img_8999-1

Hoxha flet në Vjenë: Do ta fuqizojmë sundimin efektiv të ligjit (Foto)

Në ditën e dytë të konferencës ndërkombëtare Com-Sult, që po mbahet në Vjenë, me moton “Thirrja e së ardhmes”, ku po merr pjese edhe Kryetari i Kuvendit Kadri Veseli, Ministrja e Drejtësisë, Dhurata Hoxha, ka folur për perspektivën e anëtarësimit të Kosovës në BE dhe është përqendruar në një nga kriteret kryesore për integrim- sundimin e ligjit.

Periskopi.com Lajme

“Ashtu siç Bashkimi Evropian është ndërtuar mbi vlerat e dinjitetit njerëzor, lirisë, demokracisë, barazisë, sundimit të ligjit dhe respektimin e të drejtave të njeriut dhe të drejtat e pakicave, po ashtu, ato janë vlera të Republikës së Kosovës dhe qytetarëve të saj duke i promovuar, fuqizuar dhe sendërtuar ato”, theksoi ministrja Hoxha.

Ministrja Hoxha theksoi rëndësinë dhe gatishmerinë e  bashkëpunimi midis BE-së dhe Kosovës me qëllim të forcimit të pavarësinë, paanshmërinë, llogaridhënien dhe efikasitetin e gjyqësorit në funksion të fuqizimit të sundimit të ligjit. Më tej, Ministrja përmendi progresin që ka shënuar Kosova deri më tani në luftën kundër krimit, duke theksuar se kjo luftë është prioritet i Republikës së Kosovës si e vetmja rrugë drejt integrimit në strukturat evropiane.

Ndër të tjera, Ministrja Hoxha theksoi edhe rëndësinë që ka  sundimi efektiv i ligjit për ambientin e të bërit biznes duke krijuar siguri më të madhe juridike për biznese vendore si dhe investitorët e huaj.

Në fund, Ministrja Dhurata Hoxha, ritheksoi gatishmërine e Kosovës dhe popullit të saj për t’u bërë pjesë e BE-së, vlerat dhe parimet e të cilës tashmë janë pjesë e Shtetit dhe shoqërisë kosovare.

img_8999-1  img_9014-1  img_9041-1  img_9061-1  img_9081-1  img_9117-1

Dhurata Hoxha

Edhe ministrja e Drejtësisë thotë se po punohet për lirimin e Haradinajt

Ministrja e Drejtësisë së Kosovës, Dhurata Hoxha në seancën e jashtëzakonshme ku po diskutohet për arrestimin e ish-kryeminsitrit të Kosovës Ramush Haradinaj, njëherit edhe kryetari i Aleancës për Ardhmërinë e Kosovës, Ramush Haradinaj ka treguar për hapat që i ka ndërmarr ministria të cilën ajo udhëheqë për Haradinajn, shkruan Gazeta Monitor.

Periskopi.com Lajme

 

Ministrja e Drejtësisë është shprehur se ndalimi i Haradinajt paraqet shkelje të të Drejtave të Njeriut dhe shkelje të të Drejtave Ndërkombëtare edhe nga shteti i Serbisë i cili ka kryer krime ndaj Kosovës.

“Ju siguroj që Ministria e Drejtësisë ka ndërmarr dhe do të ndërmarr masat e nevojshëme për lirimin e menjëhershme për Haradinajn”, tha Hoxha.

Hoxha ka treguar që Ministria e Drejtësisë është duke i ndërmarr gjitha hapat për lirimin e Ramush Haradinaj, madje ajo tha se është në proces të një takimi me ministrin e Drejtësisë së Francës.

“ Ndalimi i Haradinajt paraqet shkelje të rëndë të të drejtave të njeriut dhe shkelje ndërkomëbtare nga Serbia i cili kreu krime ndaj Kosovës. Ne kemi telefonuar në Francë për të marrë detajet, dhe në bashkëveprim me institucionet përkatëse ne kemi kërkuar Francës lirimin e Haradinajt. MD u bashkërendua me ambasadorin dhe konsullin në Francë që janë duke e ndjekur procesin në Francë. MD është në proces të takimit me ministrin e Drejtësisë së Francës për këtë rast. Ne kemi dërguar edhe kërkesën për lirimin e Haradinaj, dhe ka deklaruar që ky arrestim është kryekëput politik i Serbisë”, tha Hoxha.

 

Dhurata Hoxha

Dhurata Hoxha flet për Gjykatën Speciale dhe marrëveshjet ndërkombëtare për ekstradime

Në intervistën dhënë “Indekonlinë”, të fundit për 2016, ministrja e Drejtësisë, Dhurata Hoxha flet për fokusimin e kësaj ministrie në vitin 2017, sukseset dhe dështimet e MD-së në vitin që lamë pas. Ministrja Hoxha flet edhe për rastin e Astrit Deharit, arratisjes së të dënuarve të rastit “Medicus”, ekstradimin e Xhabir Zharkut. Ministrja tregon  se viti 2017 do të nis me nënshkrimin e disa  marrëveshjeve për ekstradim me disa shtete.

Periskopi.com Intervista

Në vitin 2017 pritet të  funksionalizohet Gjykata Speciale. Sa është e gatshme Ministria e Drejtësisë, t’i dal në ndihmë kësaj gjykate?

Dhurat Hoxha: Përgjegjësia e Ministrisë së Drejtësisë për këtë çështje është tejet e limituar, andaj bashkëpunimi i Ministrisë së Drejtësisë në këtë drejtim do të jetë në pajtim me këtë përgjegjësi.

A do të jetë një sfidë tjetër për sistemin e drejtësisë, Gjykata Speciale?

Dhurata Hoxha: Sfidë mbetet procesi i synuar integrues euro-atlantik, dhe besojmë fort se do ta kalojmë me sukses.

Cilat janë planet e ministres për pavarësimin e gjyqësorit dhe prokurorisë nga politika, pasi Raporti i Progresit ka paraqitur si pengesë ë ndikimin e politikës në sistemin e drejtësisë?

Dhurata Hoxha: Pavarësia e gjyqësorit është thelbësor për proceset nëpër të cilat po kalon vendi ynë. Ministria e Drejtësisë ka iniciuar formimin e Këshillit Prokurorial të Kosovës, si kategori e pavarur kushtetuese, që deri më tani ka qenë pjesë e Këshillit Gjyqësor të Kosovës. Qeveria ka siguruar, po ashtu, mjete shtesë për gjyqtarë dhe prokurorë për ta mbështetur edhe më tej pavarësinë e gjyqësorit. Ministria e Drejtësisë është e obliguar ta respektoj pavarësinë e gjyqësorit, sistemin prokurorial si dhe mbikëqyrjen e tyre nëpërmjet instrumenteve të brendshme të këtyre institucioneve, pa ndikim nga jashtë.

Këtë vit, sidomos muajt e fundit Shërbimi Korrektues i Kosovës ka marr kritika të mëdha për keq menaxhim. Çka do të bëni ju si ministre e Drejtësisë për përmirësimin e gjendjes në SHKK?

Dhurata Hoxha: SHKK dhe Shërbimi Sprovues është duke zbatuar praktikat më të mira në këtë fushë. Lëshimet e mundshme në zinxhirin e funksionimit dhe komandimit janë duke u evidentuar dhe duke u përmirësuar. Jeni në dijeni për veprimet ndaj shkeljeve të supozuara, duke i mënjanuar të gjithë ata që janë në procedurë gjyqësore, kemi rezultate edhe sa i takon luftimit të korrupsionit brenda institucioneve korrektuese.

