Zbulohet inskenimi serbo-rus për zgjedhjet e nesërme në Kosovë (Video)

Periskopi.com Lajme

Organet e sigurisë së Republikës së Kosovës kanë dekonspiruar një operacion serbo-rus, i cili ka pasur për qëllim dëmtimin e procesit zgjedhor të 11 qershorit në vendin tonë.

Qëllimi i këtij operacioni ka qenë inskenimi i një vrasjeje në veri të vendit, të cilin gjoja do ta bënin shqiptarët.

Të dhënat flasin se në të vërtetë, operacioni ka filluar disa ditë pas shpalljes së zgjedhjeve, përkatësisht më 22 maj të këtij viti, kur, së paku një oficer rus i spiunazhit ka humbur jetën në një atentat në afërsi të pikës kufitare në Jarinje, 4-5 kilometra brenda Serbisë.

Besohet se, zyrtari rus ka qenë i ngarkuar me punë në të ashtuquajturën “Qendër Humanitare Ruso-Serbe” në Nish, e cila njihet nga perëndimi si qendër spiunazhi.

Për këtë, një portal prorus në veri të vendit ka zhvilluar një bisedë telefonike me ambasadën ruse në Beograd, ku siç dëshmon edhe audio-incizimi, diplomati rus i ka ikur përgjigjes.

Për çudi, ngjarja është mbyllur shumë shpejt për opinionin, dhe më tej nuk ka pasur asnjë reagim zyrtar nga asnjëra palë.

Kjo e konfirmon faktin se operacioni ka qenë tepër sekret.

Të dhënat flasin se, e tërë ngjarja mund të ketë ndodhur duke marrë parasysh nivelin e lartë të sekretit, dhe së këndejmi zyrtari rus ka qenë cak i sulmit të grupit kriminal serb nga veriu.

Këtij grupi kriminal i printe Millan Radojçiq, i cili njëkohësisht është edhe bashkëpunëtor i lartë i shërbimeve serbe të sigurisë për komunat veriore.

Pas vrasjes së oficerit rus, shërbimet e të dy vendeve serbe dhe ruse, janë dakorduar që kufomën ta përdorin për vrasjen që do të duhej të ndodhte më 11 qershor në veri.

Kështu, për këtë vrasje, të dy shtetet përkatëse, do t’i akuzonin shqiptarët, përkatësisht institucionet e Republikës së Kosovës në mënyrë që procesi zgjedhor të diskreditohej rëndë.

Kjo do të ndodhte në rast të të pakënaqësisë me rezultatin e zgjedhjeve për Listës Srpska. Rrjedhimisht, gjendja në veri do të eskalonte dhe se i tërë procesi zgjedhor atje do të dështonte.

Organet e sigurisë së Republikës së Kosovës edhe më herët kanë poseduar informacion se Federata Ruse është e interesuar të ndërhyjë në procesin zgjedhor në Kosovë, ashtu siç është bërë edhe në Malin e Zi në tetor të vitit të kaluar, ku cak ka qenë vrasja e ish-kryeministrit malazez Millo Gjukanoviq.

Siç dihet, prioritet i shërbimeve të inteligjencës ruse në vitin e fundit, ka qenë përfshirja në zgjedhje në shumicën e vendeve evropiane, veçanërisht në Ballkanin./RTKlive/

Partitë thonë se në listat zgjedhore nuk do të ketë kandidatë që kanë probleme me ligjin

Periskopi.com Lajme

Në prag të mbajtjes së zgjedhjeve parlamentare në Kosovë partitë politike ende nuk i kanë hartuar listat e tyre me emrat e kandidatëve që do të garojnë për deputetë të legjislaturës së ardhshme.

Por ajo që thonë partitë politike në Kosovë është se në listat e tyre zgjedhore nuk do të ketë kandidatë të cilët kanë probleme me ligjin.

Pas thirrjes së fundit të ambasadorit amerikan Greg Delawie por edhe të mekanizmave të tjerë vendorë e ndërkombëtarë që në listat zgjedhore të mos përfshihen njerëz që kanë probleme me ligjin, partitë politike garantojnë se do të jenë të kujdesshme me emrat që do t’i fusin në këto lista zgjedhore.

‘Në listat e PDK’së nuk do të gjejnë vend ata të cilët janë të akuzuar për korrupsion. Do të jenë njerëz me dinjitet dhe që do të përfaqësojnë më së miri qytetarët e Republikës së Kosovës”, tha për RTK’në Abelard Tahiri.

“Në këto lista do të jenë njerëzit më të përkushtuar, më të mirë, njerëzit që nuk kanë asnjë konflikt me ligjin dhe njerëzit që le të themi, janë me duar të pastra”, tha Blerim Grainca i LDK’së.

“Kemi qenë subjekti më i kujdesshëm që listat tona të jenë të pastra dhe njëjtë do të veprojmë prapë”, tha Driton Çaushi i VV’së.

“Të gjithë ata që janë të dënuar me vendim të shkallës së parë nuk mund të jenë pjesë e listës së Nismës për Kosovën”, tha Bilall Sherifi.

Përderisa ende nuk kanë filluar me hartimin e listave me emrat e kandidatëve për deputetë partitë politike sqarojnë se listat e reja zgjedhore do të pësojnë ndryshime për arsye të ndryshme derisa paralajmërojnë se në to do të zënë vend edhe kuadrot e reja të inkuadruara në partitë e ndryshme politike.

Zgjedhjet mbahen më 11 qershor.

Prokuroria e Shtetit tregon deri në cilën fazë kanë shkuar hetimet për veteranët e UÇK-së!

Periskopi.com Lajme

Lista me mbi 46 mijë qytetarë të Kosovës të cilët gëzuan statusin e veteranit të Ushtrisë Çlirimtare të Kosovës vazhdon të jetë objekt i hetimit nga ana e Prokurorisë së Shtetit edhe pas 5 muajve, nga kur patën nisur ato.

