Edi Rama me krim e ka marrë dhe me krim do ta ruajë pushtetin

FATOS LUBONJA Opinione

Gazetat dhe portalet tona ndahen kryesisht në tri seksione të mëdha lajmesh. Njëri është seksioni i politikës: çfarë bëri Rama, çfarë tha Basha, çfarë denoncoi Berisha, si po sillet Ilir Meta, korrupsioni i radhës, skandali i radhës, ambasadori i radhës, etj.; tjetri është ai i kronikës së krimit dhe asaj të zezë: drogë, drogë, drogë e kapur, thuajse një vrasje në ditë, në familje, me tritol, me kallashnikov, me pistoleta, me makina, në këmbë, në shtëpi etj.; e treta janë kronikat rozë dhe ndjelljet seksuale të mbushura me bythë, cica, zogun, mënyrat e bërjes seks etj.

I trajtojmë sikur u përkasin tri botëve të ndara, por nuk është kështu. Në fakt, këto tri seksione janë tri faqe të një realiteti të vetëm. Për të bërë lidhjen (do të ndalem tek ajo midis kronikës së krimit të zi dhe të zezës politikë) po i referohem kohës së regjimit komunist. Ata që e kanë jetuar e dinë se në mediat e asaj kohe nuk figuronte kronika e krimit dhe ajo e zezë. Nuk flitej për vrasje, as për vjedhje, as për përdhunime apo prostituime. Mos vallë, sepse nuk kishte? Jo, por sepse pretendohej se nuk kishte, sepse kronika e zezë e krimit ishte një nga pasqyrat e gjendjes reale sociale, ekonomike, kulturore të shoqërisë dhe diktatorëve nuk u pëlqente kjo, por pasqyrimi i realitetit të mrekullueshëm që ata, medemek, kishin ndërtuar.

Tani ne, “fatmirësisht”, e kemi kronikën e krimit. Çfarë çudirash nuk sheh, dëgjon e lexon përditë. Së fundmi më ka mbetur në mendje një lajm, sipas të cilit bandat e shqiptarëve janë ato më të frikshmet në Britani, pasi nuk e kanë problem (moral) të rrëmbejnë e masakrojnë një pensionist të moshuar për vetëm 200 paund, si dhe lajmi sipas të cilit Habilajt nuk janë banda më e fortë në Vlorë, por se ka disa të tjera që janë shumë më të forta.

Një pyetje ngrihet: si ka mundësi që politikanët tanë, kur janë në pushtet, nuk i shqetëson fare ajo që i shqetësonte diktatorët dje: se kronika e zezë e krimit ishte tregues i faktit se ata nuk kanë ndërtuar më të mirën e botëve? Si ka mundësi që nuk mendojnë për asnjë çast se autorët e vrasjeve, përdhunimeve, trafikimeve, hedhjeve në erë, plaçkitjeve me maska, pa maska, nuk janë marsianë, as personazhe filmash të Hollivudit, por shqiptarë që janë rritur dhe edukuar në Shqipërinë e qeverisur prej tyre?

Sikur të ishte e vërtetë se Rilindja me në krye kryeministrin po përpiqet vërtet të na rilindë, te ky aspekt do të duhej të përqendrohej fort. Sepse rilindje do të thotë më së pari përpjekje për të na nxjerrë nga balta e krimit. Pra, ata s’do t’i zinte gjumi kur të dëgjonin kronikën e zezë të krimit. Pale çfarë do të bënin kur t’u dilte dora vetë, ministri i tyre i Brendshëm, si pjesëtar i një bande mafioze. Mirëpo çfarë ndodhi, e zeza Rilindje dhe i ziu kryeministër na dolën me tezën se kemi të bëjmë me krijime të madiave të “kazanit”, të gazetarëve që “shajnë” Shqipërinë sepse kushedi se cili armik i jashtëm i paguan.

Duke u nisur nga absurditeti i këtyre akuzave, një pjesë gazetarësh kanë hedhur idenë se ato janë bomba tymuese që hedh kryeministri për të shmangur vëmendjen e opinionit nga skandali ku është përfshirë direkt dhe indirekt edhe vetë. Do të isha shumë i qetë po të qe kështu por, për fat të keq, mendoj se duhet të jemi shumë më të shqetësuar për veprimet e kryeministrit ndaj mediave.

Veprimi i tij ndaj mediave, ashtu sikurse edhe vendimi për të mbrojtur Saimir Tahirin nga arrestimi, me gjithë provat flagrante, tregon se rilindësit, me në krye Ramën, janë të vendosur të ruajnë paprekshmërinë e tyre. Dhe paprekshmëria ruhet duke ruajtur pushtetin. Pyetja që shtrohet është: deri ku mund të shkojnë në këtë tentativë? Të ashtuquajturat bombat tymuese për të tërhequr vëmendjen janë shumë pak në këtë aspekt. Agresiviteti i Edi Ramës ndaj mediave dhe gazetarëve të veçantë jep shenja të qarta se ai po shkon shumë më tej.

Ai po tregon se sikur të kishte pushtetin që i jepte diktatorit Hoxha sistemi njëpartiak i komunizmit, do ta kishte ndaluar fare edhe kronikën e zezë të krimit, madje do t’i detyronte mediat të pasqyronin vetëm realitetin e tij. Por, fakti që nuk e bën dot këtë, nuk do të thotë se jemi të imunizuar nga të këqija dhe rreziqe të tjera.

Përpara se të hyj te rreziqet, më duhet të ripërsëris se, ashtu siç është e gabuar ta mendojmë regjimin e djeshëm punë të një njeriu të vetëm, Enver Hoxhës, po ashtu është e gabuar ta shohim regjimin e sotëm punë të një njeriu të vetëm, Edi Ramës. Kjo do të thotë të shfajësosh shumë fajtorë që direkt dhe indirekt janë të interesuar që të mbahet në këmbë ky regjim. Pa mbështetjen e tyre, ai mund të binte që nesër. Prandaj edhe rreziqet duhen parë si rreziqe që na vijnë nga i gjithë ky kontingjent.

Sipas gjykimit tim, kjo që po ndodh me sulmin e Ramës ndaj mediave – edhe ndaj atyre që deri dje e kanë mbështetur – flet për kalimin në një fazë tjetër të regjimit. Duke përdorur terma tashmë të njohur do të thoja se po asistojmë në kalimin nga regjimi mediatik te narkoregjimi.