Rasti i vdekjes së aktivistit të VV-së në burgun e Prizrenit, Astrit Dehari, hapi çështjen e sigurisë në burgje. A ka siguri në burgjet e Kosovës, dhe cilat janë planet e MD-së për rritjen e sigurisë në burgje?

Dhurata Hoxha: Siguria në burgje, krahasuar me regjionin është pakrahasueshëm më e mirë. Ne jemi duke zbatuar praktikat më të mira në këtë fushë, me legjislacion që mund të duket në shikim të parë gjeneroz por është sistem që ruan të drejtat dhe liritë e njeriut, është sistem human ku trajtimi ka standarde të larta. Sigurisht, ka vend për përmirësim por percepcioni i krijuar, është i ndikuar nga politika.

A besoni se vitin e ardhshëm do të bëni marrëveshje ekstradimi edhe me disa shtete, me të cilat ende nuk ka marrëveshje të tilla?

Dhurata Hoxha: Po, me disa shtete do të fillojmë së zbatuari marrëveshjet e ekstradimit, kështu do të lehtësojmë zbatimin e ligjit dhe vendosmërinë që proceset e hapura juridike të realizohen. Nëpërmjet këtij bashkëpunimi ne do të krijojmë praktikat e mira të komunikimit të ndërsjellë edhe pse disa shtete ende nuk e kanë njohur pavarësinë e vendit tonë. Besojmë se askush nuk do të ketë mundësi t’i ikë zbatimit të drejtësisë.

Kemi rastin e arratisjes së ish-kryetarit të komunës së Kaçanikut, Xhabir Zharku, si dhe arratisja e fundit e të dënuarve të rastit “Medicus”. Çfarë ka bërë Ministria e Drejtësisë për ekstradimin e tyre dhe vuajtjen e dënimit?

Dhurata Hoxha: Edhe rasti “Xhabir Zharku” edhe rasti i të dënuarve në rastin “Medicus” janë në proces, ato që i ofron bashkëpunimi ndërkombëtar për momentin nuk janë duke i dhënë frytet e pritura nga ne. Ministria e Drejtësisë ka zbatuar të gjitha kërkesat e organeve tona gjyqësore lidhur me këto raste dhe ka ndërmarrë të gjithë hapat që këto kërkesa të realizohen.

Përveç këtyre dy rasteve, është edhe rasti i ekstradimit të të dyshuarit për vrasjen e Diana Kastratit, ish-bashkëshorti i saj Adnan Jashari, i cili që nga viti 2011 gjendet në duar të autoriteteve spanjolle. Çfarë ka bërë Ministria e Drejtësisë në këtë aspekt sa i përket mundësisë së ekstradimit të tij nga autoritetet spanjolle tek ato vendore?

Dhurata Hoxha: Veprimet e ndërmarra nga Ministria e Drejtësisë për ekstradimin e këtij personi të kërkuar është në proces. Marrëveshja për bashkëpunim juridik ndërkombëtar me Spanjën në këtë rast por edhe problemin i njohjes së shtetit tonë nga Spanja e komplikon çështjen. Ky person ka fletë kërkim ndërkombëtar për arrest, çështje që kanë ngritur institucionet tona. Sigurisht se do të jemi të përkushtuar që rasti të mbyllet në favor të drejtësisë së vendit tonë.

Cili do të jetë fokusimi i ministres së drejtësisë për vitin e ardhshëm në këtë institucion?

Dhurata Hoxha: Rishikimi gjithëpërfshirës i sistemit të drejtësisë, fuqizimi i zbatimit të ligjit dhe ngritja e performancës së çdo njësie të Ministrisë së Drejtësisë.

Çka mund të cilësoni sukses dhe  çka dështim të sistemit të drejtësisë për këtë vit?

Dhurata Hoxha:   Hartimi i ligjeve, zbatimi i ligjeve, fuqizimi i ligjit si dhe bashkëpunimi ndërkombëtar përbëjnë disa nga sukseset e ministrisë. Dështim mund ta shohim profilizimin e pamjaftueshëm të segmenteve të caktuara brenda sistemit të drejtësisë, komunikimi i brendshëm ndërinstitucional dhe specifikimi i përgjegjësive që lidhet me llogaridhënien, mund të jenë disa nga dobësitë e këtij dikasteri./

Ndodh edhe kjo, Isa Mustafa ofendon të gjithë e kërkon nga të tjerët të mos e bëjnë

Periskopi.com Video
haxhiu-hoxha

Haxhiu për ministren Hoxha: Zëdhënëse e përkryer e klanit ‘Pronto’

Deputetja e Vetëvendosjes Albulena Haxhiu, e ka akuzuar ministren e Drejtësisë Dhurata Hoxha për, siç ka thënë ajo, mbështetjen e krimit në “rastin Dehari”.

Periskopi.com Lajme

Ajo thotë se ministrja Hoxha, “ mos le të mos fshihet prapa gjinisë sepse nuk është asgjë më shumë sesa një zëdhënëse e përkryer e klanit Pronto dhe Kadri Veselit”.

Postimi i plotë i Haxhiut:

Ministrja e Drejtësisë, Dhurata Hoxha, në duar të së cilës vdiq dhunshëm Astriti, në vend se të jepte përgjegjësi, të paktën morale, merr guximin të fyejë publikisht familjen e Astritit dhe Lëvizjen VETËVENDOSJE!.

E njëjta pa fije turpi, edhe në seancën plenare, por edhe mbrëmë në emisionin Rubikon, mori guximin të shpifë në lidhje me atë se çfarë i ndodhi Astritit. Madje edhe të shtrembërojë fakte.

Në shpërputhje me mandatin e saj, kërkon nga prokurori hetime për ekspertët e pavarur dhe avokatin e familjes, vetëm sepse e kanë në duar gjithë sistemin dhe e keqpërdorin atë sa herë që munden dhe duan.

Po, ajo është grua dhe si grua po qëndron në mbështetje të krimit dhe ky është shembulli më i keq për një grua.

Andaj, le të mos fshihet prapa gjinisë sepse nuk është asgjë më shumë sesa një zëdhënëse e përkryer e klanit Pronto dhe Kadri Veselit.

bajrami-hoxha

Bajrami: Ministrja e Drejtësisë në mbrojtje të drejtuesve të klanit pronto

Shefja e grupit parlamentar të NISMA për Kosovën, Valdete Bajrami thotë se ministrja e drejtësisë, Dhurata Hoxha mbrëmë në emisionin Rubikon, foli gjerë e gjatë për vete, për shefat e saj partiak dhe pak edhe për sistemin e drejtësisë në Kosovë.

Periskopi.com Lajme

Përmes një shkrimi, ajo ka analizuar vetëm një pjesë të intervistës së ministres, përkatësisht atë pjesë ku ajo përpiqet të përgjigjet në pyetjet për aferën Pronto, raporton Periskopi

Shkrimi i plotë i Valdete Bajramit:

Edhe një shikues i zakonshëm dhe jo shumë i vëmendshëm, me lehtësi do të vërente se ministrja e drejtësisë kur fliste për aferën pronto ishte gjithçka tjetër, veç e drejtë nuk ishte. Mënyra se si iu qas kësaj çështje ajo mbrëmë, është një dëshmi se ajo aty është emëruar nga protagonistët e klanit pronto për t’iu shërbyer e mbrojtur ata dhe jo qytetarëve e drejtësisë në Kosovë.

