Ka futur ilegalisht refugjatët në Zvicër, dënohet deputetja

Periskopi.com Lajme

Ajo së bashku me një bashkëpunëtor të saj është kapur më 1 shtator nga rojat kufitare, kur po i pranonte katër afrikanë të moshës së mitur që vinin nga ana italiane e kufirit.

Deputetja socialdemokrate në Parlamentin e Kantonit të Tiçinos, Lisa Bosia Mirra është dënuar me 80 njësi ditore me kusht. Po kështu ajo duhet të bëjë edhe mbulimin e shpenzimeve të gjyqit. Gjykata e ka gjetur atë fajtore për ndihmën që u ka dhënë në së paku 9  raste refugjatëve për të hyrë ilegalisht  në Zvicër gjatë muajit gusht dhe shtator të vitit 2016.

Mirra është po ashtu themeluese e organizatës për ndihmë refugjatëve “Firdaus”. Ajo së bashku me një bashkëpunëtor të saj është kapur më 1 shtator nga rojat kufitare, kur po i pranonte katër afrikanë të moshës së mitur që vinin nga ana italiane e kufirit. Menjëherë pastaj një 53 vjeçar nga Berna i kishte marrë refugjatët në fjalë dhe i kishte futur me kamion në territorin zviceran.

Në muajin shkurt ajo qe dekoruar me çmimin “Alpes ouvertes” për angazhimin e saj në ndihmë refugjatëve. Mirra  gjatë verës së vitit të kaluar, me shoqatën e saj kishte kontribuuar me strehimin dhe përkujdesjen e refugjatëve që kishin ardhur në Como, Itali, thuhet në arsyetimin e çmimit të dhënë.

Ka futur ilegalisht refugjatët në Zvicër, dënohet deputetja

 

Pension dhe pagë nga buxheti i shtetit, Muja i ‘hekurt’ që nuk i njeh dënimet e Gjykatës

Kryetari i Komunës së Prizrenit, Ramadan Muja për shumë gjëra mund të hyjë në historinë e Kosovës, por për moshën që ka, e që ende ushtron detyrën e të parit të një komune, mund të thyejë rekord edhe në botë.

Periskopi.com Lajme

77 vjeçari që ka shumë probleme me shëndetin, është bërë një ‘kështjellë’ e pathyeshme në Prizren.

Që kur është bërë kryetar, është përcjellë me skandale e pakënaqësi të shumë qytetarëve. Qyteti ndër më të bukurit në Kosovë, nuk është ngjallur ekonomikisht në mandatet e tij.

Jo vetëm kaq, ai është i dënuar me dy vjet burgim dhe vazhdon të jetë në postin e të parit të Prizrenit, ngase dënimin e ka me kusht që të mos kryej vepra të tjera penale gjatë 3 vjetëve të ardhshëm.

Shumë herë është kërkuar dorëheqja e tij. Një ndër më të rëndësishmet është për shkak të tragjedisë që ndodhi në këtë qytet, ku është shembur një shtëpi në Zonën Historike në Prizren, dhe i mori jetën një fëmije 3 vjeç.

Ramadan Muja, siç mëson Periskopi pavarësisht që nuk shihet askund, dënimeve që ka dhe mospunëve, ai merr pagën e kryetarit, por edhe pensionin.

Nga buxheti i shtetit, Muja, brenda në viti merr rreth 21 mijë euro në vit.

Shtëpia ku banon Ramadan Muja, kryetar i Prizrenit nga Partia Demokratike e Kosovës, ka 250 metra katror dhe kap vlerën prej 150 mijë eurosh, ndërsa ka para të gatshme në bankë 103,416 euro.

Ai vet ka deklaruar se ka rrogën vjetore prej 18,664 euro dhe pensioni prej 1,896 euro.

Nuk përfundon me kaq, kandidati i PDK-së dhe kryetari aktual i Prizrenit, Ramadan Muja, është në mandatin e tij të tretë si kryetar i Prizrenit.

I doktoruar në histori, nuk duhet lënë pa përmendur se ai ka përjetuar edhe Luftën e Dytë Botërore.