Me regjim mediatik kam parasysh se, duke filluar që nga viti 1997 e deri në legjislaturën e fundit Rama, klasa jonë politike, për të sunduar dhe përfituar, ka punuar kryesisht nëpërmjet lidhjes me mediat dhe oligarkët pronarë mediash. Deri disa vite më parë, oligarkët pronarë mediash pasuroheshin nëpërmjet ndërtimit duke përdorur mediat, por duke thithur kryesisht paratë e emigrantëve. Me Ramën kryeministër kemi një “hop cilësor”. Paraja e madhe e krimit po merr rolin kryesor në mbajtjen në këmbë të pushtetit. Kështu, p.sh., kullat që projektohet të ndërtohen nuk justifikohen veçse me para të pista.

Banka e Shqipërisë te raporti i politikës monetare (2017) flet për ulje të kërkesave për kredi “si pasojë e përdorimit të burimeve alternative të financimit jashtë sistemit bankar”. Në këto kushte, pronarët e mediave, pjesërisht pasi ky realitet nuk fshihet dot pasi dalin përditë zbuluar nga portalet e shumta dhe pjesërisht pasi bizneset e tyre po varen gjithnjë e më shumë nga paraja e krimit, kanë dalë në plan të dytë si instrumente pushteti. Rama provoi ta mbulojë këtë realitet të ri mediatik duke shumëfishuar mediat dhe portalet e tij.

Pastaj krijoi një televizion të vetin. Duke mos mbetur i kënaqur, sot po konsumon shumë shpejt një fazë që po prodhon më së shumti efekt negativ: delegjitimimi dhe denigrimi i gazetarëve që flasin për këtë realitet. Por a mund të ndalë këtu? Shenjat janë dukshëm që jo. E këtu vijmë te rreziqet e ardhshme që, po nuk i ndalëm me kohë, mund të prodhojnë një realitet shumë më dramatik. Le të mos harrojmë se prapa Ramës tashmë nuk janë vetëm oligarkët dhe gazetarët vrasës moralë të paguar prej tyre, por edhe narkotrafikantët dhe ushtarët e tyre, vrasës fizikë. Narkoregjimi është faza e pastrimit të parave të krimit nëpërmjet çimentimit të lidhjeve të politikës me oligarkët, me kriminelët, ku këta të dytët bëhen gjithnjë e më vendimtarë.

Prandaj denoncimi dhe sulmi ndaj krimit si dhe investigimi ndaj tij sot përjetohet nga Rama dhe bashkëpunëtorët e tij si sulm ndaj shtyllës kryesore të regjimit. Ja pse në këtë moment vijmë në nevojën e diktatorëve të djeshëm për ta zhdukur fare nga faqet e mediave kronikën e zezë të krimit. Mirëpo, kjo nuk arrihet dot në gjeopolitikën ku jetojmë. Atëherë rreziku është që shumë shpejt të kalojmë në faza që i kanë kaluar vende ku ka sunduar mafia, siç është p.sh. Sicilia e viteve ’80, kur Andreoti kryeministër thoshte se në Sicili nuk ekziston mafia dhe vriteshin gazetarë dhe prokurorë.

Duke perifrazuar një thënie famëkeqe të komunistëve për pushtetin do të thoja se Edi Rama & Co po japin përditë sinjalin se me krim e kanë marrë dhe me krim do ta ruajnë pushtetin. Ndalimi i këtyre rreziqeve kërkon veprim sa nuk është vonë për shkatërrimin e narkoregjimit me kurajë, bashkim dhe largpamësi.

Pse Edi Rama i urren gazetarët

Roland Qafoku Opinione

Edi Rama kishte pak muaj që kishte marrë detyrën e ministrit të Kulturës në atë gusht të vitit 1998, kur gazetarja e gazetës “Koha Jonë” që mbulonte këtë sektor, kaloi një incident. Doli nga zyra e tij duke qarë dhe po duke qarë mbërriti në redaksinë e gazetës, me pushtetin që nuk ka për ta arritur asnjë media në Shqipëri.

Të gjithë u shqetësuan për lotët e saj, deri në momentin kur tregoi arsyen: Pasi arrita të futem në zyrë për një intervistë, ministri Rama më priti duke më thënë: “Erdhe ti, injorantja e radhës”?

Të mësuar me kërcënime, rrahje, burgosje e gjithfarësoj, për ne gazetarët që kishim rrethuar kolegen e kulturës, kjo ishte përkëdhelje, por sjellje e çuditshme. Realisht, u stepëm nga kjo fyerje e drejtpërdrejtë, e padëgjuar më parë.

Redaksia që disa çaste më parë gumëzhinte, befas ra në qetësi. Kishim kaluar përplasje për qëndrime editoriale në gazetë, por kurrë ndonjë etiketim të tillë. Kjo lloj përplasjeje ishte e ëmbël krahasuar me ato që kishim kaluar, por ishte e çuditshme. Si mund të sillej kështu një ministër.

Heshtjen e theu vetëm kolegu Arion Sulo, që i tha: “Të vërtetën të ka thënë”. Qeshëm. Natyrisht, ajo që tha Sulo ishte shaka, por një shaka që kishte edhe realitet brenda, një realitet që vazhdon të jetë edhe sot i tillë.

Edhe pas 20 vjetësh, Edi Rama nuk ka ndryshuar. Ai vazhdon t’i quajë gazetarët injorantë të radhës, që bëjnë pyetje idiote, që nuk lexojnë, nuk dëgjojnë dhe nuk kanë fare nivel.

Fjala kazan gati ka ndryshuar konotacionin edhe në fjalorin e gjuhës shqipe. Nuk është çudi që në sqarimet përbri fjalës, të citohet edhe kuptimi i kryeministri aktual.

Kush mendon se Rama, atë ditë, sulmoi median për të shmangur vëmendjen nga skandali “Tahiri”, gabohet dukshëm. Për mua kjo është ose naive ose sjellje servile, për ta nxjerrë Ramën takticien, me spaleta gjenerali, që jo vetëm bën ç’të dojë, por arrin të zgjedh deri motin politik sipas asaj që dëshiron ai.

Po përse Rama sillet rregullisht me median, kështu?

Besoj se janë disa arsye bindëse që të gjithë i dimë, por nuk i kemi thënë. Të gjithë i mendojmë, por nuk i shprehim. Mbase tani ka ardhur koha t’i themi troç dhe çuditërisht, kjo kohë erdhi nga vetë ai, që pyetjet e gazetarëve i quajti idiote.

1. EDI RAMA NUK KA NEVOJË PËR GAZETARË

Është i pari kryeministër që ka zhvlerësuar në maksimum rolin e gazetarit të mirëfilltë. Ideator dhe autor i kasetave të gatshme. Autor i të parit televizion me siglën e vet si markë, ERTV; ideator dhe realizues i një marrëdhënieje tejet të veçantë të medias, ai realisht ka arritur të zhvlerësojë rolin e gazetarit. Lajm është kur Edi Rama mendon se është lajm. Lajm nuk është kur Edi Rama nuk mendon se është i tillë. Në këtë mënyrë, ai e ka arritur këtë. Ka edhe një arsye tjetër që konfirmon këtë. Më shumë se një herë, kryeministri është shprehur se nuk lexon gazeta. A ka më domethënëse se kjo që ai deklaron? Natyrisht që këtë e bën se nuk ka nevojë t’i lexojë, sepse di se çfarë ka media, çfarë boton dhe përcjell ajo. Në kushtet kur ai nuk ka nevojë për gazetarë, nuk ka nevojë as për media.

