Albin Kurti dhe masat

JETLIR BUJA Opinione

Vetëvendosje ka merituar kritikë për diskursin e njëtrajtshëm e të ngushtë me të cilin shërbehet. Unë nuk kam ngurruar që ta kritikojë, me takatin tim. Ishte mosvet e trishtë kur shihja të njohur të ndryshëm, krejt budallenj, derisa uniformoheshin me diskursin dhe logjikën e Lëvizjes. Dhe derisa bëheshin më radikalët në atë mjedis jokritik.

Ky diskurs duhej të ndërtonte komunikim me masën. Me një shoqëri tmerrësisht të paformuar e të paarsimuar. Prandaj, duhej të ishte sa më i njëtrajtshëm, sa më i ngushtë e sa më i kuptueshëm. Dhe kësisoj, u përvetësua kollaj nga secili. E madje, duke qenë se Lëvizja Vetëvendosje e konstruktoi një imazh të papërlyeshëm e të pakorruptuar – kjo iu shërbeu shumë njerëzve që të rindreqnin imazhin e tyre individual. Më tej, iu shërbeu edhe që të ngriteshin në karrierë. Ose, të gjenin punë. Të vetëlidheshin me vargonjtë e idealeve në mënyrë që të përfitonin për veten e tyre një punë, apo ndonjë favor tjetër. Tregues i mirë për këtë është edhe numri i madh i aktivistëve që u punësuan nga Komuna e Prishtinës gjatë kohës së Shpend Ahmetit.

Amorfiteti i një pjese të madhe aktivistësh e diktoi vetë diskursin dhe aktivitetin e Lëvizjes. E vërtetë, masa u mobilizua si asnjëherë më parë përmes një thjeshtimi të diskursit – siç thoshte Albin Kurti – por, masa është asgjente e askujt. Ajo nuk ka parime të njëmendta, por interesa të njëmendta. Ajo është e korruptueshme dhe korruptuese. Si ata që ishin cullak diskursivisht, dmth militantët e PDK-së, si ata që e kishin uniformën diskursive të Vetëvendosjes. Masa bëhet e pakontrollueshme kur merr pushtet. Si jokritike, dhe e mbështjellur sipërfaqësisht me parimet e bindjet me të cilat u lëviz nga Vetëvendosje, sapo hyn në sferat e pushtetit, ajo lëvizë çlirshëm nën diktatin e amorfitetit të saj. Skandali që plasi në Vetëvendosje e tregon mjaft mirë një dukuri të tillë, e pranishme edhe në shumë lëvizje të tjera. Masa, kur mveshet me një pushtet diskursiv, me një maskë, është edhe më e çlirshme të veprojë si vetja. Të vetëimponohet. Të vetëvendoset. Masa, e cila kur fiton një vetëdije për imazhin, estetikën – operon përmes ndjelljes së neverive. E qet jashtë vetes mutin e saj. Çdo shëmti të saj. Në mënyrë që të sofistikojë maskën që ia mbulon fytyrën pa tipare, amorfe. Muti, i përdorur pezhorativisht pa fije sarkazme, është simptoma e një pamundësie të madhe, e një sëmundjeje. Sepse, masa, askush tjetër veç saj, e mbivendos veten estetikisht mbi tjetrin, dhe i përdorë neveritë si armë politike. Dhe e kërkon një lëvizje që nuk lëvizë. Ose që lëvizë, por vetëm andej kah ata e kuptojnë lëvizjen: pozitat dhe struktura; pushteti dhe njerëzit.

Nuk po e sulmoj Dardan Molliqajn. As Aida Dërgutin. Nuk e njoh asnjërin prej tyre. Sepse të dy, ashtu si shumica, ishin pjesë e atij kori të trishtë ku është e parashikueshme çdo fjalë që do të thonë. Sidoqoftë, e njoh mirë dukurinë ku amorfiteti i masave rravgon gjithçka në një parti politike. Madje, nga ky rravgim, jo vetëm në imazh, humben të gjitha trajtat përveçuese të subjektit – duke e lënë të shkrihet në tërësinë e rrëmujshme politike, e në fund, në qiellin e pamatë. Kjo ka ndodhur me Partinë Laboriste në Britani, e cila nuk ia dilte mbanë të rezononte për kollapsin financiar të vitit 2008. Të tregonte arsyet se pse ndodhi. Kujt po i ngarkohej mbi kurriz e gjithë shuma e pësimeve. Dhe të ndërtonte alternativën e saj bazuar në këto diagnoza që i takonte t’i bënte.