Lajmin e ka konfirmuar për “Gazeta Blic” Liridona Kozmaqi, zyrtare për informim e Prokurorisë së Shtetit.

Sipas saj, edhe në këtë kohë, prokurorët janë duke bërë grumbullimin e informatave në lidhje me keqpërdorimin eventual të listave të veteranëve të UÇK-së.

“Tani prokuroritë janë duke marrë veprimet e nevojshme në bazë të kompetencave që kanë dhe më pas varësisht nga grumbullimi i informatave do të përcaktohet nëse ka fakte për ndjekje penale ndaj personave përgjegjës dhe rrjedhimisht edhe për ngritje të aktakuzës”, tha ajo.

E pyetur se a kanë identifikuar parregullsi në këto lista deri në këtë fazë të hetimeve, Kozmaqi mohoi të jap detaje me arsyetimin se hetimet po vazhdojnë edhe më tutje.

“Tani në këtë fazë ku hetimet janë duke vazhduar në prokuroritë kompetente nuk mund të bëhen publike informata tjera”, ka thënë ajo.

Dyshimet për fryrje të listave me veteranë të UÇK-së nga përfaqësues të organizatave të dala nga lufta, kanë qenë pikënisje e hetimeve nga ana e prokurorisë.

Numri i madh i veteranëve ka rrezikuar edhe buxhetin e Kosovës, madje në vitin e kaluar kjo kategori për disa muaj rresht ka marrur pensionin e saj më vonesë./GazetaBlic.com/

 

Avokati i Popullit nis hetimet për kërcënimet ndaj Xharrës

Periskopi.com Lajme

Komiteti për Mbrojtjen e Gazetarëve, me seli në New York, ka reaguar për kërcënimet e fundit me vdekje ndaj kryeredaktores së gazetës “Zëri”, Arbana Xharra.

Ky komitet bën thirrje që Policia e Kosovës me shpejtësi t’i hetojë rastet e tilla.

“Policia në Kosovë duhet të hetojë me kujdes dhe me shpejtësi kërcënimet me vdekje ndaj Arbana Xharrës”, ka theksuar ky komitet.

Ata përmendin se kryeredaktorja e gazetës “Zëri”, Arbana Xharra, e cila ka gjetur të vizatuara në muret e banesës së saj disa simbole që i ngjajnë kryqit me një ngjyrë që duket si gjak, ka raportuar për korrupsionin dhe islamikët radikalë.

Ky komitet është një ndër organizatat më të famshme për mbrojtjen e gazetarëve në Amerikë.

Në anën tjetër, Avokati i Popullit Hilmi Jashari, ka nisur hetimet ndaj kërcënimeve që i janë bërë kryeredaktores së gazetës “Zëri” Arbana Xharrës dhe rastet e tjera që kanë ndodhur kohëve të fundit në vend.

Në njoftim thuhet se Avokati i Popullit ka hapur hetim edhe për kërcënimet ndaj kryeredaktores së gazetës “Zëri”, Arbana Xharra.

“Gjithashtu, duke u bazuar në informatat dhe kronikat mediale, Avokati i Popullit ka hapur për hetim ‘Ex Officio’ edhe një numër rastesh të tjera, duke përfshirë kërcënimet ndaj kryeredaktores së gazetës “Zëri”, znj. Arbana Xharra, rastin e foshnjës që gjatë procesit të lindjes në Klinikën Obstetrike Gjinekologjike ka rënë në dysheme, disa raste që kanë të bëjnë me të drejtat e fëmijëve dhe mbrojtjen shëndetësore e sociale të tyre; raste që kanë të bëjnë me përgjegjësinë për mjedisin jetësor”, thuhet në këtë njoftim.

Sipas këtij njoftimi, Avokati i Popullit vlerëson jashtëzakonisht shumë punën e medieve për të vënë në qendër të vëmendjes çështje të ndjeshme dhe me interes publik.

Hetime të reja për keqpërdorime të ish-kryetarit të Gjilanit

Periskopi.com Lajme

Ish-kryetari i komunës së Gjilanit, Qemajl Mustafa, mund të përballet sërish me një aktakuzë të re, për keqpërdorim të detyrës zyrtare, raporton KTV .

Kryeprokurori i Prokurorisë Themelore në Gjilan, Jetish Maloku, i ka thënë KTV-së se janë duke u kryer hetime të reja lidhur me një kallëzim penal kundër Qemajl Mustafës dhe se është në përfundim të tyre.

Ish-kryetari Gjilanit dyshohet se në vitin 2012 në mënyrë të jashtëligjshme kishte nënshkruar marrëveshjen e partneritetit publiko – privat për themelimin e ndërmarrjes së përbashkët aksionare “Eco Higjiena”.

Ekspertiza financiare e bërë nga Prokuroria Themelore nxjerr në pah se kompania private “Eco Vizion”, e cila kishte hyrë në partneritet me komunën, nuk ishte themeluar nga firma austriake “Moser Group”, por ishte themeluar nga disa individë. Por, ish-kryetari Mustafa i mohon të gjitha këto akuza, duke thënë se asnjëherë nuk ka vepruar jashtëligjshëm dhe se është krenar me marrëveshjen që ka bërë.

Pezullohen hetimet për Astrit Deharin

Në Austri kanë përfunduar xhirimet e Qendrës së Paraburgimit në Prizren, ku vdiq Astrit Dehari.

Periskopi.com Lajme

KohaVisioni ka mësuar nga burime brenda Prokurorisë se xhirimet janë dërguar muajin e kaluar në Austri që t’u bëhet ekspertizë.

“Pamjet e xhiruara të kamerave të sigurisë janë dërguar për analizë. Për të parë nëse ka pasur ndonjë ndërhyrje ose jo në to”, ka thënë ky burim.

