Bashkimit Evropian. Por, nuk besoj që ky interes i Bashkimit Evropian për integrimin e rajonit do të dalë nga rendi i ditës”, konsideron Ibrahimi.

Në rajonin e Ballkanit, një ndikim të fuqishëm kanë Shtetet e Bashkuara të Amerikës, thotë Ilir Ibrahimi. Ndërkaq, kohët e fundit, interesim për të shtri ndikimin e vet vërehet edhe te Rusia, thekson ai.

“Mos të harrojmë që një shtet shumë i fuqishëm i cili është i interesuar të mbaje dhe të forcoj ndikimin e vet janë Shtetet e Bashkuara të Amerikës. Prandaj, kur kemi një fuqi të tillë, pra Shtetet e Bashkuara të cilat janë të interesuara të kenë ndikimin e tyre në rajon, për t’i bërë ballë edhe ndonjë ndikimi të mundshëm rus, atëherë nuk shoh që Turqia të ketë këtu ndonjë hapësirë të madhe”, thotë Ibrahimi.

Ndërkohë, Blerim Burjani, analist, thotë se Turqia ka shprehur në vazhdimësi interes për të shtri ndikimin në Ballkanin Perëndimor.

Por, sa i takon Kosovës, ai thotë se Kosova është përcaktuar qartë se ka orientim pro- evropian dhe miqësi të përhershme me Shtetet e Bashkuara të Amerikës, kështu që raportet me Turqinë ai i sheh vetëm si një miqësi të mirë dhe jo rrezik për kthim kah lindja.

“Politika e jashtme e shtetit të Kosovës është e orientuar drejt Bashkimit Evropian në mënyrë të fuqishme dhe nuk është aspak, asnjë milimetër duke shkuar kah lindja, prandaj këto raporte, kur flasim vetëm për Kosovën, janë më tepër të natyrës miqësore dhe natyrave tjera për të cilat Kosova ka pasur dhe ka përkrahje nga Turqia, sidomos në planin e njohjeve ndërkombëtare”, thekson Burjani.

Si vend mjaft i fuqishëm, Turqia në Kosovë është e pranishme me bizneset dhe investimet në shkolla e shëndetësi, kurse në një rrafsh më të gjerë, kompanitë turke u përfshinë në ndërtimin e infrastrukturës rrugore – kryesisht përmes ndërtimit të autostradave; pastaj asaj ajrore – me marrjen me koncesion të aeroportit ndërkombëtar të Prishtinës dhe në fushën e energjisë, duke marrë nën menaxhim sistemin e distribuimit.

Në mungesë të shifrave më të reja, vetëm gatë viteve 2004 – 2014, Turqia thuhet se ka investuar në Kosovë mbi 360 milionë euro. Përderisa, sipas shifrave zyrtare, thuhet se ka afro 700 kompani turke që veprojnë në Kosovë.(REL)

Pse u shty takimi Kosovë-Shqipëri, ja përgjigja e Mustafës

Periskopi.com Lajme

Kosova dhe Shqipëria shënuan një etapë tjetër bashkëpunimi mes tyre në vitin 2014, pasi nisën takimin e parë të përbashkët të të dyja qeverive, i cili u mbajt në Prizren.

Një vit pas takimi i dytë u zhvendos në Tiranë, për të vazhduar kështu takimin e tretë sërish në Prishtinë, ku deri më tani kanë vendosur për rreth 28 marrëveshje të përbashkëta në shumë fusha.

Sipas Elmi Reçicës, kryetari i Komisionit për Punë të Jashtme, takimet janë të ralla dhe zbatimi i marrëveshjeve nuk ka ecur ashtu siç është planifikuar.

Anëtari i Komisionit për Zhvillim Ekonomik nga radhët e LDK-së, Blerim Grainca, ka thënë se të gjitha institucionet e Kosovës me seriozitetin më të madh po i qasen raporteve me Republikën e Shqipërisë, duke e konsideruar atë jo vetëm si partner ekonomik, por edhe si një vend strategjik.

Por, anëtarë të komisioneve parlamentare nga opozita që bëjnë analiza për zbatim të marrëveshjeve Kosovë-Shqipëri janë edhe më kritikë se pothuajse të gjitha marrëveshjet kanë shënuar ngecje në zbatim dhe nuk ua kanë pa, siç thonë, hairin qytetarët e Kosovës. Opozitarët shkojnë aq larg sa thonë se këto takime u bënë sa për sy e faqe dhe sa për të bërë foto.

Për anëtarin e Komisionit për Punë të Jashtme, nga radhët e AAK-së, Pal Lekaj, marrëveshjet Kosovë – Shqipëri nuk kanë pasur fare efekt. Ai thotë se takimet kanë ndodhë vetëm sa për t’u dukur në media, ndërsa diçka konkrete apo ndonjë implementim të marrëveshjeve që shkon në dobi të dy palëve, nuk ka pasur, shkruan “rtv21.tv”.

Por, se ka sfida në shumë çështje e thonë edhe në Ministrinë e Tregtisë dhe Industrisë, ministri kjo që ka nënshkruar disa marrëveshje me Shqipërinë.

Sekretari i Përgjithshëm në MTI, Agron Maxhuni tha se problemet me Shqipërinë po paraqiten në sektorin e pijeve dhe ushqimit.

Pavarësisht, nënshkrimit të një sërë marrëveshjesh, eksportuesit kosovarë vazhdojnë të kenë probleme në Shqipëri. Madje, nuk është arritur të eliminohen siç thuhet, problemet më të vogla teknike, qoftë çështja e një udhëzimi administrativ.

Por, pse u anulua data e mbajtjes së takimit të radhës Kosovë-Shqipëri e konfirmon vetë kryeministri Isa Mustafa, si një ndër personazhet kryesore të këtij takimi.

“Unë jam i kënaqur me implementimin e marrëveshjeve me Shqipërinë. Ne po punojmë në mënyrë që këto marrëveshje të implementohen. Ne po punojmë edhe për marrëveshje të reja, i kemi dhënë pak vetit kohë që marrëveshjet të cilat po përgatiten, të përgatiten në mënyrën e duhur dhe pastaj të gjejmë një kohë më të mirë të mbajtjes së takimeve të përbashkëta”, ka thënë Mustafa.