Në pluralizmin politik nuk ndihmon një qarkullueshmëri e përditshme diskursive e partive politike. Një luftë e pakompromis për pushtet. Në pluralizmin politik e në demokraci, partitë kanë rëndësi, për aq sa, ruajnë bërthamën e tyre identitare. E cila nuk është e thënë të jetë e ngurtë, e palëvizshme, eleatike – por e cila duhet të jetë reflektive në lëvizjet e saj, të ndërtojë njëfarë dialektike ku është e pranishme edhe inkonsistenca, si rezultat i paevitueshëm i papërkryerjes. Por, nëse lufta për pushtet e shkërmoq çdo lloj skeme, dhe nëse në fund, alternativat që zgjedhim nuk kanë dallime të mëdha, ose nëse na duhet të zgjedhim vetëm mes njerëzish – jemi përbrenda asaj që e njohim si totalitarizëm. E ndoshta, kjo ishte arsyeja pse Michel Foucault, nuk u mor aspak me dallimet mes demokracisë dhe totalitarizmit, duke u parakuptuar si të njëjta në epokën tonë. Na pëlqen të krijojmë idenë se po zgjedhim, por në fakt jemi përbrenda një deluzioni ku, dallimet janë estetike e të parëndësishme.

Padyshim, Vetëvendosjes më shumë se kurrë i duhet të çlirohet nga ngushtësia ligjërimore. Nga dogmatizmi ku është mbërthyer. Duhet t’i pranojë jopublikisht disa gabime të mëdha, disa rreshtime ose pozicione jostrategjike e inkoherente. Kjo do ta bënte më të pafuqishme masën e uniformuar rreth saj, do ta linte pa gjuhë e pa logjikë, duke i hapur rrugë kësisoj një ecjeje tepërpara. Vetëvendosje duhet të pranojë se ekziston një koncept inkoherent në themelet e saj: parimi i Vetëvendosjes. Ajo duhet të pranojë poashtu se ka përqafuar dy tipe të kundërta të luftës ndaj korrupsionit: atë të komunitetit ndërkombëtar, që në mbrojtje të sistemit që e kanë vendosur vetë, sulmojnë korrupsionin e shoqërisë dhe atë atë klasës politike; dhe njëkohshëm atë të së majtës radikale që e sulmon sistemin politiko-ekonomik. Poashtu, Vetëvendosje duhet të përcaktohet edhe për tipin e nacionalizmit që kërkon ta ndjekë: atë etatist, apo atë romantiko-organik.

Sepse, e shihni mirë sesi diskursi i Vetëvendosjes në thjeshtësinë dhe ngushtësinë e tij ka mbetur edhe i papërcaktuar në shumë pika. Ja një simptomë e pushtetit të masave brenda saj. Shohim një terren artificial, jopolitik shpurdhës të masës. Një terren që shërben për të rritur forcën e asaj që është e paformë. Dhe një ditë, kjo parti mund të përfundojë si të tjerat: duke qenë e tëra, një lëndinë e hapur gjerë e gjatë për masën dhe vetëm për masën. Për uniformen si maskë për të paformen e të paformueshmen. Kjo e ka ekspozuar partinë ndaj një rreziku të madh: pamundësisë që të fliste për zhvillim ekonomik, për funksionalitetin e mekanizmave shtetërorë dhe për lëngimin që të merret me çështje krejt triviale e shformuese. Vetëvendosje iu bashkua qorrazi kauzës së AAK-së për demarkacionin [delimitacionin] e kufirit. Por ajo në përgjithësi e shpërfilli problemin e madh të Kosovës me papunësinë dhe varfërinë. Megjithëse, në zgjedhjet e fundit, me Albin Kurtin si kandidat për kryeministër, ata bënë hapa domethënës përpara. E ndërruan qasjen, imazhin, folën edhe për zhvillimin ekonomik dhe arritën që të shtrinin mbështetjen në një masë të konsiderueshme.

Kemi parë një ndryshim të mosvetshëm për të mirë të Albin Kurtit. Ai ka folur edhe për të drejtat e njeriut. Edhe për nivelet e ndryshme diskursive që përdorë. Edhe për Pakon e Ahtisaarit dhe kontributin anësor të Vetëvendosjes, njësoj siç e kishte pasur edhe opozita sërbe në atë kohë. Edhe për zhvillimin ekonomik. Edhe për drejtësinë. Edhe për negociatat. Dhe, ndodhi ajo që pritej: përnjëherë Kurti – që e bëri Vetëvendosjen parti të qendrës [të majtë, por të qendrës], që nuk fliste më për Bashkimin Kombëtar, dhe që po e lëvizte Vetëvendosjen përpara – u bë pengesë. Unë jam i bindur se një mori njerëzish tjerë, e shohin themeluesin dhe liderin e Vetëvendosjes, pikërisht për shkak të hapave të tillë, si një armik të madh. Sepse, po, Kurti është elitist. Kurti është në thelbin e tij, armik i masave. Sepse masat, janë armiqësore ndaj ndryshuesve. Ai bën sarkazmë, poezi, thjeshtime për të.