2. EDI RAMA ËSHTË VETË PRODUKT MEDIATIK I YNI

Gazetarët e rinj sot, vuajnë atë që ne gazetarët me përvojë prej dy dekadash e lart, kemi bërë ndër vite. Duhet ta themi: Edi Rama është produkti ynë. Edhe gazetarët më kritikë ndaj tij, dikur kanë qenë beniaminë të tij. Në arkivin tim ndodhen me qindra, në mos mijëra shkrime të gazetarëve që sot krekosen me statusin e analistit të madh politik, që e cilësonin Ramën yllin e ndritshëm në Shqipëri, me vlerësimin si ai nuk ka tjetër, si politikan për të cilin ka nevojë Shqipëria, e të tjera etiketime si këto. Janë pikërisht këta që sot e quajnë Ramën kriminel të medias, shkatërrues të saj e të tjera. Por mirë, more kolegë gazetarë, ndryshoi rrugës Edi Rama? Si ka mundësi që atëherë ishte shumë, shumë i mirë, ndërsa tani qenka shumë, shumë i keq? Jo, në asnjë mënyrë. Atyre u vinte mirë kur drekonin, darkonin me ministrin trendi të Kulturës, që ftoheshin në Ministri e merrnin projekte pa fund prej saj dhe nga bashkia, kur gazeta priste me orë të tëra pas mesnate, që të mbaronte Rama shkrimin për veten e tij, por me emrin e dikujt tjetër, ndërsa sot ata e kritikojnë këtë. Një gazetar që shkel qoftë edhe një herë parimet, nuk mund të ketë moralin të kritikojë dhe komentojë dikë, sepse me demek, ai është pastruar.

3. EDI RAMA SI PUBLICIST

Edi Rama është nga të rrallët kryeministra që ka ushtruar në mënyrë mjeshtërore vetë, gazetarinë, më saktë publicistikën. Shkrimet e tij në gazetën “Koha Jonë”, në vitin 1995-1997, mbeten edhe sot zjarre të pashuara të modelit si duhet t’i përgjigjeshe pushtetit të Berishës të asaj kohe. Një mjeshtër i kultivimit të frazës, njohës shumë i mirë i artikulimit në print, nuk e teprojmë të themi se Edi Rama mund të krahasohet në publicistikë me mjeshtrit si Fan Noli, Mit’hat Frashëri, Faik Konica, Vangjel Koça, Selahudin Toto etj. Kjo është një meritë dhe kush nuk ia di ose e ka kundërshtar politik, ose vetëm ai e di përse e bën. Duke zotëruar këtë armë, ai nuk ndjehet asnjëherë inferior ndaj një gazetari apo analisti. Çdo shkrim që shikon dhe lexon, ai e krahason me atë që mund të shkruante ai vetë dhe nëse nuk gjen cilësi, di ai vetë si të reagojë.

4. EDI RAMA E KA MARRËDHËNIEN ME PRONARËT

Përse të çuditemi ne? Kryeministri Rama i ka marrëdhëniet me vetë pronarët e medias shqiptare. Me përjashtime të rralla, Edi Rama ka të tilla raporte që, nëse ka një çështje, nuk ka nevojë fare të merret me gazetarin, redaktorin e deri kryeredaktorin. Atij i duhet pronari dhe këta nuk i bëjnë punë. Ai dhe vetëm ai është njeriu që e zgjidh këtë çështje. Rama është politikani i parë dhe i vetëm në Shqipëri, që ka zhvlerësuar në atë farë feje postin e kryeredaktorit, sa sot të gjithë e dimë, me përjashtime të vogla, që të jesh ose jo kryeredaktor, kjo varet edhe nga humori i Ramës. Kryeredaktori ose drejtori është kthyer thjesht në një rrip transmisioni, midis Ramës dhe pronarit. Ai kurrë nuk vendos për linjën editoriale, për pikëvështrimin e lajmeve, për atë që duhet të botohet ose ajo, për vendin që duhet të zërë iks lajm dhe ypsilon analizë. Kryeredaktori i epokës së Ramës, në fakt, nuk është fare kryeredaktor. Dhe Ramës nuk i duhet fare një i tillë.

5. EDI RAMA DHE MEDIA E PËRÇARË

Herë për faj të vet medias dhe herë për faj të përçarjes që Rama i ka bërë, sot kemi një marrëdhënie skandaloze mes qeverisë dhe gazetarëve. Të gjithë e dimë që ka gazetarë që Rama i etiketon kazanë dhe sahanlëpirës. Por, ka edhe gazetarë të preferuar, që i sajdis me gjithfarëlloj mënyrash. Por, ka edhe gazetarë që janë larguar nga puna për shkak të tij. Habia është se si ne gazetarët sillemi me të. Si ka mundësi që mes gazetarëve nuk ka solidaritet, kur ka një problem? Unë shpreh keqardhjen për disa që janë larguar nga puna, duke denoncuar deri kryeministrin si autor të largimit. Por, kam një pyetje për këta gazetarë: Ku ishin ata, kur kolegët e tyre më parë u larguan në të njëjtat rrethana? Apo kur largohen ata, akuza ndaj Ramës vlen, kur largohen të tjerët, ajo nuk vlen? Pa dashje, disa gazetarë të vetëquajtur sendor, kanë zbatuar maksimën e George Orwellit se të gjitha kafshët janë të barabarta, por disa kafshë janë më të barabarta se të tjerat. Thjesht, Kryeministri e di mirë këtë cilësi mes gazetarëve të përçarë dhe fërkon duart.

