2018, viti i dhjetëvjetorit të parë të shtetësisë së Republikës së Kosovës

Hashim Thaçi Opinione

Jemi në prag të festës së fundvitit dhe të gjithë mirëpresim momentin që të mblidhemi në familjet tona, me miqtë më të mirë për të ngritur nga një dolli. Unë dua që ju t’i mbushni gotat tuaja, duke uruar për më shumë mbarësi në vitin që po vjen. Në këtë kohë të ndërrimit të moteve, kur për disa momente pushojmë pak, të rrethuar nga më të dashurit tanë dhe të larguar nga përditshmëria, të gjithë e gjejmë veten në një kohë të reflektimit. Prandaj, edhe unë dua të ndaj me ju disa momente reflektimi për vitin që po lëmë pas dhe vitin e ri 2018.

Dy ngjarje nga viti 2017, njëra në fillim dhe tjetra në fund, janë pasqyrë e gamës së gjerë të ngjarjeve që e kanë karakterizuar këtë vit që po lëmë pas. Në janar u përballëm me një provokim irritues dhe irracional me nisjen e trenit me parulla nacionaliste nga Beogradi në drejtim të Kosovës, i cili nuk e arriti cakun, por gjithsesi shërbeu si një rikujtim i brishtësisë së paqes dhe stabilitetit. Ndërsa, krejt në fund të vitit, në pjesën e dytë të dhjetorit 2017, erdhi lajmi i mrekullueshëm i nënshkrimit të marrëveshjes për një nga investimet e huaja direkte më të mëdha në Kosovë dhe rajon. Kompania amerikane “Countour Global” do të investojë me një shumë prej 1.3 miliard euro në projektin e termocentralit “Kosova e Re”, dhe do të hapë 10.000 vende të reja të punës.

Ndërmjet këtyre dy ngjarjeve kemi pasur një vit të plotë me peripeci nga më të ndryshmet.

Asnjë përshkrim i periudhës të së kaluarës sonë të afërme nuk do të ishte as përafërsisht i saktë nëse nuk thuhet qartë se kemi përjetuar disa momente jo të lehta në rrafshin politik. Përveç zgjedhjeve lokale të parapara, ne u përballëm edhe me zgjedhje të përgjithshme të parakohshme. Unë jam i lumtur për faktin që sivjet kemi pasur dy palë zgjedhje, të cilat kanë qenë të organizuara mirë, të lira dhe demokratike. Por, kjo nuk e mohon faktin se përsëri kemi pasur vazhdim të përçarjeve të brendshme, përshkallëzim të retorikës, e cila më së paku i shërben qytetarit dhe interesit shtetëror. Disa mund të thoshin se këto janë “dhimbjet e rritës”, të rritjes sonë si shtet dhe si një shoqëri demokratike. Por, kjo rritje duhet të përcillet me pjekuri. Kosova nuk e ka luksin të shpenzojë energji e kohë në debate të pafundme rreth emrave të përveçëm, personaliteteve, partive, rrymave, grupeve të ndryshme të interesit, etj. Kosova nuk ka mungesë të problemeve e temave jetike që të humbim edhe një vit për betejat e vogla të brendshme. Ky vit do të mbahet mend më shumë për atë se jemi marrë shumë me vetveten, por jo në mënyrë konstruktive. Nuk e përjashtoj se kjo mund të jetë e influencuar edhe nga faktorë të jashtëm, por, rezultati dhe përgjegjësia na mbesin ne.

Para vetes kemi një vit të rëndësishëm. Është viti kur do të shënojmë dhjetëvjetorin e pavarësisë së Republikës së Kosovës. Një dekadë shtetësi duhet të paraqes një mundësi të jashtëzakonshme. Ne duhet të jemi të fokusuar në interesin tonë shtetëror të përbashkët dhe t’i qëndrojmë besnik qëllimit tonë të konsolidimit të shtetit dhe të përfundimit të detyrës sonë të përbashkët të forcimit të funksionit të shtetit, përmirësimit të kushteve të jetesës së qytetarit, përmirësimit të pozitës së vendit tonë të rajon dhe botë. E them nga vetë përvoja ime jetësore, bazuar edhe në karrierën politike të mbushur me ballafaqime e vështirësi të shumta, se vetëm vizioni, puna ekipore, vetëbesimi, përgatitja, morali, përkushtimi dhe qëndrimi besnik ndaj qëllimit përfundimtar na  nxjerr në pozitë të volitshme.

Nuk do të ketë festim më të denjë të dekadës së parë të shtetësisë se dhënia fund e paqartësive të brendshme, përmbushja e obligimeve ndërkombëtare dhe rrjedhimisht përfundimi i izolimit, duke përfituar nga liberalizimi i vizave. Duhet ta përfundojmë punën e mbetur për përfundimin e procesit të reformës zgjedhore, avancimin në punën e Komisionit për të Vërtetën dhe Pajtimin, themelimin e Forcave të Armatosura të Kosovës dhe përfundimin e fazës së fundit të dialogut për normalizimin e marrëdhënieve ndërmjet Kosovës dhe Serbisë, përmes njohjes së ndërsjellë dhe përfundimit të pengesave bilaterale në procesin e anëtarësimit në BE dhe NATO.

