untitled

Miftaraj: Shtëpia e Lumezit duhet të mbikëqyret me kamera

Qeveria e Kosovës ka dështuar të ndërtojë një sistem të mirëfilltë për të mbrojtur gjyqtarët dhe prokurorët e vendit, ka thënë Ehat Miftaraj, Instituti Kosovar për Drejtësi në Ora e Fundit në Klan Kosova.

Periskopi.com Lajme

“Qeveria e ka neglizhuar mbrojtjen e gjyqtarëve dhe prokurorëve. Ne e kemi kritikuar edhe Qeverinë e Kosovës se si bëjnë mbrojtjen për gjyqtarë dhe prokurorë”, ka thënë Miftaraj.

Megjithatë ai ka thënë se gjyqtarët dhe prokurorët duhet të tregojnë profesionalizëm dhe guxim në punë.

Miftaraj, duke folur për rastin e vjedhjes në shtëpinë e Kryeprokurorit, Aleksander Lumezi, tha se Lumezi është megjithatë i privilegjuar, pasi ruhet 24 orë.

“Përderisa Kryeprokurori ka fatin që të ketë mbrojtje 24 orë, përkundër se e padobishme, këtë fat nuk e kanë të tjerët. Kryeprokurori është i privilegjuar në raport me kryetarin e gjykatës Supreme dhe të tjerët”, ka thënë Miftaraj.

Ai shtoi se është gjithsesi e çuditshme se si përkundër se ruhet nga policia shtëpia e Lumezit, dhe ndonëse aty duhet të ketë kamera, rasti ende nuk po zbardhet.

“Shtëpia e Lumezit duhet të ketë kamera dhe ato kamera është dashur të kapin ndonjë sinjal. Megjithatë ne duhet të presim, mos të supozojmë, derisa drejtësia të japë fjalën e saj. Edhe policia edhe prokuroria ta konsiderojë këtë rast si top prioritet që të zbardhet e vërteta sa më shpejtë që të jetë e mundur”.

policia-aaaaaa_1470057290-3623094

Kërkohet vazhdimi i masës së suspendimit për policët në rastin ‘Lumezi’

Ndaj dy zyrtarëve policor të cilët janë suspenduar menjëherë pas rastit së vjedhjes që ka ndodhur në shtëpinë e kryeprokurorit të shtetit, Drejtoria e Standardëve Profesionale e Policisë ka rekomanduar zgjatjen e masës së suspendimit deri në përfundimin e hetimeve për këtë rast, bëjnë me dije burime të “zeri.info”.

Periskopi.com Lajme

Ky rekomandim ka ardhur pasi që sot pritet të përfundoj masa ligjore ndaj këtyre dy zyrtarëve policor të cilët ishin suspenduar për 48 orë pas vjedhjes që kishte ndodhur në shtëpinë e kryeprokurorit të shtetit, Aleksandër Lumezi.

Ndërkaq, menjëherë pas këtij akti të vjedhjes në shtëpinë e kryeprokurorit Lumezi, Policia e Kosovës i kishte suspenduar për 48 orë një zyrtar policor i cili ishte duke e ruajtur shtëpinë e kryeprokurorit Lumezi si dhe mbikëqyrësin e tij.

Kujtojmë se shtëpia e kryeprokurorit të shtetit, Aleksandër Lumezi, mëngjesin e ditës së martë ishte cak i një vjedhje. Ndërsa, gjatë kësaj vjedhje persona të panjohur kishin hyrë në shtëpinë e kryeprokurorit Lumezi me ç’rast e kishin vjedhur telefonin mobil të tij.

shtepia-e-aleksander-lumezit

Lumezi nuk është kryeprokurori i parë që i vidhet shtëpia

Vjedhja në shtëpinë e Kryeprokurorit të Shtetit, Aleksandër Lumezi, është vjedhja më e freskët e shtëpisë së një zyrtari kaq të lartë të sistemit të drejtësisë në vend, megjithatë një kryeprokuror tjetër para Lumezit ishte viktimë e atyre që duhej t’i ndiqte penalisht.