Në fillim ajo bëri përpjekje që këtë temë e cila rëndon mbi supet e drejtuesve të PDK-së ta kalojë shpejt me fjalitë standarde dhe boshe se: “Kjo është çështje e drejtësisë” dhe “Të gjithë janë të barabartë para ligjit”.

Vetëm deri këtu ishte në funksion të postit që e mban. Të gjitha ato që më pas ajo i tha lidhur me këtë temë ishin në shërbim të shefave të saj partiak. Në vazhdim të intervistës ministrja Hoxha tha se: “Besoj që nuk është vetëm PDK’ja që i ka biseduar këto gjëra, por të gjitha partitë politike, edhe ato opozitare që menaxhojnë komunat në ditët e sotme veprojnë njëjtë”.

Pra ministrja e drejtësisë e din këtë nga përvoja personale si zyrtare e PDK-së, por asnjëherë nuk ka qenë e gatshme që të denoncojë shkeljet e tilla të ligjit sepse duke qenë edhe vet produkt i kësaj logjike të veprimit ajo ka përfituar nga këto shkelje.

Më pas thotë se: “Ky është një mentalitet i së kaluarës ku funksionarët e lartë politik nga komunizmi që me një thirrje telefonike i kanë vendosur ose zhvendosur personat të cilët kanë qenë të afërt me ta në pozita të caktuara” . Sikur e shini nga kjo pjesë, ministrja Hoxha e pranon se udhëheqësit e partisë së saj udhëhiqen nga një mentalitet komunist.

Në këtë pjesë të “sqarimeve” të saj duke thënë se : “Nuk mund të themi se janë domosdoshmërisht të njëjtit persona, sepse shefi i grupit parlamentar ka detyra të caktuara dhe të mos kthehem në marrëveshjet politike që janë bërë”, ajo nxjerr në shesh misionin e saj që e ka si ministre e drejtësisë, e që është ekskluzivisht mbrojtja e shefave të saj Hashim Thaçi dhe Kadri Veseli nga përgjegjësia që kanë për këtë aferë. Në këtë pjesë ajo qartë vihet në mbrojtje të shefave të saj Thaçi dhe Veseli dhe bën me gisht kah, sipas saj, përgjegjësi i vetëm shefi i grupit parlamentar Adem Grabovci. Tani, a mund t’i besohet kësaj se do të jetë e pa anshme në ushtrimin e detyrës së saj si ministre drejtësisë? Sigurisht që jo!

Në fund kam nxjerrë pjesën më skandaloze të intervistës së saj, pjesën ku ajo vihet hapur në mbrojtje të klanit pronto, dhe jo vetëm që vihet në mbrojtje të saj por duke thënë se: “Një gazetari hulumtuese po të merrej më shumë me këtë rast do të vërente që personat të cilët janë përfolur në ato përgjime nuk i kanë marrë ato pozita” ndërhyn në punën e pavarur të sistemit të drejtësisë. Pra, përmes kësaj deklarate ajo e paragjykon se si duhet të përfundojë e tërë kjo çështje. Kjo është e pa pranueshme. Në një vend demokratik, një ministre e drejtësisë nuk do të guxonte të bëj deklarata të tilla, ose edhe po të guxonte, dorëheqja nga funksioni i ministres do të ishte e pashmangshme./ Periskopi

dhurata

Kërkohet hetim ndaj deklaratave të Tomë Gashit dhe mjekoligjorëve nga Shqipëria

Ministrja e Drejtësisë, Dhurata Hoxha, për ta sqaruar opinionin publik dhe verifikuar pretendimet e njerëzve të Lëvizjes Vetëvendosje, ka kërkuar që të hetohen deklaratat e avokatit Tomë Gashi, si dhe të dy mjekoligjorëve nga Shqipëria.

Periskopi.com Lajme

Telegrafi e ka parë letrën që i është dërguar kryeprokurorit Aleksandër Lumezi nga ministrja Dhurata Hoxha, e cila mban datën e sotme 20 dhjetor 2016, për hetimin e raporteve të personave jokompetent, siç thuhet në këtë shkresë, që dalin përtej autorizimeve ligjore dhe që janë në kundërshtim edhe me kodin penal.

Konkretisht, në këtë shkresë kërkohen hetime për deklaratat e avokatit Tomë Gashi dhe raportin personal të mjekoligjorit nga Shqipëria, Besim Ymaj dhe pedologut Besim Latifaj.

Kjo është përmbajtja e letrës dërguar kryeprokurorit të shtetit, Aleksandër Lumezi, nga ministrja Dhurata Hoxha:

“I nderuar z. Kryeprokuror,

Fillimisht më lejoni të shpreh konsideratë për Juve dhe punën Tuaj.

Kohëve të fundit jemi dëshmitarë të deklarimeve, por edhe publikimit të raporteve të cilat i referohen humbjes së jetës së Astrit Deharit, ish i paraburgosur në Qendrën e Paraburgimit në Prizren.

Publikimi i raporteve të tilla nga ana e personave jo kompetent dhe atyre që dalin përtej autorizimeve ligjore, sipas pikëpamjes sonë, konsiderojmë se bien ndesh me dispozitat e legjislacionit në fuqi dhe për më tepër janë edhe në kundërshtim me dispozita të caktuara të kodit penal, që i referohen detyrës zyrtare, përkatësisht keqpërdorimit të detyrës zyrtare, duke hartuar dhe më pas edhe publikuar raporte të tilla, e duke mos qenë të autorizuar paraprakisht për një gjë të tillë.

 

Andaj mbi këtë bazë dhe në pajtim me autorizimet tuaja ligjore, si dhe me mirëkuptim, nga ju kërkojmë autorizimin e fillimit të hetimeve për: z. Tomë Gashi, avokat, z. Besim Ymaj, ekspert i mjekësisë ligjore nga Shqipëria, si dhe Besim Latifaj, pedolog.

Hetimet e tilla të bëhen para së gjithash për qellim të qartësimit të opinionit publik dhe transparencës së plotë në lidhje me këtë rast, si dhe verifikimit të pretendimeve se i ndjeri Dehari është vrarë”, thuhet në këtë letër.

dhurata

Hoxha: I kemi ndërmarr të gjitha veprimet për zbardhjen e rastit të Astrit Deharit

Ministrja e Drejtësisë, Dhurata Hoxha në seancën e Kuvendit të Kosovës ku po diskutohet për rastin e Astrit Deharit tha se kanë ndërmarrë të gjitha veprimet për zbardhjen e rastit.

Periskopi.com Lajme

Hoxha tha se përkundër faktit se ka pasur diskutime dhe deklarime nga më të ndryshmet në lidhje me këtë rast, është përpjekur maksimalisht të rezervohet nga deklarimet për të mos interferuar në hetimet e këtij rasti dhe që organeve kompetente t’u jepet hapësirë që ta kryejnë punën e tyre në mënyrë të pavarur dhe profesionale.