6. NIVELI PROFESIONAL I MEDIAS

Edi Rama ka të drejtë kur thotë që gazetarët nuk lexojnë. Ne na vjen hidhur ta themi publikisht, por përse mos ta themi troç. Edi Rama ka të drejtë kur e thotë këtë. Aktualisht, media shqiptare është e ndarë në tri kategori: Në një pjesë, gazetarët që kanë formim shumë të mirë, janë lexues mjaft të mirë dhe edukimi i tyre është e tillë. Kanë karakter dhe nuk i shkelin parimet. Në grupin e dytë, futen gazetarë që janë mediokër, të nivelit mesatar që nuk kanë njohuri të mjaftueshme bazë, vjedhin sa andej e këtej dhe, profesionalisht, këta janë më të rrezikshëm, sepse reklamojnë sikur dinë, por në fakt nuk dinë. Por duke dhënë një iluzion sikur dinë, këta janë speciet më të rrezikshme të komunitetit tonë. Grupi i tretë janë gazetarët që nuk kanë ndonjë nivel të spikatur, por që janë në media jo pak të rëndësishëm, duke qenë se një pjesë i përkasin gazetarëve të lajmit, reporterëve dhe redaktorëve të rinj. Me grupin e dytë dhe të tretë, Rama e ka më te lehtë të merret dhe t’i etiketojë si të dojë. Kur thotë që gazetarët nuk lexojnë, edhe ne që jemi vetë pjesë e medias, në mos e themi e mendojmë, se ai ka të drejtë që ç’ke me të.

7. EDI RAMA HYRI NË HISTORI

Ka qenë një dëshirë dhe qëllim i tij i hershëm, që të fitet në histori. Edhe pse në politikë u fut nga dera e pasme, ai synoi gjithnjë lart e më lart. Detyra e kryetarit të bashkisë dhe kryetarit të PS-së, ishin maja. Por ai donte majën e majës, kryeministrinë, të cilën e arriti më 2013. Tashmë e ka futur veten në histori dhe ky është rasti i skenarit të denjë të një filmi: Si e arriti atë që synoi Edi Rama, duke u bërë kryeministri i 33-të në historinë e shtetit shqiptar. Më shumë se kaq, që të renditet përkrah Ismail Qemalit, Fan Nolit, Ahmet Zogut, Mustafa Merlikës, etj. nuk ka më mirë. Madje, nuk ka as më shumë. Me mandatin e dytë të fituar, atij nuk i ka mbetur gjë tjetër në jetën politike. Synimet e tij për të ardhmen, janë për të marrë edhe mandate të tjera të njëpasnjëshme, por më shumë se kaq, të lërë edhe pasardhësin e vet të besuar në PS dhe qeveri. Ndaj nuk i duhet shumë media.

8. E ARDHJMJA POLITIKE E EDI RAMËS

Edi Rama është në një kohë që nuk ka ndonjë emocion të veçantë, nëse edhe gabon me median. Ai nuk e ka kafshuar asnjëherë buzën, kur nuk kishte pushtet dhe ishte një ministër i vogël i qeverisë së madhe të PS-së. Jo më tani që është kryeministër “i madh”, që pasi ka fituar mandatin e dytë me vota që nuk i ka patur kush në këto 27 vjet, mendon vetëm si do të pleqërojë. Atëherë do të shkruajë libra me kujtime dhe ndoshta do të tregojë se si na thoshte ne gazetarëve që bënim pyetje idiote. /AFP.al/

Ben Blushi tregon pse u bë marrëveshja Rama-Basha

Periskopi.com Lajme

Kreu i LIBRA-s, Ben Blushi gjatë një interviste televizive ka thënë ndër të tjera se Rama dhe Basha kanë marrëveshje për të qeverisur së bashku.

Sipas Blushit, LIBRA ka shumë mbështetës në emigracion, pjesa më e madhe e të cilëve nuk kthehen dot që të votojnë.

Megjithatë, ai tha se ata mund të influencojnë te familjarët e tyre.

“Unë i them se kjo është një marrëveshje për ta grabitur Shqipërinë bashkë dhe për të cenuar reformën në drejtësi. Pra, është nevoja që duke qenë bashkë në qeveri të krijojnë imunitet ndaj reformës në drejtësi. Prognoza është se ata prapë do të tentojnë të bashkëqeverisin pas zgjedhjeve për të krijuar më shumë imunitet ndaj reformës në drejtësi se kush është në qeveri vështirë se preket nga reforma në drejtësi. Dhe Edi Rama e shiti reformën në drejtësi si një kërcënim ndaj opozitës ose ish qeverisë së vjetër dhe këtu u frikësua për hir të së vërtetës “çadra” dhe për këtë arsye u fut në qeveri dhe si një kërcënim ndaj partive të tjera. Pra, duan t’i japin vetes një monopol, një duopol që merr të gjitha të drejtat kushtetuese në dorë”, theksoi ai.

Kryetari i LIBRA, Ben Blushi zhvilloi ditën e djeshme disa takime me banorë të njësive numër 1 dhe 2 në kryeqytet. Duke komentuar deklaratat e kryeministrit Edi Rama për Policinë e Shtetit, ish-deputeti i Partisë Socialiste deklaroi se ato janë famëkeqe dhe kërcënuese ndërsa theksoi se janë tregues i dëshpërimit të kryeministrit.

“Ky në fakt e ka kthyer në një shtet policor, por jo policor për të mbrojtur rendin, për të mbrojtur pronat tuaja, jo policor për të mbrojtur Shqipërinë nga hajdutët dhe kriminelët por shtet policor që ka mbjellë të gjithë Shqipërinë me kanabis. Tani i thotë mbasi mbollët kanabisin për tre vjet gjithë policëve të Shqipërisë dhe mbasi më mbrojtët mua nga populli i Shqipërisë shkoni dhe mblidhini vota për mua”, nënvizoi Blushi ndër të tjera në fjalën e tij.

LIBRA përfundoi Ben Blushi, synon të luftojë të keqen dhe politikanët që e kanë shndërruar Shqipërinë në vend të varfër dhe të pashpresë.

 

 

Zbulohet sozia e Edi Ramës (Foto)

Periskopi.com Lajme

Edi Rama, kryeministri aktual i Shqipërisë është një nga figurat më të njohura të politikës shqiptare e ndër më të ndjekurit në rrjetet sociale ku ndan me ndjekësit projektet e reja, përfundimet e tyre si dhe tejet aktiv sa i përket kthimit të përgjigjeve aty.

Por, duket se Rama ka një sozi.

Ka qenë një shqiptar në Britaninë e Madhe i cili duke parë një kuiz në televizion, vuri re se njëri prej konkurrentëve kishte një ngjashmëri të madhe me kryeministrin Edi Rama. /Telegrafi

Thaçi tregon pse u takua me Ramën në Gjakovë (Video)

Periskopi.com Lajme

Presidenti i Kosovës, Hashim Thaçi, dhe kryeministri i Shqipërisë, Edi Rama, u takuan të martën në qytetin e Gjakovës.

Thaçi e Rama thanë se u takuan më shumë sa për të pirë kafe së bashku.

“Kemi biseduar për të gjitha zhvillimet në Kosovë, Shqipëri dhe rajon, por më tepër ka qenë një kafe miqësore”, ka thënë Thaçi.

Presidenti kosovar komentoi edhe për fushatën që po e bëjnë partitë politike për zgjedhjet parlamentare të 11 qershorit.