Prokurori në Prizren, Metush Biraj, që është duke e hetuar rastin, shkurt i ka thënë televizionit se ai është në pritje të disa raporteve të reja.

“Pa i marrë ato raporte dhe rezultatet që janë të nevojshme, unë nuk mund të vazhdoj asnjë veprim hetimor”, ka thënë Biraj përmes telefonit.

Aktivisti i “Vetëvendosjes”, Astrit Dehari, ka vdekur këtu në Qendrën e Paraburgimit në Prizren vitin e kaluar. Familja e tij ka kërkuar hetim nga një Institut në Zvicër.

Avokati i familjes Dehari thotë se Prokuroria në Prizren do të duhej të merrte parasysh përfundimin e këtij hetimi, meqenëse dy raportet paraprake janë kundërthënëse.

Megjithatë, Ministria e Drejtësisë dhe Qeveria e Kosovës ende nuk kanë vendosur për kërkesën e familjes që t’ia paguajnë shpenzimet, bazuar në Rezolutën e Kuvendit të Kosovës.

Edhe pas 4 ditësh, Zyra e Kryeministrit nuk ka kthyer përgjigje në pyetjet e KTV-së për kërkesën që familja e ka dorëzuar një muaj më parë.

Pika e fundit e Rezolutës së Kuvendit megjithatë mund të jetë problem, meqenëse aty thuhet se ekspertizat shtesë mund të bëhen në çdo vend të Bashkimit Evropian dhe të SHBA-së. Zvicra nuk është anëtare e BE-së.

Prokuroria s’flet nëse po heton Zharkun rreth qasjes së “Al Petrolit” në autostrada

Ministria e Infrastrukturës dyshohet të jetë përfshirë në manipulimin e lejeve për qasje të kompanisë “Al Petrol” në rrugën lidhëse të dy autostradave “Ibrahim Rugova” dhe “Arbën Xhaferi” në Çagllavicë.

Periskopi.com Lajme

Në dosjen e dokumenteve të siguruara nga KTV-ja, thuhet se fillimisht ministria e drejtuar nga Lutfi Zharku i ka lëshuar leje kësaj kompanie në maj të vitit 2016, e tre muaj më pas e ka anuluar vendimin.

Kompania në fjalë, në kërkesën e saj, pretendon se ministria ka bërë shkelje ligjore, duke anuluar kundërligjshëm vendimin e datës 3 maj 2016, sipas të cilit, “Al Petrol” kishte qasje në këtë rrugë lidhëse.

Prokuroria e Shtetit nuk ka pohuar e as mohuar nisjen e hetimeve ndaj ministrit Lutfi Zharku dhe zyrtarëve të tjerë të kësaj ministrie.

Në dokumentet e Departamentit Antikorrupsion të Policisë së Kosovës, thuhet se më 6 dhjetor 2016, janë kërkuar të dhëna shtesë nga Inspektorati i Infrastrukturës Rrugore në këtë ministri.

Ministri i Infrastrukturës, Lutfi Zharku, nuk ka dashur të flasë për këtë çështje. Ka thënë se ai nuk është subjekt i hetimit dhe për këtë ka preferuar të flasin zyrtarët e Komisionit që ishte krijuar për çështjen Al Petrol, të cilin e kishte themeluar vet Zharku.

Familja Dehari zgjodhi zviceranët për hetime të pavarura (Video)

Familja e Astrit Deharit kanë zgjedhur një Institut në Zvicër për të bërë hetime dhe ekspertiza të pavarura për vdekjen e të birit.

Periskopi.com Lajme

Prindërit e Astritit, Xhemile dhe Avni Dehari kanë thënë se janë të bindur që djali u është vrarë, por megjithatë do e pranojnë rezultatin final.

Hetimet do të bëhen nga ekspertë dhe hetuesë të pavarur nga Qendra Universitare e Mjekësisë, në pjesën franceze të Zvicrës, me seli në Gjenevë, raporton Periskopi

Ekspertët e kësaj qendre, sipas tyre, kanë marr pjesë në ekspertiza në shumë raste të rënda brenda dhe jashtë shtetit të tyre.

Familja Dehari thotë se kanë zgjedhur Institutin në këtë shtet, meqë kanë jetuar shumë vite atje, kanë miq dhe besim të madh në punën që bëhet në Zvicër.

Besojnë se do të bëhet hetime të pavarura.

“Juridikisht do i besojmë, por shpirtërisht kurrë jo, sepse jam e bindur që djalin ma kanë vrarë”, ka thënë Xhemile Dehari, raporton Periskopi

“Për neve është e qartë se është vrasje,  por meqë Kuvendi i Kosovës mundëson dhe ka marrë vendim për angazhim të ekspertëve ndërkombëtare, atëherë le ta shohin çka po del”, tha Avni Dehari.

E në anën tjetër, përfaqësuesi juridik i kësaj familje, Tomë Gashi ka bërë të ditur se çështjet teknike do të rregullohen javën e ardhshme.

Gashi tha se nuk dihet sa do të zgjasin hetimet, por që sipas tij, të gjithë kanë besim në këtë Institut.

Ndryshe, Kuvendi i Kosovës  me një rezolutë obligon Ministrinë e Drejtësisë që të mbulojë shpenzimet për hetime dhe ekspertizë në lidhje me vdekjen e Astrit Deharit./ Periskopi

 

 

Familja e Dafina Zhubit nuk beson se ajo vrau veten

Në një vjetorin e vdekjes së vajzës së saj Dafinës, Ganimete Zhubi, erdhi te varri i saj për ta përkujtuar, e më shumë për të shprehur mllefin se si drejtësia nuk po realizohet.

Periskopi.com Lajme

E indinjuar, nëna e Dafinës thotë se ajo u gjet e vdekur në banesën e ish-të dashurit të saj Astrit Dibra.