Ditë më parë ambasadori i Shqipërisë në Kosovë, Qemal Minxhozi, ka bërë të ditur se në takimin e ardhshëm të Qeverisë së Kosovës dhe asaj të Shqipërisë do të flitet kryesisht për shkëmbimin tregtar mes dy vendeve.

Ai ka thënë se në këtë mbledhje do të trajtohen një varg çështjesh, por temë kryesore do të jetë shkëmbimi tregtar. Ai ka mohuar se do të diskutohet për bashkimin tregtar. Por, edhe ambasadori Minxhozi e ka parë si tejet të rëndësishme dhe me më shumë prioritet, që në këtë takim do të flitet, për hapjen e një pikë doganore të Kosovës në portin e Durrësit. /albeu.com/

Zgjedhje të parakohshme në Kosovë, mësohet data

Periskopi.com Lajme

Kosovarët pritet të votojnë në zgjedhjet e parakohshme në fund të muajit të ardhshëm, ose fillimin e 30 ditëshit pasues.

Klan Kosova mëson se 28 maji ose 4 qershori janë datat kur qytetarët besohet se do të mësyjnë kutitë elektorale për të shfaqur preferencat e tyre politike.

Këtij zhvillimi të madh për vendin i paraprinë një tjetër ngjarje e rëndësishme. Kjo ka të bëjë me prishjen e koalicionit aktual qeverisës.

Burime të televizionit thonë që kryetari i PDK-së Kadri Veseli dhe ai i LDK-së, Isa Mustafa i japin fund bashkëpunimit të tyre më 25 prill. Një ditë më parë, pra më 24 prill, çështja e demarkacionit pritet të jetë në rend dite, në punimet e Kuvendin të Republikës së Kosovës, pasi kështu do të vendosë Kryesia, gjatë kësaj jave, njofton Klan Kosova.

Rezultati i votimit të marrëveshjes për kufirin me Malin e Zi, nuk e paracakton fatin e koalicionit, i cili, siç bën me dije burimi i Klanit, prishet menjëherë, një ditë më pas. Kjo nënkupton edhe shpërndarjen e menjëhershme të parlamentit.

Sapo të bëhet zyrtare prishja e koalicionit, cështja e caktimit të datës për zgjedhjet e parakohshme i kalon presidentit. Ky, sipas dispozitave, cakton datën e zgjedhjeve të reja, e cila, në opsionin më të largët duhet të jetë 45 ditë pas shpërndarjes së Kuvendit.

E llogaritë matematikore thonë që në rast se koalicioni prishet me 25 prill, atëherë, zgjedhjet, më së voni, duhet të mbahen deri të dielën e 4 qershorit, pasi çfarëdo date tjetër e mëvonshme, është jashtë kornizave kushtetuese për votime të parakohshme nacionale.

E datë më e preferuar se kjo, siç i është thënë Klanit, është 28 maji, e diela e fundit e majit.

Kontratë e re kolektive për punëtorët e arsimit në Kosovë

Periskopi.com Lajme

Nesër pritet të bëhet nënshkrimi i kontratës së re kolektive në mes të Ministrit të Arsimit, Shkencës dhe Teknologjisë, Arsim Bajrami dhe Kryetarit të Sindikatës së Bashkuar për Arsim, Rrahman Jashari.

Rrahman Jasharaj, Kryetar i Sindikatës së Bashkuar të Arsimit, Shkencës e Kulturës  ka treguar për  ka treguar për Kallxo.com përmbajtjen e kontratës së re dhe ndryshimet që do t’i ketë nga ajo e vjetra.

Jasharaj tha kontrata e re do të përfshijë të gjithë punëtorët e arsimit e jo vetëm ata të arsimit parauniversitar.

“Kontrata e re është për gjithë punëtorët arsimit që nënkupton dallon nga kontrata aktuale sepse e ka të përfshirë edhe Universitetin . Çështjet që kanë qenë të mbrojtura me kontratën e vjetër si pagat përcjellëse do te jenë edhe tash. Kësaj radhe është vendosur që kontrata t’i përfshijë edhe punëtorët e arsimit të lartë”, deklaroi Jashari.

Kontrata kolektive e punëtorëve të arsimit që ishte nënshkruar nga ish-Ministri i Arsimit Ramë Buja në vitin 2014 skadoi më 11 prill të këtij viti.

Me këtë kontratë përveç të tjerash i mundësohej pensionistëve që t’i marrin deri në 6 paga në emër të pagave përcjellëse dhe asaj jubilare.

Me skadimin e kësaj kontrate SBASHK kishte paralajmëruar greva nëse një e re nuk nënshkruhet megjithëse patën ankesa për moszbatimin e kontratës paraprake.

Megjithatë sipas Jasharit presioni  me paralajmërimin e  grevës nuk ka qenë faktori i vetëm për arritjen e kontratës së re.

“Unë ma tepër do të thoja se ditëve të fundit është për t’u lavdëruar angazhimi i kabinetit i ministrit Bajrami jo për shkak se ne kemi bërë presion me greva. Besoj që një angazhim i tillë do të vërehet edhe në të ardhmen”, tha Jasharaj.

Kontrata që planifikohet të nënshkruhet nesër do të jetë e vlefshme për 3 vite sipas ligjit të punës./ Kallxo

Parashikimi i motit për fundjavë

Periskopi.com Lajme

Gjatë dy ditëve të vikendit parashihet të mbajë mot i ndryshueshëm, me vranësira dhe intervale me diell.

Vranësirat gjatë ditës do të intensifikohen duke krijuar kushte për reshje shiu dhe vende-vende parashihet të ketë edhe zbrazje elektrike.

Temperaturat minimale do të lëvizin ndërmjet 6-9 gradë Celsius, kurse maksimalet e ditës parashihet të lëvizin ndërmjet 15-21 gradë Celsius.

Do të fryjë erë nga jugperëndimi dhe verilindja me shpejtësi deri 9m/s

Për dy ditë konfiskohen mbi 160 kilogramë drogë në Kosovë

Policia e Kosovës, në tri raste të ndara gjatë kësaj jave kanë konfiskuar 160 kilogramë substancë narkotike të llojit marihuanë.