Pavarësisht se ai dyshohej për keqpërdorim pronash, PDK-ja e kishte të preferuar dhe e kandidoi gjithmonë për kryetar, raporton lajmi.net

I njohur si refuzues i debateve televizive, i daljes para publikut, shikuesve dhe kundër-kandidatëve, Muja qëndron në fron që rreth 10 vjet, e premtimi më i famshëm i partisë së tij, mbetet 100 milionëshi për Prizrenin, që kurrë më nuk është përmendur pas fushatës.

E në fillim të muajit që kemi lënë pas, më në fund, Gjykata e Apelit ia kishte dalë ta caktojë një datë për një seancë ndaj Ramadan Mujës dhe ish-zyrtarëve të tjerë të Komunës së Prizrenit.

Palëve në këtë proces u ishin dërguar njoftimet e nënshkruara për datën 14 mars, por pak ditë më pas seanca është anuluar.

Ndryshe, pas dënimit në shkallën e parë në mars të vitit 2014, rastin ndaj kryetarit Muja dhe 5 ish-zyrtarëve të tjerë të kësaj komune, që akuzohen për keqpërdorim të pozitës zyrtare, Apeli e kishte kthyer në rigjykim.

Prokuroria ishte ankuar ndaj këtij vendimi në Gjykatën Supreme, që e kishte anuluar vendimin për rigjykim dhe e kishte kthyer rastin për rishqyrtim në Apel./ Periskopi

 Kompania që pretendon t’ua marrë 120 mijë euro Stupcave

Treshja e humorit “Stupcat” dhe kompania “On Air” janë në një proces gjyqësor. Kompania e cila ka menaxhuar me llogarinë e Stupcave po pretendon se treshja e njohur e humorit e ka shkëputur njëanshëm kontrantën me ta.

Periskopi.com Lajme

 

Në një deklaratë e cila i është drejtuar policisë nga Drejtori Menaxhues i “Stupcat Group”, Vedat Bajrami, kërkohet që të hetohet kompania “On Air Fm” e cila është marrur me menaxhimin e kanalit të Stupcave në Youtube, “Stupcat TV”.

Sipas Bajramit, “On Air Fm” përveç që nuk është përkujdesur për mirëmbajtjen e kanalit të Stupcave në Youtube, ka bërë shpërndarje të materialit të krijimtarisë artistike të treshes humoristike nëpër kanalet tjera të cilat kanë qenë drejtpërdrejtë konkurrente të kanalit “Stupcat TV”.

Kompania OnAir.Fm ka dërguar një deklaratë me shkrim për Gazetën Express, duke sqaruar gjithë rastin si dhe duke zbuluar se kompania në fjalë tashmë ka ngritur padi ndaj aktorëve të njohur.

Deklarata me shkrim e OnAir.Fm

Kompania amerikane për menaxhimin e të drejtave dhe publikimin e materialeve digjitale “OnAir.FM” me seli në California të SHBA-së, ka paditur në Gjykatën Themelore në Prishtinë kompaninë “Stupcat Group” që udhëhiqet nga aktorët e humorit, Vedat Bajrami dhe Osman Azemi, nga të cilët kërkojnë dëmshpërblim në vlerë prej 120 mijë euro për shkelje të kontratës në mënyrë të njëanshme.

OnAir.FM ka vendosur që shkeljen e kontratës nga ana e Stupcave ta zgjidhë përmes institucioneve të drejtësisë në Kosovë, e jo përmes intrigave e manipulimeve mediale, siç janë përpjekur të bëjnë aktorët e grupit Stupcat.

OnAir.FM ka autorizuar avokatin e mirënjohur kosovar, Hasan Hoti që të përfaqësojë padinë e shkeljes së kontratës që kanë bërë pronarët e grupit “Stupcat”, Vedat Bajrami dhe Osman Azemi.