Të gjitha këto veprime do të rezultojnë në një përshpejtim të zhvillimit të mëtutjeshëm politik e ekonomik dhe do të ndikojnë në përmirësimin e standardit të jetesës së qytetarëve tanë. Si rrjedhojë, do të hapen rrugët për përmbushjen e standardeve evropiane në të gjitha fushat relevante, sepse qëllimi ynë strategjik është anëtarësimi në BE dhe NATO. Standardet e BE-së, por edhe kërkesat e procesit të anëtarësimit në NATO, kanë qenë pjesë organike e çdo hapi në shtetndërtimin e vendit tonë.

Fokusi duhet të jetë tek detyrat tona të përbashkëta të ndërlidhura me zhvillimin politik, konsolidimin e mëtutjeshëm të institucioneve, vazhdimin e reformës së administratës publike, reformat e mëtutjeshme në gjyqësor dhe tek përforcimi i sundimit të ligjit. Po ashtu, duhet çuar më tej reformat në qeverisjen ekonomike dhe reformat tjera strukturore në përputhje me kriteret ekonomike të BE-së, përkatësisht për të siguruar një ekonomi të tregut të lirë që është në gjendje të përballojë presionet konkurruese të tregut të vetëm të BE-së. Ne duhet edhe më tej të punojmë drejt krijimit të kushteve ekonomike për të rritur produktet dhe eksportet tona, për të tërhequr investime të huaja dhe për të integruar bizneset e Kosovës në tregjet ndërkombëtare. Në këtë drejtim kemi pasur edhe suksese, dhe këtë e dëshmon edhe raporti i Bankës Botërore i të Bërit Biznes, që doli së fundmi në të cilin Kosova shënoi nj ë përmirësim të ndjeshëm në renditje, nga vendi i 60-të në atë të 40-të. Por, të mos harrojmë, ende kemi dobësi që duhen eliminuar. Ende kemi probleme me ekonominë joformale dhe mbledhjen e të ardhurave, që ndikojnë në financat tona publike. Niveli i inovacionit dhe cilësia arsimore duhet të përmirësohen. Nuk duhet harruar që Kosova ende vazhdon të ketë një shkallë të lartë të papunësisë, që mund të zbutet dukshëm nëse me seriozitet i qasemi së bashku reformave të nevojshme.

Shpesh ndjehemi të zhgënjyer që procesi i integrimit evropian nuk është më i shpejtë. Vonesat po krijojnë hapësirë për aktorët tjerë të cilët përpiqen të cenojnë vlerat tona civilizuese perëndimore. Në këtë situatë, ne nuk kemi ndonjë dilemë apo alternativë. Ka përfunduar koha e hamendjeve. Gjithçka është e qartë se si do të arrihet ky qëllim. Porositë për këtë temë nga Brukseli dhe kryeqytetet e të gjithë aleatëve të shtetit tonë janë të qarta dhe ne duhet t’i ndërmarrim hapat tanë.

Prandaj, uroj që të gjithë së bashku të gjejmë energjinë që të përballemi me të gjitha këto tema të rëndësishme. Nga dita e fundit e vitit që lëmë pas, në ditën e parë të vitit të ri, jemi të njëjtit njerëz, me po të njëjtin fat, me të njëjtat mundësi e sfida para vetes. Por, e mira është që ne vetë jemi ata që e kemi mundësinë t’i ndryshojmë gjërat për të mirë. Prandaj, uroj që secili qytetar, ne bashkë si shoqëri, të punojmë sa më shumë që në vitin që vjen, t’i influencojmë gjërat pozitivisht në vetvete në rrethin tonë dhe për shtetin tonë.

Editorial i Periskopit | Gjykata Speciale dhe gjuha ‘e zgjidhur’ e Thaçit

Editori Editoriale

Në muajin e fundit i pamë dy protesta të ngjashme nga miqtë ndërkombëtarë drejtuar liderëve tanë. Fillimisht, ambasadori britanik O’Connell e lëshoi sallën kur dëgjoi fjalë të papëlqyeshme nga presidenti Thaçi. Edhe Federica Mogherini, megjithëse e priste për herë të parë Haradinajn në Bruksel, nuk hezitoi po njëlloj që ta lëshonte takimin – sapo i kishte dëgjuar do fjalë të çuditshme nga kryeministri ynë.

Këto dy akte proteste e zbulojnë hapur kufizimin e gjuhës që e kanë imponuar ndërkombëtarët ndaj politikanëve tanë në pushtet. E kanë varfëruar së tepërmi fjalorin e tyre duke i bërë shumë të bajatshëm, të parashikueshëm e të nënshtrueshëm. Kjo politikë reduktuese e mbikëqyrëse, kjo ndalesë strikte, e ka pamundësuar kultivimin e një gjuhe më të përdredhur në politikë, e kësisoj e mënyrave të reja të të kuptuarit. Me të drejtë vërente Wittgenstein-i se “kufijtë e gjuhës sonë, janë kufijtë e botës sonë”. Prandaj, në politikën e sotme kosovare kemi zhvillime krejtësisht të parëndësishme që regjizojnë skena bajate e të dhimbshme për qytetarët.