“Fushatë e qetë, konstruktive, e konkurrencës së ideve, koncepteve, fushatë moderne, tamam evropiane. Uroj që kushtoj të vazhdojë e qytetarët të marrin pjesë masivisht në zgjedhje”, është shprehur Thaçi.

Berisha tallet me foton e Ramës: Iu thaftë dora atyre që më kanë përzierë mallin

Periskopi.com Lajme

Ish-kryeministri Sali Berisha ka publikuar një foto me anë të së cilës ka vënë në lojë kryeministrin Edi Rama.

Në postimin e tij ai ka publikuar një foto të Ramës ku shkruan: “Noriega me overdoze! Sb”

Ndërsa sipër fotosh lexohet: “Kam vetëm dy llafe për të thënë, iu thaftë dora të gjithë atyre që ma përziejnë mallin”. /albeu.com

Edi Rama ngacmon në publik Lulzim Bashën, ja si reagoi ai (Video)

Periskopi.com Lajme

Basha foli para takimi të tryezës politike që do mbahet pas pak momentesh në Tiranë. Në një dalje për mediat para Kryesisë së Kuvendit, ai u shpreh:

Po bëhet një fushatë dezinformimi dhe dashakeqësi për opozitën shqiptare. Kanë keqpërdorur takimin tim me përfaqësues të komuniteti katolik”, përfundoi ai.

Por ajo që ra në sy ishte momenti teksa kryetari i PD-së Lulzim Basha fliste për mediat, pas tij rrinte kryeministri Edi Rama. Kjo ka shkaktuar dhe të qeshura tek gazetarët.

Në ironi Rama i ka thënë Bashës, “Këtu e ke vendin, jo aty”, referuar Kuvendit dhe daljes në media.

Lulzim Basha arkiv

Sot afati i fundit i PD-së për pjesëmarrje në 18 qershor

Periskopi.com Lajme

 

Edi Rama i ka vendosur Lulzim Bashës jo pa qëllim ditën e sotme si afati final për të negociuar pjesëmarrjen e PD-së në zgjedhje.

Teksa doli në konferencë shtypi të premten dhe tërhoqi kandidatët nga zgjedhjet e Kavajës, Rama tha se e priste Bashën deri në datën 7 maj, ndërsa në datën 8 nuk kishte më kohë për të.

Në të vërtetë data 7 nuk ishte një kufi i limitit të durimit të kryeministrit, por një datë që lidhet me aspektet teknike të përgatitjes së zgjedhjeve të 18 qershorit. Dita e sotme është afati i fundit kur Komisioni Qendror i Zgjedhjeve, në respektim të afateve ligjore, duhet të nisë shtypjen e fletëve të votimit.

Ky institucion ka një kontratë me kompaninë sllovene “Cetis” për shtypjen e fletëve te votimit dhe në bazë të kontratës, kompanisë duhet t’i dorëzohen fletët e votimit deri në datën 7 maj, në mënyrë që ajo të ketë mundësinë t’i përgatisë ato për zgjedhjet e 18 qershorit.

Duke qenë se data 7 i bie e dielë atëhere nesër, pra më 8 maj KQZ duhet të nis prodhimin e fletëve të votimit. Në këto kushte, orët e ditës së sotme, janë finalet e Partisë Demokratike për të marrë vendimin e pjesëmarrjes apo jo në zgjedhjet e 18 qershorit. Nëse do të ketë negociata intensive, dhe do të gjendet një formulë konsensusi për përfshirjen e saj në zgjedhje, atëherë KQZ duhet të rimodelojë fletën e votimit duke përfshirë dhe partitë opozitare. Kjo gjë duhet bërë brenda ditës së sotme. Në rast se kjo gjë nuk do të ndodhë, atëherë PD nuk do të jetë pjesë e zgjedhjeve të 18 qershorit. Kjo logjikë qëndron gjithnjë nëse data e zgjedhjeve ngelet po ajo që tashmë është dekretuar nga Presidenti i Republikës.

Nëse palët do të dakordësohen pas ditës së sotme për të përfshirë PD-në, do të jetë gati e pamundur që kompania “Cetis”, po ta marrë më vonë fletën e votimit, të arrijë ta printojë atë në kohë. Ekspertët thonë se nëse KQZ i lëviz kësaj date të printimit të fletëve, automatikisht do të lëvizë edhe nga data e votimit. Për këtë arsye, Rama ka paralajmëruar se nuk do të jetë i gatshëm për asnjë negociatë, përtej datës 7 maj.

“I përsëris Lulzim Bashës, lëre tani Kavajën hiqe nga mendja se mund ta shtysh me provokime, jo datën por as afatin fundit të mundësisë për të hyrë në zgjedhje që është 8 maji dhe fokusohu te zgjidhja që të është ofruar deri më 7 maj. Unë jam gati të ulem përsëri me Lulzim Bashën por këtë herë për të detajuar ofertën që ai ka në tavoline jo për ta filluar nga e para avazin e qeverisë teknike dhe të shtyrjes së zgjedhjeve në kalendar greke, me sebepin qesharak të përgatitjes së votimit elektronik. Zgjedhjet do të bëhen me 18 qershor dhe të hënën me 8 maj unë nuk jam më në dispozicion për Lulzim Bashën dhe PD-në,  nëse deri të dielën ata nuk bien dot dakord për ofertën, për ndryshimin e menjëhershëm të Kodit Zgjedhor, sipas rekomandimeve të ODHIR-it dhe zhbllokimin e Vettingut, natyrisht. Edhe fare pak durim u kërkoi të gjithëve. Jemi në prag të një zhvillimi me rëndësi të madhe me vendin tonë”,-tha Rama në konferencën për shtyp ditën e premte.

Afati

KQZ ka një kontratë me kompaninë sllovene “Cetis” për shtypjen e fletëve te votimit dhe në bazë të kontratës, kompanisë duhet t’i dorëzohen fletët e votimit deri në datën 7 maj, në mënyrë që ajo të ketë mundësinë t’i përgatisë ato për zgjedhjet e 18 qershorit.

Negociatat

Nëse do të ketë marrëveshje politike, KQZ duhet të rimodelojë fletën e votimit duke përfshirë dhe partitë opozitare. Kjo gjë duhet bërë ditës së sotme. Në rast se kjo gjë nuk do të ndodhë, atëherë PD nuk do të jetë pjesë e zgjedhjeve të 18 qershorit./Shqiptarja.com

Përfundon takimi dy orësh Rama – Basha, ja çfarë ndodhi

Periskopi.com Lajme

Kryeministri Rama pas takimit dy orësh me kreun e opozitës Lulzim Basha në Presidencë bëri të qartë se oferta e tij për Partinë Demokratike, me qëllim dhënies fund të krizës politike nuk ndryshon.