Periskopi.com Lajme

Megjithëse nuk i kujtohet data e saktë, ish-kryeprokurori Hilmi Zhtia e mban mend shumë mirë se si e kishte gjetur shtëpinë e tij pasi ajo kishte qenë cak i hajnave.

Ish-kryeprokurori Zhitia thotë se shtëpia e tij në Prishtinë ishte vjedhur në natën e Vitit të Ri.

“Ngjarja ka ndodhur diku në vitin 2009 ose 2010, nuk më kujtohet saktë por e di që ka ndodhur pas pavarësisë. Ngjarja pati ndodhur në natën e Vitit të Ri, diku para orës 12. Përmes dritareve kanë hy dhe ne s’kemi qenë askush në shtëpi por kur jemi kthyer e tërë shtëpia ka qenë në rrëmujë”, tha Zhitia.

Zhitia gjithashtu tregon se rrëmuja e shkaktuar nga hajnat nuk ishte pasoja e vetme.

“Mua më patën vjedhur një revole me leje, një lap-top, pastaj ari. Revolja dhe lap-topi më janë kthyer pasi janë nxënë dhe dënuar hajnat ndërsa ari në vlerë diku mbi 7,000 mijë euro nuk më është kthyer asnjëherë”, tha Zhitia për KALLXO.com

Ish-kreu i prokurorisë në Kosovën e pavarur mban mend se ishin arrestuar tre persona të cilët ishin shpallur fajtorë dhe ishin dënuar për veprën e kryer.

Zhitia më pas duke ndërlidhur ngjarjen e tij me atë të kryeprokurorit aktual thotë se beson se asnjëra nga vjedhjet nuk kanë qenë të rastësishme.

“Unë mendoj se vjedhja në shtëpinë time nuk ka qenë e rastësishme. Vjedhje e rastësishme nuk besoj se ka qenë as vjedhja e ndodhur në shtëpinë e prokurorit (Lumezi)”, tha Zhitia për KALLXO.com.

Zhitia që tani ka ndërruar anë por ende merret me punë juridike në rolin e avokatit, thotë se për dallim nga shtëpia e Lumezit, shtëpia e tij nuk ka qenë e ruajtur nga policia e Kosovës.

Ndërsa lidhur me mesazhin që përçon në opinion një vjedhje e tillë, Zhitia thotë se kjo tregon se ky lloj kriminaliteti është shumë i përhapur në Kosovë.

“Edhe shtëpinë time në fshat ma kanë vjedhur mbi tre herë por asnjëherë nuk e kam bërë të madhe sepse se besoj që atje e kanë ditur se shtëpia e kujt ka qenë por ka qenë cak i lehtë pasi nuk ka banuar askush aty”, tha Zhitia.

Shtëpia e kryeprokurorit aktual, Aleksandër Lumezi ishte cak i hajnave dy ditë më parë, ndërsa ende nuk është arrestuar askush lidhur me këtë vjedhje.

LUMEZI

Vidhet shtëpia e Aleksandër Lumezit

Një vjedhje ka ndodhur në rrugën “Xhevat Qena” në Prishtinë, në një shtëpi private. Për këtë rast në polici është ankuar një femër me inicialet B.L.

Periskopi.com Uncategorized

Por, Klan Kosova nga burime të saj merr vesh se kjo shtëpi është e kryeprokurorit të shtetit, Aleksandër Lumezi.

Rasti është konfirmuar edhe nga Policia e rajonit të Prishtinës. Ky incident ka ndodhur në orën 4 të mëngjesit dhe nga Policia është cilësuar si “vjedhje e rëndë”.

Në një njoftim për media thuhet se menjëherë pas marrjes së informatës, njësitet e nevojshme policore, kanë dalë në vendin e ngjarjes dhe aktualisht po vazhdojnë me ndërmarrjen e të gjitha veprimeve të nevojshme hetimore me qëllim të identifikimit të personit/ave të dyshuar si dhe ndriçimin e të gjitha rrethanave që kanë të bëjnë me rastin.