Ne besojmë që drejtësia kosovare do të veproj shpejt dhe t’i japë fund mashtrimeve dhe trillimeve të këtyre personave, të cilët përpiqen që famën e tyre ta përdorin vetëm për përfitime materiale dhe në dëmë të të tjerëve dhe në kundështim të kontratës sipas ligjeve në fuqi.

OnAir.FM si kompani amerikane do ta mbajë të informuar për gjithë procesin e zgjidhjes së këtij kontesti edhe Ambasadën e SHBA-së në Kosovë.

Më poshtë gjeni të bashkangjitur padinë e protokoluar nga Gjykata Themelore në Prishtinë si dhe ankesën e deponuar te Këshilli i Mediave të Shkruara për shpifjet mediale nga Stupcat./Insajderi.com

 

 

 

Tre zyrtarë të Ministrisë së Bujqësisë arrestohen për keqpërdorim

Pas hetimeve disa mujore me urdhër të Prokurorisë Themelore të Gjilanit, Policia e Kosovës ka arrestuar katër persona, tre prej tyre, persona zyrtarë të Ministrisë së Bujqësisë, me inicialet, B.N., K.M. dhe N.V., për shkak të dyshimit të arsyeshëm se kanë kryer veprën penale keqpërdorimi i pozitës apo autoritetit zyrtar.

Periskopi.com Lajme

Po ashtu, Policia e Kosovës ka arrestuar edhe personin me inicialet, Xh. S., pronar i Kompanisë “Calabrija” në Gjilan, për shkak të dyshimit të arsyeshëm se ka kryer veprën penale mashtrimi me subvencione.

Shuma e keqpërdorimit është mbi 200 mijë euro.

Vlen të ceket se katër të pandehurit gjenden ne masën e arrestit shtëpiak.

Flet urdhërdhënësi i vrasjes së Enver Hadrit: Nuk do të dorëzohem

Familja e aktivistit të vrarë shqiptarë nga Kosova, Enver Hadri, vlerëson se aktgjykimi i gjykatës belge, e cila për vrasjen e tij i dënoi me burg të përjetshëm ish serbët e UDB-së, Bozhidar Spasiqin dhe kriminelët Andrija Drashkoviq dhe Veselin Vukotiq, është fitore e madhe e drejtësisë.

Periskopi.com Lajme

Njëri nga të dënuarit, Bozhidar Spasiq ka thënë për REL-in në gjuhën serbe, se nuk e ka ndërmend të dorëzohet tek autoritetet belge, transmeton lajmi.net.

Organët shtetërore serbe ende nuk kanë marrë kërkesë zyrtare për ekstradimin e tre vrasësve të Enver Hadrit.

Spasiq thotë se nuk ka asnjë informacion zyrtar për këtë rast, kështu që nuk e ka ndërmend t’ju dorëzohet autoriteteve serbe.

“Unë po planifikoj ta padis shtetin belg dhe atë familjen Hadri për shkak të shqetësimit, padisë së rreme, etj”, ka thënë Spasiq.

Spasiq ishte urdhërdhënësi i vrasjes së Hadrit, pasi që ai aso kohe ishte edhe inspektor kryesor i UDB-së, shërbimit informativ jugosllav.

Enver Hadri u vra në vitin 1990 në Belgjikë. Ai ishte aktivist për të drejtat e njeriut dhe angazhohej fuqishëm për pavarësinë e Kosovës.

Drejtësia e vonuar për Enver Hadrin

Gjykata Penale e Brukselit, më 23 nëntor ka dënuar në mungesë tre shtetas të Serbisë, për vrasjen e Enver Hadrit, veprimtar për të drejtat e njeriut dhe të drejtat politike të shqiptarëve të Kosovës.

Periskopi.com Lajme

Enver Hadri ishte vrarë me 22 shkurt të vitit 1990 në lagjen Sen Zhil në Bruksel. Siç thuhet, nga një automjet në lëvizje ishte shtënë me armë zjarri mbi Hadrin, i cili ishte goditur për vdekje në kokë.