Hedh dyshime se kryeprokurori në Prishtinë Imer Beka bashkë me prokuroren Fitore Sadikaj morën para nga i dyshuari për vrasje, ish-i dashuri i Dafinës dhe e liruan vetëm pas gjashtë muajsh.

Si ka mundësi që të arrihet përfundimi se vajza e saj është vetëvrarë, kur ajo ishte me të dashurin e saj dhe vrasja u krye nga pistoleta e tij.

Kohavisioni ka provuar të kontaktojë me kryeprokurorin e Prishtinës Imer Beka, por ai nuk u është përgjigjur thirrjeve telefonike.

Ndërsa prokurorja Fitore Sadikaj po nëpërmjet telefonit, i ka thënë KTV-së se tash e 5 muaj është në pushim të lindjes dhe nuk mund të flasë për këtë lëndë, ngase ajo i ka kaluar dikujt tjetër.

Hetimet kundër imam Shefqet Krasniqi në fazën përfundimtare (Video)

Ishte në mesin shumë imamëve në Kosovë që në shtator të vitit 2014 u arrestuan e u morën në pyetje nga Policia e Kosovës.

Periskopi.com Lajme

Përderisa po në shtator të vitit të kaluar, Prokuroria Speciale ngriti aktakuzë ndaj disa prej tyre, për ish-imamin e Xhamisë së Madhe në Prishtinë, Shefqet Krasniqin, hetimet u zgjatën edhe për 6 muaj.

2 vjet e gjysmë hetime të Prokurorisë, avokati i Shefqet Krasniqit, Bajram Tmava, nuk pret që të përfundojnë me aktakuzë ndaj klientit të tij.

Prokuroria Speciale më 15 shtator 2016, një ditë para skadimit të afatit zyrtar për hetime, ngriti aktakuzë ndaj Fuad Ramiqit, Bedri Robajt, Idris Bilibanit, Enes Gogës dhe Mazllam Mazllamit.

Hetimet ndaj Krasniqit, që dyshohet për nxitje të urrejtjes, përçarjes apo mosdurimit kombëtar, racor, fetar apo etnik, me kërkesë të prokurorit Elez Blakaj, përkitazi me nenin 156 të kodit të procedurës penale, u vazhduan edhe për 6 muaj.

 

Nëntë policë nën hetime për protestën e opozitës

Nëntë pjesëtarë të Policisë së Kosovës kanë përfunduar në hetime për shkak të dyshimeve se kanë tejkaluar përgjegjësitë e tyre gjatë ndërhyrjes në një protestë të opozitës, dy vjet më parë.

Periskopi.com Lajme

Sipas zëdhënësit të Inspektoratit Policor, Arbër Beka, pas përfundimit të hetimeve në lidhje me veprimet e zyrtarëve policorë gjatë kësaj proteste, nëntë raste janë trajtuar me elemente të veprës penale për keqtrajtim gjatë ushtrimit të detyrës zyrtare.

Protesta e 27 janarit solli për herë të parë përdorimin e pothuaj gjithë arsenalit që kishte në dispozicion Policia e Kosovës duke përdorur topat e ujit, autoblindat, kamionët e blinduar, gazin lotsjellës e plumbat e gomës.

Protesta u mbajt si reagim ndaj një deklarate së ish-Ministrit Aleksandër Jabllanoviq, ndërsa kërkohej nga kryeministri Isa Mustafa ta shkarkojë atë.

Sipas një raportit të Inspektoratit Policor të Kosovës, atë ditë nga përleshja u lënduan 107 policë, 53 protestues dhe 10 qytetarë.

Në këtë ditë, një polic kishte goditur deputetin e Lëvizjes vetëvendosje, Albin Kurti.

KALLXO.com e kishte xhiruar momentin kur Kurti u godit nga ana e policit të njësisë speciale.

Nuk ishin vetëm protestuesit ata që u lënduan e lënduan.

I pyetur nga KALLXO.com, se a ka pasur zyrtarë policorë të hetuar nga IPK-ja gjatë protestës së 27 janarit, zëdhënës i IPK-së, Arbër Beka tha se nga gjithsej 40 raste të dërguara në Departamentin për Krime të Rënda, 9 nga to kanë rezultuar me elemente të veprës penale apo keqpërdorim të detyrës zyrtare.

“IPK ka përfunduar hetimet, në konsultim dhe me udhëzim të prokurorit të rastit, ka dorëzuar në Prokurorinë Themelore konkretisht në Departamentin për Krime të Rënda në Prishtinë raportin përmbledhës për të gjeturat dhe veprimet e ndërmarra nga IPK. Nga gjithsej 40 raste, 4 raste IPK i ka dërguar në DSP për trajtim disiplinor, kurse në raportin përmbledhës për prokurorinë janë të përfshira 36 raste, ku 9 prej tyre mund të trajtohen si raste me elemente të veprës penale për keqtrajtim gjatë ushtrimit të detyrës zyrtare ose autorizimeve publike dhe lëndim trupor, ndërsa për 27 raste nuk është mundur vërtetohen apo të gjinden elemente të veprës penale”, tha Beka për KALLXO.com.

Sipas tij, IPK-ja ka zhvilluar një inspektim të jashtëzakonshëm në Policinë e Kosovës lidhur me vlerësimin e performancës policore në menaxhimin e protestës së 27 janarit të vitit 2015.

Shërbimet Sekrete në ShBA nisin hetimin ndaj Madonnës, shkak deklarata e fortë kundër Trump (Video)

Nuk është hera e parë që ajo mban fjalim kundër Donald Trump. Madonna ka shprehur mos pëlqimin e saj për Presidentin e ri të SHBA, që në kohën e fushatës elektorale, megjithatë këtë herë duket se 58 vjeçarja e ka tepruar me fjalori ofendues.