Kryeministri Edi Rama duket se me kalimin e kohës po tkurr edhe ofertën e tij. Në thelb ai nuk ofron asgjë për zgjidhjen e problemit të zgjedhjeve. Kryeministri duhet ta dijë se për të sigururar votën e lirë të qytetarëve nuk mjaftojnë vetëm katër zevendës ministra.

Zoti Rama është i bindur për të hyrë i vetëm në zgjedhje dhe për të emëruara nje opozitë të re.

Propozimet e Kryeministrit, sa më shumë kalon koha aq më shumë i largohen vlerave demokratike dhe zgjedhjeve pluraliste.

Ndërsa Zoti Basha u shpreh se marrëveshje nuk do të ketë deri në momenti kur Kryeministrit nuk do të pranojë kriminalizimin e politikës dhe nuk do të ofrojë zgjidhje politike. E vetmja rrugë përpara është realizimi nga pala tjetër politike në këtë proces me një sens realiteti.

Ai tha se për të zgjidhur krizën duhet që pala tjetër të pranojë përgjegjësitë dhe të marrë përgjegjësitë për të dalë të bashkuar kundër krimit dhe drogës.

Zoti Basha tha se “Kundërpropozimi ynë është një qeveri teknike me mandat për të zgjidhur dhe ndalur krimin dhe drogën në zgjedhjet e ardhshme dhe realizmi i votimit elektronik brenda gjashtë muajve”.

“Propozimet e ofruara nga McAllsiter nuk përbëjnë zgjidhje politike. Në kushtet ku kryeministri ka kapur parti të tëra opozitare, deputetë të opozitës, nuk ofrojnë garanci që e njëjta gjë nuk do të ndodhë me katër qytetarë që i zgjedh Edi Rama dhe i miratojmë ne” — u shpreh kryetari i opozitës Basha.

“E vetmja zgjidhje është vullneti politik,” — theksoi Zoti Basha.

Mesa duket , nga deklarata e Zotit Basha dhe Rama, asnjë nga palët nuk dëshiron të ketë një marrëveshje për zgjidhjen e krizës deh sigurimin e zgjedhjeve të lira dhe të ndershme.

Rama flet pas takimit një orësh me ambasadorët, përmend datën e zgjedhjeve

Periskopi.com Lajme

Kryeministri Edi Rama ka folur pas takimit që pati me ambasadorët në zyrën e tij në lidhje me negociatat që po zhvillon me Lulzim Bashën për të zgjidhur krizën politike.

I pyetur nga gazetarët se çfarë i diskutua në Presidencë mes tij dhe kreut të opozitës Lulzim Basha, Rama nuk preferoi të bënte komente të shumta, duke sqaruar se kanë rënë dakord që të mos flasin pasi bisedimet janë në proces.

Megjithatë, shefi i qeverisë i qëndroi variantit të tij se nuk do të ketë shtyrje të zgjedhjeve.

“Nuk e shtroj për diskutim datën e zgjedhjeve”, u tha Rama gazetarëve.

Kryeministri Rama: Ne jemi në punë. Sapo kemi mbyllur një takim me skuadrën e re përfaqësuese ku kanë marrë pjesë edhe kryetarët e bashkive, por edhe deputetë aktualë për të kolauduar mesazhet, për të bërë të qarta prioritetet në planin organizativ.

Pyetje nga gazetarët: A i keni propozuar opozitës postin e zv/Kryeministrit?

Kryeministri Rama: Kemi rënë dakord që mos flasim, por mesa duket fjalët i ka marrë era i ka sjellë deri tek ju. Unë kam propozuar atë cka besoj shumë se adreson problemet. Pra një monitorim të gjithë strukturave të shtetit. Më shumë se kaq nuk ka.

Pyetje? Cila ka qenë përgjigja e z.Basha?

Rama: Unë nuk dua të komentoj kundërshtarin që isha në tavolinë për të biseduar. Pyeteni atë. Ne në angazhimin e plotë elektoral do të gjejmë kohën për të biseduar.

Pyetje? Do keni takim tjetër sot?

Rama: Unë s’kam takim tjetër. Nuk e shtroj për diskutim datën e zgjedhjeve.

Pyetje: A i trembeni akteve të dhunshme në Kavajë?

Rama: Unë nuk i trembem asgjëje. Jemi brenda filozofisë tonë për të bërë shtet.

Lulzim Basha tregon çfarë ofroi Edi Rama në takimin tek Presidenti

Periskopi.com Lajme

Duke folur nga çadra e opozitës, kryetari i PD Lulzim Basha ka treguar se çfarë ndodhi në tryezën e dialogut të zhvilluar sot në Presidencë me ndërmjetësimin e kreut të shtetit Bujar Nishani.

Fjala e Lulzim Bashës:

Sot përfaqësuesit e republikës së vjetër u ulën në tryezën e presidentit Nishani për të gjetur një zgjidhje me dialog të krizës.

Unë shkova në këtë tryzë ashtu sic ju premtova ju, me vullnetin e plotë e të palëkundur për të mos pranuar asgjë për të përfituar asgjë.

Unë shkova po  kështu me zotimin e marrë para miqve tanë europianë.

Dy janë kollonat e vullnetit politik. As ndryshimet në Kodin Zgjedhor, as ndryshimet në Kodin Penal. Dje këmbënat e Europës kanë rënë për cdo shqiptar, madje dhe për Edi Ramën. Shqipëria është në krizë politike dhe kërkohet zgjidhje politike. Ky kishte fërkuar duart bashkë me lobistët e tij, kishte shpresuar të pamundurën që ne të tregoheshim me gisht si fajtorë. Dje e kuptoi se edhe kur gënjen sa mundesh me media të kapura, e vërteta vonojnë por një ditë arrijnë në stacion.

E vërteta ka mbërritur në stacionet e mëdha të perëndimit. Droga dhe krimi janë kërcënimet kryesore për demokracinë Shqipëri. Pa zgjidhje të vërtetë, nuk ka zgjedhje në Shqipëri. Pra nuk do të ketë as bojkot, se ne vetëm duarkryq nuk do rrimë teksa kupola e krimit mundohet ti marrë shqiptarët si dele. Jo, nuk do të rrimë duarkryq. Kemi ofruar sot në tavolinë gjithçka që PD mund të ofrojmë. Pala tjetër është tërhequr edhe nga propozimet e javës së kaluar që vet i loboi. Sot Edi Rama vuloi faktin të njohur se ai jo vetëm është pengesa e vetme, por se nuk ka asnjë argument për t’i hapur rrugën zgjidhjes. Tani që ballafaqimi i argumenteve tregoi se kush do zgjidhje për shqiptarët, Edi Ramës nuk i ka mbetur gjë tjetër vecse argumenti i forcës.

