Krasniqi e quan vetën intelektual të vogël dhe thotë se ndaloi të rinjtë për të shkuar në Siri

Periskopi.com Lajme

Për herë të parë dhe ekskluzivisht në emisionin “Personale” të TV Dukagjinit, është rrëfyer Shefqet Krasniqi – imami i Xhamisë së Madhe në Prishtinë, i akuzuar për shtytje drejt terrorizmit.

Në emisionin ku temë qendrore është Muaji i Ramazanit, Krasniqi si asnjëherë më parë ka rrëfyer për veprat që çuan drejt një aktakuze që pretendon se ai ka shtyrë të rinjtë që t’i bashkohen ISIS.

Mes tjerash, ai e quan veten mysliman të thjeshtë dhe intelektual të vogël.

Tha ekstremizmi është dy lloje.

“Ekstremizmi do të thotë me shtrengu shumë, nga ana fetare është më e gjerë kjo. Është shtrëngimi i çdo dispozite të fesë më shumë se sa që ka nevojë dhe që është e mjaftueshme”, ka thënë ai.

Kur u pyet për sulmet që bëhen në emër të Zotit tha se nuk është fe.

“Kjo është me dal në ‘cernishtë’, nuk është fe. Ne shqiptarët nuk kemi faj që dikush del bëhet mafi. Ata nuk janë mirë”, thotë Krasniqi.

Thotë se hoxhallarët mund të parandalojnë çdo të keqe, përmend këtu drogën.

“Nuk mundet e as nuk dinë as qeveria, as policia, as mediat, më shumë se ne hoxhallarët me e ndalu ekstremizmin. Unë kam ndaluar të rinjtë më shku në Siri”, thotë Krasniqi./ Periskopi

Ekstremizmi i dhunshëm, problem global

Ekstremizmi i dhunshëm është problem global dhe as Kosova dhe asnjë shtet tjetër nuk mund ta zgjidhin, përveç atyre që e kanë krijuar.

Periskopi.com Lajme

Për ta parandaluar këtë fenomen që ka përfshirë edhe Kosovën, por që ka prekur edhe komunën e Skenderajt kërkohet angazhimi i të gjitha institucioneve, para së gjithash të atyre arsimore, i familjes dhe i gjithë shoqërisë.

Në përfshirjen e të rinjve kosovarë, në këtë rast edhe i atyre të komunës së Skenderaj, kanë ndikuar niveli i ulët i shkollimit të të rinjve, rrymat e ndryshme ekstremiste të pasluftës që kanë ardhur në Kosovë nëpërmes organizatave të ndryshme, pakënaqësia shoqërore, mungesa e perspektivës, përdorimi i pakontrolluar i rrjeteve sociale.

Mbi 500 organizata të huaja kanë vepruar në Kosovë pas përfundimit të luftës dhe secila nga ato kanë funksionuar në mënyrë të pakontrolluar, krahas anës humanitare, në emër të së cilës edhe janë thirrur, ato kanë zhvilluar aktivitete të karakterit ekstremist fetar, pas të cilave janë joshur shumë të rinj.

Këto janë disa nga konstatimet që kanë dalë nga konferenca në temën “Përfshirja e komunitetit në parandalimin e ekstremizmit të dhunshëm”, që është mbajtur në Skenderaj të enjten, organizuar nga Qendra Kosovare për Studime të Sigurisë, mbështetur nga Ambasada e SHBA-së në Kosovë.

Babai i Teuta dhe Memli Krasniqit thotë se ekstremizmi fetar është dështim i shtetit të Kosovës

​Shkrimtari dhe gazetari shumëvjeçar, Milazim Krasniqi, ka folur për rritjen e bindjeve fetare të islamit deri në ekstremizëm.

Periskopi.com Lajme

Ai në RTV Dukagjini ka thënë se ekstremizmi fetar i pranishëm në Kosovë është si pasojë e mungesës së bashkësive fetare dhe shtetit në tërësi për të vetëdijesuar të rinjtë.