Periskopi.com Lajme

Mes shumë emrash të njohur dhe mijëra grash që ishin mbledhur për të protestuar në Uashington, ishte edhe Madonna.

Pas fjalimit të Ashley Judd dhe Scarlett Johansson të mbajtur në mesin e 500 mijë njerëzve, Maddona pohoi se nuk ishte e kënaqur me Presidentin e 45-të të SHBA-ve, Trump.

Mbretëresha e muzikës pop madje përdori dhe disa fjalë të tjera kundër Trump duke mos përjashtuar dhe sharjet.

‘’Mirë se vini në revolucionin e dashurisë, të rebelimit, refuzimit tonë si gra në këtë moshë të re të tiranisë. Ku jo vetëm gratë janë në rrezik por të gjithë njerëzit të marxhinizuar ku të qenit në mënyrë unike ndryshe tani me të vërtetë mund të konsiderohet një krim’’ është shprehur Madonna.

Madonna madje pati dhe një mesazh për Trump të cilin e tha haptazi para gjithë marshuesve të pranishëm duke thënë “Trump suck a d***!”

Mirëpo Madonna me fjalimin i ka hapur punë vetës, pasi për të ka nisur një hetim nga ana e Shërbimeve Sekrete.

Mendohet se shkak për këtë është bërë një deklaratë e Madonnës në të cilën thoshte se ka menduar të hedh në erë Shtëpinë e Bardhë.

Megjithatë ju mund të dëgjoni më poshtë fjalim e plotë të këngëtares, i cili duhet thënë se është shpërndarë me shpejtësi në rrjete./ opinion.al

Kurti: Këta persona duhet hetuar për vdekjen e Astrit Deharit

Ish-kreu i lëvizjes Vetëvendosje, deputeti Albin Kurti tregon se kush duhet hetuar për vdekjen e Astrit Deharit.

Periskopi.com Lajme

Ai në një intervistë në Gazetën Tema ka thënë se nuk do të ndalen në kërkim të drejtësisë dhe se nevojitet një hetim i pavaruru dhe i paanshëm.

“Vdekja e Astrit Deharit është humbje e madhe për Kosovën dhe popullin shqiptar. Aktivist i palodhshëm, patriot i pa epur e student i shkëlqyeshëm. Ende nuk e kemi marrë veten, nuk e dimë nëse jemi më shumë të tronditur, të pikëlluar apo të zemëruar. Na e kanë goditur shembullin e brezit të ri të Lëvizjes sonë. Kosova është bërë shtet i kapur ku të rinjtë opozitarë që arrestohen padrejtësisht edhe mund të mos dalin të gjallë prej andej. Duket se ky ishte mesazhi i pushtetit. Por ne nuk ndalemi në kërkimin e drejtësisë për Astritin. Nevojitet një hetim i pavarur e i paanshëm”, ka thënë ai.

Kurti ka përmendur edhe emrat e atyre që duhet hetuar për vdekjen e Astrit Deharit.

“Familja e Astrit Deharit, shoqëria civile dhe Lëvizja jonë kanë kërkuar dorëheqjen e ministres së drejtësisë, Dhurata Hoxha, dhe të ministrit të brendshëm, Skënder Hyseni. Dhe, pastaj, edhe të hierarkisë sipas përgjegjësisë: drejtorit të Policisë, Shpend Maxhuni, drejtorit të Njësisë Kundër Terrorizëm, Fatos Makolli, drejtorit të përgjithshëm i RTK-së, Mentor Shala, redaktorit në RTK, Ridvan Berisha, zëvendësdrejtorit të Njësitit Kundër Terrorizmit, Luan Keka, prokurorit të Prokurorisë Speciale, Abdyrrahim Islami, gjyqtarit të procedurës paraprake Vehbi Kashtanjeva, Kryeprokurorit të Prokurorisë Themelore të Prizrenit, Sylë Hoxha, prokurorit, Metush Biraj, Komandantit të Policisë Rajonale në Prizren, Nexhmi Krasniqi. Të gjithë fajtorët do t’i zbardhte vetëm një hetim i pavarur në të ardhmen”, ka thënë ai. /Periskopi

Kosova lëshon urdhërarreste për 57 serbë të dyshuar për krime lufte

Hetimet kundër këtyre të dyshuarve janë duke i kryer prokurorët vendës të Prokurorisë Speciale të Republikës së Kosovës.

Periskopi.com Lajme

 

Kosova lëshon urdhërarreste për 57 serbë të dyshuar për krime lufte

Autoritetet kosovare të drejtësisë kanë shpallur në kërkim 57 të dyshuar serbë për krime lufte në Kosovë.

Ata, dyshohen se gjatë viteve 1998-1999 kanë kryer krime lufte kundër popullatës civile.

Kërkesat për arrestim ndërkombëtar të tyre janë lëshuar me vendim të gjyqtarëve të procedurës paraprake të EULEX-it dhe gjyqtarëve vendës.

Hetimet kundër këtyre të dyshuarve janë duke i kryer prokurorët vendës të Prokurorisë Speciale të Republikës së Kosovës.

Këto të dhëna i ka ofruar për Insajderin, Prokuroria e Shtetit e Kosovës.

Këto raste të hetimeve janë duke u ndërmarrë pas bartjes së lëndëve dhe kompetencave nga prokurorët ndërkombëtarë tek ata vendës.

Prokuroria ka thënë se EULEX-i ka transferuar 50 raste të krimeve të luftës.

Këta prokurorë deri tash kanë ngritur vetëm dy aktakuza, kundër pjesëtarëve të UÇK-së. Njëri prej tyre është Fatmir Limaj.

“Gjithsej 50 raste janë të transferuara nga EULEX-i tek prokurorët vendorë. Prej tyre, të arkivuara janë dy raste me dy persona, të pezulluara janë njëzetë 20 raste me 112 persona”, ka thënë Ekrem Lutfiu, zëdhënës në Prokurori.