Partitë politike në Kosovë, dhe në vende tjera me demokraci të brishtë [dhe jo vetëm] problem kryesor e kanë të ruajnë veten si të tilla, si palë politike jashtë së tërës, duke iu shmangur populizmit dhe masave. Një kolumnist i njohur, Dani Rodrik, i përkthyer nga Periskopi, thoshte që e vetmja formë për të luftuar kundër populizmit është që politikanët centristë [të qendrës] të përdorin ngapak retorikë populiste. DOMETHËNËSE! Kjo tregon se pushteti i masave është bërë i jashtëzakonshëm, dhe i pakontrollueshëm gjithandej. E vetmja formë për t’i mposhtur, është të përdoret gjuha e tyre. Por, përdorimi i gjuhës populiste të futë në populizëm – nga i cili është e zorshme të dalësh, siç tërheq vërejtjen edhe Rodrik.

Analizë e Periskopit: Lëvizjet e lëvizjes Vetëvendosje

Periskopi Editoriale

Koalicioni i bërë me AKR-në në Prishtinë para tri ditësh për zgjedhjet e balotazhit, e ndezi tërbimin e kundërshtarëve të Lëvizjes Vetëvendosje. Ata e sulmuan në pikën më të fortë të saj. E sulmuan me arsyen se po i shkelte parimet.

Poashtu, një deklaratë e deputetit dhe themeluesit të Lëvizjes, Albin Kurtit, se ‘një pjesë e diskursit ishte thjeshtuar në mënyrë që të mobilizohej masa” bëri mjaft bujë. Ky ishte arsyetimi i dhënë për disa fjalë që i kishte thënë pak më herët, se nuk do t’i çonin në burg njerëzit që kishin thënë se do t’i çonin – dhe se me këto punë merreshin institucionet përkatëse.

Për dallim nga partitë e tjera, Vetëvendosje nuk është konformiste. Ajo e kupton se shoqëria jonë është e paformë, e pakualifikuar, e paarsimuar dhe në thelb korruptuese. Nuk mund të ishte ndryshe, nëse marrim parasysh rrethanat nga të cilat doli. Dhe në këtë kontekst, është e natyrshme të bëhet një thjeshtim i gjuhës, ose në rastin tjetër, një bashkëpunim me parti më pak të korruptuara, që do të ndotnin më pak ligjërimin e saj. Është praktikisht i njëjti shërbim me vullnetin qytetar në të dyja rastet. Sepse AKR-ja ka marrë 10% të votave, pra e ka një pjesë të vullnetit qytetar. Ndërkaq, një pjesë e madhe e shoqërisë beson në vlera të ndryshme për dallim nga lëvizja. Dhe, ajo që propozohet nga këto sulme është e çuditshme: një parti politike duhet të ushtrojë pushtetin e saj, vetëm përmes njerëzve që mendojnë ekzaktësisht si ajo, dhe që kanë të njëjtën pastërti në qeverisje.

Natyrisht, në politikë është e pamundur të bësh lëvizje vazhdimisht ‘të pastërta’. Në demokraci është e domosdoshme të operosh me anë të bindjeve dhe vlerave me të cilat ushqehet shoqëria. Dhe përmes skemës politike që e ravijëzon kjo shoqëri përmes angazhimit apo mosangazhimit të saj. Në këtë kuptim, gjëja më e pakuptimtë do të ishte të kishim një parti politike, e cila do të veçohej nga rrethanat politike, dhe që nuk do të mësynte pushtetin. Në këtë pikë merr kuptim përpjekja e vazhdueshme për t’u ndotur sa më pak, me sa më shumë lëvizje. Ky është pragmatizëm. Dhe ky term, duket se është i huaj në skenën tonë politike, duke pasur aq shumë parti të paprofilizuara e të ndotura që u lidhën shpesh në koalicione krejt të panatyrshme të cilat dhanë qeverisje të dobëta.

Vetëvendosje mund të kritikohet për tjetërçka, mirëpo jo sa i përket përcaktimit ideologjik dhe parimeve. Pa këtë subjekt politik, do ta kishim të zorshme të kuptonim rëndësinë e shumçkaje që ndodhi në vendin tonë në 3-4 vitet e fundit. Vetëvendosje madje, me të drejtë u akuzua për një qasje jo-aq-liberale dikur, por tashmë që po bëhet më liberale e më pragmatike është absurde të kritikohet pse nuk mbeti e mbyllur dhe idealiste si më parë.

Është evidente se Vetëvendosje ka lëvizur nga pozicionet e saj të dikurshme. Ajo sot është më e fuqishme sa i përket mbështetjes popullore, më e sulmuar, por edhe më pragmatike.