Periskopi.com Lajme

Në një konferencë të jashtëzakonshme për media u tha se përveç rastit që ka ndodhur më 28 mars ku janë konfiskuar 65 kilogramë marihuanë policia dje janë zhvilluar dy operacione të quajtur “Bari” dhe “Rikthimi”.

Bajram Nuhiu nga sektori për Narkotikë tha se dje në operacionin e zhvilluar në Prishtinë janë gjetur 57 kilogramë  e 69 gramë substancë narkotike e llojit marihuanë.

“ Njësia për hetimin e trafikimit me  narkotikë në kuadër të drejtorisë së përgjithsme për hetimin e trafikimit narkotik nga rajoni I Gjilanit dhe rajoni I Prishtinës, kanë zhvilluar një operacion në Prishtinë. Gjatë këtij operacioni janë konfiskuar 57 kg e 69 gram, substancë narkotike e llojit marihuanë dhe është arrestuar një person. Gjatë këtij operacioni është kontrolluar një shtëpi dhe në atë shtëpi është gjetur substance të cilën e përmendëm”, tha ai.

Nuhiu po ashtu tha se në operacionin tjetër të realizuar  në pikëkalimin Kosovë-Serbi është  ndaluar një automjet transportues në të cilin janë gjendur lëndë narkotike.

“Dyshohet se grupe të organizuara  kriminale , të ndërlidhura, Kosovë-Serbi, kanë pasur qëllim që automjetin transportues ta dërgon deri në pikën kufitare dhe nga aty grupet kriminale të Serbisë ta marrin atë automjet dhe ta përcjellin ne vendet e Bashkimit Evropian. Gjatë kontrollit të këtij automjeti transportues janë gjetur 31 kilogramë  e 600 gram substancë narkotike e llojit marihuanë dhe është arrestuar një person”, tha Nuhiu.

Sipas tij  në vazhdim të operacionit janë bastisur tri lokacione tjera me ç’rast janë gjetur: tri revole, 79 fishekë të kalibrave të ndryshëm, para  në vlerë prej rreth 19 mijë Euro dhe është arrestuar edhe personi me inicialet M.R. i lindur më 1968 si i dyshuar për bashkëkryerje të veprës penale.

Lidhur me këtë rast në kërkim janë edhe dy persona tjerë të dyshuar, ndërsa janë sekuestruar automjeti transportues dhe tri vetura.

Në këtë konferencë, zëdhënësi i Policisë Daut Hoxha tha se gjatë kësaj jave janë konfiskuar gjithsej 160 kilogramë substanca narkotike.

“Në luftën kundër korrupsionit, Policia e Kosovës gjatë kësaj jave  ka arrestuar 34 persona të dyshuar, ka konfiskuar 160 kilogramë g substanca të dyshuara narkotike, para te gatshme,  armë, automjete transportuese dhe pajisje  tjera”, tha Hoxha.

Bajram Nuhiu tha se këto aksione të Policisë financohen nga Bashkimi Evropian dhe gjithashtu ka një përkrahje të madhe të tyre.

Qeveria miraton në heshtje mbajtjen e zgjedhjeve të Serbisë në Kosovë

Qeveria e Kosovës ka miratuar në heshtje mbajtjen e zgjedhjeve presidenciale të Serbisë në Kosovë.

Periskopi.com Lajme

OCBE sqaron se ka marrë këtë miratim, duke u munduar që qendrat ku do të votohet, t’i quaj si qendra grumbullimi dhe degë përkatëse. Për opozitën një gjë e tillë është e papranueshme, pasi që po shkelet Kushtetuta dhe Serbia po cenon sovranitetin e vendit.

Deputetja nga radhët e Vetëvendosjes Albulena Haxhiu, thotë për KosovaPress, se për ta është e papranueshme heshtja e Qeverisë në këtë rast, kur kemi të bëjmë me shkelje të Kushtetutës dhe cenim të sovranitetit.

“Nuk është hera e parë që Serbia po e cenon sovranitetin tonë, nuk është hera e parë që Serbia po organizon zgjedhje në territorin e Republikës së Kosovës, kështu ka ndodhur dhe në zgjedhje tjera parlamentare, kështu po ndodh dhe në zgjedhjet presidenciale. Për ne si Lëvizje VV është e papranueshme heshtja e Qeverisë. Keni parasysh që janë hapur diku 90 vendvotime në mënyrë që qytetarët serb që jetojnë në Kosovë, të votojnë në zgjedhjet e Serbisë, dhe arsyetimi për këtë është për shkak të dy shtetësisë. Kjo natyrisht që nuk qëndron për faktin se edhe qytetarët serb jetojnë dhe në vende tjera të Bashkimit Evropian, mirëpo nuk po hapin qendra si ta zëmë në Gjermani, Zvicër,  Francë apo vende tjera. Pra për neve si VV është e papranueshme sidomos heshtja e Qeverisë, mirëpo, shkelja e Kushtetutës që po e bëjnë këta njerëz. Natyrisht se e kemi kundërshtuar një gjë të tillë….kjo nuk po bëhet vetëm që qytetarët serb të votojnë, por qëllimi i Serbisë është ta zbatoj në përpikëri Kushtetutën që e konsideron Kosovën si pjesë të Serbisë, për ne është e papranueshme, mirëpo për sa kohë kemi njerëz në Qeveri të cilët i janë nënshtruar në plotni Qeverisë së Serbisë, nuk ka rrugëdalje përveç se t’i heqim këta njerëz për ta ndalur Serbinë“, tha ajo.

Por ky veprim nuk përbën shkelje të Kushtetutës për zyrtarë të LDK-së. Sadri Ferati thotë se mbajtja e zgjedhjeve të Serbisë në Kosovë, nuk është shkelje e Kushtetutës së vendit. Ai madje përshëndet institucionet e vendit, të cilat nuk janë marrë fare me këtë çështje.

