Shpend Maxhuni

Shpend Maxhuni është emëruar kundërligjshëm në krye të Policisë

Me riemërimin e Shpend Maxhunit si drejtor i Policisë së Kosovës, Ministria e Punëve të Brendshme e ka shkelur Ligjin Për Klasifikimin e Informacioneve dhe Verifikimin e Sigurisë.

Periskopi.com Lajme

Kështu deklaron deputeti i Vetëvendosjes Rexhep Selimi, sipas të cilit, procesi i verifikimit është ndalur për arsye se ky test ka prekur të emëruarit politikë në Policinë e Kosovës. Dështimin e disa prej drejtorëve në testin e AKI-së, e ka konfirmuar edhe deputeti tjetër opozitar Haxhi Shala, raporton KTV

Gjatë kohës kur Bajram Rexhepi ishte ministër i Punëve të Brendshme, me kërkesë të tij, Agjencia Kosovare e Inteligjencës kishte filluar procesin e verifikimit të zyrtarëve policorë.

Këtij testi i ishin nënshtruar krerët më të lartë të këtij institucioni.

Por disa prej drejtorëve kishin dalë negativ në këtë test, përfshirë këtu edhe drejtorin e Përgjithshëm të Policisë së Kosovës, Shpend Maxhuni.

Dështimi i krerëve të Policisë të kalojnë këtë test, sipas deputetit të Vetëvendosjes, Rexhep Selimi, ka bërë që ky proces të pezullohet tërësisht.

Selimi ka thënë se ky test ka përfshirë krerët e Policisë së Kosovës, të cilët janë të lidhur me pushtetin.

Deputeti Selimi e cilëson si shkelje emërimin dhe riemërimin e Shpend Maxhunit si drejtor të Policisë.

Dështimin e disa prej drejtorëve në testin e AKI-së e ka konfirmuar edhe kryetari i Komisionit për mbikëqyrjen e këtij institucioni.

Ndërkaq, në Ligjin Për Klasifikimin e Informacioneve dhe Verifikimin e Sigurisë, neni 27 pika 7, thuhet qartë se “mosmarrja e lejes së sigurisë rezulton me transferimin e personit zyrtar në një pozitë tjetër të barasvlershme, për të cilën nuk nevojitet verifikimi i sigurisë. Nëse kjo nuk është e mundur atëherë mosmarrja e lejes së sigurisë rezulton në largim nga puna apo me përfundim të kontratës mbi vepër ose shërbime në raport me autoritetin publik nëse posedimi i lejes së vlefshme të sigurisë është kërkesë e domosdoshme për punësimin apo shërbimin përkatës”.

AKI-ja, përmes një përgjigjeje elektronike, ka sqaruar se procesi i verifikimit të zyrtarëve shtetërorë, të cilët kanë qasje në informacion të klasifikuar, sipas ligjeve relevante të Republikës së Kosovës, nis me vet kërkesën e institucioneve përkatëse, ku shërbejnë zyrtarët në fjalë.

Ndërsa nuk kanë dhënë përgjigje nëse Shpend Maxhuni ka kaluar këtë test.

“Lidhur me interesimin tuaj, me keqardhje ju njoftojmë se procesi i verifikimit është i klasifikuar dhe rrjedhimisht nuk mund ta komentojmë”.

MPB-ja dhe Policia e Kosovës kanë hedhur topin te njëra-tjetra dhe nuk kanë dhënë detaje nëse e kanë kërkuar testin dhe çfarë ka ndodhur me zyrtarët policorë, të cilët nuk e kanë kaluar atë.

Dogana e Kosoves  - vula

Dogana bëhet me Ushtrues Detyre por i njëjti nuk mund të jetë drejtor

Me vendim të kryeministrit të Republikës së Kosovës, Isa Mustafa është emëruar si ushtrues detyre i drejtorit të përgjithshëm të Doganës, Fahri Gashi.

Periskopi.com Lajme

Gashi do të mbajë këtë pozitë deri në përfundimin e procedurave të përzgjedhjes së drejtorit të përgjithshëm sipas Kodit të Doganor.

Por, siç raporton Periskopi, Gashi nuk mund të jetë Drejtor i doganës pas disa ditës. Kjo ngase ai nuk ka konkurruar për këtë pozitë.

Ushtruesi i detyrës është oficer karriere me përvojë mbi 15 vite në Doganën e Kosovës ku ka ushtruar funksione të rëndësishme, derisa para emërimit ishte udhëheqës rajonal i drejtorisë së regjionit të Podujevës.

Drejtori i deritanishëm, Lulzim Rafuna përfundon mandatin në fund të kësaj, jave e shpejt pritet të përzgjidhet drejtori i ri.

Rafuna është njëri nga personat që ka konkurruar.

Kandidatët që kanë konkuruar për këtë pozitë janë: Osman Ejupi, Bajram Rexha, Agim Nika, Besnik Prokshi, Bahri Berisha,  Albert Mirdita, Bashkim Arifi,  Shqipron Misini, Hamdi Hoxha, Lulzim Rafuna, Ardian Jashari, Gazmend Maloku,Kujtim Qafleshi, Ekrem Grabanica si dhe Naser Renilovci./ Periskopi