Lëvizjet e Vetëvendosjes nuk duhen parë me llupë, në çdo skutë të Kosovës, në mënyrë që të konceptohet një ‘fitore e madhe’ duke e parë të ndotur imazhin e saj. Madje, është e çuditshme sesi vetë oponentët e Vetëvendosjes, e parakuptojnë si të pastër imazhin e saj në përpjekjen e vazhdueshme për t’i gjetur njolla. Por, Vetëvendosje nuk është krejtësisht e pastër. Nuk është një sekt religjioz që i këput ‘rrënjëjt e këqija’. Është e natyrshme të priten gabime në lëvizje nga kjo lëvizje, sepse po flasim në fund të fundit për një parti politike.

Por këtu fshihet rreziku i madh që vjen nga mënyra sesi po e projektojnë aparatet e fuqishme mediale të pushtetit. Duke dashur t’i bëjnë të tjerët që ta mendojnë Vetëvendosjen si të pagabueshme, e absolutisht të pandotur – duan që çdo gabim, e çdo ndotje të saj ta marrin si mundësi për t’i shkaktuar dëme të mëdha dhe eventualisht për ta shuar politikisht. Për ta shuar, sepse Vetëvendosje ekziston mbi parakuptimin që i ka bërë vetes, se është një parti politike thelbësisht e ndryshme nga ato të deritashmet.

Nëse është apo nuk është kështu, këtë tashmë e kemi parë.

Albin Kurti është zgjidhja e duhur për Kosovën, thotë publicisti më i njohur shqiptar

Periskopi.com Lajme

Publicisti i njohur shqiptar Fatos Lubonja ka dhënë mendimin e tij për MekuliPress, lidhur me zhvillimet në Kosovë pas zgjedhjeve të 11 qershorit.

Fatos Lubonja, ka thënë se ata që përfaqësohen nën petkun UÇK-së u mungon dituria dhe ndershmëria.

“Kosovës i duhen njerëz të ditur dhe të ndershëm, dhe kam përshtypjen atyre që përfaqësohen nën pëtkun e UÇK-së, i mungojnë që të dyja”, është shprehur Fatos Lubonja.

Në anën tjetër, Lubonja ka dhënë një këshillë për Lëvizjen Vetëvendosje e cila po pretendon të formoj institucionet.

“Albini dhe Vetëvendosja, me të vërtet duken i ndershëm, por po i’u futën aventurave nacionaliste, në vend se të ndërtojnë shtetin e së drejtës në Kosovë, më shumë do të hapin punë se do zgjidhin”, ka përfunduar Lubonja.

Zbulohet plani i Albinit kryeministër për shqiptarët e Maqedonisë (Video)

Periskopi.com Lajme

Në intervistën për LajmTV, një ditë para zgjedhjeve të 12 qershorit, kandidati i Lëvizjes Vetëvendosja Albin Kurti ka folur edhe për planet e tij për shqiptarët e Maqedonisë, nëse zgjedhet kryeministër i Kosovës.

Kurti ka paralajmëruar se do të angazhohet që Prishtina dhe Tirana zyrtare të kenë një politikë të përbashkët, me qëllim të ndërprerjes së diskriminimit të shqiptarëve në Maqedoni.

Qëndrimin e tij të plotë lidhur me këtë çështje mund ta përcillni në videon më poshtë:

Ky është fjalimi i fitores që mbajti Albin Kurti mesnatën e 11 qershorit

Periskopi.com Video

Kurti si kryeministër do të nisë hetime rreth privatizimit të KEDS-it

Periskopi.com Lajme

Albin Kurti si kryeministër do të kthejë secilin privatizim në të cilin, sipas tij, ka pasur shkelje të ligjit.

Për këtë Kurti thotë se më krijimin e qeverisë do të fillojnë hetimet.

Ish-lideri i LVV-së në një intervistë për Rubikon foli për fondin sovran. Ai theksoi se nën qeverisjen e tij nuk do të lejonte që asnjë aset të shitet tërësisht.

Negociata do të mund të bënte për shitjen e aksioneve, por assesi tërësisht, theksoi Kurti.Kurti përmendi rastin e privatizimit të KEDS-it për çka tha se do të iniciojë hetime dhe në rast se ka pasur shkelje të mjaftueshme, ai do ta kthejë.

“Ka pasur mjaftueshëm shkelje të kushtetutës e transparencës në mënyrë që të fillonte një hetim. Të shitet për 26 milionë euro. Unë do të isha në këtë rast si kryeministër me qëndrime politike të përvojës sime në politikë dhe janë pastaj juristët për të hetuar shkeljet”, ka thënë ai.

“Jemi qeveri e cila nuk do të hakmerret por nuk do ti falim krimet, nëse ka pas krime atëherë do të trajtohen”, ka thënë ai.

Albin Kurti – Adriatik Kelmendit: Mos u bëj fanatik

Periskopi.com Lajme

Albin Kurti në një intervistë ne Adriatik Kelemendin patën disa polemika.

Teksa Kelmendi e pyeste vazhdimisht për flamurin dhe Kurti nuk dëshironte të fliste gjatë për atë temë, ky i fundit e quajti Kelmendin fanatik.