Kjo politikë tepër-kufizuese gjuhësore ka bërë që shumë prej liderëve të partive politike të operojnë kryesisht nëpër hapësira private për të rritur fuqinë e tyre politike. Për shembull, PDK-së iu bë e qartë përmes “Aferës Pronto” natyra klienteliste e funksionimit. Por në fakt, shoqëria jonë nuk kishte fare nevojë për dëshmi të tilla. Kufizimi i gjuhës publike, ngushtimi i terrenit të të vepruarit, ka bërë që politikanët në pushtet të jenë mosvet të parashikueshëm – gjë që rezultonte me paragjykime shumë të sakta. Institucionet publike u shfrytëzuan për të rritur fuqinë politike të partive. U çelën universitete të reja në qytetet më të mëdha – megjithë dështimin e përsëritshëm të çdo qeverie për të shënuar hapa të rëndësishëm në përmirësimin e cilësisë në arsimin e lartë. Poashtu, u keqpërdor në mënyrë drastike edhe regjistrimi i veteranëve, duke e dyfishuar numrin e tyre. Korrupsioni endemik në përgjithësi, është rrjedhojë e një ligjërimi shterp publik të këtyre partive politike – dhe rrjedhojë e një gjuhe që nuk mundi të lëvrohej.

Kjo e la Kosovën me vetëm një parti serioze politike: Lëvizjen Vetëvendosje. Ajo ishte e vetmja që, deri më tash të paktën, i ka rezistuar agresivitetit të ‘ndërkombëtarëve’. Për ironi, ndërkohë që ushtrohej vazhdueshëm ky reduktim dhe mbikëqyrje gjuhësore, ish-ambasadorja amerikane guxoi të thoshte edhe diçka vulgare si “Mos e dh*** punën” – duke e dëftuar pushtetin e saj në hapësirën tonë publike.

Liderët e partive politike, përjashto Kurtin, u konformuan ndaj kësaj politike agresive. Edhe paaftësia e tyre në artikulim e bënte të veten, padyshim. Kjo bëri që liderët tanë të pamundësoheshin nga mbrojtja e interesave të vendit – e kjo, nuk ka dilemë, është interes i madh i secilës parti. Simptomat e kësaj sëmundjeje, ose pamundësie, i shohim te mënyra konfuze e të mbrojturit të një çështjeje si demarkacioni, nga kryeministri Haradinaj. Por, më së shumti, këto simptoma vërehen te heshtja e vijueshme e një partie të dalë nga lufta, ndaj formave të ndryshme të përlyerjes që iu bë vetë luftës. Asnjë nga partitë që u themeluan nga ish-luftëtarë të UÇK-së, nuk foli për çështjen e manipulimeve me listat e veteranëve. Dhe kjo kulmoi me pamundësinë që të pengohej një Gjykatë Speciale e cila është e qartë se do të rrënojë imazhin e UÇK-së, e poashtu edhe imazhin e shtetit tonë. Një gjykatë që e ndjekë një vijë etnike, që merret me krimet ‘e shqiptarëve’, në një luftë në të cilën shumica e viktimave i takonin pikërisht kësaj etnie.

Interesat e shtetit tonë nuk përkojnë në vijimësi me interesat e ‘ndërkombëtarëve’. As të BE-së dhe as të Amerikës. Ndjesitë romanticiste që ndjellin këto vende përbëjnë rrezik të madh për mirëqenien, e biles edhe thjesht ekzistencën e shtetit tonë. Fakti që roli i Kosovës në vend se të forcohej, vetëm sa është zbehur, tregon qartë se këto vende janë të përkushtuara, e kjo është fare e natyrshme, thjesht t’i shtyejnë përpara agjendat e tyre.

Shoqëria kosovare duhet të zgjohet nga dremitja. Duhet të kuptojë se askush nuk do t’i mbrojë interesat e saj. Politikanët kosovarë duhet të çlirojnë veten nga ky pushtim diskursiv – dhe të zgjerojnë fushën e asaj që mund të flasin, të thellojnë rezonimet, dhe të hapin horizonte të reja kuptimore. Pluralizmi nuk funksionon vetëm përmes ligjërimit të një partie politike, Vetëvendosjes në rastin tonë. Kosovës i duhet një çlirim i ri, kësaj here gjuhësor – te i cili ndryhen shkaqet e shumë fenomeneve negative që ndodhin në shoqërinë tonë.

Është iluzore të mendohet se Gjykata Speciale do të pastrojë skenën politike. Derisa të ekzistojë një masë e tillë nënshtrimi, derisa ambasadorët e vendeve mike të lëshojnë sallën e konferencave gjatë fjalës së presidentëve e kryeministrave tanë, poashtu derisa cilësia e arsimit në vend është kaq e dobët – nuk mund të pritet që korrupsioni të ndalet. Në pamundësi që t’i lidhin mbështetësit me vargonjtë e ideve ose të ligjërimit, siç bën VV-ja në një masë, partitë e tjera do t’i lidhin mbështetësit me vargonjtë e interesave. Dhe këto interesa, do të vazhdojnë që të dëmtojnë jetën akademike e institucionale të vendit. E në anën tjetër, Kosova do të dobësohet edhe më tej në rrafshin ndërkombëtar, duke u bërë edhe më e varur nga ndërkombëtarët.

Gjuha paksa e zgjidhur e Thaçit tregon mosbesim. Mosbesim tashmë kanë shfaqur edhe Haradinaj e Veseli. E pastaj, edhe Limaj – i cili u shpall i pafajshëm megjithëse ishte gjykuar për gati një dekadë nga Eulex-i. Por ky hop vetëdijësor i këtyre politikanëve nuk është diçka e re. Kjo ‘shpurdhje’ diskursive nuk do të ofrojë kurrfarë efekti përmbajtësor – meqë të gjithë këta politikanë janë të konsumuar. Veç kësaj, rruga për një relacion të ri, të rigjeneruar politikisht, është trasuar nga Vetëvendosje qysh para dhjetë vitesh. Dhe duket se, nuk ka një strehë më të mirë diskursive për të gjitha partitë, se ajo që e ka sajuar Lëvizja e Kurtit.