“Jam thellësisht e shqetësuar për tendencën për të paragjykuar rrethanat e rastit dhe rezultatin. Janë bërë shumë deklarime të cilat vetëm sa kanë nxitur opinionin publik duke u nxituar me përfundime para marrjes së raportit zyrtar nga Prokuroria, si dhe edhe pas daljes së Prokurorisë me raportin zyrtar. Unë ju bëj thirrje të gjithëve që të përmbahen nga deklarimet që paragjykojnë punën e institucioneve dhe që shfaqin mosbesim ndaj kësaj pune. Ne gjatë gjithë kohës po kërkojmë sundim të ligjit, transparencë dhe llogaridhënie. Konsideroj, se të besojmë në institucionet tona është më e pakta që duhet të bëjmë në këto rrethana”, ka thënë ministrja Hoxha.

Hoxha tha se garanton se ministria që ajo drejton ka bërë çdo gjë që është në dorën e saj për të siguruar transparencë të plotë dhe për të ndihmuar në zbardhjen e rastit, por me kujdes që të mos dëmtohet procesi dhe të mos ndërhyhet në punën dhe pavarësinë e institucioneve të pavarura.

“Çdo ndërhyrje e imja apo e Ministrisë së Drejtësisë pas kalimit të rastit te Prokuroria është ndërhyrje në pavarësinë e këtij institucioni, pavarësia e të cilit është një ndër shtyllat e sundimit të ligjit”, ka thënë ajo.

Hoxha ka bërë thirrje që jo vetëm veprimet, por për aq sa është e mundur edhe deklarimet, veçmas të personave me përgjegjësi dhe që ushtrojnë funksione publike, të bëhen në pajtim me ligjet në fuqi dhe mos të tentojmë që të përfitojmë në çfarëdo forme nga tragjedi të tilla.

“Le të mbetet në përgjegjësinë politike, përgjegjësinë profesionale dhe ndërgjegjen njerëzore të të gjithë atyre që në çfarëdo forme kane tentuar dhe po tentojnë ta keqpërdorin dhe përfitojnë nga kjo tragjedi”, ka thënë Hoxha.

Më tej, Ministrja e Drejtësisë, ka treguar se si institucion përgjegjës për menaxhimin e institucioneve korrektuese, me të marrë lajmin për humbjen e jetës së të ndjerit Astrit Dehari, ka autorizuar fillimisht inspektimin nga Inspektorati i Ministrisë së Drejtësisë.

“Për shkak të ndjeshmërisë së rastit, inspektorati ka bërë inspektim gjithëpërfshirës për veprimet dhe sjelljen e stafit ndaj të ndjerit Dehari, që nga momenti i pranimit në Qendrën e Paraburgimit në Prizren, më datë 01 shtator 2016 dhe është përgatitur raporti, të cilin e kam pranuar me datë 21 nëntor 2016 dhe i njëjti për hir të transparencës është bërë publik”, ka thënë ajo.

Sipas raportit të Inspektoratit të Ministrisë së Drejtësisë, ministrja Hoxha ka treguar se konstatohet se nuk është gjetur asnjë veprim i ndërmarrë nga ana e personave përgjegjës në kuadër të institucionit (Qendrës së Paraburgimit në Prizren), i cili në çfarëdo mënyre do të ishte nxitës apo shkaktarë i humbjes së jetës së të ndjerit Dehari.

Megjithatë, sipas ministres Hoxha, inspektorati kishte rekomanduar se për shkak të neglizhimit të procedurave të ndërmerren masa ndaj personave përgjegjës, përkatësisht ndaj oficerit në detyrë, mbikëqyrësit të krahut, si dhe personave përgjegjës të sigurisë në bazë të hierarkisë.

“Ne kemi ndërmarrë veprime konkrete, me ç’rast janë iniciuar procedurat disiplinore ndaj një zyrtari korrektues, dy mbikëqyrësve dhe ushtruesit të detyrës së Drejtorit në Qendrën e Paraburgimit në Prizren, të cilëve po ashtu u është shqiptuar edhe masa e suspendimit si masë paraprake deri në përfundim të procesit disiplinor”, ka thënë Hoxha.

Gjithashtu, Hoxha ka treguar edhe për procesin e ekzaminimit të trupit të të ndjerit Dehari, ku ekspertët e mjekësisë ligjore në një proces transparent me prezencën edhe të mjekëve të tjerë të propozuar nga familja dhe vëzhguesve nga EULEX kanë konstatuar se i ndjeri Dehari është vetëvrarë.

“Edhe Prokuroria e Shtetit ka dalë me njoftimin zyrtar se pas hetimeve preliminare rezulton se i ndjeri është vetëvrarë”, ka thënë ajo.

Hoxha, po ashtu ka përmendur edhe EULEX-in që kishte përcjellë dhe monitoruar të gjithë procesin në rastin Dehari dhe që e kishte vlerësuar të gjithë procesin profesional dhe në pajtim me standardet përkatëse. /Telegrafi

 

Dhurata Hoxha

Dhurata Hoxha kërkon më shumë bashkëpunim mes vendeve për efikasitet në drejtësi

Ministrja e Drejtësisë, Dhurata Hoxha sot ka marrë pjesë në Forumin Ministror për Drejtësi të BE-së dhe Ballkanit Perëndimor që po mbahet në Brdo të Sllovenisë.

Periskopi.com Lajme

Gjatë këtij Forumi u diskutua për zhvillimet e fundit në shtimin e bashkëpunimit ndërkombëtarë ndërmjet shteteve të Ballkanit Perëndimor, kryesisht për efikasitetin e gjyqësorit dhe mundësit për zvogëlimin e numrit të rasteve dhe kohëzgjatjen e tyre, bashkëpunimin gjyqësor në çështjet civile dhe penale, si dhe zhvillimi i besimit të ndërsjellë ndërmjet “Eurojust” dhe partnerëve të Ballkanit Perëndimor.​

Ministrja Hoxha gjatë fjalimit të saj përmendi sfidat me të cilat ballafaqohet Kosova në fushën e gjyqësorit, numrin e madh të lëndëve të pazgjidhura si dhe zgjatjen e procedurave gjyqësore. Po ashtu Ministrja Hoxha shprehu gatishmërinë për të bashkëpunuar me vendet fqinje dhe vendet e BE-së dhe për të mësuar nga praktikat me të mira. Përderisa Kosova synon integrimin euroatlantik, duam të marrim praktikat më të mira para se të lëvizim së bashku në familjen evropiane, shtoi Ministrja Hoxha.

“Ne jemi të gatshëm të bëjmë reformat e nevojshme në mënyrë që të përgatisim rrugën tonë drejt bashkëpunimit, koordinimit dhe integrimit. Gjithashtu, ne jemi të gatshëm politikisht dhe me kapacitete profesionale për të ndërmarrë të gjitha përgjegjësitë e nevojshme për të mirën e qytetarëve të Kosovës, Drejtësisë së Kosovës dhe qytetarëve të rajonit dhe më gjerë. Qeveria e Kosovës është duke punuar vazhdimisht për të rritur besueshmërinë e qytetarëve të Kosovës në sistemin e drejtësisë. Lufta kundër korrupsionit dhe krimit të organizuar si një nga sfida më të mëdha në Kosovë dhe rajon është prioritet për Ministrinë e Drejtësisë” tha Ministrja Hoxha.