Kryeprokurori, Hashim Thaçi dhe Hashim Rexhepi

Prokuroria e Shtetit po verifikon pretendimet e Hashim Rexhepit sa a u korruptua Hashim Thaçi

Ish-guvernatori i Kosovës, Hashim Rexhepi ka deklaruar se ish- kryeministri tashmë Presidenti i vendit, Hashim Thaçi ka përfituar nga investimi i 1 miliard eurove të buxhetit të shtetit, e tashmë Prokuroria flet për këtë çështje.

Periskopi.com Lajme

Në përgjigjen e Kryeprokurorisë së Shtetit, në pyetjen dërguar nga Periskopi, se a do të hetohet Hashim Thaçi?, ata thonë se do hetohet secili që vlerësohet se ka kryer vepër penale.

“Prokurori i Shtetit do të trajtoj të gjitha informatat të cilat kryen bazën e dyshimit të arsyeshëm se një person ka kryer veprën penale”, thotë Kryeprokuroria për Periskopi.com

Por, jo vetëm kaq. Pyetja ishte edhe për personat e tjerë që ka përmendur ish-guvernatori.

Ky i fundit përmend edhe ish ministrat e asaj kohe, Ahmet Shalën e më vonë edhe Besim Beqajn. Pastaj ka përmend kryetarin e Skenderajt, Sami Lushtakun dhe Azem Sylën. Thotë se këta keqpërdorën detyrën zyrtare, siç raporton gazeta Fjala.

Madje, për Beqajn thotë se bashkë me këshilltarin e Hashim Thaçit investuan paratë e Trustit në një fond që po falimentonte. Bëhet fjalë për 75 milionë euro. Beqaj ka deklaruar se me këtë çështje duhet te merret drejtësia.

Nuk duhet harruar se Kryeprokurori i Shtetit që një kohë të gjatë ka marrë një vendim: që raportimet që bëhen në mediet elektronike e të shtypit, të përcillen në baza ditore nga një komisionin, verifikohen pretendimet e rasteve të supozuara të krimit të organizuar dhe të korrupsionit, raporton Periskopi.com

Në vendimin e tij është e saktësuar, se pas verifikimit nëse qëndrojnë elemente inkriminuese për ndjekje penale, menjëherë ndërmerret veprimi në drejtim të adresimit të rastit te prokurori kompetent.

E në rast se pas verifikimeve nuk ka dyshime se qëndrojnë elementet inkriminuese për ndjekje penale, atëherë menjëherë me informatë do ta njofton publikuesin apo paraqitësin e rasteve, e sipas nevojës edhe opinionin publik përmes mjeteve të informimit./ Periksopi.com

Jakup Krasniqi

Krasniqi thotë se Kryeprokurori është mashtrues sikurse Presidenti

Kryetari i Këshillit Kombëtar të Nismës për Kosovën, Jakup Krasniqi, e ka akuzuar për mashtrim Kryeprokurorin e shtetit, Aleksandër Lumezi.

Periskopi.com Lajme

Nëpërmjet një shkrimi në faqen e tij në Facebook, Krasniqi ka thënë se “pas Presidentit, mashtrimin e vazhdoi Kryeprokurori i shtetit”.

Sipas ish-kreut të Kuvendit të Kosovës, Hashim Thaçi e Aleksandër Lumezi duan të zhvendosin vëmendjen nga problemet e shumta të ditës që e domonojnë Kosovën.

Ky është shkrimi i plotë i Krasniqit në rrjetin social:

“Është interesant sa shqiptarët e kanë për qejf mashtrimin dhe vetëmashtrimin. Shembujt më të mirë i këtij fenomeni janë Presidenti i vendit dhe Kryeprokurori i shtetit.