Lajmin për vendimin e Gjykatës Penale të Brukselit e ka konfirmuar vajza e të ndjerit, Teuta Hadri përmes një komunikate për medie, në të cilën thuhet se Bozhidar Spasiq, ish- shef i Shërbimit të Sigurimit të shtetit jugosllav, Veselin Vukotiq dhe Andrija Drashkoviq, janë dënuar për vrasje me paramendim të Enver Hadrit.

Teutra Hadri e ka vlerësuar vendimin e Gjykatës Penale të Brukselit si “fitore e madhe e drejtësisë mbi krimin politik”.

“Shpresojmë se edhe vrasjet e ngjashme politike të kryera kundër shqiptarëve apo kujtdo qoftë tjetër do të zbardhen deri në imtësi dhe organizatorët dhe vrasësit të marrin dënimin e merituar”, thuhet në letrën Teuta Hadrit, të cilën ua ka dërguar medieve.

Hydajet Hyseni, ish-deputet i Kuvendit të Kosovës dhe kryetar i Shoqatës së të Burgosurve politik të Kosovës, duke folur për Radion Evropa e Lirë, thotë se Enver Hadri i takonte plejadës së patriotëve shqiptarë të Kosovës, që siç i vlerëson ai, ishin shndërruar në shtylla të qëndresës, ndërkombëtarizimit të çështjes shqiptare dhe të konsolidimit të saj.

Vrasja e tij nga strukturat e Sigurimit të shtetit të ish Jugosllavisë, ishte sikurse edhe vrasja e vëllezërve Jusuf dhe Bardhosh Gërvalla, si dhe Kadri Zekës në Gjermani.

 

“Enver Hadri, po ashtu, është një nga shembujt më eklatant që flet vetvetiu, se pse ishte në Bruksel. Ishte, pikërisht, në përpjekjet për ta evropianizuar dhe për ta ndërkombëtarizuar çështjen e pazgjidhur shqiptare. Ky akt i funksionimit të drejtësisë në Belgjikë, uroj që të jetë shembull, model edhe për ndriçimin e rasteve të tjera, si dhe për të kërkuar atë që nuk është kërkuar në masë të duhur, përgjegjësinë shtetërore të Serbisë”, ka thënë Hyseni.

Në anën tjetër, ministrja e Drejtësisë e Qeverisë së Serbisë, Nela Kuburoviq, ka deklaruar se Belgjika deri më tash nuk ka dërguar kërkesë për ekstradimin e tre shtetasve të Serbisë.

Megjithatë, siç ka theksuar ajo, nuk ekziston një marrëveshje ndërmjet Serbisë dhe Belgjikës për ekstradimin e ndërsjellë të shtetasve, kështu që Belgjika mund të kërkojë vetëm zbatimin e vendimit të plotfuqishëm të gjyqit.

“Kjo do të thotë që në rast se vendimi i gjyqit belg bëhet i plotfuqishëm, ky shtet mund të kërkojë që Vukotiq, Drashkoviq dhe Spasiq ta kryejnë dënimin në Serbi”, theksoi Kuburoviq.

Bozhodar Spasiq, të cilit Gjykata Penale e Brukselit ia ka shqiptuar dënimin, në një bisedë me Radion Evropa e Lirë ka thënë se nuk ka asnjë informatë zyrtare lidhur me rastin, që sipas tij i ka shkaktuar shqetësim.

“Unë planifikoj madje që ta padis shtetin e Belgjikës dhe familjen Hadri për shkak të shqetësimeve të ndryshme, për veprën penale të akuzës së rrejshme dhe kështu me radhë. Qysh kur ekzistojnë informatat se po zhvillohet një proces në Bruksel, unë nuk kam asnjë gjurmë të shkruar që dikush t’ më ketë informuar. Nuk kam asnjë thirrje me letër, madje nuk e di as për çka jam akuzuar në mënyrë që të mund të jap ndonjë përgjigje për ndonjë akuzë. Pra, nuk kemi marrë asnjë thirrje me shkrim e as me gojë”, tha Spasiq.

Ai ka shtuar se në vitin 1990, si shef i ekipit të Shërbimit të Sigurimit Shtetëror, ka pasur njohuri për vrasjen e Hadrit.