Ai ka bërë të ditur se dymbëdhjetë raste me dyzetepesë persona janë në fazën preliminare të hetimeve. Ndërkaq, hetimet janë pushuar në 13 raste me nëntëmbëdhjetë persona të dyshuar.

Prokuroria Speciale ka nxjerr vendim për fillim të hetimeve në pesë raste, kundër njëzetepesë  personave.

Prokuroria ka thënë se po kërkon që të ndalohen 57 të dyshuar për krime lufte.

“Kundër pesëdhjeteshtatë të pandehurve janë lëshuar letër rreshtimet”, ka thënë Lutfiu.

Letër rreshtimet ndërkombëtare obligojnë secilin shtet që nëse takojnë këta të dyshuar, t’i ndalojnë dhe t’i njoftojnë autoritetet kosovare, të cilat pastaj fillojnë procedurat e ekstradimit në Kosovë. /Insajderi.com

Prokurori i rastit flet për aktakuzën ndaj aktivistëve të VV-së

Prokurori special, i angazhuar në rastin e sulmit me mjet shpërthyes ndaj ndërtesës së Kuvendit të Kosovës në gusht të këtij viti, thotë se u ka besuar provave që i ka para vetes kur ka ngritur aktakuzë ndaj katër aktivistëve të VV-së.

Periskopi.com Lajme

Më herët, Prokuroria Speciale konfirmoi se ndaj Atdhe Gashit, Frashër Krasniqit, Egzon Halitit dhe Adea Batushës është ngritur aktakuzë për terrorizëm për sulmin që ndodhi natën e 4 gushtit.

“Besoj se ka prova të mjaftueshme për të argumentuar këtë aktakuzë. Kemi përdorur provat të cilat i kemi pasur në kallëzimin penal dhe disa prova të tjera rrethanore përfshirë deklaratat e dëshmitarëve”, tha prokurori i rastit Abdurrahim Islami për KALLXO.com.

Ai tha se aktakuza ka të bëjë vetëm me rastin e sulmit ndaj Kuvendit, dhe jo me rastet tjera të gjuajtës së mjeteve shpërthyese, të cilat ishin të shpeshta atyre ditëve.

“E tërë aktakuza ka të bëjë me sulmin në kuvend ndërsa rastet e tjera të sulmeve gjatë asaj kohe mbeten të hetohen”, shtoi prokurori Islami.

Përderisa katër aktivistë të VV-së tashmë e kanë gjetur veten në listën e të akuzuarve për terrorizëm, ndaj njërit prej tyre, Petrit Ademit, hetimet kanë pushuar.

“Për Petrit Ademin kam vendosur me i pushu hetimet për shkak se nuk ka prova të cilat e inkriminojnë atë në kryerjen e veprës penale”, tha Abdurrahim Islami.

Hetimet kanë pushuar edhe ndaj Astrit Deharit, i cili muajin e kaluar u gjet i vdekur në qelinë e tij në qendrën e paraburgimit në Prizren, në pritje të intervistimit nga ana e prokurorisë.

Zgjerim hetimesh në rastin Dehari (Video)

Ndërhyrje në drejtësi është vlerësuar nga shoqëria civile vendimi i ministres Dhurata Hoxha, e cila i kërkoi kryeprokurorit Aleksandër Lumezi zgjerim hetimesh në rastin e vdekjes së Astrit Deharit, raporton KTV.

Periskopi.com Lajme

Pos zgjerimit të pistës së hetimit nga ajo e vetëvrasjes në vrasje, ministrja ka kërkuar hetim edhe për dy mjekët që u caktuan nga familja Dehari dhe për avokatin e familjes.

Avokati Tomë Gashi ka thënë se nuk ka arritur të kuptojë dhe nuk e di se saktë çfarë ka kërkuar ministria, duke shtuar se ai nuk ka bërë asnjë tejkalim të autorizimit ligjor.

KohaVisioni ka provuar të kontaktojë edhe me dy ekspertët e pavarur, por ata nuk janë përgjigjur.

Vetë Ministria e Drejtësisë dhe institucionet tjera kishin lejuar pjesëmarrjen e dy ekspertëve të caktuar nga familja Dehari dhe të avokatit të familjes, Tomë Gashi, në obduksion të të ndjerit Astrit Dehari.

Kjo ishte bërë publikisht dhe pa ndonjë shkresë që kufizonte ata që të mos nxjerrin raport pos atij të Institutit të Mjekësisë Ligjore të Kosovës.

Ambasadori britanik: Në Kosovë ka mjaft ekspertë që do zbulonin vdekjen e Deharit

Ambasadori britanik në Kosovë, Ruairi O'Connell vlerëson se vdekja e Astrit Deharit është e tmerrshme, por sipas tij, në Kosovë ka mjaft ekspertë që do të mund të hetonin dhe zbardhnin rastin e tij.

Periskopi.com Lajme

Në një intervistë në RTV 21 ai tha se është pikëlluar shumë kur ka dëgjuar për këtë çështje, por sipas tij, ky rast nuk është i pari dhe ndodh në shumë shtete.

AI këshill të gjithë të jenë më gjakftohtë dhe t’ia lënë në dorë drejtësisë e të mos përfshihen të gjithë në këtë çështje.

“Duhet të jemi më gjakftohtë për të mësuar se çfarë ka ndodhur dhe për të hetuar rastet sidomos ato të ndjeshme. E kuptoj kërkesën e Ministrisë së Drejtësisë për hetime nga britanikët, ka qenë gatishmëri për paanshmëri, por ne nuk mund të marrin rol në këtë rast sepse nuk ka të bëjë asgjë me Britaninë, dhe nuk është e përshtatshme që gjithmonë të vijmë nga jashtë për hetime”, tha O’Connell.