Diskutimet do të vazhdojnë tutje rreth bashkëpunimit me vendet e Ballkanit Perëndimor si dhe do të bëhet prezantimi i raportit të përkohshëm të planit të veprimit 2015 – 2017 dhe çështje të tjera me rendësi si, trafikimi i armëve nga Ballkani Perëndimor në Bashkimin Evropian si dhe veprimet e përbashkëta që parashihet të merren gjatë këtij bashkëpunimi në të ardhmen.

Ministrja Hoxha po qëndron në Slloveni me ftesë të Ministrisë së Drejtësisë të Sllovenisë në bashkëpunim me Presidencën Sllovene./ Periskopi

photo-2-1 photo-1-1 photo

Ministria e Drejtësisë forcon luftën kundër konfliktit të interesit

Ministrja Dhurata Hoxha, sot në mbledhjen e Qeverisë ka paraqitur për aprovim Projektligjin për parandalimin e konfliktit të interesit në ushtrimin e funksionit publik.

Periskopi.com Lajme

Hartimi dhe finalizimi i këtij Projektligji është rezultat i punës dhe përkushtimit të vazhdueshëm të Ministrisë së Drejtësisë në funksion të avancimit të infrastrukturës ligjore në përgjithësi e me theks të veçantë legjislacionit të fushës së luftimit dhe të parandalimit të korrupsionit.

Gjatë prezantimit të këtij projektligji, Ministrja Hoxha tha se përmes angazhimeve tona duke përfshirë edhe aprovimin e këtij projektligji, konsideroj se institucioneve kompetente po iu ofrojmë legjislacion adekuat, në mënyrë që puna e tyre të jetë sa më efikase dhe efektive në drejtim të parandalimit dhe luftimit të dukurive negative, veçmas korrupsionit. Në këtë aspekt konflikti i interesit dhe shmangja nga ky i fundit është një mundësi e mirë përmes të cilës do të ndikohet në drejtim të parandalimit të kësaj dukurie.

Po ashtu, Ministrja Hoxha shpalosi edhe përmbajtjen e këtij projektligji, duke theksuar pikat kryesore ku parashihet një numër i konsiderueshëm i ndalesave për zyrtarët publik. “Përcaktimi i papajtueshmërisë në ushtrimin e funksionit publik, i cili parasheh që zyrtari i lartë nuk mund të jetë menaxher, përfaqësues i autorizuar ose anëtar i ndonjë organi menaxhues apo mbikëqyrës i personave juridik privat, fitimprurës. Me marrjen e detyrës dhe gjatë ushtrimit të saj, zyrtari ka për detyrë të parandalojë dhe të zgjidhë vetë në mënyrën më efektive të mundshme, çdo situatë të konfliktit të tij të interesit; çdo udhëheqës dhe institucion udhëheqës duhet të marrë të gjitha masat e nevojshme për të parandaluar dhe zgjidhur rastet e konfliktit të interesit”, shtoi Ministrja Hoxha.

Përmes këtij Projektligji është bërë përpjekje t’i kushtohet vëmendje e veçantë aspektit preventiv përkatësisht parandalimit të konfliktit të interesit. Projektligji është në harmoni të plotë me dispozitat e legjislacionit të BE-së, po ashtu është hartuar në bashkëpunim me përfaqësuesit e Agjencisë Kundër Korrupsionit, si ekspertë të Këshillit të Evropës dhe Zyra e BE-së në Kosovë./ Periksopi

photo-1

Dhurata Hoxha thotë se fuqizimi i sundimit të ligjit – nuk ka alternativë

Ministrja Dhurata Hoxha mori pjesë në takimin e Bordit të projektit të UNDP-së “Mbështetje për fuqizimin e sundimit të ligjit në Kosovë”, me ç’rast theksoi rëndësinë e mbështetjes që vije nga partnerët e Ministrisë së drejtësisë për reformën ligjore dhe fuqizimin e sundimit të ligjit.

Periskopi.com Lajme

“Ministria e Drejtësisë është duke përmirësuar llogaridhënien e prokurorëve dhe gjyqtarëve duke reformuar, në aspektin ligjor, procedurat disiplinore kundër tyre; Jemi duke kompletuar mes tjerash reformën e të drejtave pronësore e cila do të ngërthen në vete legjislacionin mbi pronën publike dhe do të sqarojë administrimin e të drejtave pronësore ekzistuese ne vend”, theksoi ministrja Dhurata Hoxha.

Mbështetja nga UNDP dhe Ambasada e Norvegjisë në këtë rast, theksoi ministrja Hoxha, duke përfshirë këtu edhe partnerët tjerë, është shumë e nevojshme sepse, me këto reforma synohet krijimi i një baze të shëndoshë për funksionim më efikas dhe efektiv të sektorit të sundimit të ligjit.

Falë mbështetjes së këtij projekti, dhe disa projekteve tjera nga partnerë tjerë ndërkombëtarë,  Ministria e Drejtësisë, ka kompletuar këtë vit pakon e reformës ligjore e cila adreson mangësitë funksionale në profesionet e lira siç janë ndërmjetësimi dhe provimi i jurisprudencës.

Ministrja Hoxha vlerësoi lartë përkushtimin e ekipit të projektit, përfaqësuesit relevant dhe përfitues të projektit, Ministria e Drejtësisë, Këshilli Gjyqësor i Kosovës, Instituti Gjyqësor i Kosovës, Këshilli Prokurorial i Kosovës, Ndërmjetësimi dhe Gjykata e Apelit duke falënderuar Ambasadën e Norvegjisë për kontributin pa mbështetjen se cilës nuk do te mund të realizoheshin këto rezultate dhe prioritete./ Periskopi

dhurata

Hoxha: Zero tolerancë ndaj dhunës seksuale dhe dhunës mbi baza gjinore

Periskopi.com Lajme

Ministrja e Drejtësisë e Republikës së Kosovës, Dhurata Hoxha, sot, ka marrë pjesë në konferencën me temën “Hetimi i dhunës seksuale dhe të bazuar në gjini – Sfidat dhe mundësitë për bashkërendim forenzik” të organizuar nga misioni i EULEX-it në Kosovë.

Gjatë kësaj konference, Ministrja Hoxha, ka falënderuar EULEX-in dhe institucionet vendore për angazhimin e tyre në lidhje me përdorimin sa më  efektiv të teknikave forenzike gjatë rasteve të krimeve të dhunës seksuale të cilat paraqesin shkelje të rëndë të drejtave të njeriut.

”Është tejet shqetësuese kur dëgjon numrin e rasteve të dhunës seksuale dhe pikërisht për këtë ekziston një vullnet i madh  për ta luftuar këtë dukuri negative. Duke marrë parasysh ndërlikueshmërinë e dhunës seksuale dhe dhunës mbi baza gjinore, duhet të krijohet një qasje më e  mirë, përmes bashkëpunimit ndërmjet akterëve relevant sepse vetëm në këtë mënyrë mund t’i luftojmë këto shkelje të të drejtave të njeriut. Jemi të përkushtuar për zero tolerancë ndaj dhunës seksuale dhe dhunës mbi baza gjinore”, theksoi Ministrja Hoxha.

Ministrja Hoxha theksoi se me propozim të Ministrisë së Drejtësisë, nga Qeveria është emëruar “Komisioni për kompensimin e Viktimave të Krimit”, si dhe  janë përgatitur edhe draftet e udhëzimeve administrative.