Rama braktis kandidatët e PS, takim urgjent me ambasadorët

Periskopi.com Lajme

Kryeministri Edi Rama ka shkruar në një takim urgjent me ambasadorët e akredituar në Tiranë për t’i informuar në lidhje me negociatat që zhvilloi me kryetarin e PD Lulzim Basha ditën e sotme.

Kryeministri ka qenë në një takim në Xibrakë ku prezantonte kandidatët për deputetë të PS, kur ka lënë në mes bashkëbisedim dhe u largua me urgjencë.

Ai u njoftua për takim me ambasadorët, të cilët duhet t’i informojë si po shkojnë negociatat me opozitën.

Rama tërhiqet nga marrëveshja me McAllister

Periskopi.com Lajme

Nëse gjatë takimit me David McAllister, Edi Rama kishte pranuar që ti jap katër ministri opozitës, ministri që kanë të bëjnë me procesin zgjedhor, sot në takimin me Bashën, kryetari i Rilindjes ka ofruar vetëm poste zëvendësministrash dhe postin e Niko Peleshit, si zv/kryeministër që është.

Në këtë mënyrë ai nuk i ka qëndruar marrëveshjes së 25 prill me David McAllister.

Blendi Fevziu: Përse po zgjidhet president Ilir Meta dhe si po e nxjerr Rama jashtë loje

Periskopi.com Lajme

Blendi Fevziu shkruan se Ilir Meta nesër do të zgjidhet president.

Sipas tij, më i fituari nga kjo është kryeministri Edi Rama, që sipas Fevziut, të paktën për pesë vite e ka nxjerrë jashtë loje Ilir Metën.

Ja çfarë shkruan Fevziu në faqen e tij:

Ilir Meta pritet të zgjidhet nesër Presidenti i ri i Shqipërisë. Ai bëhet kështu, presidenti i shtatë i Shqipërisë Pluraliste dhe padyshim më i dobëti në listën e parardhësve të tij. Më i dobëti jo për hir të staturës politike, (pas Berishës që drejtoi presidencën në vitet 1992 – 1997, ai është padyshim personaliteti më imponues) por si pasojë e kompetencave që janë sot më të paktat dhe më të reduktuarat që nga viti 1991. Roli i Presidentit u reduktua në mënyrë drastike në Kushtetuën e vitit 1998, ai u reduktua akoma në ndryshimet kushtetuese të 2008 dhe së fundmi u zhvesh edhe nga pak kompetenca të mbetura në vitin 2016, në ndryshimet që ju bënë pas reformës në drejtësi.

Po përse Meta po lakmon postin e Presidentit? Përse ai po lë një parti që po vinte e bëhej më dominuese në skenën politike shqiptare, gati gati faktor përcaktues dhe po shkon në një zyrë që më shumë i ngjan ceremonialit se sa vendimmarrjes politike? Përgjigja nuk është e thjeshtë, por ajo padyshim ka disa pista.

E para, Ilir Meta e kishte aspiruar postin e Kreut të shtetit që në vitin 2012. Në marrëveshjen e 2013, siç dëshmon në një gazetarët që ka qenë më pranë Ramës dhe Metës, Baton Haxhiu, ndarja e pushtetit ka qenë e tillë: Rama Kryeministër dhe Meta President. Pra, Meta nuk po bën asgjë më shumë, por po shkon në pretendimin e vjetër të tij. Ai e di mirë që ndryshe nga presidentët e tjerë (Përjashto Berishën dhe deridiku Topin), nuk po shkon atje për të mbyllur karrierën politike, por për ta hapur atë edhe një herë. Ai po kërkon një periudhë tranzitore për të krijuar imazhin e njeriut që bashkon palët, duke synuar të mbajë në këmbë edhe LSI. Një President me parti, është gjithnjë shumë më i fortë se sa një President që është propozuar nga partia dhe i humb lidhjet me të. Pra, Presidenca është vetëm një fazë tjetër tranzitore në karrierën e Metës. Së paku kështu duket.

E dyta është koha! Opinion.al që njoftoi sot e para kandidimin e Metës ka qenë e informuar se Meta e pretendonte postin e Presidentit pas zgjedhjeve. Ndërkohë që Rama ishte i prirur ta niste në Presidencë përpara zgjedhjeve. Por situata ka lëvizur me shpejtësi pas refuzimit të opozitës. LSI e humbi datën ligjore të regjistrimit me PS në një koalicion dhe do të detyrohet të dalë në zgjedhje e vetme. Në mungesë të PD, rezultati i përftuar do jetë padyshim i deformuar dhe jo real. Humbëset më të mëdha do të jenë LSI dhe PDIU votat e të cilave nuk do jenë të nevojshme për PS që do ketë vetë votat e domosdoshme për të ngritur dhe mbajtur qeverinë. Në këto rrethana koalicioni pas zgjedhor do jetë formal, por jo funksional. Kësaj gjëje i është trembur Meta. Ai ka llogaritur që pas zgjedhjeve posti i premtuar mund t’i refuzohej apo t’i shmangej, ose mund të përftohej një situatë e re politike e paparashikuar, dhe ka vendosur të garojë tani.

Kjo mazhorancë i ka votot. Meta do të jetë nesër President dhe Rama ka arritur fiks atë që ka dashur. Nxjerrjen qoftë edhe përkohësisht, për 5 vite nga skena politike aktive e njeriut që e kërcënonte më shumë në postin e Kryeministrit. Pas daljes së Metës nga skena, ai ka tashmë vetëm një rival, Bashën.

E treta, nuk dihet se çfarë do prodhojë për politikën vendimi i Metës. Nuk dihet se çfarë do sjellë për LSI dalja nga fushata e Metës, por vështirë që partia e tij, pa të, të arrijë objektivat që kishte vendosur.

Gjithsesi Meta duhet të jetë i qetë sot, por akoma më i qetë duhet të jetë Rama që ja arriti ta shmangë së paku për ca kohë aleatin dhe rivalin e tij brenda mazhorancës!

Edi Rama i ka ofruar Presidencën, mësohet përgjigja e Ilir Metës

Periskopi.com Lajme

Edhe raundi i tretë i zgjedhjes së Presidentit ka dështuar. Ndërkohë zbardhen prapaskenat e fundit mes kryeministrit Rama dhe liderit të LSI-së, Ilir Meta.

Burime pranë maxhorancës kanë bërë të ditur se qenë kryeministri Rama që i ka ofruar Metës karrigen e Presidentit në një nga takimet e fundit që kanë pasur.

Po ashtu mësohet se Ilir Meta nuk ka dhënë një përgjigje aty për aty, por ka thënë se do ta shqyrtojë këtë propozim.