 

“Unë mendoj që nuk është shkelje e Kushtetutës. Ka pasur edhe OSCE edhe neve na ka ndihmuar në zgjedhjet në Kosovë, ka qenë e lajmëruar që t’i ndihmoj ato zgjedhje, që të kenë qendra ku do të votojnë qytetarët. Shihet se është një entuziazëm shumë më i vogël se sa në të kaluarën. Nga ana tjetër vet marrja e lejes për hyrje dhe mbajtja e këtyre mitingjeve nga politikanë serb, e tregon se edhe ata dalëngadalë çdo ditë e më tepër janë dhe po e reflektojnë atë se Kosova është një shtet fqinjë të cilin duhet me respektuar…. Unë i përshëndes institucionet e Republikës së Kosovës, të cilat nuk janë marrë me atë se si do ta shpreh vullnetin një qytetar i Kosovës, që e ka fituar të drejtën me votu për një vend tjetër. E rëndësishme është se edhe në Beograd ka filluar të kuptohet se shteti i Kosovës është në forcim e sipër dhe të cilin duhet me respektu ”, tha ai.

Ndërkaq, shefi i Grupit parlamentar të PDK-së, Zenun Pajaziti thotë se më e rëndësishme, se ajo se duhet të mbahen zgjedhjet apo jo, është ndalja e manipulimit që Beogradi po bënë me qytetarët serb në Kosovë, në vend se ata të ndihmohen të integrohen.

“Më shumë se sa ajo se a duhet lejuar apo duhet të ndaluar, duhet që vet qytetarët serb të ndalin një proces të përsëritur të manipulimit të tyre nga Beogradi. Veç kur ka zgjedhje ata vijnë të votojnë dhe në fakt se ky është veçse një manipulim i radhës. Institucionet e Kosovës duhet të veprojnë në përputhje me ligjet që janë në fuqi. Asnjë aktivitet ilegal nuk duhet lejuar, porse qytetarët që kanë dy shtetësi në Kosovë, kemi nga të gjitha komunitetet që posedojnë dy shtetësi kanë të drejtë të votojnë aty ku e kanë të drejtën të votojnë, aty ku kanë një shtetësi tjetër. Ata mund të shkojnë të votojnë atje. Institucionet e Kosovës nuk kanë asnjë lloj përgjegjësie për organizimin e këtyre zgjedhjeve, përkundrazi ne vlerësojmë se Beogradi po i përdor serbet për qëllimet e tyre politike, për më tepër po i manipulon në të gjitha rastet, jo vetëm në proceset politike por në të gjitha rastet e mundshme. Mendoj që kjo duhet njëherë e përgjithmonë të ndalet, pra më shumë se sa një proces teknik i zgjedhjeve, që mund të bëhet nëpër shtëpi private, t’i mbledhin kutitë e t’i manipulojnë ato, më e rëndësishme është që të ndalet kjo mënyrë e manipulimit. Një president i zgjedhur me vota të tilla, në mënyrë të tillë duke i mbledhur kutitë nëpër rrugica, nëpër shtëpi, nëpër vende të fshehta, nuk është asgjë tjetër, veçse proces jolegjitim dhe institucione jolegjitime”, tha ai.

Ndërkaq presidenti i vendit, Hashim Thaçi, në një intervistë për KosovaPress, pati deklaruar se institucionet e vendit do të marrin vendim për mbajtjen e zgjedhjeve të Serbisë në Kosovë, mbi bazën e Kushtetutës dhe ligjeve në fuqi, si dhe në bashkërendim me bashkësinë ndërkombëtare.

“Është një paradoks që përderisa vet serbët e Kosovës bojkotojnë institucionet, tash kemi një rrethanë të mundësisë për organizimin e zgjedhjeve apo kërkesës për organizimin e zgjedhjeve serbe në Kosovë. Përgjigjen për këtë do ta dhënë institucionet në mënyrë unike në ditët e ardhshme dhe në koordinim me bashkësinë ndërkombëtare. Por, çdo vendim do të jetë i bazuar në Kushtetutën dhe ligjet e Kosovës e Kosovës…që do të thotë se do të respektohet Kushtetuta dhe ligjet e Kosovës”, tha Thaçi.

Ndryshe, misioni i OSBE-së në Kosovë, ka bërë të ditur se do të ndërmarrë një operacion të grumbullimit të votave, duke hapur katër qendra grumbullimi dhe degë përkatëse nëpër Kosovë me prani të stafit të OSBE-së, në kontekst të zgjedhjeve presidenciale të Serbisë. Për të ndërmarrë këtë operacion, OSBE bënë të ditur se ka marrë një kërkesë nga Beogradi dhe miratimin e Qeverisë së Kosovës.

OSBE do të jetë bartëse e operacionit në Kosovë, duke përfshirë edhe ruajtjen e materialit të ndjeshëm dhe integritetit të procesit. Procedurat do të jenë të njëjta me ato të viteve të kaluara. Me t’u përmbyllur operacioni, OSBE do t’i bartë votat e grumbulluara në Rashkë dhe Vranje dhe do t’ia dorëzojë ato Komisionit Zgjedhor Republikan (RIK) për procedura të mëtutjeshme.

Përplasje mes taksistëve shqiptarë dhe policëve në veri

Përplasje verbale mes taksistëve shqiptarë dhe disa policëve të veriut të Mitrovicës, ka ndodhur sot rreth mesditës në ‘Lagjen e boshnjakëve’ në veri të këtij qyteti, ndërsa pati edhe tentime për arrestim.

Periskopi.com Lajme

Shkak i kësaj përplasje ishte tentimi nga ana e policëve për t’i dënuar taksistët për shkak të parkimit të automjeteve të tyre në udhëkryqin kryesor të lagjes, ku ndodhet shenja e komunikacionit që ndalon ndaljen dhe parkimin e automjeteve.

Mirëpo, taksistët dhe banorët shqiptarë të kësaj lagje ankohen se pjesëtarët e Policisë së Kosovës të stacionit veri dënojnë në mënyrë selektive dhe vetëm shqiptarët.

Ramadan Fejza, qytetar, tha se policia këtu zbaton ligjin dhe merr masa vetëm ndaj shqiptarëve, kurse ndaj serbëve jo. Sipas tij, shqiptarët në atë pjesë të qytetit janë krejtësisht të pambrojtur.