Ministria e Drejtësisë në bashkëpunim me institucionet tjera mbetet e përkushtuar në krijimin dhe forcimin e mekanizmave ligjorë me qëllim të mbrojtjes së të drejtave të njeriut, me theks të veçantë mbrojtjes nga çdo lloj dhune ndaj gruas.

Astrit Dehari

EULEX-i përkrah Ministrinë e Drejtësisë për masat në shërbimin korrektues

EULEX-i ka shprehur përkrahjen për Ministrinë e Drejtësisë për transparencën dhe llogaridhënien në shërbimin korrektues.

Periskopi.com Lajme

Inspektorati i Ministrisë së Drejtësisë suspendoi drejtorin e burgut të Prizrenit, ku ishte mbajtur i ndjeri Astrit Dehari.

Përveç drejtorit u suspenduan edhe tre zyrtarë tjerë të shërbimit korrektues për neglizhencat procedurale.

EULEX-i me një postim në Twitter ka përkrahur ministren Dhurata Hoxha për transparencën dhe llogaridhënien në shërbimin korrektues.

Imer Mushkolaj

Edhe Mushkolaj kërkon dorëheqjen e Skender Hysenit dhe Dhurata Hoxhës

Analisti Imer Mushkolaj, sikur edhe shumë të tjerë, ka regauar pas suspendimeve të drejtorit të burgut të Prizrenit dhe tre zyrtarëve të tjerë.

Periskopi.com Lajme

Ai thotë se kjo nuk mjafton.

Kërkon dorëheqjen e ministrit të Punëve të Brendshme, Skender Hysenit dhe ministres së Drejtësisë, Dhurata Hoxhës.

“Suspendimet në Prizren nuk mjaftojnë. Dhurata? Skënder?”, ka thënë ai./ Periskopi

burgu Prizren diten kur vdiq Dehari

Aktivizohet Dhurata Hoxha, pritet ta shkarkojë menaxhmentin e Qendrës së Paraburgimit në Prizren

 Ministrja e Drejtësisë, Dhurata Hoxha pritet të shkarkojë stafin menaxherial të Qendrës së Paraburgimit në Prizren.

Periskopi.com Lajme

Burime të Klan Kosovës brenda Shërbimit Korrektues të Kosovës kanë thënë se kjo gjë pritet të ndodhë së shpejti dhe duke u bazuar tek të gjeturat e Inspektoriatit të Ministrisë së Drejtësisë, të cilët kanë hartuar një raport pas vdekjes së Astrit Deharit në Qendrën e Paraburgimit në Prizren.

Klan Kosova poashtu merr vesh se si rezultat i të gjeturave të Komisionit Hetimor edhe Inspektoriatit do të merret vendim për pezullim të u.d të drejtorit të Qendrës së Paraburgimit në Prizren, Destan Zogaj, një mbikqyrësi të lartë edhe dy oficerëve.

Astrit Dehari ka vdekur më 5 nëntor në rrethana akoma të paqarta deria raporti i autopsisë që u bë publik të premten konstatoi se Dehari është vetëvrarë.

pali

Lekaj – ministres së Drejtësisë: Dikush është dashur të jap dorëheqje për rastin e Deharit

Shefi i grupit parlamentar të AAK-së, Pal Lekaj, gjatë mbledhjes së Komisionit për Legjislacion, Mandate, Imunitete, Rregulloren e Kuvendit, në lidhje me diskutimin e ftesës së raportimit e Kryeprokurorit të Prokurorisë Themelore të Prizrenit, Sylë Hoxha dhe Ministres së Drejtësisë, Dhurata Hoxha, në lidhje me sqarimin e vdekjes së Astrit Dehari, ka thënë së paku deri më tani është dashur që dikush nga zingjiri komandues i Ministrisë së Drejtësisë të japë dorëheqje morale shkruan "zeri.info".

Periskopi.com Uncategorized

“Ky proces nuk është menaxhuar në mënyrë profesionale si nga policia dhe prokuroria. Ajo që më çudit është që askush nuk ka dhënë përgjegjësi. Është dashur që moralisht të largohet apo të suspendohet dhe me këtë duhet të dihet se shteti po ndërmerr diçka në lidhje më këtë rast. Duke mos dashur që të politizoj më këtë rast, por, është dashur që dikush të japë dorëheqje. Ky rast ka krijuar dilema të shumta dhe kjo është për të ardhur keq. Unë mendoj që duhet ta përkrahim idenë për raportim të kryeprokurorit Sylë Hoxha dhe Ministres së Drejtësisë”, ka thënë Lekaj.

Astrit Dehari

Ministrja e Drejtësisë ende në pritje të përgjigjes nga britanikët për rastin e Astrit Deharit

Ministrja e Drejtësisë, Dhurata Hoxha, ka deklaruar  se ende nuk kanë marrë përgjigje nga britanikët lidhur me kërkesën e Kosovës që policia “Scotland Yard” të bëjnë një hetim të ndarë lidhur me vdekjen e anëtarit të Vetëvendosjes, Astrit Dehari.

Periskopi.com Lajme

 

“Ende nuk kemi pranuar përgjigje”, ka thënë Hoxha, për Express, të dielën.

Kjo zyrtare e Qeverisë së Kosovës ka thënë se në ditët në vijim do të diskutojmë me Ambasadorin britanik, Ruairí O’Connell, derisa, ajo pret përgjigje pozitive për kërkesën e Ministrisë së Drejtësisë dhe Kryeprokurorit për hetimin e “Rastit Dehari” edhe nga një palë e tretë.

“Besoj që edhe në kërkesën tonë do të gjejmë mirëkuptim”, ka shtuar ajo.

Por, cila është baza ligjore nëse angazhohen hetues nga Britania për të hetuar vdekjen e Deharit?

Ministrja e Drejtësisë jep përgjigje.

“Ndërsa sa i përket bazës ligjore: Ligji nr. 04/L-213 për Bashkëpunim Juridik Ndërkombëtar në Çështjet Penale, neni  98, lejon themelimin e njësive të përbashkëta të hetimit. Ftesa e dërguar te pala britanike është bërë bashkërisht nga Ministria e Drejtësisë dhe e Prokurorit të Shtetit, i cili, në bashkërendim me Ministrinë e Drejtësisë, ka kompetencë për bashkëpunim ndërkombëtar sipas nenit 9 të Ligjit 03/L-225 për Prokurorin e Shtetit”, ka deklaruar Ministrja Hoxha.

Dhurata Hoxha kishte bërë kërkesë britanikëve që të përfshihen në hetim të pavarur me rastin e Astrit Deharit me qëllim sigurimin e besimit dhe kredibilitetin e vdekjes së Astrit Deharit.

Astrit Dehari kishte ndërruar jetë gjatë transportimit prej paraburgimit për në Spitalin e Prizrenit ku ishte duke u mbajtur si i dyshuar për sulm terrorist ndaj Parlamentit. Rezultatet e autopsisë të Mjekësisë Ligjore në Prishtinë kanë konstatuar se Dehari kishte vdekur nga lëndimet e vetshkaktuara. Kryeprokurori i Prizrenit ka konstatuar se anëtari i Vetëvendosjes bëri vetëvrasje, por, ende nuk janë sqaruar motivet. Askush s’është arrestuar apo akuzuar se ka shtyrë Deharin në vetëvrasje.