Sipas tij, pas luftës ka pasur rritje të ushtrimit të fesë islame nga të rinjtë, disa prej të cilëve kanë shkuar shumë më lartë se kaq, duke e kthyer besimin në ekstremizëm.

Krasniqi ka shtuar se ky ndryshim social nuk është menaxhuar drejtë as nga Bashkësia Islame e Kosovës e as nga shteti, dhe kjo ka çuar në kalimin e besimit në ekstremizëm.

Shkrimtari ka shtuar se arritja e individëve deri në bindje ekstremiste fetare është përgjegjësi e shtetit, e BIK’ut dhe e vetë familjeve të tyre.

Kosova, Amerika dhe UNDP me marrëveshje bashkëpunimi në luftës kundër ekstremizmit

Të mërkurën u nënshkrua Marrëveshja e Bashkëpunimit në Fushën e Luftës Kundër Ekstremizmit të Dhunshëm Ndërmjet Zyrës së Kryeministrit të Kosovës, Ambasadës së SHBA-ve në Prishtinë dhe Programit të Kombeve të Bashkuara për Zhvillim (UNDP).

Periskopi.com Lajme

Marrëveshja është nënshkruar nga kryeministri i Republikës së Kosovës, Isa Mustafa, ambasadori i SHBA-ve në Kosovë, Greg Delaëie dhe koordinatori për zhvillim dhe përfaqësuesi i përhershëm i UNDP-së, Andreë Russell, raporton Periskopi

Kjo Marrëveshje Bashkëpunimi, ofron kornizën e përgjithshme të bashkëpunimit ndërmjet ZKM-së, Ambasadës së SHBA-së dhe UNDP-së për zbatimin e një projekti për të kryer një vlerësim bazik të luftëtarëve të huaj që vijnë ose që janë të lidhur me Kosovën.

Qëllimi i projektit është që të prodhojë një vlerësim gjithëpërfshirës që mund të përdoret për hartim të politikave të bazuara në dëshmi për parandalimin e radikalizimit të dhunshëm në burgje dhe në komunitete, për të informuar aktivitetet për deradikalizëm dhe riintegrim, si dhe për të siguruar një drejtim strategjik për Strategjinë e Kosovës për Luftën Kundër Ekstremizmit të Dhunshëm dhe Planin e saj të Veprimit./ Periskopi

zkp-004 zkp-002

Hoxha në Amerikë, merr përkrahje të fuqishme për luftimin e ekstremizmit

Ministrja e Drejtësisë e Republikës së Kosovës, Dhurata Hoxha, gjatë vizitës zyrtare në Uashington DC, ku qëndroi me ftesë të Departamentit të Drejtësisë dhe Departamentit të Shtetit të Shteteve të Bashkuara të Amerikës, ka zhvilluar takim me qëllim të thellimit të bashkëpunimit në lëmin e drejtësisë.

Periskopi.com Lajme

Hoxha takoi Brett McGurk – përfaqësuesin special të Presidentit amerikan të Koalicionit global për luftën kundër terrorizmit dhe me këtë rast u diskutua për trendët globale të terrorizmit dhe rajonin e Ballkanit.

Përfaqësuesi special i Presidentit amerikan, McGurk, ka vlerësuar se Republika e Kosovës, ka dhënë kontribut të çmuar kur i është bashkuar Koalicionit global kundër terrorizmit duke çmuar miratimin e ligjit dhe masave tjera kundër terrorizmit. Ai po ashtu theksoi se është lajm i mirë se ka ulje të numrit të pjesëmarrësve të shtetasve të Kosovës që marrin pjesë në konfliktet që zhvillohen në shtetet tjera.

Ministrja theksoi rëndësinë e trajtimit dhe masat ndaj personave që marrin pjesë në luftëra në shtetet e huaja si dhe masat e deradikalizimit dhe risocializimit ndaj personave të tillë.

Ministrja Hoxha, mori përkrahje të plotë nga i deleguari i Presidentit Obama për përkushtimin e saj, duke vënë në pah se kjo përkrahje do të vazhdojë për Ministrinë e Drejtësisë edhe në të ardhmen në fuqizimin e shtetit ligjor dhe sistemin e drejtësisë./Periskopi