“Këtu po ndodh çka është më e keqja. Policë serbë me një shqiptar të ndershëm, kështu i themi, i largon vetëm shqiptarët, merr masa vetëm ndaj shqiptarëve, ndaj serbëve aspak. Asnjëherë nuk marrin masa, i ndalin me tabela KM, PR, BG, dhe nuk ndërmarrin asnjëherë, pos neve që për një kafshatë buke dalim… Për me heq veturën, s’po mundem me u shpreh në mënyrën banale qysh u shpreh polici…Ligji për shqiptarët këtu absolut nuk vlen. Nuk kemi ligj, nuk kemi mbrojtje, por për serbët ligji është shumë i disponueshëm për ta në çdo aspekt”, ka thënë Fejza.

Edhe Ramadan Jonuzi, banor i ‘Lagjes së boshnjakëve’, i cili punon me automjetin e tij taksi, ka bërë të ditur se ligji në këtë pjesë nuk vlen për të gjithë njëjtë.

“Te ne nuk funksionon ligji hiç. Këta policë, kapërcejnë vetura me tabela KM dhe të ngjashme, askush s’guxon me i ndal, ndërsa neve na pengojnë, s’na lënë për të punuar. Unë jam banor i kësaj ane dhe përtej këtu s’kam ku shkoj… Me më arrestuar se veç po kanë qejf se jam shqiptar për këtë.. Në udhëkryq e kam pas veturën sikur të gjithë. Unë ju thash, nëse ekziston ligji për të gjithë ekziston edhe për mua, përmbi ligjin s’është askush. Le t’i dënojnë krejt, atëherë edhe mua, jam i pajtimit… Më herët ishte një veturë me tabela KM dhe s’guxuan me i thënë asgjë. Ja tani, pa tabela kalon këndej, nuk guxon me ndal, neve po na ndalin, pse nuk e di. Ne i paguajmë të gjitha dhe na dënojnë”, theksoi mes tjerash Jonuzi.

Ndryshe, njëri prej policëve ka penguar gazetarin e KosovaPressit gjatë punës së tij, duke provuar të mos lejojë xhirime dhe ta ndalë kamerën menjëherë. KosovaPress-i ka provuar të kontaktojë me përgjegjësit e policisë në veri rreth kësaj ngjarje, por një gjë e tillë ka qenë e pamundur.

Nga 1 prilli, familjet që shpenzojnë rreth 400 kWh rrymë, do të paguajnë 30-40% më shtrenjtë

Konsorciumi Kosovar i Organizatave të Shoqërisë Civile për Zhvillim të Qëndrueshëm (KOSID) u ka dërguar letër zyrtare anëtarëve të Bordit të Zyrës së Rregullatorit për Energji (ZRRE), në të cilën shpalos qëndrimet në lidhje me propozimin e strukturës së re tarifore.

Periskopi.com Lajme

Në letër shpjegohet se në bazë të kalkulimeve të bëra nga KOSID, del që faturat e rrymës për pjesën e shoqërisë që harxhon më pak energji elektrike do të pësojnë rritje.

“Në bazë të kalkulimeve tona, sipas këtij propozimi, një familje që harxhon rreth 300-400 kWh energji elektrike në një muaj të verës do të paguaj 30-40% më shumë për faturën e energjisë elektrike,” thuhet në letër.

KOSID vlerëson se propozimi i bërë nxit konsumin e energjisë elektrike dhe rrezikon që përveç çmimeve më të larta, t’u shkaktojë qytetarëve edhe kosto të importit të shtrenjtë të energjisë elektrike në kohën e pikut.

Në letrën dërguar ZRRE-së, KOSID, gjithashtu, ka informuar se propozimi dëmton edhe bizneset e vogla dhe të mesme, të cilët në bazë të raporteve të ZRRE-së, kanë një volum të konsiderueshëm të konsumit.

KOSID informon se struktura e re tarifore nuk ofron masa incentive për ato biznese, një pjesë e madhe e të cilave kryejnë aktivitetin e tyre më të lartë biznesor kryesisht gjatë muajve të verës.

“Tarifat e propozuara, në këta muaj të verës do t’u shkaktojë këtyre bizneseve nga 9.09 €/kWh në tarifë të lartë, në 13.88 €/kWh; dhe nga 4.54 €/kWh në tarifë të ultë, në 5.78 €/kWh. Konsiderojmë që së paku është dashur të konsiderohen kostot që kjo do t’i shkaktojë aktivitetit biznesor, të bëhen llogaritje dhe t’u thuhet hapur që në krahasim me muajt e njëjtë të vitit 2016 do të ketë një rritje gjatë muajve të verës,” thuhet në letrën e KOSID.

KOSID konsideron se rruga drejt një tregu të integruar rajonal duhet arritur me një qasje më të balancuar, që nuk dëmton shtresat e ndjeshme të shoqërisë dhe nuk thellon pabarazinë sociale, andaj i bën thirrje anëtarëve të Bordit të ZRRE-së që të marrë parasysh ato familje kosovare që nuk kanë mundësi të paguajnë më shtrenjtë energjinë elektrike ose që kanë investuar në masa të efiçiencës, si dhe bizneset e vogla dhe të mesme që operojnë në vend, dhe të mos ndryshojë strukturën aktuale të tarifave të energjisë elektrike.

KOSID, gjithashtu, ua ka përcjellë Bordit të ZRRE-së analizën e publikuar në të cilën identifikohen ndikimet që struktura e re e propozuar do të ketë për konsumatorët më të ndjeshëm të shoqërisë. Po ashtu, analiza përmban rekomandime konkrete për ZRRE-në.

ZRrE propozon që të hiqet tarifat sezonale

Zyra e Rregullatorit për Energji në seancën publike dëgjimore, ka propozuar që të hiqet tarifat sezonale. Me këtë propozim nuk do të ketë më sezon dimërore dhe verore të tarifave.

Periskopi.com Lajme

Propozimin e strukturës së re tarifore parashihet që rryma të tarifohet për shfrytëzim ditë dhe natë.

ZRrE parasheh çmimin e konsumit ditore 7 centë  për kilovatë, ndërsa, 3 centë për kilovatë për natë.