Lëvizja Vetëvendosje ka kontestuar gjetjet e Mjekësisë Ligjore dhe kanë dhënë versionin e tyre. Kanë thënë se Astrit Dehari është vrarë duke drejtuar gishtin kah Shteti. As Vetëvendosje s’ka përmendur emra konkret se kush qëndron pas vdekjes së Deharit. Përmes vdekjes së Deharit, Partia e Visar Ymerit ka kërkuar rrëzimin e Qeverisë dhe dorëheqjen e udhëheqësve shtetëror.

______________________________________________________________

Baza ligjore mbi të cilën janë ftuar britanikët për të hetuar vdekjen e Astrit Deharit

Ky është Neni 98 i Ligjit për Bashkëpunim Ndërkombëtar në Çështje Penale:

Njësitë e përbashkëta të hetimit

  1. Autoritetet kompetente të Republikës së Kosovës me marrëveshje të ndërsjellë me një apo më shumë shtete mund të formojnë njësi të përbashkëta të hetimit për një qëllim të caktuar dhe për një periudhë kohe të kufizuar me qëllim të kryerjes së hetimeve në një apo më shumë shtete që kanë formuar njësinë. Periudha kohore mund të zgjatet me marrëveshje mes palëve.
  2. Njësia e përbashkët e hetimit mund të formohet posaçërisht nëse:

2.1. hetimi në një shtet për një vepër penale përfshin hetime të vështira dhe kërkuese të cilat kanë lidhje me shtetet e tjera;

2.2. disa shtete janë duke zhvilluar hetime për vepra penale dhe rrethanat kërkojnë veprim të koordinuar dhe të bashkuar të shteteve të përfshira.

  1. Njësitë e përbashkëta të hetimeve mund të formohen me kërkesë të cilido nga shtetet e përfshira.
  2. Antarët e njësisë së përbashkët të hetimit, që janë të deleguar nga shteti i tyre mund të lejohen të kryejnë hetime në territorin e Republikës së Kosovës nën udhëheqjen e anëtarit të njësisë së Republikës së Kosovës, në përputhje me marrëveshjen mes Republikës së Kosovës dhe shtetit delegues.
  3. Antarët e njësisë së përbashkët të hetimit duhet të lejohen të jenë prezent gjatë ndërmarrjes së çdo veprimi hetimor në Republikën e Kosovës. Megjithatë udhëheqësi i njësisë mund të vendos ndryshe për arsye të veçanta dhe në përputhje me ligjin vendor.
  4. Anëtarët vendor të njësisë së përbashkët të hetimit, në përputhje me ligjin vendor dhe brenda kompetencave të tyre, mund t’i ofrojnë njësisë informatat e siguruara në Republikën e Kosovës, për qëllime të hetimeve penale që kryehen nga njësia.
  5. Kur njësia e përbashkët e hetimit ka nevojë për veprime hetimore që duhet të ndërmerren në Republikën e Kosovës, anëtarët vendor të deleguar në atë njësi mund të kërkojnë nga organet gjyqësore vendore marrjen e atyre veprimeve. Ato veprime duhet të trajtohen në Republikën e Kosovës nën kushtet e njëjta që do të zbatoheshin nëse ato veprime do të kërkoheshin gjatë hetimeve vendore.
  6. Informatat e siguruara ligjërisht nga antarët vendor të njësisë së përbashkët të hetimit, të cilat nuk do të ishin të arritshme ndryshe për autoritetet vendore, mund të përdoren për qëllimet e mëposhtme:

8.1. për qëllim për të cilin njësia është formuar;

8.2. për zbulimin, hetimin dhe ndjekjen e veprave penale tjera, pas marrjes paraprakisht të

pëlqimit nga shteti ku janë siguruar ato informata;

8.3. për parandalimin e kërcënimit serioz dhe të menjëhershëm të sigurisë publike;

8.4. për qëllime të tjera, siç mund të pajtohen shtetet që kanë formuar njësinë.

  1. Persona tjerë nga përfaqësuesit e organeve kompetente të shteteve që formojnë njësinë e përbashkët të hetimit, mund të lejohen të marrin pjesë në veprimet e njësisë. Të drejtat e dhëna antarëve të njësisë sipas këtij Neni, nuk do të jepen këtyre personave, përveç nëse shtetet pajtohen ndryshe shprehimisht.

Ky është Neni 9  Ligjit 03/L-225 për Prokurorin e Shtetit:

Bashkëpunimi ndërkombëtar

  1. Kryeprokurori i Shtetit, në bashkëpunim me Ministrinë e Drejtësisë, do të përcaktojë protokole dhe procedura për të ngritur bashkëpunimin me autoritetet e shteteve të tjera sa i përket ndjekjeve penale, përmes shkëmbimit të informacionit dhe mënyrave të tjera në përputhje me ligjin e zbatueshëm dhe marrëveshjet ndërkombëtare lidhur mes Kosovës dhe vendeve të tjera.
  2. Kryeprokurori i Shtetit bashkëpunon me autoritetet dhe subjektet ndërkombëtare të vendosura në Republikën e Kosovës.
Policia britanike

Ministrja Hoxha kërkoi të hetohet rasti Dehari nga policia britanike (Dokument)

Ministrja e Drejtësisë, Dhurata Hoxha disa dite pas vdekjes se Astrit Deharit i ka shkruar letër ambasadorit britanik në Kosovë, Ruairi O'Connell nga i cili ka kërkuar përfshirjen në hetimet shtesë për të mos lënë asnjë hapësirë për dyshime potenciale.

Periskopi.com Lajme

Në letrën që “Zëri” e ka siguruar nga burimet e saj, ministrja Hoxha, ftojnë policinë metropolitane (Scotland Yard) që në mënyrë të ndarë të kryej një hetim në lidhje me këtë rast.

Më poshtë mund të lexoni letrën e plotë:

E kuptoj se qeveria juaj dhe e jona ndajmë shqetësimin e njëjtë se është tejet e rëndësishme që hetimet rreth vdekjes së z.Astrit Dehari në paraburgim të kryhen dhe kompletohen në mënyrë profesionale dhe të paanshme.

Në këtë kontekst, po ashtu i referohem vizitës së fundit të Sekretarit të Shtetit, Johnson në Kosovë dhe fjalimin e tij në Kuvendin e Kosovës, ku ai ka adresuar këtë shqetësim. Siç e dini, autoritetet e Kosovës janë në proces të kryerjes së një hetimi të hollësishëm në këtë rast dhe unë konfirmoj se të gjitha autoritetet e Kosovës, që janë të përfshira në këtë proces, janë të zotuara që të kryejnë një hetim profesional, të paanshëm dhe të gjerë. Mirëpo, siç e dini, në pjesë të caktuara të opinionit publik, janë shfaqur dyshime në lidhje me integritetin dhe paanshmërinë e procesit të hetimit. Kjo mund të shkaktoj një dëm të madh në promovimin e rendit dhe ligjit dhe respektimin për institucionet e Kosovës.

Me qëllim të adresimit të këtyre shqetësimeve dhe për të siguruar besimin dhe kredibilitetin e publikut për këtë hetim, Ministria e Drejtësisë, së bashku me Kryeprokurorin e shtetit, ftojnë dhe mirëpresin policinë metropolitane (Scotland Yard) që në mënyrë të ndarë të kryej një hetim në lidhje me këtë çështje. Edhe pse të gjeturat e hetimit të tanishëm pritet të bëhen të ditura gjatë ditëve në vijim, çfarëdo hetimi që do të kryhej nga Skotland Jard, nuk duhet të pengohet apo kufizohet nga këto të gjetura.