Ai ka shpjeguar se nëse kjo do të ndodhte në Britani, hetimet do të zgjasnin shumë, me muaj të tërë.

“Në Britani një hetim pas vdekjes në burg do të zgjaste me muaj, nuk është diçka që bëhet për një ditë. Ne kërkojmë profesionalizëm. Ka profesionist në sistemin e drejtësisë në Kosovë që mund ta bëjnë këtë që sipas fakteve mund të konkludojnë se çfarë ka ndodhur në këtë rast”, tha ai.

Ambasadori, duke folur në gjuhën shqipe ka thënë se nuk është e nevojshme që patjetër të hetoj dikush nga jashtë.

Ai tha se korrupsioni ekziston gjithandej nëpër botë, por e rëndësishme është si reagon shteti.

O’Connell thotë se është e rëndësishme që njerëzit të marrin përgjegjësi për veprimet e tyre./ Periskopi

Rasti Dehari nuk çon në dorëheqjen e asnjë ministri

Vdekja e aktivistit të Lëvizjes Vetëvendosje në burgun e Prizrenit nuk pritet të sjell si pasojë ndonjë dorëheqje nga postet ministrore në Qeverinë e Kosovës.

Periskopi.com Lajme

Kohë më parë, familja e Astrit Deharit, përmes një deklarate për media, kishte kërkuar që ministrja e Drejtësisë, Dhurata Hoxha dhe Ministri i Punëve të Brendshme, Skënder Hyseni të japin dorëheqje për shkak të mungesës së sigurisë në burgje.

Sipas familjes, e cila e ka edhe mbështetjen e subjektit opozitar Lëvizja Vetëvendosje, hetimet aktuale duhet të ndërpriten derisa të mos ketë dorëheqje të nivelit politik.

“Pa dorëheqje të këtyre dy ministrave dhe pa ndërprerjen e hetimeve aktuale, ne si familje Dehari nuk pajtohemi për hetime ndërkombëtare”, është thënë në një deklaratë të familjes Dehari.

Në anën tjetër, zyrtarët në të dy ministritë e apostrofuara nuk kanë dashur të flasin lidhur me kërkesat për dorëheqjen e ministrave.

Ministria e Drejtësisë, me anë të një komunikate për media, të lëshuar të mërkurën, ka thënë se “aktualisht rasti është ende në duar të Prokurorisë dhe se Ministria e Drejtësisë nuk mund të bëjë më shumë lidhur me këtë proces”.

Ministria e Drejtësisë, vijon komunikata, mbetet e përkushtuar që të bashkëpunojë me të gjitha institucionet dhe tu ofrojë përkrahje të mëtutjeshme nëse ka nevojë”.

Sipas të gjeturave të raportit të Inspektoratit pas vdekjes së Deharit, Ministria ka iniciuar procedurat disiplinore dhe janë suspenduar nga puna një zyrtarë korrektues, dy mbikëqyrës dhe Drejtori i Qendrës së Paraburgimit në Prizren.

 

Betim Musliu, nga Instituti i Kosovës për Drejtësi, thotë për Radion Evropa e Lirë se suspendimet janë të mirëseardhura, ndonëse shumë të vonuara.

Musliu konsideron se puna e bërë deri më tash nga institucionet e Kosovës ka qenë një punë jo profesionale, e cila tani po interpretohet nga grupet e ndryshme, duke nisur nga ato për interesa politike.

“Zinxhiri i shërbimit korrektues, në aspektin e sigurisë, do të duhej të suspendohej deri ne nivel qendror. Kjo për t’i dhënë hapësirë dhe mundësi një hetimi të pavarur, të paanshëm dhe e profesional.”

“Papërgjegjësia institucionale në fillim të këtij rasti, për të mos e trajtuar siç duhet, e ka krijuar këtë konfuzion ku besueshmëria në punën e institucioneve vendore po kontestohet në çdo segment”, tha Musliu.

Edhe analisti politik, Imer Mushkolaj, konsideron se institucionet e Kosovës në rastin Dehari kanë dështuar që në fillim.

Ai mendon se për arsye morale drejtuesit e shërbimit korrektues, por edhe ministrat përkatës, është dashur të japin dorëheqje.

“Kjo tregon se sa i përgjegjshëm është shteti, sa të përgjegjshëm mund të them se janë këta udhëheqës të shtetit karshi një ngjarje tragjike, çfarë ishte vdekja e Deharit në Prizren.”

“Natyrisht, në ketë rast shteti është palë në këtë çështje dhe nuk duhet të veprojë nga një prizëm i pavarur. Në radhë të parë duhet të japim përgjegjësi zyrtare për të krijuar kushtet themelore për fillimin e hetimeve të pavarura”, tha Mushkolaj.

Ministria e Drejtësisë i ka dërguar një shkresë Ambasadës Britanike në Kosovë, përmes së cilës ka kërkuar përfshirjen e Policisë Metropolitane “Scotland Yard”, në hetimin e vdekjes së Astrid Deharit, i cili ka ndërruar jetë më 5 Nëntor 2016, në Qendrën e Paraburgimit në Prizren.

Por, sipas ministrisë, Policia Britanike ka njoftuar se nuk mund të ndërmarrë hetime në këtë rast, meqenëse rasti nuk lidhet me Britaninë.

Përfaqësuesit e shoqërisë civile kanë shprehur habinë se si për vjedhjen e një celulari të Kryeprokurorit të Shtetit brenda pak orësh janë suspenduar dy polic, kurse për vdekjen e Deharit suspendimet ndodhin gati një muaj pas.

Musliu thotë se vjedhja në shtëpinë e kryeprokurorit të shteti tregon më së miri sa në Kosovë mungon siguria.