Papadopoulou tregon sa akuza për krime lufte i ka ngritur EULEX-i

Shefja e misionit të EULEX-it në Kosovë, Alexandra Papadopoulou, ka thënë se ky mision ka punuar mirë dhe deri më tani ka ngritur 450 aktakuza për krime luftë.

Periskopi.com Lajme

Ajo në një intervistë për RTK, ka thënë se 38 raste kanë kaluar nëpër gjykata, kurse tani në gjykata janë 43 akuza, të cilat kanë të bëjnë me krime lufte.

“Nuk kanë shikuar përkatësinë etnike të rasteve, por faktet që janë ofruar, pasi EULEX nuk bënë dallime mes shqiptarëve dhe serbëve e të tjerëve, në trajtimin e rasteve”, thotë Papadopoulou.

Ajo shtoi se gjykatësit e EULEX-it, nuk mund të gjykojnë personat në mungesë, pasi këtë nuk e lejojnë ligjet e Kosovës.

“Personat në mungesë nuk kanë mundur të gjykohen në Kosovë. Nëse ligji nuk lejon që të dënohen, një person që nuk gjendet këtu, atëherë duhet ndryshuar këtë ligj”, tha shefja e EULEX-it.

Ajo, po ashtu gjatë intervistës ka bërë të ditur se mandati i EUELX-it dhe Gjykata Speciale në Hagë, kanë mandate të ndryshme, transmeton KosovaPress.

Ngrihet aktakuzë kundër një kosovari për pjesëmarrje në luftën e Sirisë

Prokuroria Speciale e Republikës së Kosovës, ka ngritur sot aktakuzë, pranë Departamentit për Krime të Rënda të Gjykatës Themelore në Gjakovë, kundër personit B.U. në drejtim te veprës penale: Organizimi dhe pjesëmarrja në grupin terrorist në tentativë, nga neni 143 paragrafi 2 të Kodit Penal të Republikës së Kosovës.

Periskopi.com Lajme

Siç njofton zyra e Prokurorit të Shtetit, sipas aktakuzës për të pandehurin B.U. ekziston dyshimi i bazuar mirë në kod se, i njëjti në periudhën kohore korrik 2014 deri në fund të muajit nëntor 2014, ka marr pjesë në veprimtarinë e grupit – organizatë terroriste, të quajtur ISIS, e cila operon në konfliktin e armatosur në Siri.

Bëhet e ditur se aktakuza është ngritur nga një prokuror vendës i Prokurorisë Speciale të Republikës së Kosovës, i cili i ka propozuar Gjykatës që pas administrimit të provave dhe përfundimit të shqyrtimit gjyqësor i pandehuri, për veprën penale që akuzohet, të shpallet fajtor dhe të gjykohet sipas ligjit.

E mbyllë biznesin në Kosovë, ikë në Serbi te Vuçiqi (Video)

Biznesmeni turk, Besim Minkara e ka lënë në gjendje të mjerë fabrikën "Rematex" në Dragash. Investitori turk ka lënë shumë borxhe në fabrikën shumë të njohur dikur të prodhimit të tekstilit. Afër 2 milionë euro thuhet të jetë shuma e borxheve që Minkara e ka lënë në fabrikën "Rematex".

Periskopi.com Lajme

Besim Minkara ka mijëra euro borxhe në tatime, paga të papaguara të punëtorëve, rrymë, shërbime komunale si dha borxhe të shërbimit në transport.

“Kompanisë tonë Besim Minkara i ka mbetur borxh plot 65 mijë euro. Ne kemi kryer të gjitha shërbimet e transportit të punëtorëve, por që borxhi asnjëherë nuk na është paguar” ka thënë Mehal Rysheni, një nga pronarët e firmës transportuese “Erëza” në Dragash, shkruan Indeksonline

Fabrika “Rematex” ka më shumë se 1 vit që është mbyllur dhe se punëtorët vazhdojnë të kërkojnë paratë e mbetura borxh nga milioneri turk.

Por, biznesmeni turk nuk duket sa ka krizë për para. I njëjti dje është parë në Serbi bashkë me kryeministrin serb, Aleksander Vuçiq. Ai e ka hapur një fabrikë të re në Lebane të Serbisë në të cilën pritet të punësohen më shumë se 300 punëtorë.

Punëtorët e fabrikës kanë thënë se janë duke ndjekur çdo rrugë ligjore për të marrë paratë e merituara.

“Jemi duke ndjekur të gjitha rrugët për të marrë paratë tona. Kemi angazhuar përmbaruesit të cilët nuk duket se po bëjnë punë të madhe. Por ato janë paratë tona dhe nuk do të ndalemi deri sa Besim Minkara të na i kthej” ka thënë për Indeksonline njëri nga ish punëtorët e Rematex.

Zgjedhje të parakohshme më së largu në qershor

Demarkacioni, e edhe projektligji për bërjen e FSK’së ushtri, janë dy çështje të cilat do të përdoren për ta çuar vendin në zgjedhje të parakohshme.

Periskopi.com Lajme

Burime brenda partisë më të madhe në vend, PDK’së, kanë thënë për gazetametro.net, se do të ketë zgjedhje të parakohshme gjatë këtij viti, dhe një pjesë e partisë po insiston që ato të mbahen sa më shpejt, më së largu në qershor. Në PDK tanimë, thuhet se përgatitjet për zgjedhje veçse kanë filluar.

Megjithatë, sipas të njëjtit burim, për këtë ende nuk ka folur kryetari i partisë, Kadri Veseli, edhe pse ai vet ka filluar të dal në terren dhe të bëj spote, që mund të konsiderohen parapërgatitje për fushatë elektorale.

Ky burim po ashtu thotë se nëse zgjedhjet nuk do të mbahen këtë qershor, ato do të mbahen në të njëjtën kohë me zgjedhjet lokale.

Nga koalicioni qeverisës LDK është ajo që nuk po dëshiron të ketë zgjedhje të parakohshme. Kjo parti po insiston që të respektohet kalendari i rregullt zgjedhor.

Sipas analistit Imer Mushkolaj, tani është koha më se e nevojshme që vendi të shkojë në zgjedhje dhe se gjasat janë si asnjëherë më shumë.