“BE-ja është mësuar të negociojë me politikanë të dëgjueshëm, Ramushi i befasoi”

Periskopi.com Lajme

Gazetari i grupit Koha, nga Brukseli, Augustin Palokaj në një opinion ka thënë që paraqitja kritike e kryeministrit Haradinaj në Bruksel, e ka bërë të ndihet ‘e befasuar dhe ‘e ofenduar’ zonjën Mogherini. Kjo e fundit, bëhet e ditur që e kishte lëshuar takimin para kohe, dhe kishte anuluar konferencën e paralajmëruar për media – sepse ishte zemëruar me qëndrimet e kryeministrit tonë Haradinaj.

Vetë kryeministri ka deklaruar ditë më parë, që po kërkon nga BE-ja të angazhojë edhe Shtetet e Bashkuara në procesin e dialogut. Gazetari Palokaj, ka thënë që Haradinaj ka qenë kritik ndaj BE-së shkaku i liberalizimit të vizave dhe shpërfilljes së vazhdueshme që po i bëjnë vendit tonë. Ai është shprehur skeptik edhe në lidhje me fitimin e statusit të vendit kandidat për vendin tonë.

Më tej, ai ka thënë që BE-ja është mëuar të negociojë vetëm me politikanë të dëgjueshëm e të cilët nuk bëjnë ankesa asnjëherë. Ai ka lënë të kuptohet se kjo gjë e ka dëmtuar palën tonë, duke e bërë më pak faktore përgjatë gjithë dekadës së fundit – përcjell Periskopi.

Lexo shkrimin e plotë: http://www.koha.net/veshtrime/58836/be-ja-eshte-mesuar-qe-kosova-te-heshte-dhe-ti-gezohet-suksesit-te-fqinjeve-ne-procesin-e-integrimeve/

Thaçi tregon pse u takua me Ramën në Gjakovë (Video)

Periskopi.com Lajme

Presidenti i Kosovës, Hashim Thaçi, dhe kryeministri i Shqipërisë, Edi Rama, u takuan të martën në qytetin e Gjakovës.

Thaçi e Rama thanë se u takuan më shumë sa për të pirë kafe së bashku.

“Kemi biseduar për të gjitha zhvillimet në Kosovë, Shqipëri dhe rajon, por më tepër ka qenë një kafe miqësore”, ka thënë Thaçi.

Presidenti kosovar komentoi edhe për fushatën që po e bëjnë partitë politike për zgjedhjet parlamentare të 11 qershorit.

“Fushatë e qetë, konstruktive, e konkurrencës së ideve, koncepteve, fushatë moderne, tamam evropiane. Uroj që kushtoj të vazhdojë e qytetarët të marrin pjesë masivisht në zgjedhje”, është shprehur Thaçi.

Flet Dardan Molliqaj, tregon të vërtetën e fotografisë me Hashim Thaçin

Periskopi.com Lajme

Sekretari i Lëvizjes Vetëvendosje, Dardan Molliqaj në emisionin “Magazina Zgjedhore” në Klan Kosova ka folur për fotografinë e tij me Hashim Thaçin.

Ai ka thënë se kjo fotografi është bërë gjatë kohës sa ka qenë nxënës në shkollë të mesme.

“Kam qenë atë kohë në shkollë të mesme. Hashim Thaçi ka qenë në shkollë, dhe e kemi bërë fotografinë. Nuk kam qenë kurrë PDK”, tha ai.

Lista Serbe ia bënë me dije Hashim Thaçit: Nuk e lejojmë krijimin e Ushtrisë së Kosovës

Periskopi.com Lajme

Në një tubim parazgjedhor të Listës Serbe i cili u mbajt në Gorazhdec u tha se qëllimi i zgjedhjeve parlamentare të 11 qershorit është të fitohen 10 vende për t’i ruajtur interesat e Serbisë në Kosovë.

Asistenti i drejtorit të Zyrës për Kosovë, Petar Petkoviq tha se të gjithë serbët duhet të votojnë në mënyrë unike për Listën Serbe pasi këta të fundit nuk e tradhtojnë shtetin e Serbisë.

“Lista Serbe është e vetmja e cila e ka përkrahjen e shtetit të Serbisë dhe liderit të saj, Aleksandar Vuçiq”, ka thënë Petkoviq, transmeton lajmi.net.

Ai shtoi se nuk do të lejojnë formimin e Ushtrisë së Kosovës dhe nuk do të marrin pjesë në diskutimet rreth demarkacionit me Malin e Zi.

“Lista Serbe do të luftojnë për themelimin e asociacionit të komunave serbe. Përfaqësuesit e politikanëve shqiptarë janë ata që duan ta ndajnë popullin serb”, ka theksuar Petkoviq.

Edhe kryetari i Listës Serbe, Slavko Simiq deklaroi se kanë mbështetjen e Serbisë për zgjedhjet e 11 qershorit.

Thaçi sërish kërkon vëmendje në kohë fushate, flet për Ushtrinë

Periskopi.com Lajme

Presidenti i Kosovës Hashim Thaçi ka ripërsëritur se Kosova do të bëhet me ushtri këtë vit. Thotë se askush brenda apo jashtë vendit nuk mund ta ndalojë këtë proces.