“Veprimet e institucioneve, në këtë rast, për suspendimin e këtyre dy policëve në këtë kohë të shpejtë, flasin në fakt për një veprim selektiv të institucioneve, kur bëhet fjalë për të adresuar përgjegjësinë atyre që mund të jenë dështakë në ofrimin e sigurisë dhe kryerjen e obligimeve ligjore”, tha Musliu.

Autoritete kanë thënë se nga hetimet e bëra Astrit Dehari është vetëvrarë, kurse Lëvizja Vetëvendosje vlerëson se raporti dhe përfundimi për shkaktarin e vdekjes së veprimtarit janë të pabesueshme.

Lëvizja Vetëvendosje fajëson institucionet e shtetit për vdekjen e Astrit Deharit, i cili qe arrestuar së bashku me pesë anëtarë tjerë të Lëvizjes Vetëvendosje, me dyshimin që për një sulm mbi ndërtesën e parlamentit të Kosovës. (REL)

Ministrja Hoxha kërkoi të hetohet rasti Dehari nga policia britanike (Dokument)

Ministrja e Drejtësisë, Dhurata Hoxha disa dite pas vdekjes se Astrit Deharit i ka shkruar letër ambasadorit britanik në Kosovë, Ruairi O'Connell nga i cili ka kërkuar përfshirjen në hetimet shtesë për të mos lënë asnjë hapësirë për dyshime potenciale.

Periskopi.com Lajme

Në letrën që “Zëri” e ka siguruar nga burimet e saj, ministrja Hoxha, ftojnë policinë metropolitane (Scotland Yard) që në mënyrë të ndarë të kryej një hetim në lidhje me këtë rast.

Më poshtë mund të lexoni letrën e plotë:

E kuptoj se qeveria juaj dhe e jona ndajmë shqetësimin e njëjtë se është tejet e rëndësishme që hetimet rreth vdekjes së z.Astrit Dehari në paraburgim të kryhen dhe kompletohen në mënyrë profesionale dhe të paanshme.

Në këtë kontekst, po ashtu i referohem vizitës së fundit të Sekretarit të Shtetit, Johnson në Kosovë dhe fjalimin e tij në Kuvendin e Kosovës, ku ai ka adresuar këtë shqetësim. Siç e dini, autoritetet e Kosovës janë në proces të kryerjes së një hetimi të hollësishëm në këtë rast dhe unë konfirmoj se të gjitha autoritetet e Kosovës, që janë të përfshira në këtë proces, janë të zotuara që të kryejnë një hetim profesional, të paanshëm dhe të gjerë. Mirëpo, siç e dini, në pjesë të caktuara të opinionit publik, janë shfaqur dyshime në lidhje me integritetin dhe paanshmërinë e procesit të hetimit. Kjo mund të shkaktoj një dëm të madh në promovimin e rendit dhe ligjit dhe respektimin për institucionet e Kosovës.

Me qëllim të adresimit të këtyre shqetësimeve dhe për të siguruar besimin dhe kredibilitetin e publikut për këtë hetim, Ministria e Drejtësisë, së bashku me Kryeprokurorin e shtetit, ftojnë dhe mirëpresin policinë metropolitane (Scotland Yard) që në mënyrë të ndarë të kryej një hetim në lidhje me këtë çështje. Edhe pse të gjeturat e hetimit të tanishëm pritet të bëhen të ditura gjatë ditëve në vijim, çfarëdo hetimi që do të kryhej nga Skotland Jard, nuk duhet të pengohet apo kufizohet nga këto të gjetura.

Edhe përkundër mundësisë së kufizuar të fondeve, ne jemi në gjendje të bëjmë aranzhime për t’i mundësuar policisë metropolitane që ta kryej këtë hetim. Po ashtu, autoritetet e Kosovës janë të gatshme që të sigurojnë çfarëdo ndihme që ka nevojë policia metropolitane për të realizuar dhe kompletuar këtë hetim. Nuk kam dyshim se autoritetet e Kosovës po kryejnë hetimin në mënyrë shumë profesionale dhe të pavarur. Sidoqoftë, përfshirja e policisë metropolitane do të siguronte një besim publik në këtë proces dhe ne jemi të gatshëm të pranojmë të gjeturat e këtij hetimi, duke pasur besim në profesionalizmin dhe paanshmërinë e policisë metropolitane. Mbështetja dhe bashkëpunimi juaj në këtë çështje është i mirëpritur dhe i vlerësuar.

Avokati i familjes Dehari nuk ka informacione nëse është lejuar hetim ndërkombëtar

Avokati i familjes Dehari, Tomë Gashi thotë se ne cilësinë e avokatit të familjes Dehari, nuk është njoftuar nga askush se është lejuar hetim ndërkombëtarë për rastin e vdekjes së aktivistit të Vetëvendosjes, Astrit Dehari.

Periskopi.com Lajme

Ai thotë se deshën apo nuk deshën Qeveria, pranua ose jo, lejuan apo nuk lejuan, sipas tij, do të ketë hetime ndërkombëtare dhe të pavarura.

“Ekspertet e mjekesis ligjore,ne raportin e tyre nuk kane konstatuar askund, se asfiksia apo mbyllja dhe bllokimini i frymemarrjes me mjet te forte eshte vetlendim,dhe nuk kan then me asnji shkronje, asnji fjale , dhe asnji fjali se kemi te bejme me vetvrasje, askush pos kryeprokurorit Syle Hoxha kete nuk e ka thene, aj qellimisht , rastesisht, i porositur , apo nga mosdija, e tha fjalen e fundit te paren, sipas tij rasti eshte mbyllur me kaq”, thotë Gashi.

Ndryshe, orë më parë, analisti Halil Matoshi ka shkruar se shteti (Qeveria) ka lejuar hetim të pavarur për vdekjen e Astrit Deharit, dhe se këtë e ka kërkuar nga një shtet i fuqishëm i BE-së./ Periskopi