Deri në këto moment Meta ende nuk e ka vendosur se cili do të jetë drejtimi i karrierës së tij politike, shkruan Panorama.

Po ashtu kreu i grupit parlamentar të PS-së, Gramoz Ruçi dhe ai i LSI-së, Luan Rama kanë urdhëruar të gjithë deputetët që të anullojnë vizitat jashtë vendit dhe nesër në orën 17:00 të jenë në Kuvend për votimin e raundit të katërt. /albeu.com/

Berisha paralajmëron Ramën: Nëse do përdorësh armët ndaj nesh, bëhu gati!

Periskopi.com Lajme

“Nëse Edi Rama do të përdorë armët ndaj opozitës të bëhet gati.”

Kështu është shprehur ish kryeministri, Sali Berisha në ‘Tonight Ilva Tare”, teksa u pyet rreth aksionit të radhës së pozitës, e cila ka thënë se nuk do të tërhiqet nga kushtet e saj për një qeveri teknike.

Shqiptarët duan që drejtësia të mos jetë as e PD-së dhe as e PS-së.

Berisha: Na mori 12 mandate Fehmi Avdiu dhe raporti ndërkombëtar tha se Shqipëria është vendi i vetëm me sistem 4 shkallë.

Mos hyrja në zgjedhje e PD-së a është vetëvrasje e PD-së?

Berisha: Mos hyrja e PD-së do të thotë të ketë bllokim të zgjedhje. PD është e vendosur me Edi Ramën nuk do të ketë zgjedhje. PD nuk është e vërtetë që bën këtë betejë për të mos marrë pjesë në zgjedhje. Nëse Rama shkon në zgjedhje do të marrë përgjigjen më spektakolare. Vota prevalon mbi cdo gjë.

Edi Rama takon në spital familjen që u bllokua rrugëve me ambulancë për shkak të bllokimit të rrugëve nga PD’ja

Periskopi.com Video
Greg Delawie

Delawie: SHBA-ja, kundër bisedave të pakujdesshme për bashkim

Periskopi.com Lajme

Ambasadori i SHBA-së në Kosovë, Greg Delawie, i ka cilësuar deklaratat për mundësinë e bashkimit të Kosovës dhe Shqipërisë, si të “pakujdesshme”.

“Qeveria amerikane e mbështet sovranitetin edhe të Kosovës edhe të Shqipërisë. Ne jemi kundër bisedave të pakujdesshme për bashkim dhe të reagimeve të tepruara ndaj deklaratave të tilla, të cilat minojnë qëndrueshmërinë në rajon”, tha Delawie në një deklaratë për Radion Evropa e Lirë.

Reagimi u bë pas një interviste të kryeministrit të Shqipërisë, Edi Rama, për portalin Politico, në të cilën tha se rruga e hapur drejt integrimeve evropiane dhe perspektiva e qartë janë mënyra e vetme që Ballkani të jetë i qetë “por nëse kjo shpresë, perspektivë, mungon atëherë unionet e vogla mund të ndodhin”.

Pas kësaj Presidenti i Kosovës, Hashim Thaçi, i tha Radios Evropa e Lirë se nëse Bashkimi Evropian e mbyll derën për Kosovën, “atëherë të gjithë shqiptarët në rajon do të jetojnë në një hapësirë të vetme”.

Kryeminstri i Serbisë, Aleksandar Vuçiq, u ka bërë thirrje, siç i ka cilësuar, përfaqësuesve politikë të shqiptarëve, që të mos dalin në opinion me deklarata për nevojën që të gjithë shqiptarët e rajonit të krijojnë shtetin e përbashkët, nëse ndalet procesi i integrimeve evropiane, ka transemtuar Beta.

“Ne i lusim, po e përsëris, i lusim që me deklarata të tilla të mos dalin në publik, sepse ato nuk u kontribuojnë marrëdhënieve të mira në rajon dhe as krijimit të atmosferës së bashkëpunimit dhe punës së përbashkët në projekte të rëndësishme”, tha Vuçiq në konferencën për gazetarë në Qeverinë e Serbisë.

Ndërkohë, zëdhënësja e përfaqësueses së lartë të BE-së për siguri dhe politikë të jashtme, Maja Kocijançiq, i tha Radios Evropa e Lirë se “Ballkani Perëndimor ka një perspekitvë të qartë dhe për këtë punohet së bashku me partnerët në rajon, mbi parimet e pajtimit dhe bashkëpunimit rajonal”. (REL)

Takimi që vendos të ardhmen e koalicionit Rama-Meta

Periskopi.com Lajme

Sot do të zhvillohet një takim zyrtar mes kreut të Partisë Socialiste, Edi Rama, dhe kreut të Partisë Lëvizja Socialiste për Integrim, Ilir Meta, ku do të diskutojnë mbi të ardhmen e koalicionit.

Në takimin e parë zyrtar që pritet të mbahet në orën 10:00 në Hotel Tirana, Rama dhe Meta pritet të vendosin nëse do të vijojnë koalicionin PS-LSI edhe për katër vitet e ardhshme.

Ende nuk dihet nëse krerët e dy partive të koalicionit qeverisës do të jenë të vetëm në takim apo bashkë me ta do të marrin pjesë edhe përfaqësues të tjerë, nga këto dy forca politike.

Pse Rama ka ftuar Metën nesër në orën 10-të në takim?

Periskopi.com Lajme

Nesër vendoset fati i koalicionit Rama-Meta Ditën e nesërme aleanca e majtë organizon paradite takimin e parë zyrtar ku do të flitet për rikonfirmimin e koalicionit për “Shqipërinë Europiane” edhe për katër vitet e ardhshme.

Ky takim mes palëve pritet të mbahet në Hotel Tirana, dhe të do jenë përballë njëra¬tjetrës vetëm Partinë Socialiste dhe Lëvizjen Socialiste për Integrim. Mësohet se takimi mes palëve është thirrur nga Rama dhe do të mbahet në orën 10:00.

Dy kryetarët Rama dhe Meta do të shoqërohen edhe nga dy pjesëtarë secili, po ende është e paqartë axhenda e takimit, ndërkohë që edhe gjatë ditës së sotme nuk munguan replikat mes deputetëve të dy krahëve, si Luan Rama me Pjerin Ndreun.

Duket se firmosja zyrtare e koalicionit, përveç modaliteteve të brendshme si dhe programit të përbashkët, do ketë pikë të fortë edhe mënyrat e zgjidhjes së krizës aktuale dhe përfshirjes së opozitës në zgjedhje si edhe çështjen e Presidentit të ri të vendit.

Seanca e parë është javën e ardhshme dhe megjithëse e majta i ka votat, ka lëshuar sinjale se do të kërkojë një President konsensual me të djathtën./Albeu.com/