Sipas Thaçit askush nuk e ka të drejtën e vetos dhe se ky është vullneti i qytetarëve  e që vendimi është i institucioneve të Kosovës për themelimin e Forcave të Armatosura të Kosovës.

“Forcat e armatosura të Kosovës do të formohen gjatë këtij viti, në një proces të koordinuar me NATO-n dhe partnerët e tjerë ndërkombëtarë. Do të jetë një forcë e standardeve të NATO-s. Një forcë multietnike. Do të jetë ushtri e mirëfilltë e një vendi të pavarur dhe sovran. Do të punojmë edhe në kampanjën që kemi filluar për përfshirjen e të gjitha komuniteteve në këtë ushtri të ardhshme të Kosovës si parakusht për partneritet dhe anëtarësim në NATO dhe theksoj se Forcat e Armatosura të Kosovës do të themelohen gjatë këtij viti dhe askush nuk do të mund ta pengojë qoftë ndonjë faktor brenda apo nga faktorët jashtë Kosovës. Askush nuk e ka të drejtën e vetos. Ky është vullneti i qytetarëve të Kosovës. Është vendimi i institucioneve të Kosovës për themelimin e Forcave të Armatosura të Kosovës”, tha Thaçi për RTK-në.

Ndërhyn Hashim Thaçi, nis fushatën për ish-partinë e tij

Periskopi.com Lajme

Presidenti i Kosovës, Hashim Thaçi nuk është ndikuar nga paralajmërimet e disa prej partive politike që të mos organizoi takime me mësimdhënës në këtë kohë zgjedhjesh.

Pavarësisht “kërcënimit” se do të dërgohet në Gjykatë Kushtetuese për shkelje të mandatit presidencial, ai sonte i ka mbledhur rreth 600 punëtorë të arsimit të komunës së Klinës.

Meqë është muaj Ramazan, kreu i shtetit ka shtruar iftar për ta, raporton AktivPress.

Siç mësohet nga të pranishmit, ai nuk ka qëndruar më shumë se 15 minuta me ta, por për aq kohë i ka uruar ata për punën që e bëjnë, pa u lëshuar në fjalime politike.

Presidenti Thaçi takohet me mësimdhënës pothuajse për çdo vjet.

Ai ka deklaruar se takimi me mësues e me qytetarë është në traditën e punës së tij.

Thaci bën thirrje për pjesëmarrje massive në zgjedhje; LDK- Mos bëj fushatë

Periskopi.com Video

Presidenca e mohon që Thaçi ishte sot në Llaushë

Periskopi.com Lajme

Portali Magazina.al ka njoftuar se familja Geci e Llaushës e ka penguar sot Presidentin Hashim Thaçi që të kryejë një vizitë në një shkollë të këtij fshati. Por, në Presidencë e kanë mohuar se Presidenti i vendit ka qenë atje.

Presidenti i Kosovës, Hashim Thaçi, ka planifikuar që në kuadër të vizitave nëpër shkollat e Kosovës, ta bëjë një ndalesë edhe në fshatin Llaushë.

Por, vizita e tij bërë shkollës që mban emrin e mësuesit dëshmor “Halit Geci” është penguar.

Magazina.al merr vesh se familjarë të ish-deputetit Gani Geci, kanë penguar aktivitetin e presidentit, për çka eskorta e tij nuk është ndalur dhe ka vazhduar rrugën për Turiqefc.

Ky portal njofton se plani për ta penguar vizitën e Thaçit në shkollën fillore të Llaushës së Skenderaj, është bërë qysh mbrëmë.

Vëllezërit Geci, sipas burimeve, nuk kishin planifikuar ta pengonin por thjesht kishin dashur që të jenë pjesë e kësaj ngjarje, madje duke dashur të mbanin edhe fjalim.

Meqë ajo nuk u është lejuar është krijuar një situatë në shkollë ku ka sjellë shqetësim edhe tek nxënësit. Për një moment ata janë mbyllur brenda objektit të shkollë.

Prindërit kanë raportuar se fëmijët e tyre janë kthyer në shtëpi të trishtuar nga skenat që kanë parë. Ndërkohë të kontaktuar nga stafi i Presidencës kanë mohuar të kenë qenë në Llaushë.

Ata madje nuk kanë qenë të njoftuar se diçka e tillë ka ndodhur në shkollën “Halit Geci”.

Çartet LDK: Thaçi po bën fushatë për PDK-në, mund ta dërgojmë në Kushtetuese

Periskopi.com Lajme

Reagim ndaj përfshirjes së Thaçit në fushatën zgjedhore

Lidhja Demokratike e Kosovës ka reaguar lidhur me vizitat që ka filluar Hashim Thaqi nëpër disa shkolla.

Kjo parti thotë se nisja e turneut të Thaqi, gjoja për t’i vizituar nxënësit dhe mësimdhënësit, janë përpjekje e tij për t’i dalë në ndihmë fushatës së koalicionit të mesnatës, për krijimin e të cilit, një rol të rëndësishëm ka luajtur ai.