“Partnerët e koalicionit qeveritar madje as nuk po komunikojnë si duhet, lëre më të marrin vendime të rëndësishme për vendin. Çdo ditë më tepër në pushtet i këtij koalicioni vetëm sa e dëmton vendin dhe nuk e ndihmon”, ka thënë Mushkolaj për gazetametro.net.

Ndërsa publicisti, Xhemal Ahmeti ka thënë për Gazetën Metro, se kriza brenda LDK’së reflektohet në kualitetin dhe kompaktësinë e koalicionit, dhe kjo sips tij shkakton dëme si në qeverisje brenda ashtu edhe në politikat e vendit me faktorët ndërkombëtarë.

“E vetmja alternativë, me apo pa zgjedhje, për problemet aktuale mbetet një tryezë urgjente gjithëpërfshirëse për të dalë nga kjo pozitë pa rrugëdalje në të cilën gjendet vendi. Përndryshe atë ditë që njëri nga partnerët e koalicionit të kërkojë zgjedhje të reja ato do caktohen”, ka thënë Ahmeti.

Komisioni Qendror i Zgjedhjeve, po ashtu ka shprehur gatishmërinë teknike, për t’i organizuar ato, kurdo që partitë marrin vendim për këtë

 

Mogherini bashkon liderët e Kosovës, i frikësohet vizitës te ura në Mitrovicë

Përfaqësuesja e lartë e Bashkimit Evropian Federica Mogherini, do të mbledh nesër në një takim të përbashkët të gjithë krerët e partive politike.

Periskopi.com Lajme

Ajo, do t’i takojë ata në zyrat e Bashkimit Evropian.

Kjo konfirmohet edhe tek agjenda e Mogherinit, ku thuhet se në ora 11:00 ajo do të takojë udhëheqësit e partive politike.

Prezencën për gazetametro.net e ka konfirmuar edhe Lëvizja Vetëvendosje. Lideri i kësaj partie Visar Ymeri, do të jetë në këtë takim.

Ndërsa edhe në agjendën e kryeministrit Isa Mustafa, është shënuar për takimin me Mogherinin dhe udhëheqësit e partive tjera.

Në publikimin e agjendës së Mogherinit, nuk është treguar as për kohën e vizitës së saj te ura në Mitrovicë, por është konfirmuar se do jetë atje.

Në njoftim thuhet se ato detaje do bëhen të ditura në vazhdimësi.

Agjenda e Mogherinit në Kosovë, i frikësohet vizitës te ura në Mitrovicë

 

 

Agjenda e Mogherinit në Kosovë, i frikësohet vizitës te ura në Mitrovicë

Federica Mogherini, përfaqësuesja e lartë e BE-së për punë të jashtme dhe politika të sigurisë dhe zëvendëspresidentja e Komisionit Evropian (PL/ZP) do të vizitojë Kosovën të shtunën më 3 mars.

Periskopi.com Lajme

Gjatë vizitës, PL/ZP do të takohet me autoritetet politike duke përfshirë Presidentin Hashim Thaçi, Kryetarin e Kuvendit Kadri Veseli, Kryeministri Isa Musta dhe udhëheqësit e partive politike parlamentare. PL/ZP poashtu do të vizitojë urën e Mitrovicës. Fotografitë dhe videot e vizitës do të jenë në dispozicion në platformat e medias sociale të BE-së në Kosovë dhe në platformën “Europe by Satellite” (EbS).

E shtunë, 4 Mars 2017

9.00 Takim me Presidentin Hashim Thaçi

Vendi: Krahu i Presidentit, Kuvendi i Kosovës (vetëm mundësi fotografimi)

9.35 Takim me Kryetarin Kadri Veseli

Vendi: Kuvendi i Kosovës (vetëm mundësi fotografimi)

10.00 Takim me Kryeministrin Isa Mustafa

Vendi: Kabineti i Kryeministrit (vetëm mundësi fotografimi)

10.35 Deklaratë për shtyp me Kryeministrin Isa Mustafa

Vendi: Ndërtesa e Qeverisë, Salla P38 (nuk do të ketë mundësi për pyetje)

11.00 Takim me udhëheqësit e partive politike

Vendi: Zyra e BE-së në Kosovë (vetëm mundësi punësimi)

 

“Anëtarët e mediave të cilët dëshirojnë të marrin pjesë në aspektet e shtypit të vizitës së PL/ZP tek ura e Mitrovicës duhet të dërgojnë njoftimin në Zyrën e BE-së deri në ora 16 të premtën, 3 mars 2017 në [email protected] (ju lutem tregoni se për cilën ngjarje dëshironi të akreditoheni). Për shkaqe sigurie, më shumë detaje mbi vizitën e PL/ZP do të jenë në dispozicion për mediat e akredituara, të cilët do të jenë të vetmit që do të lejohen të hyjnë tek hapësira”, thuhet në njëoftimin e BE-së. / Periskopi

Kosova, pjesë e fushatës zgjedhore të Vuçiqit

Kosova është një ndër temat me të cilën kryeministri serb, Aleksandar Vuçiq, bën fushatë në përpjekjen e tij për t’u zgjedhur president i Serbisë.

Periskopi.com Lajme

 

Madje, Vuçiq është zotuar, të enjten, se në kuadër të fushatës së tij zgjedhore do të qëndrojë edhe në Kosovë.

Siç raporton agjencia e lajmeve FoNet, në një paraqitje publike në Vranjë, i pyetur nga gazetarët, Vuçiq ka thënë se gjatë fushatës zgjedhore për president të Serbisë ai do të qëndrojë edhe në Kosovë, ku ai shpreson se “do të fitojë përkrahjen e popullit serb prej së paku 70 për qind”, përcjell Koha Ditore.

“Çfarë fushate është kjo nëse nuk shkoj në Kosovë?”, tha Vuçiq para gazetarëve në Vranjë.

Dokumentari që tregon për krimet serbe në Kosovë

Provat tregojnë rolin e Ushtrisë Jugosllave në vrasjet masive të civilëve shqiptarë në Izbicë, Qirez, Savarinë, Rezallë dhe fshatra të tjerë në rajonin e Drenicës.