Madje e citoi Churchillin i cili shpjegon fanatikun saktësisht.

“Një fanatik është dikush që s’mund ta ndryshojë mendjen dhe nuk do të ndërrojë as temë”, citoi ai Winston Churchillin.

Dhe në fund i tha se flamurin nuk e ka këto ditë ngase shtabi zgjedhor i tij ka vendosur që këto ditë ta ketë llogon #mezemër

Albin Kurti flet për bashkimin Kosovë-Shqipëri, tregon mënyrën

Periskopi.com Lajme

Lëvizje Vetëvendosje ndonëse kohë më parë e zëshme për bashkimin kombëtar, në fushatën e zgjedhjeve të 11 qershorit këtë entuziazëm e ka zbehur.

Madje kjo nuk shprehet as në 40 pikëshin qeverisës të këtij subjekti.

Albin Kurti, i nominuari për kryeministër në radhët e Vetëvendosjes, në Rubikon të KTV-së ka mohuar se ka ndryshuar qëndrim karshi bashkimit kombëtar.

Kurti ka thënë se i takon qytetarëve të vendosin nëse janë për bashkim ose jo.

“Nuk ka kuptim kurrfarë bashkimi Kosovë-Shqipëri pa Shqipërinë dhe nuk besoj që ka parti politike në Kosovë që do të mund të përshtatej më shumë me Shqipërinë. Ne jemi që ta kemi të drejtën të bashkohemi me Shqipërinë e i takon popullit të vendosë”, ka thënë ai.

Kurti në Prizren: Pas 11 qershorit do të kemi qeverinë e parë progresive në Kosovën e pasluftës

Periskopi.com Lajme

Kandidati për kryeministër, Albin Kurti, është shprehur i bindur se qytetarët e Prizrenit do të bashkohen në këtë qytet të bashkimit.

“Pas 11 qershorit nuk do të ketë më qytetarë të dëgjueshëm ndaj politikanëve, por politikanë të dëgjueshëm ndaj qytetarëve. Vetëvendosje e do shtetin e Kosovës me sovranitet, ekonominë me prodhim, gjyqësinë me drejtësi, shoqërinë me barazi, ligjet me morale dhe popullin e Kosovës me demokraci”, u ka thënë Kurti simpatizantëve të shumtë të mbledhur në palestrën “Rexhai Surroi”.

Tutje, Kurti tha se në secilën ditë të këtyre 4 viteve të fundit, por edhe të 18 viteve të pasluftës, kemi pasur “Ramazan” për qytetarët dhe “Bajram” për pushtetarët. Por, ai premtoi se me qeverisjen e VV-së kjo do të jetë anasjelltas.

“Kur politikani ndahet fizikisht dhe materialist prej qytetarëve ai e vendos interesin e veçantë mbi interesin e përgjithshëm, këtu nis korrupsioni. Politikanët e Vetëvendosje-s nuk do të pasurohen asnjëherë nga posti dhe do të jeni gjithmonë pranë dhe me popullin”, ka shtuar tutje Kurti.

Ai u zotua se me qeverisjen e VV-së do të investohen në bujqësi 240 milion euro në mandatin e parë. Si dhe u zotua se qeverisja e VV-së do ta fus tërë ekonominë brenda ligjit.

“Pas 11 qershorit do të kemi qeverinë e parë progresive në Kosovën e pasluftës”, u tha Kurti në fund qytetarëve të Prizrenit.

Në Skenderaj, Kurti tha se ky vend i ka dhënë shumë popullit, por u ndëshkua me moszhvillim

Periskopi.com Lajme

 Albin Kurti e ka filluar fjalën e tij në Skënderaj duke thënë së ky vend që i dha aq shumë popullit, Republikës dhe kombit tonë, u ndëshkua me moszhvillim.

“Vendi i punës në Kosovë është temë partiake dhe as politike dhe as ekonomike. Partia në ekonominë e pasluftës edhe të punëson edhe të shpunëson. E kanë pushtetin në program dhe s’kanë as program politik dhe ekonomik”, tha Kurti në Skënderaj.

Ai shtoi se prodhimi bujqësor, industrial dhe zejtar do të ndihmohet dhe të përkrahet nga qeveria, që të zvogëlohen importet dhe të rritet punësimi për qytetarët.

“Këta pushtetarë të deritanishëm, mbase më mirë është t’i quajmë zullumqarë. Sa janë të rinj, këta zullumqarë vjedhin me vëllazëri, kur plaken vjedhin me djemtë e tyre, edhe vëllaznitë po i lënë”, ka thënë Kurti në këtë tubim, teksa premtoi se punësimi e bizneset sipas mbiemrave marrin fund me qeverinë e VV-së.

“11 qershori është data e shpërthimit demokratik të votimit masiv”, tha Kurti po ashtu në Skenderaj.