“Praktikat e mëhershme të trajtimit të padinjitetshëm të mësimdhënësve nëpër fushata zgjedhore, sikur rasti në balotazhin për kryetar të Komunës së Drenasit, të aplikuara nga Thaçi, kanë dëmtuar reputacionin e institucionit të Presidentit të Republikës. Për të mos e degraduar tërësisht këtë institucion, i kërkojmë Presidentit të Kosovës, Hashim Thaçi, të heqë dorë nga turneu i tij parazgjedhor nëpër shkollat e Kosovës. Këtë kërkesë e bëjmë për të evituar shkeljen kushtetuese, të cilën do të ishim të detyruar ta adresonim”, thotë LDK, transmeton Periskopi

LDK madje thotë se Thaqi duke e parë humbjen e sigurt të koalicionit të mesnatës, po përpiqet që të ndryshojë vullnetin e qytetarëve të Kosovës, për të çkapur shtetin dhe institucionet.

“Kjo nuk është hera e parë që Thaçi ndërhynë tek institucionet e pavarura për t’i krijuar favore partisë së tij – PDK-së. Thaçi ka qenë pengesa kryesore gjatë procesit të çkapjes së Doganave të Kosovës, duke ndërhyrë drejtpërdrejt në procesin e zgjedhjes së drejtorit. Qytetarët e Kosovës e dinë se pas çkapjes së Doganave dhe Administratës Tatimore nga Qeveria e drejtuar nga LDK, të hyrat në arkën e shtetit u shtuan 400 milionë euro. Këto mjete edhe më parë kanë mundur të inkasohen po të kishte vullnet politik”, thotë LDK e Isa Mustafës.

Vazhdimi i reagimit:

Më shumë sesa për fushatën e tij mbështetëse ndaj koalicionit të mesnatës, mësimdhënësit kanë nevojë të përqendrohen në përmbylljen me sukses të vitit shkollor.

Duke qenë të përkushtuar për ta mbështetur reformimin dhe forcimin e sistemit arsimor, të degraduar nën menaxhimin e Thaçit si ish-kryeministër dhe bashkëpartiakëve të tij në koalicionin e mesnatës, ne u bëjmë thirrje të gjithë garuesve në këto zgjedhje ta lënë arsimin dhe mësimdhënësit të qetë nga diktatet partiake.

Ne ju bëjmë thirrje oponentëve tanë politikë, duke përfshirë edhe Thaçi si i rreshtuar kah koalicioni i mesnatës, që të mos keqpërdorin taksat e qytetarëve për qëllime elektorale.

Në programin tonë për arsimin, ne ofrojmë zgjidhjen për rritjen e cilësisë së arsimit dhe garantojmë se rezultatet e testit PISA do t’i takojnë të kaluarës.

Presidenti i Kosovës reagon vetëm kur sulmohen anëtarët e PDK-së

Periskopi.com Lajme

Presidenti i Kosovës, Hashim Thaçi ka reaguar për sulmin ndaj anëtares më të re të PDK-së, Arbana Xharra.

Ai thotë se sulmuesit duhet të sillen para drejtësisë dhe se, sipas tij, me këtë sulm janë cenuar edhe parimet dhe vlerat demokratike mbi të cilat po ndërtohet shteti ynë.

Por, Thaçi që është president, nuk reagoi edhe kur u sulmua Dardan Molliqaj, që është anëtarë i një partie tjetër. AI u sulmua dy muaj më parë, e së fundmi mori sërihs kërcënime.

Reagimi i Thaqit:

Jam thellësisht i tronditur dhe i shqetësuar me sulmin kundër Arbana Xharrës. Është krejtësisht i papranueshëm dhe i dënueshëm përdorimi i dhunës dhe asgjë nuk e arsyeton atë.

Si shoqëri nuk bën të lejojmë që dhuna të bëhet mjet i shprehjes së pakënaqësisë sonë.

Me këtë sulm të ulët nuk janë cenuar vetëm Arbana dhe familja e saj, por edhe parimet dhe vlerat demokratike mbi të cilat po e ndërtojmë shoqërinë tonë.

Organet e rendit duhet ta zbardhin në tërësi rastin dhe t’i sjellin sulmuesit para drejtësisë. HTH

Bujar Nishani nesër në Kosovë

Periskopi.com Lajme

Ish – presidenti i Shqipërisë, Bujar Nishani nesër do të jetë në Kosovë.

Në vizitën e tij shtetërore do të pritet nga presidenti i Kosovës, Hashim Thaçi.

Pritja ceremoniale do të bëhet në orën 10:00, që nënkupton se takimi paraprak që Thaçi ka me subjektet politike për caktimin e datës së zgjedhjeve të parakohshme duhet të përfundoj deri në atë kohë.

Takimi me subjektet politike është paraparë të fillojë në orën 08:45./ Periskopi

 

Ramiz Kelmendi godet Hashim Thaçin: Nga shantazhi prej Speciales po bënë lëshime territoriale (Video)

Periskopi.com Lajme

Zëvendëskryeministri në ikje, Ramiz Kelmendi, në emisionin InfoBox të RTV Dukagjinit ka thënë se përfundimi i sotëm i koalicionit qeverisës është ditur që në momentin kur për president u votua një nga nënshkruesit e marrëveshjes së koalicionit PDK-LDK, Hashim Thaçi. Pikërisht fal këtij koalicioni, sipas Kelmendit, në krye të PDK-së erdhi Kadri Veseli.

“Po mos të ishte bashkësia ndërkombëtare, Veseli nuk do të kishte qenë sot kryetar i PDK-së. Sepse, koalicioni me PDK-në nuk do të ishte bërë në asnjë formë”, ka thënë ai.