Zoran Mijatoviq, ish pjesëtar i Sigurimit të shtetit në ish-Jugosllavi, i cili kishte përcjellë migracionin shqiptar të Kosovës, thotë për Radion Evropa e Lirë se shërbimi ku ka punuar Spasiq i ka takuar nivelit federal. Ai thekson që nuk ka informata lidhur me aktivitetin e këtij niveli.

“Unë, në një kohë, në Qendrën e Beogradit, e kam udhëhequr sektorin për migracion. Por, në kohën time, kur unë kam qenë shef, mund të them se asnjë migrant nuk ka pësuar nga dora jonë. Se çfarë ka bërë shërbimi federal, këtë e dinë ata të cilët po i gjykojnë njerëzit të cilët kanë punuar në atë shërbim”, tha Mijatoviq.

Spasiq ka theksuar se nuk e ka ndërmend t’i dorëzohet organeve belge, për shkak se nuk e ka kërkuar këtë askush dhe madje nuk ka as fletë-arrest ndërkombëtar për të. (REL)

 

Vrasësit e Enver Hadrit sot u dënuan me burgim të përjetshëm

Familja e Enver Hadrit të ndjerë, të vrarë në Bruksel, ka njoftuar se sot vrasësit e Enverit janë dënuar me burgim të përjetshëm.

Periskopi.com Lajme

Dje organizatorët e vrasjes së aktivistit shqiptar Enver Hadri u shpallën fajtorë. Prokurorja e Mbretit në Belgjikë dje ka kërkuar që të dënohen të tre me nga 30 vjet burgim, por sipas një njoftimi nga familja, ata sot janë dënuar me burgim të përjetshëm, transmeton Koha.net.

Juria, e përbërë nga përfaqësuesit e drejtpërdrejtë të popullit në sistemin e drejtësisë, kanë vendosur burgim të përjetshëm.

Kjo ishte dhe kërkesa e familjes Hadri.

Ky është njoftimi i plotë, pa ndërhyrje, i familjes Hadri:

Dje me, 22 nentor 2016, Kryetarja e Trupit Gjykues ia kishte shtruar Jurise se perbere prej 12 qytetaresh te perzgjedhur me short, 3 pyetje dhe 3 nenpyetje :

  1. Pyetja e pare kryesore : … I akuzuari Veselin Vukotiq a eshte fajtor per vrasjen e Enver Hadrit, i lindur me 2 prill 1941 ?
  2. A e ka kryer i akuzuari këtë vrasje me paramendim ?
  3. I akuzuari Bozhidar Spasiq a eshte fajtor per vrasjen Enver Hadrit, i lindur me 2 prill 1941 ?
  4. A e ka kryer i akuzuari këtë vrasje me paramendim ?
  5. I akuzuari Andrija Drashkoviq a eshte fajtor per vrasjen me paramendim te Enver Hadrit, i lindur me 2 prill 1941 ?
  6. A e ka kryer i akuzuari këtë vrasje me paramendim ?

Pas nje shqyrtimi prej me shume se dhjete oresh Juria ne te gjitha pyetje e Kryetares kishte nje pergjigje te vetme : PO !

Ne kete menyre Gjykata e Madhe Penale e Brukselit, i shpalli fajtor per vrasjen e Enver Hadrit, Bozhidar Spasiq-in, ish-shef i UDB-se per operacione speciale dhe vrasesit Veselin Vukotiq dhe Andrija Drashkoviq.

Nderkaq sot, me 23 nentor 2016, ani se Prokurorja e Mbretit kerkoi per fajtoret nga 30 vjet burg per çdonjerin, megjithateJuria, e perbere nga perfaqesuesit e drejtperdrejte te popullit ne sistemin e drejtesise,vendosen ndryshe : ata vendosen qe kriminelet serbe te denohen me burg te perjetshem.

Kjo eshte nje fitore e madhe e drejtesise mbi krimin politik.