Kurti: Qytetarët dhe i gjithë populli ynë kanë nevojë për një qeveri që nuk i sundon, por u shërben

Periskopi.com Lajme

Në fjalimin e tij para qytetarëve të Pejës në tubimin e mbajtur në këtë komunë, Kandidati për Kryeministër, Albin Kurti, tha se qytetarët e Pejës dhe mbarë Kosovës janë njerëz të mirë që nuk i kanë merituar këto qeveri të këqija.

“Qytetarët dhe i gjithë populli ynë kanë nevojë për një qeveri që nuk i sundon, por u shërben. Ne duam të qeverisim se duam të shërbejmë”, u shpreh Kurti.

Ai tha se çdo ditë e kemi parë diktaturën prej lart, por me 11 qershor do ta shohim demokracinë prej poshtë. Si dhe shtoi se më qeverisjen e Vetëvendosje-s nuk ka më as korrupsion dhe as krim, por ka demokraci dhe zhvillim, mirëqenie e punësim, zhvillim e begati.

“Në këto 18 pas luftës, Kosova ishte shtet me deklarata politikanësh, shtet i deklaruar zyrave, shtet deklarativ. Me VV vjen përmbajtja, e vërteta, e drejta, Lëvizja. Dy koalicionet që më shumë janë një koalicion në dy lista janë përvoja e hidhur e qytetarëve. Vetëvendosje është shpresa e re e këtij vendi”, shtoi tutje.

“Unë i kam dëgjuar shpesh e shumë jo pak politikanë dhe të afërm të tyre teksa ironizojnë korrupsionin në Kosovë duke thënë që korrupsion ka gjithkund edhe në Perëndim. Pasuria e vjedhur nga buxheti duhet të konfiskohet dhe do të konfiskohet”, tha po ashtu Kandidati për Kryeministër, Albin Kurti.

Ai premtoi se se me qeverinë e Vetëvendosje-s merr fund terri i krimit dhe drita e drejtësisë, duke shtuar se qeverisja e Vetëvendosje-s sjell vende pune sepse me të vjen edhe prodhimi edhe tregu për atë prodhim.

“Me 11 qershor u thoni mjaft dhe kurrë me qeverive të pasluftës. Vetëvendosje është emri i ndryshimit dhe 35 është numri i fitores’, tha ndër të tjera Kurti, duke shtuar se Lëvizja Vetëvendosje do t’i respektojë të drejtat e pakicës serbe, jo sepse e kërkon Beogradi, por se ne besojmë te respektimi i të drejtat e njeriut.

Albin Kurti u lexon fëmijëve një libër të veçantë

Periskopi.com Lajme

Albin Kurti, i cili është kandidat për kryeministër vendi nga Lëvizja Vetëvendosje, në aktivitetin e sotëm të organizuar në Prishtinë, është parë derisa u ka lexuar fëmijëve libër.

Libri të cilin Kurti po u lexonte fëmijëve, në kuadër të organizimit ‘’Prishtina Lexon’’, ishte ‘’Luli i Vocërr’’ nga Migjeni.

Ndërkohë, lideri i Vetëvendosjes, gjatë qëndrimit të tij në këtë aktivitet, ai mbajti dhe një fjalim para fëmijëve të pranishëm, derisa u tha se duhet të lexojnë për të pasur një të ardhme më të ndritur.

“Lexoni sa më shumë, se ashtu do bëheni më të mençur e më të ditur e më të suksesshëm në jetë”.

Tutje Kurti për fëmijët pati dhe një kërkesë:”Të gjithë ju që keni dy molla, ndani një për vete e një për shokun/shoqen tuaj. Por nëse keni një ndani gjysmën për vete gjysmën për shokun/ shoqen ka përfunduar Kurti”.

Kurti tregon pse u bën koalicionet

Periskopi.com Lajme

Kandidati për kryeministër nga radhët e Vetëvendosjes, Albin kurti thotë se koalicioni PDK-AAK-NISMA ishte befasi por jo befasi e madhe.

Ai tha se e kishin paralajmëruar edhe më herët se kjo do ndodh.

“Janë dy rrugë, e Vetëvendosjes ose ajo e SHIK-ut. Një ditë një takim me WIlliam Walker na u tha nga Haradinaj që mos të mos e sulmojmë njëri-tjetrin meqë ne nuk shkojmë me PDK. Kjo ndodhi 72 orë më parë. Dhe na tha që po bisedojmë me AKR-në e që ne Vetëvendosja po bisedonim që më herët”, tha ai.

Këto koalicione sipas tij, bëhen nga paniku sepse Vetëvendosje po rritet shumë.

Kurti: Arsimi i lartë do të jetë pa pagesë

Periskopi.com Lajme

I nominuari për kryeministër të Kosovës nga Lëvizja Vetëvendosje, Albin Kurti, të martën në një takim me studentë në Qendrën e studentëve në Prishtinë, tha se me ardhjen e kësaj partie në pushtet, arsimi i lartë do të jetë pa pagesë, pasi që ai nuk mund të konsiderohet luks.