Kelmendi tha se edhe kalimi i demarkacionit me Malin e Zi nuk do ta shpëtonte këtë qeveri. Madje, ai tërhoqi një diagonale mes Gjykatës Speciale e çështjes së demarkacionit, duke thënë se Thaçi – sa ka qenë kryeministër – ka mundur të jetë i shantazhuar nga kjo gjykatë dhe ka bërë lëshime.

“Ky demarkacion është nënshkruar, është përgatitur për nënshkrim, është negociuar dhe i është vendosur si kusht Qeverisë së Republikës së Kosovës sa ka qenë Thaçi kryeministër. Gjithmonë tendenca ka qenë te një konspiracion politik për demaskimin e Thaçi dhe vendosjen e tij në listën e tradhtarëve. Dhe, shumica e deputetëve nuk kanë dyshuar se Thaçi – nga shantazhimi për Gjykatë Speciale – ka bërë lëshime territoriale”, tha ai.

Arsyeja që LDK nuk procedoi me çështjen e përcaktimit të kufirit me Malin e Zi, sipas zëvendëskryeministrit, ishte mungesa e votave – rreth 15 sosh që mungonin nga Grupi Parlamentar i PDK-së.

Për zgjedhjet në Kosovë nesër merret vesh që në mëngjes

Periskopi.com Lajme

Presidenti i Republikës së Kosovës, Hashim Thaçi, pas shpërndarjes së legjislaturës së pestë të Kuvendit të Republikës së Kosovës, do të mbajë nesër takim konsultativ me subjektet politike për caktimin e datës së zgjedhjeve të parakohshme për Kuvendin e Republikës së Kosovës.

Takimi do të mbahet në ora 08:45 në kabinetin e presidentit të Republikës së Kosovës.

Ndryshe, sot Kuvendi i Kosovës votoi mocionin e mosbesimit për rrëzimin e Qeverisë së Kosovës të drejtuar nga kryeministri Isa Mustafa, ndërsa shpërndarjen e Kuvendit, presidenti Thaçi e ka bërë përmes dekretit, i cili ka hyrë menjëherë në fuqi.

Për rrëzimin e Qeverisë votuan 78 deputetë, 34 ishin kundër, ndërsa tre prej tyre abstenuan.

Nesër vendoset për datën e zgjedhjeve

Periskopi.com Lajme

Presidenti i Republikës së Kosovës, Hashim Thaçi u ka dërguar ftesat partive politike për takim gjatë ditës së nesërme.

“Po ftesat janë gati dhe ato u janë nisur partive politike. Takimi do të mbahet nesër në mëngjes nga i cili do të dal edhe data e zgjedhjeve”, ka thënë një burim i Indeksonline.

Janë dy data të mundshme kur pritet që qytetarët tu drejtohen kutive të votimi, data 11 dhe ajo 18 qershor, por që për këtë do të vendoset nesër gjatë takimit Thaçi- subjektet politike.

Thaçit mezi si pritet, shpërbën Kuvendin (Dokument)

Periskopi.com Lajme

Pas votimit të mocionit për rrëzimin e Qeverisë Mustafa, presidenti Kosovës, Hashim Thaçi ka vendosur që ta shpërndaje Kuvendin e Kosovës.

Ai shpërndarjen e Kuvendit e ka bërë përmes dekretit dhe i cili ka hyrë menjëherë në fuqi..

 

Drecun godet Hashim Thaçin: Po i ofron Serbisë shkëmbim territoresh

Periskopi.com Lajme

Kryetari i Komisionit Parlamentar për Kosovën në Qeverinë e Serbisë, Milovan Drecun, ka thënë se Presidenti i Kosovës, Hashim Thaçi, është duke u përpjekur që nën tavolinë t’i propozojë Beogradit shkëmbim territoresh.

Sipas tij, Thaçi po do shkëmbim të territoreve me Serbinë, duke ia dhënë Serbisë veriun e Kosovës, saktësisht Mitrovicën Veriore, dhe duke marrë një pjesë të Serbisë Jugore, saktësisht Luginën e Preshevës.

Ai ka thënë në një intervistë të tij në Radio Beograd, se është e sigurt që do të ketë ndërrim të kufijve në Ballkan.

“Hashim Thaçi po përpiqet që ‘nën tavolinë’ të flas rreth asaj se si mundemi që të shkëmbejmë territoret”, pohoi Drecun./ Klan Kosova

Thaçi thotë se NUK e ka përmendur “Shqipërinë e Madhe”

Periskopi.com Lajme

Presidenti i vendit Hashim Thaçi ka thënë se në asnjë deklaratë nuk e ka përmendur krijimin e ‘Shqipërisë së Madhe’.

Thaçi vuri në dukje se mungesa e lidershipit dhe vizionit të Bashkimit Evropian hap rrugën për ideologji tjera dhe ndikon në rajon, si nacionalizimi, ekstremizmi dhe radikalizmi politik, transmeton lajmi.net.

“Kjo frymë është e përbërë nga Serbia dhe e mban atë për të shërbyer ndaj interesave të saj për legjitimitetin e Serbisë së Madhe, e cila tani vepron nën hundët e BE-së dhe bashkësisë ndërkombëtare”, ka thënë Thaçi.

Ai ka theksuar se Serbia nuk ka reaguar ndaj tij mirëpo ka përsëritur tregimet e vjetra të cilat me dekada kanë manipuluar dhe frikësuar njerëzit.

“Serbia duhet të ndahet nga e kaluara dhe të kthehet në një të ardhme të re. Kjo do të thotë që të heqë dorë nga politika e cila rajonin e sheh si armik”.