Në ketë rast natyrshëm shtrohet pyetja: A e dinë këta dy përfaqësues të lartë te shtetit, pse para më shumë se një viti, me miratimin e partive te koalicionit është ndryshuar Kushtetuta për t’ia hapur rrugën miratimit te Ligjit për Gjykatën Speciale te Kosovës me seli në Hagë, e cila do të merret vetëm me të ashtuquajturat krime te UCK-së, pra jo për krimet e gjenocidin e ushtruara nga ushtria e policia serbe në Kosovë?!

Madje as ajo gjykatë nuk do të merret me krimet e gjenocidit serb te kryera në Kosovë. Sipas te gjitha gjasave, me ato krime do te “merret” Gjykata Speciale e Serbisë?!!! Se deri me tani është treguar shumë azhure për t’i amnistuar te gjithë kriminelet e luftës, te cilët Beogradi nuk heziton t’i shpallë heronj?!

Sa interesant janë qeveritarët e Beogradit, te cilët nuk dëshirojnë te mësojnë nga shqiptarët, te cilët heronjtë e luftës, te gjallë a te vdekur nuk hezitojnë t’i quajnë kriminelë?!

Nuk besoj që Presidenti i vendit dhe Kryeprokurori nuk e dinë se janë duke e mashtruar, veten e pastaj edhe ndonjë fanatik te tyre të verbër.

S’do mend e gjithë kjo bëhet për te zhvendosur vëmendjen nga problemet e shumta te ditës që e domonojnë Kosovën tonë.”

Aleksander Lumezi

Kryeprokurori në aksion, pas letrave të Hashim Thaçit

Prokurori i Shtetit, Aleksandër Lumezi ka pranuar dje shkresat e dërguara nga ana e presidentit të Kosovës Hashim Thaçi.

Periskopi.com Lajme

Nëpërmjet një komunikate për media, Lumezi bën të ditur edhe për hapat që janë ndërmarrë siç është ai për themelimin e Departamentit për Krime Lufte.

“Prokurori i Shtetit konsideron se letra e Presidentit të Republikës së Kosovës është në përputhje me objektivat e Prokurorit të Shtetit, dhe se për mënyrat se si të arrihet deri te një situatë e tillë, tashmë ka kohë që janë diskutuar modalitete brenda zyrës së Kryeprokurorit të Shtetit, andaj nga kjo edhe rrjedh se kurdoherë që një kërkesë është në pajtim me objektivat dhe mandatin e Prokurorit të Shtetit, kërkesat e tilla do të trajtohen dhe adresohen me seriozitet dhe përkushtim profesional e maksimal”, thuhet në komunikatë.

Kryeprokurori ka theksuar se gjatë hetimeve të zhvilluara janë lëshuar deri më tani 6 letër rreshtime me 15 persona, ndërsa që janë trajtuar dhe po trajtohen edhe 24 raste të dhunimeve seksuale të kryera gjatë luftës.

“Deri më tani sa u përket këtyre rasteve janë lëshuar gjithsej 72 letër rreshtime për të pandehurit dhe në momentin e parë që do të jetë e mundshme, ata do të arrestohen dhe do të dërgohen para drejtësisë”, thuhet më tej në komunikatë.

Komunikata e plotë e Prokurorit të Shtetit:

Prokurori i Shtetit, konfirmon se dje ka pranuar katër shkresa nga ana e Presidentit të Republikës së Kosovës, shkresa këto të ngjashme me fjalën e Presidentit të Kosovës në konferencën e organizuar për media.

Prokurori i Shtetit, edhe njëherë konfirmon përkushtimin e tij kushtetues dhe ligjor në ndjekjen, hetimin dhe dërgimin para gjykatave e të gjithë atyre që kanë kryer vepra penale.

Në këtë drejtim ne tashmë kemi bërë hapa konkret në luftimin e shumë dukurive negative kurse më datë 13.05.2015, Këshilli Prokurorial i Kosovës (KPK), ka marrë vendim me të cilin ka themeluar Departamentin për Krime Lufte në kuadër të Prokurorisë Speciale të Republikës së Kosovës.