Ai tha se në mandatin e parë të qeverisjes së Vetëvendosjes në gjithë Kosovën do të ndërtohen banesa sociale, si dhe do të hapen çerdhe të reja.

“Katër mijë banesa sociale do të ndërtohen gjatë mandatit të parë të qeverisjes sonë, pasi që një numër i madh i të rinjve,  thjesht e shtyjnë martesën dhe formimin e familjes, për shkak se nuk e kanë mundësinë ta braktisin banesën apo shtëpinë e prindërve të tyre dhe të dalin në një banesë të veçantë. 160 çerdhe për fëmijë nëpër krejt Kosovën, vetëm 42 çerdhe janë sipas regjistrit të MASHT. Do të pesëfishohet numri i çerdheve. Arsimi i lartë publik do të jetë pa pagesë. Nuk ka kuptim që arsimi të konsiderohet luks. Arsimi është e drejtë dhe është obligim i shtetit, që t’ua mundësojë dhe garantojë këtë gjithë rinisë sonë”, tha Kurti.

Ai u tha studentëve që të dalin më 11 qershor të votojnë, pasi që ndryshimi  tanimë është i domosdoshëm.

“Na ndajnë vetëm 12 ditë nga zgjedhjet e 11 qershorit. Katër vjet për çdo ditë pushteti vendos. Por nuk kanë çare pa e lënë një ditë për qytetarët dhe ajo është e diela e 11 qershorit, kur do të duhej që i gjithë populli e posaçërisht rinia ta shfrytëzojnë këtë të drejtë,  të votojnë masivisht dhe drejtësisht, dhe kësisoj ta mundësojnë dhe realizojnë ndryshimin që nëse ka qenë deri dje i nevojshëm, tash është i domosdoshëm”, tha Kurti.

Ai tha se arsimi duhet të lidhet me ekonominë dhe se kjo është e domosdoshme, në mënyrë që  njerëzit të kenë vende pune dhe të punojnë në profesionin e tyre.

Sipas tij çdo e teta grua në Kosovë punon dhe dy e treta e rinisë janë të papunë, derisa shumica e atyre që janë të punësuar, nuk punojnë në profesion dhe 40 për qind e rinisë që punon, nuk është me kontratë pune.

Kurti potencoi se Lëvizja Vetëvendosje është i vetmi subjekt që mund ta luftojë krimin dhe korrupsionin.

“Lëvizja Vetëvendosje është i vetmi subjekt që këtij regjimi nuk ia ka pasur as frikën, as respektin. Prandaj, ne jemi të vetmit që mund ta luftojmë krimin dhe korrupsionin”, tha Kurti.

Ndryshe, Vetëvendosje në zgjedhjet e parakohshme të 11 qershorit do të garojë e vetme.

 

Kurti tregon se ku do ta nisin fushatën dhe pse kanë zgjedhur atë qytet

Periskopi.com Lajme

I nominuari për kryeministër nga Vetëvendosje, Albin Kurti ka treguar se fushatën elektorale do ta nisin në qytetin e Gjilanit të mërkurën në orën 14:00.

Ai ka thënë se arsye se pse kanë zgjedhur Gjilanin për këtë është pasi rajoni i Anamoravës është prekur më së shumti nga decentralizimi etnik.

“Gjilani e Anamorava janë prej regjioneve të prekura më së shumti nga decentralizimi etnik. Ndaj dhe fushata jonë elektorale do të nisë me tubimin e madh në Gjilan, të mërkurën në orën 14:00”,

“Tash është momenti të punojmë për ndryshimin. Katër vjet këta nuk e pyesin popullin, e pyesin vetëm në një ditë, në ditën e zgjedhjeve. Le ta japim përgjigjen tonë atë ditë, që në 12 qershor të festojmë së bashku 12 vjetorin e VETËVENDOSJE!-s”, ka shkruar Kurti në Facebook.

Molliqaj ironizon me refuzimin e Haradinajt për pjesëmarrje në debat me Hotin dhe Kurtin

Periskopi.com Lajme

Sekretari organizativ i Vetëvendosjes, Dardan Molliqaj thotë se Haradinaj nuk ka guxim të përballet me Kurti.

Madje ai paralajmëroi një orë më parë se kjo do të ndodhte, dhe ashtu doli.

Molliqaj thotë se Haradinaj po arsyetohet se po e respekton Ligjin, por si-pas tij, nuk ka njeri që e ka shkelur ligjin më shumë se vet Haradinaj, transmeton Periskopi

Shkrimi i plotë:  

Konfirmohet ajo që e shkrova para 1 ore: Ramush Haradinaj nuk guxon të përballet me Albin Kurtin të premten në Klan Kosova.