Periskopi.com Lajme

Në Beograd, Qendra për të Drejtën Humanitare ka publikuar një dokumentar që akuzon kreun e ushtrisë serbe, Lubisha Dikoviq për përfshirje në krime të luftës në Kosovë, si dhe në operacionet për fshehjen e trupave, shkruan ‘balkaninsight.com’.

Sipas këtij dokumentari rreth 1,400 civilë u vranë në vitin 1999 në zonën e Kosovës, e cila ishte nën kontrollin e Brigadës 37 të Ushtrisë Popullore Jugosllave, që drejtohej nga Dikoviq, përcjell albinfo.ch.

Ky dokumentar është titulluar “Gjenerali Dikoviq dhe Brigada e 37-të e Kosovës” dhe bazohet në dëshmitë e viktimave dhe dokumentet nga Gjykata Penale Ndërkombëtare për ish-Jugosllavinë, por gjithashtu në hulumtimet e kryera nga HLC-ja gjatë punës e saj për dy dosjet “Lubisha Dikoviq” dhe “Rudnica”, që u publikuan në vitin 2012 dhe 2015. Ky dokumentar zgjat 23 minuta.

Provat tregojnë rolin e Ushtrisë Jugosllave në vrasjet masive të civilëve shqiptarë në Izbicë, Qirez, Savarinë, Rezallë dhe fshatra të tjerë në rajonin e Drenicës. Disa nga eshtrat e një sërë viktimave u zbuluan më vonë në varre masive në Serbi.

47 trupa viktimash u gjetën në vitin 2014 në një varr masiv në guroren e Rudnicës, pranë qytetit të Rashkës në Serbinë Veriore. Brigada e 37-të ishte përgjegjëse për largimin e trupave nga fshatrat Rezallë, Staro Cikitovo, Donji Zabelj dhe Gladno Selo në një tentativë për të mbuluar krimin.

Krimet e kryera nga Brigada e 37-të u trajtuan pjesërisht gjatë gjyqit të ish-presidentit serb Milan Milutinoviq dhe ato të zyrtarëve të tjerë të lartë në Gjykatën e Hagës, por askush nga brigada nuk u ndoq kurrë penalisht.

 

Dokumentari që tregon për krimet serbe në Kosovë

 

Flori Mumajesi ka braktisur Shqipërinë, prej një kohe po jeton në Kosovë (Foto)

Kantautori më i suksesshëm shqiptar Flori Mumajesi, duket se ka ndërruar vendbanim.

Periskopi.com Showbiz

Prej një kohe ai është ‘zhdukur’ nga rrjetet sociale duke postuar shumë pak gjëra, e aq më pak fotografi të tij, shkruan lajmi.net.

Që nga koha kur publikoi këngën e tij me Shkurte Gashin, ai nuk ka mbajtur as koncerte dhe nuk ka publikuar asnjë projekt të ri muzikor.

Së fundmi ai ka publikuar një fotografi me mikun e tij Kledi Bahiti në një ambient të hapur, e në prapavijë shihet bora e fundit që ka rënë këto ditë në Kosovë.

Ajo që e bën edhe më bindëse tranferimin e tij në Kosovë janë disa komente nga miqtë e tij, në dy fotot e fundit të publikuara në Instagram.

Në fotografinë që ka publikuar Flori me rastin e 9 vjetorit të pavarësisë së Kosovës, ka komentuar Erolld Belegu duke shkruar “Ani tash që je bo Kosovar”.

E  në anën tjeter edhe një komentues ka lënë komentin e tij duke thënë “Mirë se na vjen në lagje Flori”.

Se tashmë është banor i Kosovës, e bën edhe më dyshuese edhe këngëtarja Besa Kokëdhima e cila ka komentuar foton e Florit me Kledin me fjalët “Miss u dreqër” (Më mungoni), që tregon se ata ka kohë që nuk janë takuar.

Sipas këtyre informacioneve, nënkuptohet se Flori tashmë është banor i Kosovës. Se pse ka ndodhur një gjë e tillë, nuk dihet akoma./Lajmi.net.

Maqedonia e përgjysmon tregtinë me Kosovën

Edhe përkundër rënies se shkëmbimit tregtar katër vitet e fundit me Kosovën,  Maqedonia deri në fund të vitit 2016 ka shënuar suficit sa i përket eksportit të mallrave kundrejt importit të mallrave nga Kosova, shkruan gazeta KOHA.

Periskopi.com Lajme

Në tregun kosovar, kompanitë nga Maqedonia brenda vitit të kaluar kanë eksportuar mallra në vlerë prej mbi 188 milionë euro, dhe krahasuar me vitin 2015, importi është rritur për 20 milionë euro, gjegjësisht në vitin 2015 Maqedonia drejt tregut kosovar kishte eksportuar rreth 168 milionë euro.

Nga na tjetër, kompanitë kosovare në vitin 2016 në Maqedoni kanë eksportuar mallra me vlerë tepër të ulët, vetëm 30 milionë euro, ndërsa krahasuar me vitin 2015 sa i përket eksportit të mallrave kosovare në tregun e Maqedonisë, ato kanë shënuar rritje prej 8 milionë eurove.

Eksporti i mallrave nga Kosova i hyrë në tregun e Maqedonisë në vitin 2015 kapte shifrën prej 22 milionë eurove. Nëse do të krahasonim se si ishte shkëmbimin tregtar midis Maqedonisë dhe Kosovës pesë vite më parë, mund të konstatohet se Maqedonia ndër vite po e humb tregun e Kosovës.

Kështu, në vitin 2011 Maqedonia ishte partner numër një sa i përket shkëmbimit tregtar me Kosovën, sepse në këtë vit këmbimi tregtar me Kosovën kishte arritur shifrën prej 421 milionë eurove, edhe atë mallrat e eksportuara nga Maqedonia drejt Kosovës shënonin vlerën prej 396 milionë eurove, ndërsa mallrat e eksportuara nga Kosova në tregun e Maqedonisë kapnin shifrën prej 25 milionë eurove.

Po të krahasojmë këto shifra të vitit 2011 me shifrat e fundit të vitit 2016, i bie që Maqedonia brenda pesë viteve drejt tregun kosovar të eksporton 50 për qind më pak mallra.