Edhe përkundër mundësisë së kufizuar të fondeve, ne jemi në gjendje të bëjmë aranzhime për t’i mundësuar policisë metropolitane që ta kryej këtë hetim. Po ashtu, autoritetet e Kosovës janë të gatshme që të sigurojnë çfarëdo ndihme që ka nevojë policia metropolitane për të realizuar dhe kompletuar këtë hetim. Nuk kam dyshim se autoritetet e Kosovës po kryejnë hetimin në mënyrë shumë profesionale dhe të pavarur. Sidoqoftë, përfshirja e policisë metropolitane do të siguronte një besim publik në këtë proces dhe ne jemi të gatshëm të pranojmë të gjeturat e këtij hetimi, duke pasur besim në profesionalizmin dhe paanshmërinë e policisë metropolitane. Mbështetja dhe bashkëpunimi juaj në këtë çështje është i mirëpritur dhe i vlerësuar.

Dafina Demaku

Dhimbja e Xhemile Deharit dhe turizmi i Dhurata Hoxhës

Kur ministrja Hoxha të kthehet nga turizmi në Amerikë, ia rekomandoj patjetër ta shohë rrëfimin e Xhemile Deharit. Jo si ministre, por si nënë.

Dafina Demaku Opinione

Nuk kanë kaluar as pesëmbëdhjetë ditë kur rasti i Astrit Deharit po shkon ‘drejt normalizimit’. Pra, nuk na ngutet për asgjë. Po na ftohen gjakrat. Ama, e kam menduar edhe vet, ashtu siç thanë prindërit e Astritit, nuk bëhet fjalë për rastin e ‘një Astriti’, por për natyrën e rastit. Pra, çka e pret dikë prej nesh që nesër mund të burgoset, të merret nga një protestë ose nën një dyshim çfarëdo qoftë? Çka e pret në burgjet e Kosovës? Vrasja, vetëvrasja?

Udhëheqëse e Ministrisë së Drejtësisë, ka qëlluar të jetë një grua që quhet Dhurata Hoxha. Me gjasë, s’ka mundur ta dëgjojë rrëfimin e dhimbshëm të një nëne, të Xhemile Deharit, në një emision. Dhimbja e saj sa të thyen, po aq të bën të fortë. Ajo flet për drejtësinë universale. Nuk flet për djalin e saj si individ. Ajo kërkon drejtësinë që e kërkojmë të gjithë. Kërkon të dihet se çka na pret nesër të gjithë neve që mund të përfundojmë në një burg? Vrasja, vetëvrasja?

Xhemile Dehari kishte me vete një fletore ku jepte një kronologji ngjarjesh që në dhimbjen e saj tingëllojnë edhe si fakte. Fliste për humbjen e djalit të parë (Arbënorit), për humbjen e djalit të dytë (Astritit). Përshkruante pushimet, net kritike të përballur me skena horrori, për të cilat familja Dehari s’paska pas marrë kurrë asnjë përgjigje nga drejtësia.

Pika më kulmore e dhimbjes së Xhemile Deharit, dukej kur përshkruante gjendjen në shtëpinë e saj, derisa mediumet po shfaqnin xhirimet nga burgu i Prizrenit, sikur të ishin një material nga ‘Big Brother’ për ta ‘kënaqur’ publikun.

Derisa po ndodhin gjithë këto zhvillime në Kosovë, ministrja e Drejtësisë, Dhurata Hoxha është për vizitë në ShBA. Në kumtesën e fundit që e ka postuar në Facebook, zonja Hoxha, paska renditur disa takime me përfaqësues të lartë amerikanë të drejtësisë. Në një fjali, paska pas folur edhe për veten në superlativ, si një ministre e suksesshme në ‘fuqizimin e legjislacionit për sundimin e ligjit’. Hoyt Brian Yee, veç tjerash, njofton zonja Hoxha, ‘vlerësoi lart punën e bërë nga Institucionet e Drejtësisë në Kosovë dhe përkushtimin tim…” (lexojeni dhjetë herë: ‘përkushtimin tim”).

Tash, me këtë, s’dua të them se ministrja e Drejtësisë do të duhej ta anulonte vizitën e saj në ShBA. Por, të injorosh gjithë këto shqetësime që të adresohen Ty apo institucionin që udhëheq, atëherë vizita jote, kudo qoftë ajo, ngjan në turizëm.

Nuk mund t’u ikim do emocioneve në rastin e familjes së Astrit Deharit, edhe kur kërkojmë drejtësi. Me siguri, Xhemile Dehari ka pas emocione kur ka menduar të sakrifikojë nga Zvicra për lirinë e Kosovës. Me siguri, ato emocione kanë qenë të lidhura me lirinë tonë.

Kur ministrja Hoxha të kthehet nga turizmi në Amerikë, ia rekomandoj patjetër ta shohë rrëfimin e Xhemile Deharit. Jo si ministre, por si nënë.

Jam e bindur që secila grua në botë, për një rast të tillë, pavarësisht nga cili orientim politik do të vinte, do të fliste fillimisht si nënë edhe nga një post ministror. Pse duhet të flasësh në veten e parë kur je në Amerikë e nuk duhet të kesh pak ndjeshmëri në veten e parë përballë një rasti kur je në Kosovë?

 

Dhurata Hoxha ne Amerike

Hoxha në Amerikë, merr përkrahje të fuqishme për luftimin e ekstremizmit

Ministrja e Drejtësisë e Republikës së Kosovës, Dhurata Hoxha, gjatë vizitës zyrtare në Uashington DC, ku qëndroi me ftesë të Departamentit të Drejtësisë dhe Departamentit të Shtetit të Shteteve të Bashkuara të Amerikës, ka zhvilluar takim me qëllim të thellimit të bashkëpunimit në lëmin e drejtësisë.

Periskopi.com Lajme

Hoxha takoi Brett McGurk – përfaqësuesin special të Presidentit amerikan të Koalicionit global për luftën kundër terrorizmit dhe me këtë rast u diskutua për trendët globale të terrorizmit dhe rajonin e Ballkanit.

Përfaqësuesi special i Presidentit amerikan, McGurk, ka vlerësuar se Republika e Kosovës, ka dhënë kontribut të çmuar kur i është bashkuar Koalicionit global kundër terrorizmit duke çmuar miratimin e ligjit dhe masave tjera kundër terrorizmit. Ai po ashtu theksoi se është lajm i mirë se ka ulje të numrit të pjesëmarrësve të shtetasve të Kosovës që marrin pjesë në konfliktet që zhvillohen në shtetet tjera.

Ministrja theksoi rëndësinë e trajtimit dhe masat ndaj personave që marrin pjesë në luftëra në shtetet e huaja si dhe masat e deradikalizimit dhe risocializimit ndaj personave të tillë.

Ministrja Hoxha, mori përkrahje të plotë nga i deleguari i Presidentit Obama për përkushtimin e saj, duke vënë në pah se kjo përkrahje do të vazhdojë për Ministrinë e Drejtësisë edhe në të ardhmen në fuqizimin e shtetit ligjor dhe sistemin e drejtësisë./Periskopi