Ndërsa, më 08.01.2016, KPK ka caktuar dy prokurorë në Departamentin e Krimeve të Luftës, me qëllim të rritjes së resurseve brenda Prokurorisë Speciale, e me fokus të posaçëm në hetimin, ndjekjen dhe gjykimin e krimeve të luftës, kështu tashmë PSRK ka në punë gjithsej 167 raste me 456 persona, nga prokurorët e EULEX-it janë transferuar 69 raste me 218 persona tek prokurorët vendor në Departamentin e Krimeve të Luftës në kuadër të PSRK-së.

Krimet e luftës të ndodhura në: Mejë, Dubravë, Qyshk, Lubeniq, Grashtica dhe Krusha e Madhe, janë lëndë në të cilat po punojnë prokurorët dhe ata po punojnë intensivisht për përfundimin e tyre.

Gjatë hetimeve të zhvilluara janë lëshuar deri më tani 6 letër rreshtime me 15 persona, ndërsa që janë trajtuar dhe po trajtohen edhe 24 raste të dhunimeve seksuale të kryera gjatë luftës.

Deri më tani sa u përket këtyre rasteve janë lëshuar gjithsej 72 letër rreshtime për të pandehurit dhe në momentin e parë që do të jetë e mundshme, ata do të arrestohen dhe do të dërgohen para drejtësisë.

Andaj, Prokurori i Shtetit konsideron se letra e Presidentit të Republikës së Kosovës është në përputhje me objektivat e Prokurorit të Shtetit, dhe se për mënyrat se si të arrihet deri te një situatë e tillë, tashmë ka kohë që janë diskutuar modalitete brenda zyrës së Kryeprokurorit të Shtetit, andaj nga kjo edhe rrjedh se kurdoherë që një kërkesë është në pajtim me objektivat dhe mandatin e Prokurorit të Shtetit, kërkesat e tilla do të trajtohen dhe adresohen me seriozitet dhe përkushtim profesional e maksimal.

Për më tepër, Prokurori i Shtetit ka obligim kushtetues dhe ligjor të mbroj interesin publik para gjykatave të vendit, ndërsa që mirëpresim vullnetin politik në rritje për të fuqizuar luftën kundër krimit.

Në këtë drejtim Prokurori i Shtetit do të bëj gjithçka në mundësitë e tij kushtetuese dhe ligjore, për të kontaktuar të gjitha mekanizmat vendor e ndërkombëtar në marrjen e dosjeve ku mund të gjenden prova rreth pretendimeve për krimet e ndodhura gjatë dhe pas luftës së vitit 1999.

Sidoqoftë, tërheqim vërejtjen se një pjesë e krimeve që supozohet se janë kryer, tashmë janë gjykuar nga gjykata kompetente dhe parimi NE BIS IN IDEM, parim ky i vendosur në dispozitën e nenit 4 të KPP-së, pamundëson hapjen e sërishme të hetimeve kurdoherë kur ato tashmë kanë marrë një epilog nga ana e një gjykate.

Në të gjitha ato raste ku ka hapësirë për veprim, Prokurori i Shtetit do të veproj me gjithë forcën e ligjit dhe do të sjellë para drejtësisë të gjithë ata që kanë kryer krime.

Prokurori i Shtetit siguron opinionin se po punon në krijimin e Ekipeve të Përbashkëta Hetimore në adresimin e këtyre dhe shumë çështjeve tjera, ndërsa që fton Qeverinë e Republikës së Kosovës dhe të gjitha institucionet tjera që t’ia lehtësojnë dhe mundësojnë arritjen e objektivave të Prokurorit të Shtetit, duke përmirësuar kushtet e punës, rritjen e buxhetit, si dhe përmes ndryshimeve ligjore në ligjin për Prokurorinë Speciale të Republikës së Kosovës, ligjit për Prokurorin e Shtetit dhe ligjeve tjera relevante, ngase është parakusht themelor krijimi i kushteve elementare në resurset njerëzore dhe infrastrukturës ligjore në luftimin, hetimin dhe ndjekjen e suksesshme të krimeve që kanë ndodhur që nga viti 1999 e deri në ditët e sotme.