Presidenti ka thënë se Kosova dëshiron të forcojë paqen dhe stabilitetin në të gjithë rajonin. “Kjo është arsyeja pse ne duhet të angazhohemi që sa më shpejt të anëtarësohemi në BE”.

Sipas Thaçit deklaratat e tij për mungesën e lidershipit të BE-së nuk do të thonë konflikt i hapur me Bashkimin Evropian mirëpo kjo është një thirrje për bashkëpunim të sinqertë dhe strategjik me Kosovën si dhe me vendet e tjera.

Sa i takon situatës politike në Kosovë, Thaçi ka thënë se në qoftë se koalicioni qeverisës e konsideron të nevojshme për të shkuar në zgjedhje të parakohshme ai si president do të respektojë këtë vendim, por shtoi se tani për tani nuk ka një vendim të tillë.

Thaçi e pranon: Mediat nuk lejuan cenimin e lirisë së shprehjes përmes Kodit Penal

Periskopi.com Lajme

Presidenti i vendit, Hashim Thaçi, sot e ka hapur zyrtarisht konferencën ndërkombëtare “Prishtina Media Days”, e cila është organizuar nga Departamenti i Gazetarisë së Universitetit të Prishtinës, në bashkëpunim me Universitetin e Vjenës dhe me Southeast European Media Organization (SEEMO), si dhe është mbështetur nga Zyra e Presidentit të Kosovës.

Duke ua uruar 3 Majin, Ditën Botërore të Lirisë së Shtypit, presidenti Thaçi shprehu mirënjohje për të gjithë gazetarët që me guxim dhe profesionalizëm vazhdojnë të kryejnë punën e tyre fisnike, të informimit të drejtë të opinionit publik.

“Liria e shtypit, e cila në kuptimin më të gjerë përfshin lirinë e shprehjes së mendimit dhe të drejtën për t’u informuar është një nga liritë themelore të njeriut dhe ndër më të dëshiruarat. Përpjekjet për të realizuar këtë liri janë përpjekje që nderojnë historinë e kulturës njerëzore”, u shpreh presidenti Thaçi, transmeton Periskopi

Ai tha se gazetaria në Kosovë ka qëndruar e palëkundur përkundër presioneve dhe joshjeve, duke u rritur dhe fuqizuar gjithnjë e më shumë.

“Ju përgëzoj për pavarësinë dhe integritetin profesional që keni ruajtur. E përgëzoj edhe transmetuesin publik për pavarësinë redaktuese që ka ruajtur, përkundër përpjekjeve të politikës për ta cenuar dhe për ta ndikuar”, shtoi ai.

Presidenti Thaçi dënoi çdo kërcënim kundër gazetarëve dhe i përgëzoi edhe organet e rendit dhe ligjit që kanë vepruar menjëherë kundër kërcënuesve.

“Përpjekjet për të penguar gazetarët në punën e tyre, kërcënimet kundër tyre, janë të papranueshme në shoqërinë kosovare dhe do të luftohen me forcën e ligjit. I përgëzoj organet e rendit dhe ligjit që kanë vepruar menjëherë kundër atyre që guxojnë të kërcënojnë gazetarët. Kam kërkuar edhe që drejtësia të zbulojë fatin e gazetarëve të zhdukur apo atyre të vrarë në Kosovë para, gjatë dhe pas luftës”, shtoi ai.

Presidenti theksoi se është i mirëseardhur lajmi se këtë vit progresi në Kosovë njihet edhe nga “Reporterët pa Kufij”, që renditi vendin tonë për tetë vende më lartë se një vjet më parë në shkallën e lirisë së shtypit.

“Përkushtimi ynë, i tërë shoqërisë, është që të mbrohet dhe të forcohet edhe më tutje liria e të shprehurit”, u shpreh presidenti Thaçi.

Ai përgëzoi mediat dhe shoqërinë civile edhe për debatin publik për ndryshimet fillestare të propozuara në kodin penal, që cenonin lirinë e shtypit dhe lirinë e shprehjes.

“Kjo edhe një herë dëshmoi fuqinë e mediave dhe të debatit të lirë”, theksoi presidenti Thaçi.

Në përputhje me kompetencat e tij, presidenti Thaçi tha se është përkushtuar që nga dita e parë që të mbrojë Kushtetutën dhe ligjet e Kosovës.

Ai tha se zhvillimi i teknologjisë informative ka krijuar mundësi që nuk i kemi pasur kurrë më parë për t’u shprehur dhe për të komunikuar.

“Sot është më lehtë se asnjëherë më parë që të shprehemi dhe të ndajmë mendimet tona. Por, kjo e ka bërë edhe më të lehtë se kurrë më parë që të abuzohet me lirinë e të shprehurit. Kjo është sfidë jo vetëm për shoqërinë kosovare, por për tërë botën. E tërë bota po përballet me fenomenin e lajmeve të rrejshme, por edhe me përpjekjet e regjimeve jodemokratike që nëpërmjet luftës hibride të abuzojnë me lirinë e shprehjes dhe të cenojnë rendin e vlerave dhe parimeve që ndërtojnë shoqëritë liberal-demokratike”, u shpreh ai.

Presidenti Thaçi theksoi se sfidë sot nuk është vetëm ruajtja e lirisë së shprehjes nga përpjekjet për të kufizuar atë, por edhe mbrojtja e saj nga përpjekjet për të abuzuar me të./ Periskopi