Me kete vendim Gjykata Penale e Brukselit, kryeqytetit te Evropes, krahas organizatorit dhe vrasesve te Enver Hadrit, praktikisht e denoj edhe shtetin serb. Sepse organet serbe qe nje çerek shekulli, nuk lane gur pa levizur, qe vrasja e Enver Hadrit te mos zbardhet dhe dorasit te mos ndeshkohen.

Shpresojme se edhe vrasjet e ngjashme politike te kryera kunder shqiptareve apo kujtdo qofte tjeter do te zbardhen deri ne imtesi dhe organizatoret dhe vrasesit te marrin denimin e merituar.

Per familjen Hadri

Teuta Hadri

Bruxelles, 23 nentor 2016, 18h45

4 mijë euro dënim për ujësjellësin rajonal “Prishtina”

Inspektorët sanitarë në Komunën e Shtimes, në bashkëpunim me inspektorët e Agjencisë së Ushqimit dhe të Veterinës, kanë shqiptuar një gjobë prej 4 mijë eurosh për kompaninë e ujësjellësit rajonal “Prishtina” në Shtime.

Periskopi.com Lajme

Sipas inspektorëve, kjo kompani nuk e ka bërë klorizimin e ujit të pijshëm në mënyrë digjitale, dezinfektimin e stacionit të pompave dhe njëkohësisht rezervarët i ujit nuk janë izoluar në mënyrë që insektet të mos futen brenda tyre, shkruan Koha Ditore.

Sherif Sherifi, shef i Inspektoratit në Komunën e Shtimes, ka deklaruar se kësaj kompanie tri herë paraprakisht i janë dhënë vërejtje dhe rekomandime për t’i përmirësuar defektet, mirëpo një gjë e tillë deri tashti nuk ka ndodhur.

Fushatë pesëditore për zgjedhjen e të parit të Drenasit

Komisioni Qëndror i Zgjedhjeve ka marrë vendim që fushata për zgjedhjet lokale në Drenas të zgjasë pesë ditë.

Periskopi.com Lajme

Në mbledhjen e zhvilluar t ëpremten është vendosur që për këtë proces të ndahen 268 mijë e 420 euro.

Në rrethana normale ky takim do të drejtohej nga shefja e KQZ-së, Valdete Daka, por ajo nuk ishte prezente, pasi ishte duke marrë pjesë në një takim për reformën zgjedhore të ftuar nga presidenti Hashi Thaci. Kjo gjë është kundërshtuar nga përfaqësuesi i Vetëvendosjes, Andan Rrustemi, që takimin e ka cilësuar politik.

PDK-së i rrezikohet Drenica

Partia Demokratike e Kosovës rrezikon ta humbë në zgjedhjet e ardhshme lokale dhe parlamentare bastionin më të fuqishëm elektoral, Drenicën. Kjo vjen pas vërtetimit të dënimeve nga Gjykata për figurat kryesore të kësaj partie nga ky rajon

Periskopi.com Lajme

Partia Demokratike e Kosovës(PDK) rrezikon që ta humbë bastionin kryesor që nga paslufta, Drenicën, nëse figurat kryesore politike nga ky rajon nuk e mbështesin në zgjedhjet e ardhshme lokale dhe parlamentare, shkruan gazeta ‘Zeri’.

Një rrëshqitje e tillë e votave nga partia më e madhe në vend, në bastionin më të fuqishëm të PDK-së, sipas analistëve politik, mund të ndodhë pas vendimit të fundit të Gjykatës së Apelit me të cilin u vërtetohet dënimi për krime lufte  ish- komandantit të shtabit të përgjithshëm të UÇK-së, Sylejman Selimi, ish- deputetit të PDK-së Fadil Demaku dhe tre vëllëzerve të tij, Nexhat, Jahir e Zeqir Demaku.

Pas këtij vendimi të Gjykatës, Fadil Demaku ka dhënë dorëheqje nga posti i deputetit, ndërsa vëllai i tij, Nexhati, nga pozita e kryetarit të Komunës së Drenasit, me ç’rast kjo e fundit do të shkojë në zgjedhje të parakohshme.