Ai tërhiqet nga debati me arsyetimin se po e respekton ligjin për medie.

Ramush, pranoje që s’po guxon. Se për ligj, ja e ke shkelë ti ja s’di kush

Ky është postimi i parë i Albin Kurtit në Facebook (Foto)

Periskopi.com Lajme

Kandidati i Lëvizjes Vetëvendosje për deputet, Albin Kurti ka bërë edhe postimin e parë në Facebook, pas hapjes së llogarisë zyrtare ditën e djeshme.

Ai ka shkruar se në politikë shërbehet me ideal e moral, raporton Gazeta Blic.

Shënimi i plotë:

Albin Kurti e “godet” rëndë Avdullah Hotin!

Periskopi.com Lajme

Kandidati për Kryeministër të Kosovës nga radhët e Lëvizjes Vetëvendosje Albin Kurti e ka quajtur kandidatin e LDK-së kandidat të dorës se dytë apo tretë shkruan Gazeta Blic.

Ish lideri i Vetëvendosjes ka thënë që Avudallah Hoti mundet me qenë një ekonomist i mirë por jo që të bëhet edhe Kryeministër i vendit.

” Ai është i kategorisë së dytë apo tretë, mund të jetë një ekonomist i mirë, por jo për Kryeministër” tha Kurti në Speciale të KTV-së.

Po ashtu Kurti tha që kundërshtarët e fortë e bëjnë edhe garën më të fortë, por jo Avdulllah Hoti.

Fjalimi i Albin Kurtit, pas nominimit për kryeministër (Video)

Periskopi.com Lajme

Këshilli i Përgjithshëm i Vetëvendosje, i ka dhënë besimin Albin Kurtit duke e dominuar atë për kryeministër të Kosovës për zgjedhjet e 11 qershorit.

Kurti ka mbajtur një fjalim para anëtarëve të Këshillit Drejtues si dhe anëtarëve të Vetëvendosje.

“Drejtësia, zhvillimi ekonomik e demokracia e së nesërmes do ta mposhtë koalicionin e hajnave, kriminelëve e milionerëve të së djeshmes”, shkruan në faqen e kësaj partie në Facebook, ku është postuar edhe fjalimi i Kurtit – të cilin e gjeni më poshtë:

 

Flet Albin Kurti, tregon detaje nga bisedimet me LDK-në

Periskopi.com Lajme

I nominuari për kryeministër nga Vetëvendosja, Albin Kurti, ka thënë se takimet me LDK-në nuk sollën bashkëpunim sepse LDK nuk ishte e gatshme të përfshihej në listën e Vetëvendosjes, edhe pse iu ofrua shumica e numrave në listë.

Ai ka thënë se ky insistim i LDK-së për marrëveshje me Vetëvendosjen erdhi vetëm sepse u frikësua nga koalicioni PDK-AAK-Nisma, të cilin Kurti e quan “koalicion të natës”.

“Kemi qenë të gatshëm të presim zyrtarë të LDK-së që na vërshuan me telefonata se duan kompromis vetëm që të merremi vesh për t’i hequr këta. Ne ishim me ta në kohën e VLAN-it, ikën shkuan te klani Pronto. Ishim VAN-i ata ikën. Me këto koalicione të natës kur e panë se mbetën prapa kësaj listës tjetër filluan të na kontaktojnë neve. Tash ka dy lista dhe një lëvizje, që po ashtu nesër e dorëzon listën e deputetëve. Ose ne do të duhej të shkonim në listën e koalicionit të natës që u frikësua nga një koalicion tjetër i natës apo ata të vijnë në listën tonë. Ishim të hapur që shumica e vendeve të jenë nga ky koalicion, nëse e kishin me mend, por ne ishim të hapur që të vijnë në listën e Vetëvendosjes. Por nga takimi u pa që nuk pati gatishmëri të tillë”, ka thënë ai në Specialen në KTV.

Ai ka folur edhe për kandidaturën e tij për kryeministër duke u shprehur i bindur në fitore. Ka thënë se populli po kërkon ndryshim dhe këtë nuk mund ta bëjë me koalicionet që kanë udhëhequr deri tani vendin.

“Vetëvendosja dhe unë jemi gati t’i shërbejmë popullit si kryeministër. Kemi pasur rritje të jashtëzakonshme në dy vitet e fundit. Mbështetja shihet në terren dhe në matjet e opinionit publik. Edhe populli po kërkon ndryshim. Nuk duam të lejojmë ky koalicion i ndarë në dy lista të vazhdojë me zhvatje. Njerëzit po frikësohen se nuk gjejnë vende pune. Njerëzit frikësohen se fëmijët nuk po arsimohen. Njerëzit po frikësohen se shumë shpejt mund të bëhen të varfër. Është koha e fundit për të sjellë ndryshim”, tha ai.

Data e zgjedhjeve nacionale është përcaktuar 11 qershori.